سیرت المسیح، حصّہ 5، مسیح کی شخصیت اور شاگردیت کے اصول

"شمعون نے جواب میں کہا، تُو زندہ خدا کا بیٹا مسیح ہے۔ یسوع نے جواب میں اُس سے کہا، مبارک ہے تُو شمعون بریوناہ کیونکہ یہ بات گوشت اور خون نے نہیں بلکہ میرے باپ نے جو آسمان پر ہے تجھ پر ظاہر کی ہے۔ اور میں بھی تجھ سے کہتا ہوں کہ تُو پطرس ہے اور میں اِس پتھر پر اپنی کلیسیا بناﺅں گا اور عالم ارواح کے دروازے اُس پر غالب نہ آئیں گے۔ میں آسمان کی بادشاہی کی کُنجیاں تجھے دوں گا اور جو کچھ تُو زمین پر باندھے گا وہ آسمان پر بندھے گا اور جو کچھ تُو زمین پر کھولے گا وہ آسمان پر کُھلے گا۔ اُس وقت اُس نے شاگردوں کو حکم دیا کہ کسی کو نہ بتانا کہ میں مسیح ہوں۔" (انجیل بمطابق متی 16: 16- 20)

اِس حوالہ میں یوں لگتا ہے کہ جیسے یسوع اپنے اہم ترین رسول پطرس کو یہ کہہ رہے تھے: "پطرس جب تُو نے میرے وجود کی حقیقت کا اعلان ایک شخصیت میں اِنسانی مسیح اور زندہ خدا کے بیٹے کے طور پر کیا ہے تو یوں اِن مشکل حالات میں چٹان کی طرح کی اپنی مضبوطی ظاہر کی ہے۔ میں تجھے بتاتا ہوں کہ میں اِس بنیادی سچائی کی چٹان پر اپنی کلیسیا کی تعمیر کروں گا جس کا اظہار تُو نے ابھی میرے آسمانی باپ کی طرف سے ملنے والے مکاشفہ سے کیا ہے۔ دُنیا کی تمام مخالفت اور ابلیسی قوت کلیسیا کو شکست دینے کے قابل نہ ہو گی کیونکہ اِس کی بنیاد اِس سچائی پر ہے۔ میں تجھ میں اِس بڑے کام کو سرانجام دینے کی لیاقت دیکھتا ہوں جس کےلئے میں نے تجھے اختیار بخشا ہے۔ میں تجھے آسمان کی بادشاہی کی کُنجیاں دیتا ہوں تا کہ تُو اپنی گواہی سے مختلف خطوں تک نجات کے پیغام کو لے کر جانے کے قابل ہو، اور میری کلیسیا میں اُن لوگوں کو لے کر آئے جو نجات کے پیغام پر ایمان لانے سے ایمانداروں کے خاندان کا حصہ بنیں گے۔ میں تجھے نجات کے پیغام کو رد کرنے اور توبہ، ایمان اور راستبازی کو ترک کرنے والوں کےلئے ابدی سزا کا اعلان سُنانے کا بھی اختیار دیتا ہوں۔ خداوند کا رُوح تجھے میری خوشخبری کا پیغام لکھنے کی تحریک بخشے گا جس کے ذریعے یہ اختیار قائم ہو گا۔ اُن پیغامات کی توثیق آسمانی ہو گی۔ وہ ہمیشہ میری کلیسیا کےلئے راہنما ہوں گے کیونکہ اُس پیغام میں تُو اُن احکام اور انتباہات کو تحریر کرے گا جو تُو نے مجھ سے سُنے یا الہٰی تحریک سے پائے ہوں گے۔ میں نے تجھے مقرر کیا ہے کہ تُو میرے آسمانی صعود کے بعد میری نمائندگی کرے اور میرے کام کو پورا کرے۔ میں تجھے اِس غیرمعمولی کام کےلئے نبوت اور امتیاز کے رُوح کا خاص مسح بخشوں گا۔ میں تجھ پر رُوح القدس کے معجزاتی نزول کے ذریعے تجھے اپنا مصدقہ نمائندہ بناﺅں گا۔ میں تجھے بڑے معجزات کرنے کی قوت دینے سے اِس اختیار پر مہر ثبت کروں گا۔ میں تمہیں اِس کام کو سونپ رہا ہوں اور اِسے پورا کرنے کےلئے میں تمہیں تقویت بخشوں گا۔"

"پھر وہ اُن کو تعلیم دینے لگا کہ ضرور ہے کہ ابنِ آدم بہت دُکھ اُٹھائے اور بزرگ اور سردار کاہن اور فقیہ اُسے رد کریں اور وہ قتل کیا جائے اور تین دِن کے بعد جی اُٹھے۔ اور اُس نے یہ بات صاف صاف کہی۔ پطرس اُسے الگ لے جا کر اُسے ملامت کرنے لگا۔ مگر اُس نے مُڑ کر اپنے شاگردوں پر نگاہ کر کے پطرس کو ملامت کی اور کہا، اے شیطان میرے سامنے سے دُور ہو کیونکہ تُو خدا کی باتوں کا نہیں بلکہ آدمیوں کی باتوں کا خیال رکھتا ہے۔" (انجیل بمطابق مرقس 8: 31- 33)

جب پطرس رسول نے مسیح کے زندہ خدا کا بیٹا ہونے کا اقرار کیا تو یسوع نے اُسے کہا کہ اِس بارے میں ابھی کِسی کو نہ بتانا کیونکہ ابھی میرا وقت نہیں آیا۔ پھِر آپ نے پہلی مرتبہ واضح طور پر شاگردوں کو آسمان سے اپنے آنے کے مقصد کے بارے میں بتایا۔ آپ نے اُنہیں سکھانا شروع کیا کہ آپ یروشلیم میں بہت سے دُکھ سہیں گے، یہودی بزرگوں کی طرف سے رد کئے جائیں گے، پھر آپ کو قتل کیا جائے گا اور تیسرے دِن آپ جی اُٹھیں گے۔ یہ سب بتانے سے پہلے یسوع نے اِس بات کا انتظار کیا کہ وہ اُس کے تجسم کے بھید کو واضح طور پر سمجھ جائیں اور سب کے سامنے اُس کا اقرار کریں۔ مسیح کی موت کے ذریعے مخلصی کے کام کو سمجھنے کےلئے اُنہیں تجسم کو سمجھنے کی ضرورت تھی کہ وہ ایک ہی وقت میں خدا اور اِنسان دونوں ہے۔ جب تک وہ اُسے مسیح، خدا کے بیٹے اور ابنِ آدم کے طور پر نہ جانتے وہ اُس کی موت اور قیامت کے مکمل معنٰی کو سمجھ نہیں سکتے تھے۔ جو تجسم کی حقیقت کا انکار کرتا ہے وہ مخلصی کے کام کا بھی انکار کرے گا۔ جو مسیح کی الوہیت کا انکار کرتے ہیں وہ اُس کی کفارہ بخش موت کا بھی انکار کریں گے کیونکہ دونوں حقیقتیں گہرے طور پر ایک دوسرے سے مربوط ہیں۔

تاہم، یہ نیا اعلان شاگردوں کی تمام آرزوﺅں کے برعکس تھا۔ اِس لئے، پطرس خاموش نہ رہ سکا۔ وہ مسیح کو ایک طرف لے گیا اور ملامت کرنے لگا۔ کس قدر عجیب بات ہے! وہ جس نے ابھی اقرار کیا تھا کہ نہ صرف اُس کا اُستاد مسیح ہے بلکہ زندہ خدا کا بیٹا بھی ہے، وہ یہ کہتے ہوئے اپنی ہی تردید کر رہا تھا "اے خداوند خدا نہ کرے۔ یہ تجھ پر ہرگز نہیں آنے کا۔" جس بات کو پطرس نے اپنے اُستاد کےلئے محبت بھرا جذبہ سمجھا حقیقت میں وہ ایک شیطانی بات تھی۔ ابلیس ایک دھاڑتے شیر کی مانند اِس اہم رسول کا انتظار کر رہا تھا، اُس کے جلال کے وقت میں اُس پر حملہ آور ہوا اور اُسے زمین پر زخمی پچھاڑ گرایا۔ سب کامیاب لوگوں کو اِس بات سے آگاہ ہونا چاہئے کہ ابلیس اُن کی تباہی و بربادی کےلئے تباہ کن چالیں چلتا ہے۔ ہمیں یہ تنبیہ پولس رسول کے الفاظ میں بھی نظر آتی ہے: "پس جو کوئی اپنے آپ کو قائم سمجھتا ہے وہ خبردار رہے کہ گِر نہ پڑے" (نیا عہدنامہ، 1- کرنتھیوں 10: 12)۔ مردِ دانا سلیمان نبی نے کہا: "ہلاکت سے پہلے تکبُّر اور زوال سے پہلے خُودبینی ہے" (پرانا عہدنامہ، امثال 16: 18)۔

جناب مسیح اِن الفاظ سے درگزر نہیں کر سکتے تھے، اِس لئے اُنہوں نے شیطان کو جھڑکا جس نے پطرس کے ذریعے بات کی تھی۔ آپ نے اُسے سخت ملامت کی اور کہا "اے شیطان میرے سامنے سے دُور ہو۔" یسوع جو دِل کی پوشیدہ باتوں کو بھی دیکھ سکتے ہیں، اُنہوں نے دیکھا کہ پطرس کی سوچ دُنیوی شان و شوکت سے آزاد نہ تھی، اور اُسے اِس سخت تنبیہ کی ضرورت تھی۔ چونکہ پطرس ایک حقیقی شاگرد تھا اِس لئے اُس نے اِس جھڑک کو محبت میں یہ جانتے ہوئے قبول کیا کہ مسیح کی غرض صرف یہ تھی کہ اُس کا فائدہ ہو۔ سلیمان نبی نے کہا: "دانا کو ملامت کر اور وہ تجھ سے محبت رکھے گا" (پرانا عہدنامہ، امثال 9: 8); "صاحبِ فہم کو تنبیہ کر، وہ علم حاصل کرے گا" (امثال 19: 25)۔

"پھر اُس نے بھِیڑ کو اپنے شاگردوں سمیت پاس بُلا کر اُن سے کہا، اگر کوئی میرے پیچھے آنا چاہے تو اپنی خودی سے اِنکار کرے اور اپنی صلیب اُٹھائے اور میرے پیچھے ہو لے۔ کیونکہ جو کوئی اپنی جان بچانا چاہے وہ اُسے کھوئے گا اور جو کوئی میری اور اِنجیل کی خاطر اپنی جان کھوئے گا وہ اُسے بچائے گا۔ اور آدمی اگر ساری دُنیا کو حاصل کرے اور اپنی جان کا نُقصان اُٹھائے تو اُسے کیا فائدہ ہو گا؟ اور آدمی اپنی جان کے بدلے کیا دے؟" (انجیل بمطابق مرقس 8: 34- 37)

جناب مسیح نے اپنے شاگردوں کو اکھٹا کیا اور اُن تین شرائط کا ذِکر کیا جنہیں پورا کرنے کی توقع اُن افراد سے کی گئی ہے جو اُس کی پیروی کرتے ہیں:

(1) اپنی خودی کا انکار کرنا۔ اِس کا مطلب اپنی شخصیت اور زندگی کا اختیار یسوع کے سپرد کر دینا ہے۔ جب پطرس نے یسوع کا انکارکیا تو کہا "میں اُسے نہیں جانتا۔" جو کوئی سچائی سے مسیح کی پیروی کرتا ہے اور اپنی خودی کا انکار کرتا ہے وہ یہ کہتا ہے: "میں اپنے آپ کو اپنی زندگی کا مالک نہیں سمجھتا، بلکہ اِس پر مکمل اختیار خداوند کا ہے۔ میں اپنی زندگی کے تمام پہلو مسیح کے سپرد کروں گا جو مجھ سے محبت کرتا ہے۔"

(2) ہر روز اپنی صلیب اُٹھانا۔ اِس کا مطلب مسیح کی مثال کی پیروی کرنا ہے جس نے اپنی آزاد مرضی سے صلیب کو اُٹھایا۔ مسیح نے لوگوں کو گناہ اور جہنم سے بچانے کےلئے ایک مقصد کے تحت محبت کی وجہ سے صلیب کو اُٹھایا۔ مسیح کی مثال کی پیروی کرتے ہوئے صلیب اُٹھانا پوری رضامندی کے ساتھ مشکلات اور پریشانیوں کو موت کی حد تک قبول کرنا ہے۔ ہماری حتمی فکر روحوں کی نجات ہونی چاہئے۔ جس صلیب کو ہم برداشت کرتے ہیں وہ ہم پر تھوپی نہیں گئی، بلکہ اپنی چُنی ہوئی صلیب برداشت کرتے ہیں جو ہم دوسروں کی بھلائی کی خاطر اُٹھاتے ہیں۔

(3) مسیح کے پیچھے چلنا۔ اِس کا مطلب، بیزاری، شرمائے اور پیچھے مڑے بغیر مسیح کے نقشِ قدم کی دھیان سے پیروی کرنا ہے۔ وہ چرواہا ہے جو اپنی بھیڑوں کے آگے آگے چلتا ہے اور اُس کی بھیڑیں اُس کے پیچھے چلتی ہیں، اور محفوظ ہوتی ہیں۔

یسوع نے اِس بات کو واضح کیا کہ یہ تین شرائط فضل کی شریعت کی اہم سچائی پر مبنی ہیں; کہ جو سب سے پہلے اپنی سلامتی کی تمنا کرتے ہیں وہ اُسے کھو دیں گے، جبکہ جو سب سے پہلے خدمت کرنے کا چناﺅ کرتے ہیں سلامتی پائیں گے۔ جب ہماری پہلی فکر اپنے آپ کو محفوظ کرنے کی ہوتی ہے تو خداوند ہمیں محفوظ نہیں کرے گا اور ہم نقصان اُٹھائیں گے۔ لیکن اِس کے برعکس جو اپنے آپ کو بنیادی طور پر خدا تعالیٰ کی خدمت کےلئے وقف کرتا ہے اور اِس عمل میں مشکلات برداشت کرنے کےلئے تیار ہوتا ہے تو وہ خداوند خدا کی حفاظت میں ہو گا۔

پھر مسیح نے کہا: "آدمی اگر ساری دُنیا کو حاصل کرے اور اپنی جان کا نُقصان اُٹھائے تو اُسے کیا فائدہ ہو گا؟" یہاں پر مسیح اپنے سامعین سے پوچھ رہے ہیں کہ کیا تمام دُنیا کی قدر ایک انسانی جان کے برابر ہے؟ بےشک، جواب یہ ہے کہ "ایسا ناممکن ہے۔" جیسے ہی دُنیا اور اُس کی تمام دولت اور شان و شوکت ختم ہوتی ہے، تو غیرفانی جان پھر بھی باقی رہتی ہے اور اِس کی زیادہ قدر ہے۔ اُس شخص کی حماقت کس قدر بڑی ہے جو دُنیوی فائدے کے حصول کےلئے اپنی کوششوں میں رُوح کے معاملات کو نظرانداز کر دیتا ہے۔ فرض کریں وہ تمام دُنیا کو حاصل کرتا ہے اور پھِر جب اِس کے ساتھ اپنی نجات کو خریدنے کی کوشش کرتا ہے تو اُسے پتا چلتا ہے کہ اُس کے وسائل پھِر بھی ناکافی ہیں۔

مسیح نے اپنے سامعین کو تنبیہ کی کہ وہ اُس سے اور اُس کے کلام سے نہ شرمائیں۔ اگر اُس کے زمانے کی بری اور گنہگار نسل نے اُس کا انکار کیا، تو ایک دِن آئے گا جب وہ ہر ایک کو اُس کے کاموں کے مطابق بدلہ دینے کےلئے فرشتوں کے ہمراہ اپنے باپ کے جلال میں واپس آئے گا۔ تب جو اُس سے شرمائے تھے، وہ اُن سے شرمائے گا۔

پطرس، یعقوب اور یوحنا کے درمیان گفتگو کا موضوع مسیح کی نزدیکی موت تھی جس نے شاگردوں کو پریشان کر دیا۔ انجیل مُقدّس میں "موت" کےلئے یہاں جو لفظ استعمال ہوا ہے وہ ہے "انتقال"، یہی لفظ ہمیں توریت شریف میں بنی اسرائیل کی مصر کی غلامی سے موعودہ سرزمین میں جانے کےلئے ملتا ہے۔ لوقا انجیل نویس نے بیان کیا ہے کہ موسیٰ اور ایلیاہ نبی مسیح کے ساتھ اُس کے انتقال کے بارے میں بات کر رہے تھے جو یروشلیم میں واقع ہونے کو تھا (انجیل بمطابق لوقا 9: 31)۔ یوں اُس نے بیان کیا کہ مسیح کی موت اُس پر تھوپی نہیں گئی تھی بلکہ یہ اُس کا اپنا چناﺅ تھا، اِسی مقصد کے تحت وہ آیا تھا اور اِسے اُس نے پورا کرنا تھا۔

تبدیلی صورت کا واقعہ تاریخ کا وہ واحد لمحہ ہے جہاں ایک عالمگیر مسیحی کلیسیا جس کی مسیح نے بات کی ترجمانی ہوئی۔ یسوع اِس کلیسیا کا واحد سر، پہاڑ پر کھڑے ہوئے پرانے عہدنامہ کے دو بڑے راہنماﺅں سے بات کر رہا تھا جو آسمان پر پہلے سے موجود کلیسیا کی ترجمانی کر رہے تھے۔ اُن کے نزدیک ہی تین بڑے رسول نئے عہد کے وقت کے راہنما کھڑے تھے، جو اِس کلیسیا کے زمینی حصہ کی نمائندگی کر رہے تھے۔

پولس رسول نے اِس گفتگو کے موضوع اور اہمیت میں بڑا فخر محسوس کیا کیونکہ اُس نے کہا "کیونکہ میں نے یہ اِرادہ کر لیا تھا کہ تمہارے درمیان یسوع مسیح بلکہ مسیح مصلوب کے سِوا اَور کچھ نہ جانوں گا" (نیا عہدنامہ، 1- کرنتھیوں 2: 2)۔ آسمان پر فرشتے اور مُقدّسین اپنی حمد و ستایش میں مسیح کی جلالی موت کے موضوع اور اُس جلال کے شاندار تاج کا اظہار کرتے ہیں جس کےلئے باپ اُس سے محبت کرتا ہے۔ وہ جو یسوع کی کفارہ بخش موت کے بارے میں خاموشی اختیار کرتے ہیں یا اُس کا انکار کرتے ہیں، وہ اپنے آپ میں مسیح کے علم سے فائدہ نہیں پاتے اور نہ ہی اُن کے پیروکاروں کو کوئی فائدہ پہنچتا ہے، کیونکہ یسوع نے کہا: "میں تم سے سچ کہتا ہوں کہ جب تک گیہوں کا دانہ زمین میں گر کر مر نہیں جاتا اکیلا رہتا ہے لیکن جب مر جاتا ہے تو بہت سا پھل لاتا ہے" (انجیل بمطابق یوحنا 12: 24)۔

جب مسیح کے تینوں شاگرد اپنی گہری نیند سے جاگے تو غالباً مسیح نے آسمان سے آنے والے موسیٰ اور ایلیاہ نبی کے ساتھ اپنی بات چیت ختم کر دی تھی۔ اُنہوں نے فوراً دیکھا کہ اُن کا خداوند دُعا میں جھکا ہوا نہیں تھا بلکہ وہ دو اَور آدمیوں کے ساتھ موجود تھا جن کے بارے میں اُنہیں پتا تھا کہ وہ اُن کے ساتھ پہاڑ پر نہیں آئے تھے۔ دونوں جلالی انبیا کی جھلک نے اُن پر ایک گہرا اثر ڈالا کہ جیسے وہ فرشتوں کی موجودگی میں تھے۔ اُنہوں نے اپنے اُستاد کو حیرت انگیز طور پر جلالی صورت میں دیکھا، وہاں موسیٰ اور ایلیاہ بھی آسمانی جلال سے ملبس تھے۔ اَب وہ مکمل طور پر جاگ گئے تھے اور جان گئے تھے کہ وہ رویا نہیں دیکھ رہے تھے۔ سو جانے کی وجہ سے ایسے جلال کو دیکھنے کے موقع کو ہاتھ سے گنوانے پر غالباً وہ افسُردہ تھے، اور اَب موسیٰ اور ایلیاہ رُخصت ہونے کی تیاری کر رہے تھے۔ اِس لئے، ہمیں پطرس رسول پر حیرت نہیں ہوتی کہ اُس نے اپنی بےچینی میں اُنہیں وہاں سے رُخصت ہونے سے روکنے کی کوشش کی۔

ہم پہلے ہی دیکھ چکے ہیں کہ پطرس رسول نے اپنی دلیری میں مسیح کو روکنے کی کوشش کی لیکن اَب اُس نے اپنے جوش میں مسیح کے سامنے ایک منصوبہ عمل پیش کرنے کی کوشش کی۔ وہ بھول گیا تھا کہ مسیح کی سوچ اور کامل مرضی کا انتظار کرنا اُس کا فرض تھا، اور اُسے اپنی سوچ نہیں تھوپنی تھی کہ جیسے وہ اپنے اُستاد سے زیادہ عقلمند تھا۔ اُس نے رائے دی کہ وہ اور اُس کے دو ساتھی جا کر خیمے کھڑے کر دیتے ہیں، بالکل ویسے جیسے خیموں کی عید کے دوران وہ یروشلیم اور اُس کے قرب و جوار میں خیمے لگایا کرتے تھے۔

پطرس کی رائے کے جواب میں آسمانی ردعمل سامنے آیا کیونکہ ہمیں بتایا گیا ہے کہ بادِل میں سے ایک آواز آئی۔ تب شاگرد خوف سے بھر گئے اور منہ کے بل زمین پر گرے اور اُنہوں نے یہ آواز سُنی: "یہ میرا پیارا بیٹا ہے۔ اِس کی سُنو۔"

جب مسیح نے بتایا کہ وہ مصلوب کیا جائے گا تو پطرس نے اُسے ملامت کر کے کہا "اے خداوند خدا نہ کرے۔ یہ تجھ پر ہرگز نہیں آنے کا۔" لیکن جب تبدیلی صورت کے پہاڑ پر آسمان سے خدا کی آواز نے مسیح کی شخصیت اور اختیار کی گواہی دی تو کہا: "اِس کی سُنو۔" یہ ایسے تھا کہ جیسے خدا تعالیٰ شاگردوں سے کہہ رہا تھا "جو کچھ مسیح تمہیں کہہ رہا ہے قبول کرو; صلیب پہلے سے مقرر کی گئی ضرورت ہے۔"

ایک ہفتہ پہلے، مسیح نے اپنے بارے میں نہ صرف شاگردوں کی گواہی کو قبول کیا تھا کہ وہ نہ صرف ابنِ آدم ہے بلکہ ابنِ خدا بھی ہے۔ اَب خدا تعالیٰ کی آواز اِس گواہی کی تصدیق کر رہی تھی، اور جو کچھ تبدیلی صورت کے پہاڑ پر اُن کی آنکھوں نے دیکھا تھا اور اُن کے کانوں نے سُنا تھا اُسے اُن پر ثابت کر رہی تھی۔ کیا اَب شک کی کوئی گنجایش موجود تھی؟ جب اِن شاگردوں نے اِس سچائی کے بارے میں بعد میں بات کی تو اُنہوں نے اپنا مدعا اِس بےمثل واقعہ کو بنیاد بناتے ہوئے پیش کیا۔

آسمانی آواز سے شاگردوں نے ایک نہایت اہم سبق سیکھا کہ اُنہیں اِنسانی رضا کا نہیں بلکہ الٰہی رضا کا متمنی ہونا چاہئے۔ وہ سب جو الہٰی رضا پر عمل کرتے ہیں اُنہیں بڑے سے بڑے اِنسان کے غصہ کا خوف نہیں ہوتا۔ چاہے مخالفت کتنی ہی سخت کیوں نہ ہو وہ اُس سے خوفزدہ نہیں ہوتے۔ الفاظ "اِس کی سُنو" میں شاگردوں کی حوصلہ افزائی کی گئی ہے کہ وہ فقیہ، فریسیوں اور سردار کاہنوں کی نہیں بلکہ مسیح کی بات سُنیں۔ اگرچہ موسیٰ اور ایلیاہ بھی موجود تھے، لیکن الہٰی آواز نے شاگردوں کو مسیح کی بات سُننے کےلئے کہا۔ کیا یہ آسمانی آواز ہر ایک ایماندار کے کان میں نہیں سُنائی دیتی کہ صرف مسیح کی آواز کو سُنے؟ جب ایک ایماندار ایسے کرتا ہے تو یہ اُسے اِنسانی تعلیم کی پیروی کرنے سے روکے گی، سوائے اُس وقت کے کہ جب ایسی تعلیم الہٰی معلم کی تعلیم کی بازگشت ہو۔

جب یہ تینوں شاگرد زمین پر پڑے خوف کا شکار تھے، تو موسیٰ اور ایلیاہ ایک بادِل میں واپس آسمان پر لے جائے گئے کیونکہ اُن کے وہاں آنے کا مقصد پورا ہو گیا تھا۔ خدا تعالیٰ نے اِس بات کی اجازت نہ دی کہ شاگرد موسیٰ اور ایلیاہ پر زیادہ توجہ دیں جیسا کہ اُنہوں نے کیا تھا، بلکہ اُس کی آواز نے واضح طور پر کہا کہ وہ اُس کے پیارے بیٹے مسیح کی سُنیں۔ اُس آواز نے اُنہیں موسیٰ اور ایلیاہ کے بارے میں گہری سوچ میں گم ہونے پر نرمی سے جھڑکا، کیونکہ اُن کا برتاﺅ ایسا تھا کہ جیسے موسیٰ اور ایلیاہ کی موجودگی سے اُنہیں مسیح سے زیادہ فائدہ پہنچا ہے۔ یہ ایسے تھا کہ جیسے وہ آواز اُنہیں کہہ رہی تھی "تمہارے مستقبل کا انحصار اُن پر نہیں ہے جو تمہارے ساتھ نہیں ہوں گے (جیسے کہ شریعت کا دینے والا موسیٰ نبی اور بڑا نبی ایلیاہ)، بلکہ تمہارے مستقبل کا انحصار اُس پر ہے جو تمہارا مستقل ساتھی ہے اور جس کی حقیقی قدر کا اَب تک تمہیں احساس نہیں ہوا۔"

شاگردوں کو بادِل میں موسیٰ اور ایلیاہ کی غیرموجودگی کا اُس وقت تک احساس نہ ہوا جب تک کہ مسیح نے اُنہیں چھو کر یہ نہ کہا "اُٹھو۔ ڈرو مت۔" جب اُنہوں نے اوپر دیکھا تو سوائے یسوع کے اَور کِسی کو نہ دیکھا۔ وہ تجربہ کِس قدر حیرت انگیز ہوتا ہے جس میں خوف کے بعد خداوند کی طرف سے ذہنی اطمینان میسر آتا ہے۔ وہ رویا کِس قدر مبارک ہوتی ہے جو صرف مسیح پر توجہ مرکوز کرتی ہے۔اُس لمحہ پطرس، یعقوب اور یوحنا کے ساتھ ایسا ہی ہوا۔ اَب اُنہیں اُس شخصیت کے سِوا کوئی اَور نظر نہ آیا جو سب کچھ ہے، کیونکہ کِسی دوسرے کی کوئی ضرورت نہیں۔ یسوع ہماری زندگی کا واحد نجات دہندہ، درمیانی اور خداوند ہے۔

موسیٰ اور ایلیاہ نبی کو دیکھنے کے بعد اِن آدمیوں کے ذہنوں سے موت کے بعد کی زندگی کے بارے میں ہر ایک شک ختم ہو گیا۔ شاگردوں کےلئے، جنہوں نے نئی مسیحی کلیسیا کو تعلیم دینی تھی، یہ واقعہ صدوقیوں کے خلاف ایک اہم ثبوت تھا جو موت کے بعد کی زندگی اور عالم ارواح کا انکار کرتے تھے۔ شاگردوں پر واضح کیا گیا کہ وفات پانے والے ایماندار سوئے ہوئے روزِ قیامت کا انتظار نہیں کر رہے جیسا کہ کچھ لوگوں کا دعویٰ ہے، بلکہ وہ خدا تعالیٰ کے تخت کے سامنے اُس کی خدمت کرنے کےلئے تیار کھڑے رہتے ہیں۔ اِن تینوں شاگردوں نے یہ بھی سیکھا کہ ہر ایک ایماندار موت کے بعد ایک جلالی بدن پائے گا کیونکہ اُنہوں نے جلالی بدن اور زمینی بدن کا فرق واضح طور پر دیکھا۔ جلالی بدن ویسے محدودیت کا شکار نہیں ہوتا جیسے زمینی بدن ہوتا ہے۔

"اور جب کفرنحوم میں آئے تو نیم مِثقال لینے والوں نے پطرس کے پاس آ کر کہا، کیا تمہارا اُستاد نیم مِثقال نہیں دیتا؟ اُس نے کہا، ہاں دیتا ہے، اور جب وہ گھر آیا تو یسوع نے اُس کے بولنے سے پہلے ہی کہا، اے شمعون! تُو کیا سمجھتا ہے؟ دُنیا کے بادشاہ کِن سے محصول یا جِزیہ لیتے ہیں؟ اپنے بیٹوں سے یا غیروں سے؟ جب اُس نے کہا، غیروں سے، تو یسوع نے اُس سے کہا، پس بیٹے بری ہوئے۔ لیکن مبادا ہم اُن کےلئے ٹھوکر کا باعث ہوں تُو جھیل پر جا کر بنسی ڈال اور جو مچھلی پہلے نکلے اُسے لے اور جب تُو اُس کا مُنہ کھولے گا تو ایک مِثقال پائے گا۔ وہ لے کر میرے اور اپنے لئے اُنہیں دے۔" (انجیل بمطابق متی 17: 24- 27)

خداوند مسیح کافی عرصہ بعد کفرنحوم میں تشریف لائے۔ اُس وقت ہیکل میں موجود محصول لینے والے اُن کی باری کا انتظار کر رہے تھے تا کہ یسوع سے نیم مثقال کا تقاضا کریں، کیونکہ یہ محصول بائیس برس یا اُس سے بڑے ہر یہودی شخص کےلئے ادا کرنا ضروری تھا۔ ہو سکتا ہے کہ یہ تقاضا سب سے پہلے اُن راہنماﺅں کی درخواست پر کیا گیا جو چاہتے تھے کہ یسوع وہ محصول ادا کرے جو نبیوں اور مذہبی اُستادوں کو ادا نہیں کرنا ہوتا تھا، اور یوں وہ یسوع کی تذلیل کرنا چاہتے تھے۔ ہو سکتا ہے کہ وہ یہ بھی دیکھنا چاہتے ہوں کہ کیا وہ محصول ادا کرنے سے انکار کر دے گا، تا کہ اُن کے پاس اُس پر الزام لگانے کی کوئی وجہ ہو۔ یہ ممکن ہے کہ خداوند مسیح ہر سال محصول کی اِس تھوڑی سی رقم کو ادا کرتے ہوں۔ محصول لینے والے پطرس سے گھر کے باہر ملے اور اُس سے پوچھا: "کیا تمہارا اُستاد نیم مِثقال نہیں دیتا؟"

پطرس کو جواب دینے سے پہلے اپنے اُستاد سے پوچھنا چاہئے تھا کہ کیا کہے۔ اُس نے فوراً جواب دیا "ہاں دیتا ہے۔" جب وہ گھر کے اندر گیا تو مسیح نے یہ پوچھتے ہوئے اُس کی غلطی اُسے دِکھائی: "دُنیا کے بادشاہ کِن سے محصول یا جِزیہ لیتے ہیں؟ اپنے بیٹوں سے یا غیروں سے؟" پطرس نے جواب دیا "غیروں سے۔" تب مسیح نے کہا "پس بیٹے بری ہوئے۔" یوں وہ پطرس کو کہہ رہے تھے "تُو نے خود اِس بات کا اقرار کیا ہے کہ میں خدا کا بیٹا ہوں; تو پھر کیسے وہ میرے باپ کے گھر کےلئے مجھ سے محصول کا تقاضا کر رہے ہیں؟"

مسیح نے اپنے حقوق پر اصرار کئے بغیر اُنہیں بیان کرنے پر اکتفا کیا ۔اگر آپ یکسر محصول ادا کرنے سے انکار کر دیتے، تو اِس سے دوسروں کو ٹھوکر لگتی، کیونکہ سرداروں اور لوگوں نے آپ کو مسیحا کے طور پر نہیں پہچانا تھا۔ مسیح کا انکار ہیکل اور مذہب کے وقار کے خلاف ایک بےعزتی اور بغاوت تصور کیا جاتا۔ یہ محصول بزرگوں کی روایت کی وجہ سے لاگو نہیں تھا بلکہ اِس کا ماخذ موسیٰ کی شریعت تھی۔ مسیح الہٰی نوعیت کے ایسے احکام کو اُس وقت تک منسوخ کرنا نہیں چاہتا تھا جب تک کہ وہ صلیب پر اُس کے مخلصی کے کام سے پورے نہ ہو جاتے۔ اِس لئے، مسیح نے شریعت کی فرمانبرداری کی۔ ایسا کرنے میں آپ نے اپنے پیروکاروں کو ایک نمونہ دیا کہ ایسے حالات میں جن کا نتیجہ نقصان، جھگڑے یا شکوک شبہات کی صورت میں نکل سکتا ہے، اپنے حقوق پر زور نہ دیں۔ اگر لوگ صرف اپنے حقوق پر زور نہ دیں تو زیادہ تر مسائل اور لوگوں کے باہمی تنازعے کم ہو جائیں گے۔

اِس بات کا امکان ہے کہ یہوداہ اسکریوتی کے حوالے کی گئی رقم کی تھیلی اُس وقت خالی تھی۔ ہو سکتا ہے کہ جناب مسیح شریعت کی اپنی فرمانبرداری کو ایک معجزہ کے ساتھ یکجا کر کے پطرس کے ایمان کو مضبوط کرنے کے خواہشمند ہوں، اور ساتھ ہی یہ دِکھا رہے ہوں کہ آپ کا یہ عمل کمزوری کی وجہ سے نہیں تھا۔ سو، اپنے باپ کے گھر ہیکل میں اپنے آپ کو ایک بےانصافی کے تابع کرتے ہوئے، آپ اپنے باپ کے بڑے گھر میں جو فطرت ہے اپنے جائز اختیار کا اظہار کرنے کو تھے۔ آپ نے پطرس کو ایک بنسی لے کرجھیل میں ڈالنے کو کہا اور بتایا کہ جو مچھلی سب سے پہلے نکلے گی اُس کا منہ کھولنا تو اُس میں ایک مثقال پائے گا، اور پھر کہا "وہ لے کر میرے اور اپنے لئے اُنہیں دے"، غور کریں یسوع نے یہ نہیں کہا "ہم دونوں کےلئے دے" کیونکہ پطرس قانونی طور پر اِس محصول کو دینے کا ذمہ دار تھا جبکہ مسیح نہیں تھا۔ یوں، محصول کی ادائیگی رضاکارانہ طور پر آزادی کی رُوح میں ہونی تھی۔

"لیکن جو کوئی اِن چھوٹوں میں سے جو مُجھ پر ایمان لائے ہیں کِسی کو ٹھوکر کِھلاتا ہے اُس کےلئے یہ بہتر ہے کہ بڑی چکی کا پاٹ اُس کے گلے میں لٹکایا جائے اور وہ گہرے سمندر میں ڈبو دِیا جائے۔ ٹھوکروں کے سبب سے دُنیا پر افسوس ہے کیونکہ ٹھوکروں کا ہونا ضرور ہے لیکن اُس آدمی پر افسوس ہے جس کے باعث سے ٹھوکر لگے۔ پس اگر تیرا ہاتھ یا تیرا پاﺅں تُجھے ٹھوکر کھِلائے تو اُسے کاٹ کر اپنے پاس سے پھینک دے۔ ٹُنڈا یا لنگڑا ہو کر زندگی میں دِاخل ہونا تیرے لئے اِس سے بہتر ہے کہ دو ہاتھ یا دو پاﺅں رکھتا ہوا تُو ہمیشہ کی آگ میں ڈالا جائے۔ اور اگر تیری آنکھ تُجھے ٹھوکر کِھلائے تو اُسے نکال کر اپنے پاس سے پھینک دے۔ کانا ہو کر زندگی میں داخل ہونا تیرے لئے اِس سے بہتر ہے کہ دو آنکھیں رکھتا ہوا تُو آتشِ جہنم میں ڈالا جائے۔" (انجیل بمطابق متی 18: 6- 9)

یہاں یسوع ایک اَور اہم موضوع یعنی ٹھوکروں کے بارے میں بات کر رہے ہیں۔ یسوع نے پہلے ہی پہاڑ پر دیئے گئے اپنے وعظ میں اِس کا ذِکر کیا تھا، اور اَب اکیلے میں اپنے شاگردوں کے فائدہ کےلئے پھر اِس بات کو دُہرایا۔ ہیکل کا محصول ادا کرنے سے یسوع نے اپنے شاگردوں کو راہنمائی بخش کر سکھایا کہ جرم کرنے سے بچیں اور محصول ادا کریں۔ پھر یسوع نے اُنہیں نامعلوم شاگرد کو ٹھوکر پہنچانے پر جھڑکا جو مسیح کے نام میں بدرُوحوں کو نکال رہا تھا۔ اور اَب وہ یہ کہہ رہے ہیں کہ اِن چھوٹوں میں سے کِسی کو ٹھوکر کھلانے سے بہتر ہے کہ ایسا شخص سمندر میں ڈبو دیا جائے۔ بلا شک و شبہ یسوع کے نزدیک جرم نہ صرف دوسروں کے ٹھوکر کھانے اور گناہ میں گرنے کا سبب بنتا ہے بلکہ بغیر وجہ کے جھنجھلاہٹ اور اہانت کی وجہ بھی بنتا ہے۔ ایک حقیقی ایماندار کے ساتھ جو بھی شخص ایسے کرتا ہے، اُسے اِس سے بھی خوفناک نتیجہ بھگتنا پڑے گا کہ بڑی چکی کا پاٹ اُس کے گلے میں لٹکایا جائے اور وہ گہرے سمندر میں ڈبو دِیا جائے۔

اِس غرض سے کہ شاگرد یہ تاثر نہ لیں کہ اِس دُنیا میں ٹھوکریں مکمل طور پر ختم ہو سکتی ہیں، یسوع نے کہا "ٹھوکروں کا ہونا ضرور ہے۔" لیکن کیا یہ دوسروں کو ٹھوکر کھلانے کےلئے ایک بہانہ ہو سکتا ہے؟ کِسی بھی ایسی غلط فہمی کا تدارک کرنے کےلئے آپ نے فوراً یہ بھی کہا "لیکن اُس آدمی پر افسوس ہے جس کے باعث سے ٹھوکر لگے۔"

پھر مسیح نے کہا: "پس اگر تیرا ہاتھ یا تیرا پاﺅں تُجھے ٹھوکر کھِلائے تو اُسے کاٹ کر اپنے پاس سے پھینک دے۔ ... اور اگر تیری آنکھ تُجھے ٹھوکر کِھلائے تو اُسے نکال کر اپنے پاس سے پھینک دے۔" یقیناً جناب یسوع مجازی طور پر بات کر رہے تھے، کیونکہ اِن اعضا کا کاٹ دینا اُس گناہ کو ختم نہیں کرتا جو اِنسان کے دِل میں ہے; ہر گناہ سب سے پہلے دِل و دماغ میں کیا جاتا ہے۔ خدا تعالیٰ جو گناہ اور ہلاکت کے تعلق سے واحد منصف ہے، وہ ہمارے جسم کے اعضا پر نہیں بلکہ ہمارے دِل پر نگاہ کرتا ہے۔ اِن الفاظ کا مطلب یہ ہوا کہ ہر وہ چیز جو اِنسان کو گناہ کی طرف لے کر جاتی ہے اُسے دُور کرنا چاہئے، چاہے وہ اُس کے ہاتھ یا آنکھ کی طرح اُس کےلئے عزیز ہی کیوں نہ ہو۔

خالق خداوند کا اِنسانی بدن کے ہر عضو کےلئے مقصد یہ ہے کہ وہ ایک برکت اور دوسروں کی خدمت کا ایک ذریعہ ہو۔ اِسی لئے پولس رسول نے 1- کرنتھیوں 6: 19 میں ہمارے بدنوں کو "روح القدس کا مقدِس" کہا ہے۔ جو کوئی اِس بدن کو بگاڑتا یا اِس کا غلط استعمال کرتا ہے وہ اِس کے بنانے والے کی توہین کرتا ہے۔ چنانچہ یسوع نے ہمیں اپنے بدن کے اعضا کاٹنے کےلئے نہیں کہا بلکہ یہ کہا ہے کہ ہم اُن کا خیال رکھیں اور اُنہیں اپنے خداوند کی خدمت کرنے کےلئے مخصوص کریں۔ یقیناً یہ خدمت اُس فرد کےلئے ناممکن ہو جائے گی جو اپنے اعضا کو کاٹ ڈالے گا۔

پھر مسیح نے کہا ہر کوئی جو دوسرے کو ٹھوکر کھلاتا ہے جہنم کی آگ میں ڈالے جانے کے خطرہ میں ہے جہاں نہ کیڑا مرتا ہے اور نہ آگ بجھتی ہے۔ یہ الفاظ ڈرانے کےلئے نہیں تھے بلکہ محبت کرنے والے خداوند کے منہ سے خبرداری اور تنبیہ تھے جو ہمیں اِس خطرناک ابدی سزا سے بچانے کےلئے آسمان سے آیا۔ مسیح نے ہمیں جہنم کے بارے میں اِس لئے بتایا ہے کیونکہ آپ چاہتے ہیں کہ ہم توبہ کرنے اور باپ کے پاس آنے سے ہلاکت سے بچ جائیں۔

"خبردار اِن چھوٹوں میں سے کِسی کو ناچیز نہ جاننا کیونکہ میں تم سے کہتا ہوں کہ آسمان پر اُن کے فرشتے میرے آسمانی باپ کا مُنہ ہر وقت دیکھتے ہیں۔ کیونکہ ابنِ آدم کھوئے ہوﺅں کو ڈھونڈنے اور نجات دینے آیا ہے۔ تم کیا سمجھتے ہو؟ اگر کِسی آدمی کی سو بھیڑیں ہوں اور اُن میں سے ایک بھٹک جائے تو کیا وہ ننانوے کو چھوڑ کر اور پہاڑوں پر جا کر اُس بھٹکی ہوئی کو نہ ڈھونڈے گا؟ اور اگر اَیسا ہو کہ اُسے پائے تو میں تم سے سچ کہتا ہوں کہ وہ اُن ننانوے کی نِسبت جو بھٹکی نہیں اِس بھیڑ کی زیادہ خوشی کرے گا۔ اِسی طرح تمہارا آسمانی باپ یہ نہیں چاہتا کہ اِن چھوٹوں میں سے ایک بھی ہلاک ہو۔" (انجیل بمطابق متی 18: 10- 14)

مسیح نے اپنے شاگردوں کو تنبیہ کی کہ اُن لوگوں کو تحقیر کی نظر سے نہ دیکھیں جو غیراہم معلوم ہوتے ہیں کیونکہ خدا تعالیٰ اُن کی فکر کرتا ہے۔ یقیناً وہ اپنے فرشتوں کے ذریعے اُن کی حفاظت کرتا ہے۔ لوگوں کے پاس کیا حق ہے کہ وہ اُن کو حقارت کی نظر سے دیکھیں جن کے فرشتے ہر وقت خدا کا چہرہ دیکھتے ہیں؟ مسیح نے یہ کہتے ہوئے واضح کیا کہ اُس کی نجات میں سب بچے شامل ہیں: "تمہارا آسمانی باپ یہ نہیں چاہتا کہ اِن چھوٹوں میں سے ایک بھی ہلاک ہو۔" اِس سے مسیح کی مراد نہ صرف وہ ہیں جو عمر میں چھوٹے ہیں بلکہ اِس میں بچوں کے سے دِل کے حامل لوگ بھی شامل ہیں، خاص کر جو ایذارسانی کا شکار ہیں یا جو تضحیک کا نشانہ بننے کو ہیں۔

اپنے لقب "ابنِ آدم" کو استعمال کرتے ہوئے مسیح نے آسمان پر سے اپنے آنے کے مقصد کے بارے میں ایک خوبصورت بات کہی: "ابنِ آدم کھوئے ہوﺅں کو ڈھونڈنے اور نجات دینے آیا ہے۔" آپ نے اپنے کام کو اُس شخص کے کام سے تشبیہ دی جو اپنی ننانوے بھیڑوں کو جو کھوئی نہیں چھوڑ کر اُس ایک کی تلاش میں نکل پڑتا ہے جو کھو چکی ہوتی ہے۔ جب وہ اُسے ڈھونڈ لیتا ہے تو ننانوے بھیڑوں کی نسبت اُس کی وجہ سے زیادہ خوش ہوتا ہے۔ سچ مچ، خدا تعالیٰ کو اُن سب لوگوں کی نسبت جو توبہ کی حاجت نہیں رکھتے، ایک گنہگار کی توبہ کے باعث زیادہ خوشی ہوتی ہے، اور یہ بات اِنسانی اِدراک سے پرے ہے کیونکہ اُس کی سوچیں ہماری سوچیں نہیں ہیں۔

"اگر تیرا بھائی تیرا گناہ کرے تو جا اور خلوت میں بات چیت کر کے اُسے سمجھا۔ اگر وہ تیری سُنے تو تُو نے اپنے بھائی کو پا لیا۔ اور اگر نہ سُنے تو ایک دو آدمیوں کو اپنے ساتھ لے جا، تا کہ ہر ایک بات دو تین گواہوں کی زبان سے ثابت ہو جائے۔ اگر وہ اُن کی سُننے سے بھی اِنکار کرے تو کلیسیا سے کہہ اور اگر کلیسیا کی سُننے سے بھی اِنکار کرے تو تُو اُسے غیرقوم والے اور محصول لینے والے کے برابر جان۔ میں تم سے سچ کہتا ہوں کہ جو کچھ زمین پر باندھو گے وہ آسمان پر بندھے گا اور جو کچھ تم زمین پر کھولو گے وہ آسمان پر کُھلے گا۔ پھِر میں تم سے کہتا ہوں کہ اگر تم میں سے دو شخص زمین پر کِسی بات کےلئے جِسے وہ چاہتے ہوں اِتفاق کریں تو وہ میرے باپ کی طرف سے جو آسمان پر ہے اُن کےلئے ہو جائے گی۔ کیونکہ جہاں دو یا تین میرے نام پر اِکھٹے ہیں وہاں میں اُن کے بیچ میں ہوں۔" (انجیل بمطابق متی 18: 15- 20)

اِن آیات میں مسیح نے کلیسیا میں ایمانداروں کے مابین ہونے والے ایک اَور اہم معاملہ کے بارے میں بات کی ہے، جو یہ ہے کہ ایک ایماندار اُس وقت کیسا برتاﺅ کرے ہے جب اُس کا بھائی اُس کے خلاف گناہ کرے؟ سب سے پہلے وہ اُس کے ساتھ جھگڑا نہ کرے بلکہ اپنے آپ کو غصہ سے بچائے رکھے۔ پھر اُسے برادرانہ محبت قائم رکھتے ہوئے اُس بات کو پھیلنے سے روکنا چاہئے تا کہ اصلاح کا عمل مشکل نہ ہو جائے۔ اُسے گناہ کرنے والے بھائی کے پاس اکیلے میں جا کر اِس اُمید میں مہربانی سے تمام معاملہ کی وضاحت کرنی چاہئے کہ وہ غصہ میں بےقابو نہیں ہو جائے گا۔ اکثر جب گناہ کرنے والا شخص محبت اور اطمینان کے رویہ کو دیکھتا ہے تو وہ شرمندہ ہو جاتا ہے۔ یوں اُس کی گناہ کو ترک کرنے کی طرف راہنمائی ہوتی ہے اور وہ معاملہ کو درست کرنے کی کوشش کرتا ہے۔ اِس وجہ سے یسوع نے فرمایا: "اگر وہ تیری سُنے تو تُو نے اپنے بھائی کو پا لیا۔"

تاہم، اگر گنہگار شخص اپنے بھائی کے خلاف اپنے دِل کو سخت کرتا ہے، نہ شرم محسوس کرتا ہے اور نہ توبہ کی حاجت سمجھتا ہے، تو ایک چھوٹے گروہ کو دونوں کے مابین درمیانی کے طور پر کام کرتے ہوئے مسئلہ کے حل کی کوشش کرنی چاہئے۔ لیکن اگر یہ اچھی کوشش ناکام ہو جاتی ہے تو تمام قضیہ کو کلیسیا کے پاس لے جانا چاہئے تا کہ وہ تحقیق کرے اور گنہگار کو سُدھارنے کی کوشش کرے۔ یہ طریقہ بہت مفید ہے، کیونکہ اِس سے گنہگار شخص کی توبہ کرنے کی طرف مدد ہوتی ہے۔ مگر جب وہ کلیسیا کی بات بھی سُننے سے انکار کرے تو جس کے خلاف گناہ ہوا ہو اُسے حق حاصل ہے کہ وہ اُس سے اجتناب برتے اور اُسے اپنا بھائی نہ سمجھے کیونکہ اُس نے اپنے کردار سے ثابت کر دیا ہوتا ہے کہ اُس میں مسیحی محبت کی بنیادی خوبی موجود نہیں ہے۔

"اُس وقت پطرس نے پاس آ کر اُس سے کہا اے خداوند اگر میرا بھائی میرا گناہ کرتا رہے تو میں کتنی دفعہ اُسے معاف کروں؟ کیاسات بار تک؟ یسوع نے اُس سے کہا میں تُجھ سے یہ نہیں کہتا کہ سات بار بلکہ سات دفعہ کے ستر بار تک۔" (انجیل بمطابق متی 18: 21- 22)

یہودی شریعت کے مطابق ایک فرد دوسرے کے گناہ کو تین مرتبہ معاف کر سکتا تھا لیکن اگر گنہگار باز نہ آتا تو وہ اُسے مسلسل معاف کرنے کا پابند نہیں تھا۔ پطرس رسول نے یہ محسوس کرتے ہوئے کہ مسیح کی شریعت فیاضی پر مبنی ہے، پوچھا کہ "اگر میرا بھائی میرا گناہ کرتا رہے تو میں کتنی دفعہ اُسے معاف کروں؟ کیاسات بار تک؟" یوں لگتا ہے جیسے اُس نے سوچا کہ ایک فرد سے زیادہ سے زیادہ سات مرتبہ معاف کرنے کی توقع ہو گی اور یوں وہ بڑی فراخدلانہ سوچ کا مظاہرہ کر رہا تھا۔ لیکن یسوع کا یہ جواب سُن کر اُسے کس قدر شرمندگی محسوس ہوئی ہو گی کہ "سات دفعہ کے ستر بار تک۔" ایسا کہنے سے یسوع کا مطلب تھا کہ معافی کی کوئی حد نہیں ہے۔

یہ بات عملی طور پر کس قدر مشکل ہے! کیونکہ انسانی فطرت اِس طرح سے معاف نہیں کر سکتی، اِس کےلئے الہٰی فضل کی مدد کی ضرورت ہے۔ رُوح القدس جو پہلی مرتبہ دِلی معافی کی طرف لے کر جاتا ہے، وہی دوسری مرتبہ بھی ایسا کرنے کی راہنمائی بخشتا ہے اور پھر اِس کے بعد بھی معاف کرنے کے قابل بناتا ہے۔ یہ بات خاص کر اِس لحاظ سے سچ ہے کہ جو فرد ایک مرتبہ معاف کرتا ہے وہ بار بار ایسا کرنے کےلئے تقویت پاتا ہے۔ اِس کے برعکس، جو سویں مرتبہ بھی معاف نہیں کر سکتا وہ یہ دِکھاتا ہے کہ اُس کی پہلی معافی حقیقی مسیحی رُوح میں نہیں تھی۔ ہر وہ فرد جو خدا تعالیٰ کی معافی کا احساس رکھتا ہے، اگر اُس کے خلاف اُس کے بھائی نے کتنا ہی بڑا گناہ کیوں نہ کیا ہو، ممکن نہیں کہ وہ اُسے معاف نہ کر سکے۔

"پس آسمان کی بادشاہی اُس بادشاہ کی مانند ہے جس نے اپنے نوکروں سے حساب لینا چاہا۔ اور جب حساب لینے لگا تو اُس کے سامنے ایک قرض دار حاضر کیا گیا جس پر اُس کے دس ہزار توڑے آتے تھے۔ مگر چونکہ اُس کے پاس ادا کرنے کو کچھ نہ تھا اِس لئے اُس کے مالک نے حکم دیا کہ یہ اور اِس کی بیوی بچے اور جو کچھ اِس کا ہے سب بیچا جائے اور قرض وصول کر لیا جائے۔ پس نوکر نے گِر کر اُسے سجدہ کیا اور کہا اے خداوند مجھے مہلت دے۔ میں تیرا سارا قرض ادا کروں گا۔ اُس نوکر کے مالک نے ترس کھا کر اُسے چھوڑ دیا اور اُس کا قرض بخش دیا۔ جب وہ نوکر باہر نکلا تو اُس کے ہمخدمتوں میں سے ایک اُس کو ملا جس پر اُس کے سو دینار آتے تھے۔ اُس نے اُس کو پکڑ کر اُس کا گلا گھونٹا اور کہا جو میرا آتا ہے ادا کر دے۔ پس اُس کے ہمخدمت نے اُس کے سامنے گِر کر اُس کی مِنّت کی اور کہا مُجھے مہلت دے۔ میں تُجھے ادا کر دوں گا۔ اُس نے نہ مانا بلکہ جا کر اُسے قیدخانہ میں ڈال دیا کہ جب تک قرض ادا نہ کر دے قید رہے۔ پس اُس کے ہمخدمت یہ حال دیکھ کر بہت غمگین ہوئے اور آ کر اپنے مالک کو سب کچھ جو ہوا تھا سُنا دیا۔ اِس پر اُس کے مالک نے اُس کو پاس بُلا کر اُس سے کہا اے شریر نوکر! میں نے وہ سارا قرض تُجھے اِس لئے بخش دیا کہ تُو نے میری مِنّت کی تھی۔ کیا تُجھے لازم نہ تھا کہ جیسا میں نے تُجھ پر رحم کیا تُو بھی اپنے ہمخدمت پر رحم کرتا؟ اور اُس کے مالک نے خفا ہو کر اُس کو جلّادوں کے حوالہ کیا کہ جب تک تمام قرض ادا نہ کر دے قید رہے۔ میرا آسمانی باپ بھی تمہارے ساتھ اِسی طرح کرے گا اگر تم میں سے ہر ایک اپنے بھائی کو دِل سے معاف نہ کرے۔" (انجیل بمطابق متی 18: 23- 35)

شاگردوں کو اِس بات کے ممکن ہونے کے بارے میں قائل کرنے کےلئے اِس مشکل اصول کی بنیاد کی وضاحت کرنا ضروری تھا۔ یسوع نے اِس بات کو معاف نہ کرنے والے نوکر کی مثال کے ذریعے واضح کیا۔ باوجود کہ اِس شخص کے مالک نے اُس کے ذمے واجب الادا ایک بہت بڑا قرض معاف کر دیا، لیکن اُس نے اپنے ہمخدمتوں میں سے ایک کے ذمہ آنے والے چھوٹے سے قرض کو معاف نہ کیا بلکہ اُسے گرفتار کر کے قید میں ڈال دیا۔ جب دوسروں نے اِس بارے میں سُنا تو اُنہوں نے یہ تمام ماجرا اُس شخص کے مالک کو بتایا جو یہ سب سُن کر بہت غصے ہوا۔ اُس نے معاف نہ کرنے والے نوکر کو بلوایا اور رحم نہ کرنے پر اُسے جھڑکا اور پھر جلّادوں کے حوالہ کیا کہ جب تک تمام قرض ادا نہ کر دے قید رہے۔ قیدخانہ میں رہتے ہوئے اُس کےلئے دس ہزار توڑے قرض ادا کرنے کا امکان بہت کم تھا۔

اِس تمثیل میں مسیح نے خدا تعالیٰ کو ایک مالک کے ساتھ اور گنہگاروں کو قرضداروں کے ساتھ تشبیہ دی ہے۔ چونکہ ایک گنہگار کا خدا کے ذمہ قرض بہت بڑا ہے، اِس لئے اُس کےلئے اُس قرض کو ادا کرنا ناممکن ہے۔ لیکن خدا تعالیٰ اپنے رحم اور مسیح کے کفارہ بخش کام کی بنیاد پر بڑے سے بڑے گنہگار کو بھی اُس وقت معاف کر دیتا ہے جب وہ اپنے گناہ کا اقرار کرتا ہے، رحم کا طلبگار ہوتا ہے اور نئی زندگی گزارنے کا چناﺅ کرتا ہے۔ ایک شخص کا اپنے ساتھی انسان کے ذمہ قرض اُس وقت معمولی لگتا ہے جب اُس کا موازنہ اُس قرض سے کیا جائے جو ایک شخص کو خدا کے حضور ادا کرنا ہوتا ہے۔ جب ایک شخص خدا کی معافی حاصل کرتا ہے تو اُسے کوئی حق حاصل نہیں کہ وہ اپنے خلاف گناہ کرنے والے کسی فرد کو معاف نہ کرے چاہے وہ اُس کے خلاف کتنی ہی مرتبہ گناہ کیوں نہ کرے۔ اُسے اپنے بھائی سے ملے اور اُس کی سُنے بغیر کوئی بھی فیصلہ کرنے کا حق حاصل نہیں ہے۔ یہ بھی ہو سکتا ہے کہ اُس کے بھائی نے غیر ارادی طور پر گناہ کیا ہو یا پھر اُس پر بہتان باندھا گیا ہو۔ پطرس کے سوال کے ردعمل میں مسیح نے جو بیان دیا وہ کس قدر حواس گم کردینے والا ہے: "میرا آسمانی باپ بھی تمہارے ساتھ اِسی طرح کرے گا اگر تم میں سے ہر ایک اپنے بھائی کو دِل سے معاف نہ کرے۔"

خداوند کی سکھائی ہوئی دُعا میں ہمارے سامنے نفرت کو دِل میں جگہ نہ دینے کا ایک ثبوت موجود ہے: "اور جس طرح ہم نے اپنے قرضداروں کو معاف کیا ہے تُو بھی ہمارے قرض ہمیں معاف کر" (انجیل بمطابق متی 6: 12)۔ ایک بےگناہ شخص کو قصوروار کا انتظار نہیں کرنا چاہئے کہ وہ آئے اور معافی طلب کرے بلکہ اُسے اِس حکم کے مطابق صلح صفائی کرنے میں پہل کرنی چاہئے: "اگر تیرا بھائی تیرا گناہ کرے تو جا اور خلوت میں بات چیت کر کے اُسے سمجھا۔ اگر وہ تیری سُنے تو تُو نے اپنے بھائی کو پا لیا" (انجیل بمطابق متی 18: 15)۔ ایسا کرنے سے وہ مسیح کی مانند ہو گا جس نے اِس بات کا انتظار نہیں کیا کہ پہلے گنہگار اُس کے پاس آئیں اور توبہ کریں بلکہ آسمان سے "کھوئے ہوﺅں کو ڈھونڈنے اور نجات دینے آیا ہے" (انجیل بمطابق متی 18: 11)۔

"اِن باتوں کے بعد خداوند نے ستر آدمی اَور مقرر کئے اور جس جس شہر اور جگہ کو خود جانے والا تھا، وہاں اُنہیں دو دو کر کے اپنے آگے بھیجا۔ اور وہ اُن سے کہنے لگا کہ فصل تو بہت ہے لیکن مزدور تھوڑے ہیں اِس لئے فصل کے مالک کی مِنّت کرو کہ اپنی فصل کاٹنے کےلئے مزدور بھیجے۔ جاﺅ۔ دیکھو میں تم کو گویا برّوں کو بھیڑوں کے بیچ میں بھیجتا ہوں۔ نہ بٹوا لے جاﺅ نہ جھولی نہ جوتیاں اور نہ راہ میں کِسی کو سلام کرو۔ اور جس گھر میں داخل ہو پہلے کہو کہ اِس گھر کی سلامتی ہو۔ اگر وہاں کوئی سلامتی کا فرزند ہو گا تو تمہارا سلام اُس پر ٹھہرے گا نہیں تو تم پر لوٹ آئے گا۔ اُسی گھر میں رہو اور جو کچھ اُن سے ملے کھاﺅ پیو کیونکہ مزدور اپنی مزدوری کا حقدار ہے۔ گھر گھر نہ پھرو۔ اور جس شہر میں داخل ہو اور وہاں کے لوگ تمہیں قبول کریں تو جو کچھ تمہارے سامنے رکھا جائے کھاﺅ۔ اور وہاں کے بیماروں کو اچھا کرو اور اُن سے کہو کہ خدا کی بادشاہی تمہارے نزدیک آ پہنچی ہے۔ لیکن جس شہر میں داخل ہو اور وہاں کے لوگ تمہیں قبول نہ کریں تو اُس کے بازاروں میں جا کر کہو کہ ہم اِس گرد کو بھی جو تمہارے شہر سے ہمارے پاﺅں میں لگی ہے تمہارے سامنے جھاڑے دیتے ہیں مگر یہ جان لو کہ خدا کی بادشاہی نزدیک آ پہنچی ہے۔ میں تم سے کہتا ہوں کہ اُس دِن سدوم کا حال اُس شہر کے حال سے زیادہ برداشت کے لائق ہو گا۔" (انجیل بمطابق لوقا 10: 1- 12)

اِس میں کوئی شک نہیں کہ لوگوں کی ایک بڑی تعداد نے شاگردوں کے طور پر یسوع کی پیروی کی۔ اُن میں ستر آدمی شامل تھے جنہیں دو دو کر کے بھیجا گیا تھا۔ جیسے مسیح نے بارہ شاگردوں کے ساتھ کیا تھا، ویسے ہی اُنہیں بھی مختلف گاﺅں اور شہروں میں منادی کرنی، تعلیم اور شفا دینی تھی۔ اُنہیں دو دو کر کے بھیجنا زیادہ موثر ہونا تھا کیونکہ ایک دوسرے کی حوصلہ افزائی کر سکتا تھا، وہ باری باری منادی اور خدمت کر سکتے تھے۔ دو سے زیادہ افراد میزبانوں پر بھی بوجھ ہوتے اور اُن کے منادی کرنے کے مواقع کم ہونے تھے۔ بیماریوں سے شفا دینے کی قوت ہونے سے، وہ لوگوں کے اعتماد اور اُلفت کو حاصل کرتے ہوئے اُن کی توجہ کو کھینچ سکتے تھے۔ یوں وہ سب کی دنیوی اور رُوحانی بھلائی کےلئے اپنے خداوند کی فکر کا اظہار کر سکتے تھے۔ وہ بادشاہی کے کلام کو پھیلا سکتے تھے جو اَب نزدیک تھا اور بادشاہ کے بارے میں بتا سکتے تھے جس نے اُنہیں اپنے نمائندوں کے طور پر بھیجا تھا۔

یسوع نے اِن ستر آدمیوں کی ویسے ہی نصیحت اور ہدایات دیں جیسے بارہ شاگردوں کو دی تھیں۔ تاہم، وقت کی کمی کی وجہ سے یہ بھی کہا کہ راہ میں کسی کو سلام نہ کرو۔ مشرق وسطیٰ کے علاقے کے لوگ سلام دُعا لیتے ہوئے بات چیت میں کافی وقت صرف کرتے ہیں۔ مزید برآں، یسوع نے اُنہیں مشورہ دیا کہ جو کچھ اُن کے آگے رکھا جائے وہ بغیر کسی سوال کے کھائیں۔ یہ باتیں ستر شاگردوں اور اُن افراد کے درمیان ایک رکاوٹ ہو سکتی تھیں جو اُنہیں اپنے گھروں میں قبول کرتے۔ پھر یسوع نے اپنی بات کی تائید میں کہا "مزدور اپنی مزدوری کا حقدار ہے..."۔

"وہ ستر خوش ہو کر پھِر آئے اور کہنے لگے اے خداوند تیرے نام سے بدرُوحیں بھی ہمارے تابع ہیں۔ اُس نے اُن سے کہا میں شیطان کو بجلی کی طرح آسمان سے گرا ہوا دیکھ رہا تھا۔ دیکھو میں نے تم کو اختیار دیا کہ سانپوں اور بچھوﺅں کو کچلو اور دشمن کی ساری طاقت پر غالب آﺅ اور تم کو ہرگز کِسی چیز سے ضرر نہ پہنچے گا۔ تو بھی اِس سے خوش نہ ہو کہ رُوحیں تمہارے تابع ہیں بلکہ اِس سے خوش ہو کہ تمہارے نام آسمان پر لکھے ہوئے ہیں۔" (انجیل بمطابق لوقا 10: 17- 20)

زیادہ امکان یہ ہے کہ شاگردوں کا یہ گروہ بتدریج واپس لوٹا۔ لیکن وہ سب خوش و خرم اور حیران واپس آئے۔ جو اختیار مسیح نے اُنہیں دیا تھا، اُس میں غالباً بدرُوحوں کو نکالنا شامل نہیں تھا، لیکن جب اُنہوں نے ایسا کیا اور کامیاب ہوئے تو وہ بہت خوش ہوئے۔ جب وہ اپنے بھیجنے والے کے پاس آ کر اپنی کارگزاری بیان کر رہے تھے تو اُس میں یہ کامیابی سب سے نمایاں تھی، اِسی لئے اُنہوں نے یسوع سے کہا "اے خداوند تیرے نام سے بدرُوحیں بھی ہمارے تابع ہیں۔"

یہ کامیابی اُنہیں خدا کے نام کی نسبت مسیح کے نام میں کیوں ملی؟ اگر مسیح حقیقتاً رُوح میں اُن کے ساتھ موجود نہ ہوتا تو محض ایک نام میں کیا اثر ہو سکتا تھا؟

مسیح نے جواب میں اِس حقیقت کی طرف نشاندہی کی کہ اُن کی کامیابی، شیطان کو اُس کے غرور کی وجہ سے آسمان سے گرانے کے الہٰی عمل کی وجہ سے تھی۔ یوں گویا مسیح اُن سے کہہ رہے تھے کہ "تم نے کچھ سپاہیوں کی شکست کو دیکھا ہے، لیکن میں نے اُن کے کماندار کی شکست اور گراوٹ، اُس کی حتمی شکست کو دیکھا ہے۔" مسیح ابلیس کو قیدی بنائے گا جس نے ہمیشہ انسانوں کو غلام بنایا اور بگڑی ہوئی فطرت اور قابل نفرت عادات کی بیڑیوں سے اُنہیں جکڑا ہے۔ انجیل بمطابق یوحنا 16: 11 میں مرقوم شیطان کے نام "دُنیا کا سردار" سے ہم اُس کی بادشاہی کو پہچانتے ہیں، اور جب اُسے نئے عہدنامہ میں افسیوں 2: 2 میں ہوا کی عملداری کا حاکم کہا گیا ہے تو اِس سے ہمیں اُس کی جائے سکونت کے بارے میں پتا چلتا ہے۔ اِسی طرح نئے عہدنامہ میں کلسیوں 1: 13 میں مرقوم اُس کے دائرہ اثر سے متعلق "تاریکی کے قبضہ" کے الفاظ سے ہمیں اُس کے کاموں کی نوعیت سمجھ میں آتی ہے، اور افسیوں 2: 2 کے الفاظ "نافرمانی کے فرزندوں" سے ہمیں اُن لوگوں کا رویہ نظر آتا ہے جو اُس کے پیروکار ہیں۔

یسوع نے کہا: "اُس دِن بہتیرے مجھ سے کہیں گے اے خداوند اے خداوند! کیا ہم نے تیرے نام سے نبوت نہیں کی اور تیرے نام سے بدرُوحوں کو نہیں نکالا اور تیرے نام سے بہت سے معجزے نہیں دِکھائے؟ اُس وقت میں اُن سے صاف کہہ دوں گا کہ میری کبھی تم سے واقفیت نہ تھی۔ اے بدکارو میرے پاس سے چلے جاﺅ" (انجیل بمطابق متی 7: 22- 23)۔ کیا اُنہوں نے اِس بات کا احساس نہیں کیا تھا کہ اُن کی حقیقی کامیابی بدرُوحوں کے نکالنے میں نہیں تھی، جس سے غالباً وہ مغرور بن سکتے تھے کیونکہ اُنہیں یہ اپنے کاموں کا نتیجہ محسوس ہونا تھا؟ تاہم، حقیقی کامیابی اِس بات میں تھی کہ اُن کے نام آسمان پر لکھے تھے جو خدا تعالیٰ کا کام اور اُس کے فضل کی مفت بخشش ہے۔ مبارک ہیں وہ جنہیں خداوند مسیح اِس حقیقت کی تصدیق فراہم کرتے ہیں کہ اُن کے نام کتابِ حیات میں لکھے ہوئے ہیں۔ کیا محض ایک اِنسان کو یہ حق حاصل ہے کہ وہ لوگوں کو بتائے کہ اُن کے نام آسمان پر لکھے ہیں؟ کیا اِس سے ہمیں واضح طور پر یہ نہیں پتا چلتا کہ مسیح ابنِ آدم اور ابنِ خدا دونوں ہے؟

"اُسی گھڑی وہ رُوح القدس سے خوشی میں بھر گیا اور کہنے لگا اے باپ آسمان اور زمین کے خداوند! میں تیری حمد کرتا ہوں کہ تُو نے یہ باتیں داناﺅں اور عقلمندوں سے چھپائیں اور بچوں پر ظاہر کیں۔ ہاں اے باپ کیونکہ ایسا ہی تجھے پسند آیا۔ میرے باپ کی طرف سے سب کچھ مجھے سونپا گیا اور کوئی نہیں جانتا کہ بیٹا کون ہے سِوا باپ کے اور کوئی نہیں جانتا کہ باپ کو ن ہے سِوا بیٹے کے اور اُس شخص کے جس پر بیٹا اُسے ظاہر کرنا چاہے۔ اور شاگردوں کی طرف متوجہ ہو کر خاص اُن ہی سے کہا مبارک ہیں وہ آنکھیں جو یہ باتیں دیکھتی ہیں جنہیں تم دیکھتے ہو۔ کیونکہ میں تم سے کہتا ہوں کہ بہت سے نبیوں اور بادشاہوں نے چاہا کہ جو باتیں تم دیکھتے ہو دیکھیں مگر نہ دیکھیں اور جو باتیں تم سُنتے ہو سُنیں مگر نہ سُنیں۔" (انجیل بمطابق لوقا 10: 21- 24)

مسیح کی تمام زمینی زندگی کے واقعات کے دوران یہی ایک موقع ہے جہاں ہم پڑھتے ہیں کہ جناب مسیح خوشی سے بھر گئے۔ لیکن، ہم اُن تین واقعات کے بارے میں جانتے ہیں جہاں مسیح روئے، اور کئی اُن واقعات کے بارے میں جانتے ہیں جب وہ رُوح میں رنجیدہ ہوئے۔ مسیح شیطان پر اپنے شاگردوں کی فتح اور نتیجہ کے طور پر لوگوں کو ملنے والی برکات دیکھ کر بہت خوش ہوئے۔ یہ آپ کی خدمت کی ایک بہت بڑی کامیابی تھی۔ اُس خوشی میں آپ کی رُوح لوگوں کی جانب نہیں بلکہ اپنے آسمانی باپ کی جانب متوجہ ہوئی۔ یسوع نے باپ کا اُنہی الفاظ میں شکر ادا کیا جو آپ نے پہلے استعمال کئے تھے۔ پھر، آپ نے اپنی توجہ شاگردوں کی جانب مبذول کی اورخاص اُن ہی سے کہا کہ جو کچھ تم نے دیکھا اور سُنا ہے یہ استحقاق تو بہت سے نبیو ں اور بادشاہوں کو بھی نہیں ملا۔

ہمیں اُن عظیم فائدوں کو نظرانداز نہیں کرنا چاہئے جو اُن ستر شاگردوں نے حاصل کئے، اور جن سے آج ہم اُن کی خدمت کی وجہ سے لطف اندوز ہو رہے ہیں۔ جب یسوع نے اِن آدمیوں کو وہ کام سونپا جو پہلے بارہ شاگردوں کو دیا تھا، تو اِس سے ہمیں سکھایا ہے کہ بشارت کا کام صرف پاسبانوں تک محدود نہیں ہے بلکہ یہ ہر ایک ایماندار کا خاص فرض ہے کہ وہ اپنے وقت اور رقم کا کچھ حصہ انجیل کے پھیلاﺅ کےلئے وقف کرے۔ اگرتمام مسیحی اِس سچائی کو سمجھ جائیں اور اِس کی پیروی کریں تو وہ معجزات سرانجام دے سکتے ہیں۔ مسیح نے اپنے شاگردوں کو انجیل بمطابق یوحنا 14: 12 میں جب کہا کہ "میں تم سے سچ کہتا ہوں کہ جو مجھ پر ایمان رکھتا ہے یہ کام جو میں کرتا ہوں وہ بھی کرے گا بلکہ اِن سے بھی بڑے کام کرے گا کیونکہ میں باپ کے پاس جاتا ہوں"، تو یہی حقیقت بتانے کی کوشش کی۔ اِس اصول کی سچائی ابتدائی کلیسیا کی تاریخ میں ظاہر ہوئی۔ یہ سچائی آج بھی مختلف علاقوں میں انجیل کے پھیلاﺅ کے ساتھ ظاہر ہو رہی ہے۔

"پھِر جب جا رہے تھے تو وہ ایک گاﺅں میں داخل ہوا اور مرتھا نام ایک عورت نے اُسے اپنے گھر میں اُتارا۔ اور مریم نام اُس کی ایک بہن تھی۔ وہ یسوع کے پاﺅں کے پاس بیٹھ کر اُس کا کلام سُن رہی تھی۔ لیکن مرتھا خدمت کرتے کرتے گھبرا گئی۔ پس اُس کے پاس آ کر کہنے لگی اے خداوند! کیا تجھے خیال نہیں کہ میری بہن نے خدمت کرنے کو مُجھے اکیلا چھوڑ دیا ہے۔ پس اُسے فرما کہ میری مدد کرے۔ خداوند نے جواب میں اُس سے کہا مرتھا! مرتھا! تُو تو بہت سی چیزوں کی فکر و تردُّد میں ہے۔ لیکن ایک چیز ضرور ہے اور مریم نے وہ اچھا حصہ چُن لیا ہے جو اُس سے چھینا نہ جائے گا۔" (انجیل بمطابق لوقا 10: 38- 42)

مسیح اور اُس کے شاگرد یروشلیم کی طرف رواں دواں تھے، یہاں تک کہ بیت عنیاہ میں پہنچے جو یروشلیم سے تقریباً پون گھنٹہ کی مسافت پر ہے۔ تاریخ میں بیت عنیاہ کا ایک خاص مقام ہے کیونکہ یہاں ایک خداپرست خاندان رہتا تھا۔ اِس خاندان کے افراد یسوع کے ذاتی دوست تھے اور اُنہوں نے یسوع اور اُس کے شاگردوں کو جب کبھی بھی ضرورت پڑی آرام دہ رہائش فراہم کی۔ جب یسوع اپنے شاگردوں کے ساتھ اِس گھر میں داخل ہوئے تو گاﺅں کے دوسرے لوگ بھی وہاں آئے جنہیں یسوع نے اپنے دستور کے موافق تعلیم دی۔ اُس وقت دونوں بہنوں مریم اور مرتھا نے اپنے معزز مہمان کی خدمت کی، اگرچہ کہ دونوں کا انداز فرق تھا۔ مرتھا بڑی ہونے کے ناتے گھر کی نگران تھی اور اُن کی جسمانی ضروریات کا خیال رکھ رہی تھی۔ جب کبھی بھی مردِ معجزات یسوع اُن کے ہاں آتے تو وہ سب کےلئے کھانا تیار کرتی۔

جہاں تک مریم کا تعلق ہے، وہ سمجھ گئی تھی کہ مسیح پُرتکلف ضیافت کا خواہشمند ایک روایتی اُستاد نہیں تھا، بلکہ اُس کی حقیقی خوشی اِس بات میں تھی کہ لوگ اُس کی تعلیم پر دھیان دیں۔ آپ نے فرمایا تھا: "مبارک ہیں وہ جو راستبازی کے بھوکے اور پیاسے ہیں کیونکہ وہ آسودہ ہوں گے" (انجیل بمطابق متی 5: 6)۔ اِسی لئے، مریم یسوع کے پاﺅں کے پاس بیٹھ کر اُس کا کلام سُن رہی تھی۔ مریم کا یہ عمل بہت خوبصورتی سے لوگوں کے اُس چھوٹے سے گروہ کی ترجمانی کرتا ہے جن کے نزدیک خدا تعالیٰ پر ایمان کے مقابلہ میں دُنیا کی ہر چیز کمتر ہے۔ ایسے لوگ دُنیا اور اُس کی شرارت کو چھوڑ کر اپنے ایمان کو سب چیزوں سے زیادہ بلند درجہ دیتے ہیں۔ یہ وہ لوگ ہیں جن کے نام کتابِ حیات میں لکھے ہوئے ہیں کیونکہ خدا تعالیٰ نے اُنہیں ہمیشہ کی زندگی کےلئے چُن لیا ہے۔

مرتھا کی خطا یہ تھی کہ اُس نے دُنیا کی اچھی چیز کو خدا پر ایمان سے زیادہ اہمیت دی۔ کتنی مرتبہ "اچھی" چیز "بہترین" کی دُشمن ہوتی ہے۔ چونکہ گناہ مزید گناہ کی طرف لے کر جاتا ہے، اِس لئے وہ اپنے دِل میں اپنی بہن کے خلاف بڑبڑائی اور یسوع کے پاﺅں میں بیٹھنے پر اُس کے ساتھ حسد کیا۔ اِس کے نتیجہ میں اُس نے اُستاد سے شکایت کی۔ اُسے تو خوش ہونا چاہئے تھا کہ اُس کی بہن کو سیکھنے کا نادِر موقع ملا تھا۔ وہ اپنی بہن سے یہ کہہ سکتی تھی "مہربانی سے پہلے میری مدد کرو، اور پھر ہم اکھٹے خداوند کے قدموں میں بیٹھیں گے۔" لیکن اِس کے برعکس اُس نے اپنی بہن پر اعتراض کرتے ہوئے کہا "اُسے فرما کہ میری مدد کرے۔"

جناب مسیح مادی اشیاء کی ضرورت کو اچھی طرح سے سمجھتے تھے اور اکثر رُوحانی ضروریات کے ساتھ ساتھ آپ نے مادی ضروریات بھی پوری کیں۔ تاہم، آپ نے واضح کیا کہ آپ کو یہ بات زیادہ پسند تھی کہ وہ جسمانی ضروریات کو پورا کرنے کی نسبت بیٹھ کر آپ کی تعلیم سُنے۔

خداوند نے اُسے کہا: "مرتھا! مرتھا! تُو تو بہت سی چیزوں کی فکر و تردُّد میں ہے۔" یہ ایسے تھا کہ جیسے آپ اُسے کہہ رہے تھے کہ دُنیوی معاملات کے ساتھ مصروفیت نے اُس کا اطمینان، سکون اور خوشی چُرا لی تھی، جو اُسے مادی بہبود کی نسبت پہلے خدا کی بادشاہی کی تلاش کرنے سے مل سکتی تھی۔ صرف ایک چیز ضروری تھی، اور مریم نے وہ اچھا حصہ چُن لیاتھا جو اُس سے چھینا نہ جا سکتا تھا۔

"پس یسوع نے اُن سے پھِر کہا میں تم سے سچ کہتا ہوں کہ بھیڑوں کا دروازہ میں ہوں۔ جتنے مجھ سے پہلے آئے سب چور اور ڈاکو ہیں مگر بھیڑوں نے اُن کی نہ سُنی۔ دروازہ میں ہوں۔ اگر کوئی مجھ سے داخل ہو تو نجات پائے گا اور اندر باہر آیا جایا کرے گا اور چارا پائے گا۔ چور نہیں آتا مگر چرانے اور مار ڈالنے اور ہلاک کرنے کو۔ میں اِس لئے آیا کہ وہ زندگی پائیں اور کثرت سے پائیں۔" (انجیل بمطابق یوحنا 10: 7- 10)

علم الہٰی کے ایک ماہر نے ایک مرتبہ لکھا: "انسانوں کا اچھا چرواہا وہ ہے جو اپنا عہدہ مسیح سے محبت کی خاطر قبول کرتا ہے، مسیح کو جلال دینا چاہتا ہے، اپنے کام کو مسیح کی مضبوطی میں سرانجام دیتا ہے، اُس کی تعلیم سکھاتا ہے، اُس کے نقشِ قدم پر چلتا ہے، اور رُوحوں کو اُس کے پاس لانے کےلئے کوشاں رہتا ہے۔" پاسبانی خدمت میں مسیح جو دروازہ ہے، اُس کے بغیر کوئی داخلہ نہیں ہے۔ اُس کے بغیر نکلنے کا بھی کوئی راستہ نہیں ہے۔ ایک پاسبان کو مسیح کی اجازت کے بغیر اپنے کام کو چھوڑنے کی اجازت نہیں ہے کیونکہ اُس نے فرمایا: "دروازہ میں ہوں۔" مزید برآں، چرواہوں کےلئے دروازہ بھیڑوں یعنی عام ایمانداروں کےلئے بھی دروازہ ہے۔

"اچھا چرواہا میں ہوں۔ اچھا چرواہا بھیڑوں کےلئے اپنی جان دیتا ہے۔" (انجیل بمطابق یوحنا 10: 11)

مسیح نے اپنے آپ کو اچھے چرواہے کے طور پر بیان کیا۔ پرانے عہدنامہ میں زبور نویس نے کہا: "اے اسرائیل کے چوپان! تُو جو گلہ کی مانند یُوسُف کو لے چلتا ہے کان لگا! تُو جو کروبیوں پر بیٹھا ہے جلوہ گر ہو!" (زبور 80: 1)۔ یسعیاہ نبی نے کہا: "وہ چوپان کی مانند اپنا گلہ چرائے گا۔ وہ بروں کو اپنے بازوﺅں میں جمع کرے گا اور اپنی بغل میں لے کر چلے گا اور اُن کو جو دودھ پلاتی ہیں آہستہ آہستہ لے جائے گا" (پرانا عہدنامہ، یسعیاہ 40: 11)۔ انتہائی خوبصورت ترین زبور وہ ہے جس میں چرواہے کا ذِکر ہے: "خداوند میرا چوپان ہے۔ مجھے کمی نہ ہو گی" (زبور 23: 1)۔

ایک چرواہے کا کام آسان نہیں ہوتا۔ اِس میں مشکلات اور جنگلی جانوروں کے خطرات شامل ہیں۔ مسیح نے اچھے چرواہے کے طور پر بڑی مشکلات اور سختیاں برداشت کیں اور اپنی بھیڑوں کو بچانے کےلئے اپنی جان دے دی۔ اِس کے برعکس جنہیں یسوع نے "چور" کہا ہے وہ سوائے چرانے اور مارنے کے نہیں آئے، اور جنہیں یسوع نے "مزدور" کہا ہے وہ خطرے میں بھیڑوں کی حفاظت نہیں کرتے بلکہ گلے کو پراگندہ اور ہلاک ہونے کےلئے چھوڑ کر بھاگ جاتے ہیں کیونکہ اُنہیں حقیقت میں بھیڑوں کی فکر نہیں ہوتی۔

مسیح وہ اچھا چرواہا ہے جس نے بھیڑوں کےلئے اپنی جان دی ہے۔ بھیڑوں کو شیطان کے چُنگل سے چھڑا نے کےلئے اُس نے موت سہی جس کا وہ مستحق نہ تھا اور اُن سب کو زندگی بخشی جو رُوحانی طور پر مُردہ تھے۔ اِس سے ظاہر ہوتا ہے کہ وہ اپنی بھیڑوں کی اجتماعی اور شخصی طور پر کتنی زیادہ قدر کرتا ہے۔ وہ گلے کے ہر رُکن کو شخصی طور پر جانتا ہے اور اُن کے نام سے اور دِلی بھیدوں سے بھی واقف ہے۔ اُس کا ہر فرد کو جاننا اور اُن کی فکر کرنا بےبیان ہے، اور یہ حقیقت آج بھی بالکل ویسے ہی ہے جیسے اُس وقت تھی جب اُس نے اپنی جان صلیب پر دی تھی۔

"مزدور جو نہ چرواہا ہے نہ بھیڑوں کا مالک۔ بھیڑئے کو آتے دیکھ کر بھیڑوں کو چھوڑ کر بھاگ جاتا ہے اور بھیڑیا اُن کو پکڑتا اور پراگندہ کرتا ہے۔ وہ اِس لئے بھاگ جاتا ہے کہ مزدور ہے اور اُس کو بھیڑوں کی فکر نہیں۔ اچھا چرواہا میں ہوں۔ جس طرح باپ مجھے جانتا ہے اور میں باپ کو جانتا ہوں۔ اِسی طرح میں اپنی بھیڑوں کو جانتا ہوں اور میری بھیڑیں مجھے جانتی ہیں اور میں بھیڑوں کےلئے اپنی جان دیتا ہوں۔ اور میری اَور بھی بھیڑیں ہیں جو اِس بھیڑخانہ کی نہیں۔ مجھے اُن کو بھی لانا ضرور ہے اور وہ میری آواز سُنیں گی۔ پھِر ایک ہی گلّہ اور ایک ہی چرواہا ہو گا۔ باپ مجھ سے اِس لئے محبت رکھتا ہے کہ میں اپنی جان دیتا ہوں تا کہ اُسے پھِر لے لوں۔ کوئی اُسے مجھ سے چھینتا نہیں بلکہ میں اُسے آپ ہی دیتا ہوں۔ مجھے اُس کے دینے کا بھی اختیار ہے اور اُسے پھِر لینے کا بھی اختیار ہے۔ یہ حکم میرے باپ سے مجھے ملا۔" (انجیل بمطابق یوحنا 10: 12- 18)

جب مسیح نے دیکھا کہ وہ آپ کی بات نہیں سمجھے تو اپنی بات دہرائی اور اِس حقیقت کو واضح کیا کہ وہ اپنی جان رضامندی سے قربان کرے گا۔ صرف اُسے یہ کہنے کا حق حاصل تھا کہ "باپ مجھ سے اِس لئے محبت رکھتا ہے کہ میں اپنی جان دیتا ہوں..."۔ یہ الفاظ پرانے عہدنامہ میں یسعیاہ نبی کے صحیفہ کے اِن الفاظ سے ملتے جلتے ہیں: "اپنی جان ہی کا دُکھ اُٹھا کر وہ اُسے دیکھے گا اور سیر ہو گا۔ اپنے ہی عرفان سے میرا صادِق خادِم بہتوں کو راستباز ٹھہرائے گا کیونکہ وہ اُن کی بدکرداری خود اُٹھا لے گا۔ اِس لئے میں اُسے بزرگوں کے ساتھ حصہ دوں گا اور وہ لُوٹ کا مال زورآوروں کے ساتھ بانٹ لے گا کیونکہ اُس نے اپنی جان موت کےلئے اُنڈیل دی اور وہ خطاکاروں کے ساتھ شمار کیا گیا تو بھی اُس نے بہتوں کے گناہ اُٹھا لئے اور خطاکاروں کی شفاعت کی۔" (یسعیاہ 53: 11- 12)

مسیح نے اُن پر اِس بات کو واضح کیا کہ آپ کو اپنی جان دے دینے کے بعد اُسے واپس لینے کا بھی اختیار ہے، جس کا مطلب یہ ہوا کہ وہ اپنی رضاکارانہ موت کے بعد اپنی ہی قدرت سے مُردوں میں سے جی اُٹھے گا۔ پھر آپ نے اُن افراد میں بھی اپنی دلچسپی کا اظہار کیا جو آپ کے بھیڑخانہ کے نہیں اور کہا "جو اِس بھیڑخانہ کی نہیں۔ مجھے اُن کو بھی لانا ضرور ہے"۔ اِن الفاظ سے آپ کی مُراد غیر اقوام تھیں۔

"اِن باتوں کے سبب سے یہودیوں میں پھِر اختلاف ہوا۔ اُن میں سے بہتیرے تو کہنے لگے کہ اُس میں بدرُوح ہے اور وہ دیوانہ ہے۔ تم اُس کی کیوں سُنتے ہو؟ اَوروں نے کہا یہ ایسے شخص کی باتیں نہیں جس میں بدرُوح ہو۔ کیا بدرُوح اندھوں کی آنکھیں کھول سکتی ہے؟ یروشلیم میں عیدِ تجدید ہوئی اور جاڑے کا موسم تھا۔ اور یسوع ہیکل کے اندر سلیمانی برآمدہ میں ٹہل رہا تھا۔ پس یہودیوں نے اُس کے گرد جمع ہو کر اُس سے کہا تُو کب تک ہمارے دِل کو ڈانوانڈول رکھے گا؟ اگر تُو مسیح ہے تو ہم سے صاف کہہ دے۔ یسوع نے اُنہیں جواب دیا کہ میں نے تو تم سے کہہ دیا مگر تم یقین نہیں کرتے۔ جو کام میں اپنے باپ کے نام سے کرتا ہوں وہی میرے گواہ ہیں۔ لیکن تم اِس لئے یقین نہیں کرتے کہ میری بھیڑوں میں سے نہیں ہو۔ میری بھیڑیں میری آواز سُنتی ہیں اور میں اُنہیں جانتا ہوں اور وہ میرے پیچھے پیچھے چلتی ہیں۔ اور میں اُنہیں ہمیشہ کی زندگی بخشتا ہوں اور وہ ابد تک کبھی ہلاک نہ ہوں گی اور کوئی اُنہیں میرے ہاتھ سے چھین نہ لے گا۔ میرا باپ جس نے مجھے وہ دی ہیں سب سے بڑا ہے اور کوئی اُنہیں باپ کے ہاتھ سے نہیں چھین سکتا۔ میں اور باپ ایک ہیں۔" (انجیل بمطابق یوحنا 10: 19- 30)

یہ باتیں اُن یہودیوں کو پھر سمجھ نہ آئیں۔ کچھ نے کہا: "اُس میں بدرُوح ہے اور وہ دیوانہ ہے۔ تم اُس کی کیوں سُنتے ہو؟" دوسروں نے اِس بات سے اختلاف کرتے ہوئے کہا: "یہ ایسے شخص کی باتیں نہیں جس میں بدرُوح ہو۔" اِن اختلاف رائے کرنے والوں کا جواب مسیح کے حال ہی میں ہونے والے معجزہ پر مبنی تھا جس کے بارے میں اُنہوں نے کہا کہ اِسے شیطان سے موسوم نہیں کیا جا سکتا۔ ہم یہاں ایک اَور دلیل پیش کر سکتے ہیں: فرض کریں شیطان کے پاس اندھے کی آنکھیں کھولنے کی طاقت تھی، تو کیا وہ اُس شخص کےلئے کچھ اچھا کرتا؟ اگر وہ بھلائی کا کوئی کام کرتا تو وہ دُشمن شیطان نہ ہوتا!

جب یہودی بزرگ مسیح کے بھلائی کے کاموں کو شیطان سے منسوب کر رہے تھے تو اُنہوں نے ایسا کرنے سے یہ دِکھایا کہ وہ کس قدر بیوقوف تھے، یوں وہ مسیح کی اُس راست عدالت کو اپنے اوپر بلا رہے تھے جو رُوحانی طور پر اندھے افراد کے خلاف ہے۔ یہ مذہبی علما کیوں بھول گئے تھے کہ اندھے کو بینائی عطا کرنا توریت میں مسیح کے نشانوں میں سے ایک نشان تھا؟

مسیح نے واضح طور پر بیان کیا کہ وہ اچھا چرواہا ہے اور اُس کی بھیڑیں اُس کی آواز سُنتی اور اُس کے پیچھے چلتی ہیں۔ یہ یہودی راہنما اُس کی بھیڑیں نہیں تھے۔ اُنہوں نے یسوع کے مسیح ہونے کے واضح ثبوت کا انکار کیا، اُسے اِس وجہ سے رد کر دیا کہ اُس نے اُن کی خواہشات کے مطابق عمل نہیں کیا تھا۔ لیکن مسیح کی رُوحانی لحاظ سے اپنی حقیقی بھیڑوں کےلئے بڑی رغبت اِس بات کا ثبوت تھی کہ وہ اُن کا آنے والا نجات دہندہ تھا۔ اپنی نئی پیدایش میں الہٰی رُوح کے کام کی بدولت وہ اچھے چرواہے کے پاس کھِنچے چلے آئے، اور بھیڑوں کی طرح اُس کی پیروی کی۔

یسوع نے اپنی بھیڑوں سے اُن کے ابدی تحفظ کے بارے میں بات کی۔ جہاں تک اُن لوگوں کی بات ہے جو عموماً یسوع کی بھیڑیں تصور کی جاتی ہیں لیکن اپنے ایما ن سے پھر جاتے ہیں، اُن کے بارے میں مُقدّس یوحنا رسول نے لکھا ہے: "وہ نکلے تو ہم ہی میں سے مگر ہم میں سے تھے نہیں۔ اِس لئے کہ اگر ہم میں سے ہوتے تو ہمارے ساتھ رہتے لیکن نکل اِس لئے گئے کہ یہ ظاہر ہو کہ وہ سب ہم میں سے نہیں ہیں۔" (نیا عہدنامہ، 1- یوحنا 2: 19)۔ جسے اِس بات کا یقین ہے کہ وہ مسیح کی ایک بھیڑ ہے وہ اُس کی حفاظت میں آ گیا ہے اور ہلاک نہ ہو گا۔ کوئی بھی قوت اُسے آسمانی چرواہے کے ہاتھوں سے نہیں لے کر جا سکتی۔ یسوع اُس کی جان کو بحال کرے گا اور اپنے نام کی خاطر صداقت کی راہوں پر لے جائے گا (زبور 23: 3)۔

جب ایک ایماندار خدا تعالیٰ کے وعدوں پر بھروسا کرتا ہے، تو وہ اپنی جان کےلئے خاص طور پر شکست کے وقت میں ایک محفوظ لنگر پاتا ہے۔ ہو سکتا ہے کہ کوئی شخص یہ سوچے کہ مسیح میں اُس کا تحفظ اُسے گناہ کرنے کی آزادی دیتا ہے، لیکن ہم یہ کہیں گے کہ مسیح جو ہمیشہ کی زندگی بخشتا ہے اُس کے نتیجہ میں اُس کی بھیڑیں گناہ سے نفرت کرتی ہیں اور آسمانی باپ کو خوش کرنا پسند کرتی ہیں۔ وہ سب جو کسی بھی طرح کے گناہ میں رہنے میں راضی رہتے ہیں درحقیقت اُسے اپنے دِل میں پروان چڑھا رہے ہوتے ہیں اور ثابت کرتے ہیں کہ وہ اُس کی حقیقی بھیڑ نہیں ہیں۔ وہ جو صرف ابدی سزا سے بچنے کی تمنا کرتے ہیں اُن کی اُن بھیڑوں میں کوئی جگہ نہ ہو گی جنہیں بادشاہ عدالت کے دِن اپنے دائیں ہاتھ کی طرف کھڑا کرے گا۔ لیکن وہ سب جو خلوصِ دل سے نجات دہندہ سے محبت کرتے ہیں اور اُس کی مرضی کے خلاف ہر چیز سے بچنے کی دیانتداری سے کوشش کرتے ہیں، اپنی وقتی ناکامیوں کے باوجود محفوظ رہ سکتے ہیں۔ وہ پولس رسول کے الفاظ میں یہ کہہ سکتے ہیں: "مجھے اِس بات کا بھروسا ہے کہ جس نے تم میں نیک کام شروع کیا ہے وہ اُسے یسوع مسیح کے دِن تک پورا کر دے گا" (نیا عہدنامہ، فلپیوں 1: 6)۔ پرانے عہدنامہ میں امثال 24: 16 میں لکھا ہے: "کیونکہ صادِق سات بار گرتا ہے اور پھِر اُٹھ کھڑا ہوتا ہے لیکن شریر بلا میں گر کر پڑا ہی رہتا ہے۔" یہ سوچنا مناسب نہیں کہ نجات دہندہ یعنی خدائے مجسم نے نجات کے کام کو شروع کیا اور پورا کرنے میں ناکام رہا۔ یہ ایک بھید ہے جو اُن لوگوں کو سمجھ میں نہیں آتا جو اُس کی بھیڑیں نہیں ہیں۔

یسوع کی اِن باتوں میں ہمارے سامنے آپ کی الہٰی فطرت کا ایک واضح ثبوت موجود ہے جس کی بدولت آپ ایسی باتیں کہہ سکے جو کوئی انسان نہیں کہہ سکتا تھا۔ آپ نے سب حقیقی ایمانداروں کو اپنی بھیڑیں کہہ کر مخاطب کیا اور کہا کہ وہ اُس کی آواز سُنیں گی، یسوع کے یہ الفاظ قدیم انبیا کے الفاظ سے اِس طرح سے مختلف تھے کہ اُنہوں نے اپنی آواز کی نہیں بلکہ خدا کی آواز کی بات کی تھی۔ آپ نے کہا کہ آپ کی بھیڑیں آپ کی آواز سُنیں گی اور آپ کی پیروی کریں گی۔ آپ اُنہیں ہمیشہ کی زندگی بخشیں گے اور کوئی بھی اُنہیں آپ کے ہاتھ سے چھین نہیں سکتا۔ پھر، آپ نے یہ بھی کہا کہ کوئی بھی اُنہیں آپ کے باپ کے ہاتھ سے بھی نہیں چھین سکتا۔ یسوع کے ایسے کچھ بیانات بظاہر ایک دوسرے سے تضاد میں نظر آتے ہیں لیکن یہ حقیقت میں خدا تعالیٰ کی ذات میں اقانیم کی واحدانیت کی طرف اشارہ کرتے ہیں۔ یسوع نے خود یہ فرمایا: "میں اور باپ ایک ہیں۔"

یہ اہم نتیجہ یہودی بزرگوں کے کانوں میں ایک دھماکہ خیز خبر کی مانند تھا۔ اَب اُن کے سامنے دو ہی راستے تھے: یا تو اُس کی مسیح، خدا کے اکلوتے بیٹے کے طور پر تمجید کرتے، یا پھر اپنی شریعت کے مطابق اُسے کفر کرنے والا جان کر سنگسار کرتے۔ اُنہوں نے مسیح کو سنگسار کرنے کےلئے پتھر اُٹھانے کا فیصلہ کیا۔ مسیح نے اِس سب کا بہادری سے سامنا کیا، اور اُن سے پوچھا کہ "میں نے تم کو باپ کی طرف سے بہتیرے اچھے کام دِکھائے ہیں۔ اُن میں سے کس کام کے سبب سے مجھے سنگسار کرتے ہو؟" اُنہوں نے جواب دیا: "تُو آدمی ہو کر اپنے آپ کو خدا بناتا ہے۔" تب یسوع نے اُنہیں کہا: "آیا تم اُس شخص سے جسے باپ نے مُقدّس کر کے دُنیا میں بھیجا کہتے ہو کہ تُو کُفر بکتاہے اِس لئے کہ میں نے کہا میں خدا کا بیٹا ہوں؟ اگر میں اپنے باپ کے کام نہیں کرتا تو میرا یقین نہ کرو۔ لیکن اگر میں کرتا ہوں تو گو میرا یقین نہ کرو مگر اُن کاموں کا تو یقین کرو تا کہ تم جانو اور سمجھو کہ باپ مجھ میں ہے اور میں باپ میں" (انجیل بمطابق یوحنا 10: 33، 36- 38)۔

کسی نبی نے اپنے بارے میں یہ نہیں کہا کہ باپ نے اُسے مُقدّس کر کے دُنیا میں بھیجا ہے۔ جب مسیح نے کفر کے مرتکب ہونے سے انکار کیا تو آپ کے الفاظ کی سچائی واضح تھی۔ جب یہودیوں نے پھر آپ کو پکڑنے کی کوشش کی تو آپ اُن کے ہاتھ سے نکل گئے اور یردن کے پار اُس جگہ چلے گئے جہاں یوحنا بپتسمہ دیا کرتا تھا۔ یہاں مسیح کی منادی کا ایک زبردست نتیجہ نکلا کیونکہ بہتیرے آپ پر ایمان لائے۔

"پھِر ایسا ہوا کہ وہ کِسی جگہ دُعا کر رہا تھا۔ جب کر چکا تو اُس کے شاگردوں میں سے ایک نے اُس سے کہا اے خداوند! جیسا یوحنا نے اپنے شاگردوں کو دُعا کرنا سکھایا تُو بھی ہمیں سِکھا۔ اُس نے اُن سے کہا جب تم دُعا کرو تو کہو اے باپ! تیرا نام پاک مانا جائے۔ تیری بادشاہی آئے۔ ہماری روز کی روٹی ہر روز ہمیں دیا کر۔ اور ہمارے گناہ معاف کر کیونکہ ہم بھی اپنے ہر قرضدار کو معاف کرتے ہیں اور ہمیں آزمایش میں نہ لا۔ پھِر اُس نے اُن سے کہا تم میں سے کون ہے جس کا ایک دوست ہو اور وہ آدھی رات کو اُس کے پاس جا کر اُس سے کہے اے دوست مجھے تین روٹیاں دے۔ کیونکہ میرا ایک دوست سفر کر کے میرے پاس آیا ہے اور میرے پاس کچھ نہیں کہ اُس کے آگے رکھوں۔ اور وہ اندر سے جواب میں کہے مجھے تکلیف نہ دے۔ اب دروازہ بند ہے اور میرے لڑکے میرے پاس بِچھونے پر ہیں۔ میں اُٹھ کر تجھے دے نہیں سکتا۔ میں تم سے کہتا ہوں کہ اگرچہ وہ اِس سبب سے کہ اُس کادوست ہے اُٹھ کر اُسے نہ دے تو بھی اُس کی بےحیائی کے سبب سے اُٹھ کر جتنی درکار ہیں اُسے دے گا۔ پس میں تم سے کہتا ہوں مانگو تو تمہیں دیا جائے گا۔ ڈھونڈو تو پاﺅ گے۔ دروازہ کھٹکھٹاﺅ تو تمہارے واسطے کھولا جائے گا۔ کیونکہ جو کوئی مانگتا ہے اُسے ملتا ہے اور جو ڈھونڈتا ہے وہ پاتا ہے اور جو کھٹکھٹاتا ہے اُس کے واسطے کھولا جائے گا۔ تم میں ایسا کون سا باپ ہے کہ جب اُس کابیٹا روٹی مانگے تو اُسے پتھر دے؟ یا مچھلی مانگے تو مچھلی کے بدلے اُسے سانپ دے؟ یا انڈا مانگے تو اُس کو بِچھّو دے؟ پس جب تم بُرے ہو کر اپنے بچوں کو اچھی چیزیں دینا جانتے ہو تو آسمانی باپ اپنے مانگنے والوں کو رُوح القدس کیوں نہ دے گا؟" (انجیل بمطابق لوقا 11: 1- 13)

ایک مرتبہ جب مسیح نے دُعا کرنی ختم کی تو آپ کے شاگردوں میں سے ایک نے کہا کہ جیسے یوحنا بپتسمہ دینے والے نے اپنے شاگردوں کو دُعا کرنا سکھایا ہے ویسے ہی ہمیں بھی دُعا کرنا سکھا۔ جواب میں مسیح نے اُنہیں وہ مشہور دُعا سکھائی جسے "دُعائے ربّانی" کہتے ہیں۔ پھر آپ نے اُنہیں ایک ایسے شخص کی تمثیل سُنائی جس نے آدھی رات کو اپنے دوست کے پاس جا کر اُس سے کچھ روٹی مانگی، لیکن پہلے اُسے ناکامی ہوئی۔ وہ ثابت قدمی سے دروازہ کھٹکھٹاتا رہا اور آخرکار اُسے کامیابی ملی۔

اِس تمثیل کی وضاحت کرتے ہوئے یسوع نے فرمایا: "مانگو تو تمہیں دیا جائے گا۔ ڈھونڈو تو پاﺅ گے۔ دروازہ کھٹکھٹاﺅ تو تمہارے واسطے کھولا جائے گا۔"

باالفاظ دیگر، پہلے ایک سادہ درخواست کریں، اور پھر اگر جواب نہ ملے تو شِدّت کے ساتھ درخواست پیش کریں۔ اگر پھر بھی جواب نہ ملے تو ایک فرد کو دروازہ کھٹکھٹانا چاہئے۔ جو ہمیں فوراً ملتا ہے وہ اچھا ہوتا ہے، جو ہم ڈھونڈنے سے پاتے ہیں وہ اُس سے بہتر ہوتا ہے اور جو ہم دروازہ کھٹکھٹانے کے بعد پاتے ہیں وہ بہتر ین ہے۔

مسیح ایمانداروں کی خدا تعالیٰ کے ساتھ گہری قربت والے تعلق کی وضاحت کرتے گئے۔ یہ تعلق اِس بات کی ضمانت دیتا ہے کہ اُس کے ہاتھ سے ایماندار بھلائی پائیں گے، کیونکہ اُس کےلئے یہ ناممکن ہے کہ وہ اپنے فرزندوں سے جن سے وہ محبت رکھتا ہے بھلائی و عافیت کو باز رکھے۔ اگر ایک دُنیوی باپ اپنے بچوں کو اچھی چیزیں دینا جانتا ہے تو کامل آسمانی باپ اپنے فرزندوں کو اچھی چیزیں دینے میں کیسے تاخیر کر سکتا ہے، خاص کر جب وہ اعلیٰ ترین بخشش یعنی رُوح القدس کی بخشش کےلئے دُعا مانگتے ہیں۔

"پھِر بھِیڑ میں سے ایک نے اُس سے کہا اے اُستاد! میرے بھائی سے کہہ کہ میراث کا میرا حصہ مجھے دے۔ اُس نے اُس سے کہا، میاں کِس نے مجھے تمہارا منصف یا بانٹنے والا مقرر کیا ہے؟ اور اُس نے اُن سے کہا خبردار! اپنے آپ کو ہر طرح کے لالچ سے بچائے رکھو کیونکہ کِسی کی زندگی اُس کے مال کی کثرت پر موقوف نہیں۔ اور اُس نے اُن سے ایک تمثیل کہی کہ کِسی دولتمند کی زمین میں بڑی فصل ہوئی۔ پس وہ اپنے دِل میں سوچ کر کہنے لگا کہ میں کیا کروں کیونکہ میرے ہاں جگہ نہیں جہاں اپنی پیداوار بھر رکھوں؟ اُس نے کہا میں یوں کروں گا کہ اپنی کوٹھیاں ڈھا کر اُن سے بڑی بناﺅں گا۔ اور اُن میں اپنا سارا اناج اور مال بھر رکھوں گا اور اپنی جان سے کہوں گا اے جان! تیرے پاس بہت برسوں کےلئے بہت سا مال جمع ہے۔ چین کر۔ کھا پی۔ خوش رہ۔ مگر خدا نے اُس سے کہا اے نادان! اِسی رات تیری جان تجھ سے طلب کر لی جائے گی۔ پس جو کچھ تُو نے تیار کیا ہے وہ کِس کا ہو گا؟ ایسا ہی وہ شخص ہے جو اپنے لئے خزانہ جمع کرتا ہے اور خدا کے نزدیک دولتمند نہیں۔ پھِر اُس نے اپنے شاگردوں سے کہا اِس لئے میں تم سے کہتا ہوں کہ اپنی جان کی فکر نہ کرو کہ ہم کیا کھائیں گے اور نہ اپنے بدن کی کہ کیا پہنیں گے۔ کیونکہ جان خوراک سے بڑھ کر ہے اورر بدن پوشاک سے۔ کووّں پر غور کرو کہ نہ بوتے ہیں نہ کاٹتے۔ نہ اُن کے کھتّا ہوتا ہے نہ کوٹھی۔ تو بھی خدا اُنہیں کِھلاتا ہے۔ تمہاری قدر تو پرندوں سے کہیں زیادہ ہے۔ تم میں ایسا کون ہے جو فکر کر کے اپنی عمر میں ایک گھڑی بڑھا سکے؟ پس جب سب سے چھوٹی بات بھی نہیں کر سکتے تو باقی چیزوں کی فکر کیوں کرتے ہو؟ سوسن کے درختوں پر غور کرو کہ کِس طرح بڑھتے ہیں۔ وہ نہ محنت کرتے نہ کاتتے ہیں تو بھی میں تم سے کہتا ہوں کہ سلیمان بھی باوجود اپنی ساری شان و شوکت کے اُن میں سے کِسی کی مانند مُلبّس نہ تھا۔ پس جب خدا میدان کی گھاس کو جو آج ہے اور کل تنور میں جھونکی جائے گی ایسی پوشاک پہناتا ہے تو اے کم اعتقادو تم کو کیوں نہ پہنائے گا؟ اور تم اِس کی تلاش میں نہ رہو کہ کیا کھائیں گے اور کیا پئیں گے اور نہ شکّی بنو۔ کیونکہ اِن سب چیزوں کی تلاش میں دُنیا کی قومیں رہتی ہیں لیکن تمہارا باپ جانتا ہے کہ تم اِن چیزوں کے محتاج ہو۔ ہاں اُس کی بادشاہی کی تلاش میں رہو تو یہ چیزیں بھی تمہیں مل جائیں گی۔ اے چھوٹے گلّے نہ ڈر کیونکہ تمہارے باپ کو پسند آیا کہ تمہیں بادشاہی دے۔ اپنا مال اسباب بیچ کر خیرات کر دو اور اپنے لئے ایسے بٹوے بناﺅ جو پرانے نہیں ہوتے یعنی آسمان پر ایسا خزانہ جو خالی نہیں ہوتا۔ جہاں چور نزدیک نہیں جاتا اور کیڑا خراب نہیں کرتا۔ کیونکہ جہاں تمہارا خزانہ ہے وہیں تمہارا دِل بھی لگا رہے گا۔" (انجیل بمطابق لوقا 12: 13- 34)

جب ایک شخص نے یسوع کو کہا کہ وراثت کو تقسیم کرنے کے معاملہ میں وہ مداخلت کرے تو یسوع نے ایسا کرنے سے انکار کر دیا کیونکہ آپ نے اپنے آپ کو اُن کاموں تک محدود رکھا ہوا تھا جو کوئی دوسرا نہیں کر سکتا تھا۔

مسیح نے خاص مذہبی یا سیاسی گروہوں کی جانب اپنا میلان رکھتے ہوئے اپنے کام کو سرانجام نہیں دیا۔ آپ یہ نہیں چاہتے تھے کہ لوگ آپ کو دُنیوی معاملات کا فیصلہ کرنے والا ایک فرقہ کا سربراہ سمجھیں۔ اِس مثال میں مسیح نے ایک گناہ کو عیاں کیا ہے جو بہت عام ہے اور جسے عموماً قابل قبول سمجھا جاتا ہے یعنی لالچ کا گناہ، دولت کی جانب دِلی رغبت۔

لالچ کی حقیقت کو واضح کرنے کےلئے یسوع نے اپنے شاگردوں کو ایک ایسے شخص کی کہانی سُنائی جس کی دولت میں اضافہ ہوا۔ لیکن خدا تعالیٰ کا شکرگزار ہونے کے بجائے اُس نے اُس کے بغیر زندگی گزارنے کا چناﺅ کیا۔ اُسے اِس بات کا احساس کرنا چاہئے تھا کہ اُس کی دولت اُس کی نہیں بلکہ خداوند کی تھی، وہ تو اُن چیزوں کا صرف ایک مختار تھا تا کہ اُنہیں ذمہ داری اور بغیر خودغرضی کے استعمال کرے۔ جب وہ صرف اپنے لئے ہی زندگی بسر کر رہا تھا تو اُسے کیا حق حاصل تھا کہ وہ خدا کی حفاظت میں رہتا؟ اگرچہ اُس کی دولت میں اضافہ ہوا، مگر اُس کی جان اُس سے طلب کر لی گئی۔

خدا تعالیٰ نے اُس سے کہا: "اے نادان! اِسی رات تیری جان تجھ سے طلب کر لی جائے گی۔" خداوند خدا صرف اپنے محبت کرنے والوں کو دُنیوی برکات نہیں دیتا بلکہ وہ اپنے سورج کو نیکوں اور بدوں دونوں پر چمکاتا ہے اور راستبازوں اور ناراستوں دونوں پر مینہ برساتا ہے (انجیل بمطابق متی 5: 45)۔ خدا تعالیٰ ایسا اِس لئے کرتا ہے تا کہ دین کہیں زمینی خواہشات کی تکمیل تک محدود ہونے سے بگڑ نہ جائے۔

جب یسوع نے فطرت میں سے مثالوں کو استعمال کرتے ہوئے شاگردوں کو یہ حقیقت بتائی کہ خدا تعالیٰ اُن کی دُنیوی ضرورتوں کی فکر کرتا ہے، تو پھر اُنہیں تسلی دی کہ تمہاری کمزوریوں کے باوجود تمہارے باپ کو پسند آیا ہے کہ تمہیں بادشاہی دے۔ یسوع نے اُن کی حوصلہ افزائی کی کہ وہ خدا کی راہ میں دیا کریں کیونکہ جو انسان بھلائی کی راہ میں خرچ کرتا ہے وہ قائم رہے گا، لیکن جو وہ اپنے لئے جمع کرتا ہے ختم ہو جائے گا۔ جب آپ راستبازی کی خاطر اپنی رقم خرچ کرتے ہیں تو یہ آپ کے دِل کو خدا کی طرف لگائے گا، "کیونکہ جہاں تمہارا خزانہ ہے وہیں تمہارا دِل بھی لگا رہے گا" (انجیل بمطابق لوقا 12: 34)۔

"تمہاری کمریں بندھی رہیں اور تمہارے چراغ جلتے رہیں۔ اور تم اُن آدمیوں کی مانند بنو جو اپنے مالک کی راہ دیکھتے ہوں کہ وہ شادی میں سے کب لوٹے گا تا کہ جب وہ آ کر دروازہ کھٹکھٹائے تو فوراً اُس کے واسطے کھول دیں۔ مبارک ہیں وہ نوکر جن کا مالک آ کر اُنہیں جاگتا پائے۔ میں تم سے سچ کہتا ہوں کہ وہ کمر باندھ کر اُنہیں کھانا کھانے کو بٹھائے گا اور پاس آ کر اُن کی خدمت کرے گا۔ اور اگر وہ رات کے دوسرے پہر میں یا تیسرے پہر میں آ کر اُن کو ایسے حال میں پائے تو وہ نوکر مبارک ہیں۔ لیکن یہ جان رکھو کہ اگر گھر کے مالک کو معلوم ہوتا کہ چور کِس گھڑی آئے گا تو جاگتا رہتا اور اپنے گھرمیں نقب لگنے نہ دیتا۔ تم بھی تیار رہو کیونکہ جس گھڑی تمہیں گمان بھی نہ ہو گا ابنِ آدم آ جائے گا۔" (انجیل بمطابق لوقا 12: 35- 40)

مسیح نے اپنی دوبارہ آمد کے تعلق سے بیان کیا کہ وہ اچانک ہو گی۔ اُس کے خادموں کو جاگتے رہنا چاہئے تا کہ وہ اُسے خوشی سے خوش آمدید کہنے کےلئے تیار ہوں، کیونکہ جو تیار ہوں گے اُنہیں اجر ملے گا اور وہ مبارک ٹھہریں گے۔ جب پطرس رسول نے مسیح سے پوچھا کہ یہ تمثیل تُو ہم ہی سے کہتا ہے یا سب سے؟ تب یسوع نے اُنہیں ایک اَور تمثیل سُنائی تا کہ بےایمان مختار پر اپنی ناراضگی کا اظہار کرے۔ وہ ایسے نوکر کو خوب کوڑے لگا کر بےایمانوں میں شامل کرے گا (انجیل بمطابق لوقا 12: 46)۔ جنہیں اُس نے زیادہ بخشا ہے اُن سے وہ زیادہ توقع کرتا ہے، اور جنہیں اُس نے کم بخشا ہے اُن سے کم کی توقع کرتا ہے (انجیل بمطابق لوقا 12: 48)۔ یسوع مسیح کے دعووں سے کوئی بھی مستثنیٰ نہیں ہے۔

خداوند انسان سے نہ صرف اُن چیزوں کا تقاضا کرتا ہے جو اُس کے پاس ہیں اور جو اُس عظیم ہستی نے اُسے عنایت کی ہیں، بلکہ وہ اُس سے اُن چیزوں کا بھی تقاضا کرتا ہے جو وہ دیانتداری سے کام کر کے حاصل کر سکتا ہے۔ خدا تعالیٰ ایک فرد کو نہ صرف اُس کے فرض سے غفلت پر سزا دیتا ہے، بلکہ اُس کام کے نہ کرنے پر بھی سزا دیتا ہے جو وہ جانتا ہے کہ اُسے کرنا چاہئے تھا۔

"پھِر اُس نے یہ تمثیل کہی کہ کِسی نے اپنے تاکستان میں ایک انجیر کا درخت لگایا تھا۔ وہ اُس میں پھل ڈھونڈنے آیا اور نہ پایا۔ اِس پر اُس نے باغبان سے کہا کہ دیکھ تین برس سے میں اِس انجیر کے درخت میں پھل ڈھونڈنے آتا ہوں اور نہیں پاتا۔ اِسے کاٹ ڈال۔ یہ زمین کو بھی کیوں روکے رہے؟ اُس نے جواب میں اُس سے کہا اے خداوند اِس سال تو اَور بھی اُسے رہنے دے تا کہ میں اُس کے گِرد تھالا کھودُوں اور کھاد ڈالوں۔ اگر آگے کو پھلا تو خیر نہیں تو اُس کے بعد کاٹ ڈالنا۔" (انجیل بمطابق لوقا 13: 6- 9)

اِن الفاظ میں جناب مسیح نے دِکھایا ہے کہ آپ اِس دُنیا میں ایسی تعلیم لے کر آئے ہیں جو آگ کی طرح بطالت کے کانٹوں اور اُس کے پیروکاروں کو جلا ڈالے گی۔ جب دُنیا میں نُور آتا ہے اور لوگ تاریکی کو ترجیح دیتے ہیں، تو لازم ہے کہ نُور کے پیروکاروں اور تاریکی کے پیروکاروں کے درمیان کشمکش ہو گی۔ تاریکی کی فطرت میں کشمکش شامل ہے۔ اگر مکمل تاریکی ہو یا مکمل نُور ہو تو کوئی کشمکش نہیں ہو گی۔ لیکن جب نُور تاریکی کی طرف آتا ہے تو تاریکی اُس پر حملہ کرتی ہے اور یوں دونوں میں فرق واضح ہے۔ غرض، تقسیم مسیح کی آمد اور تعلیم کے پھیلاﺅ کا ایک ناگزیر نتیجہ ہے۔

پھر مسیح نے یہودی قوم کو ایک انجیر کے درخت کے ساتھ تشبیہ دی، جو پھل نہ لانے کی وجہ سے کاٹے جانے کو ہے۔ آپ نے باپ کو تاکستان کے مالک کے ساتھ اور اپنے آپ کو باغبان سے تشبیہ دی۔ آپ خدا اور انسان کے مابین درمیانی ہوتے ہوئے انسانیت پر خدا کے غضب کو روکے ہوئے ہیں۔

آپ نے باپ سے درخواست کی کہ جب تک آپ اُن کی نجات کے منصوبہ کو مکمل نہیں کرتے وہ اپنا تحمل دِکھائے۔ آپ نے اِس بات کا اعتراف کیا کہ جب آپ تین برس تک تعلیم دینے اور خدمت کرنے میں مصروف تھے تو خدا تعالیٰ نے اُن کے ساتھ صبر و برداشت کا مظاہرہ کیا تھا۔ آپ نے اُن کا عوضی ہو کر اپنی جان قربان کر دی۔ اگر وہ مسیح کو قبول کرتے تو محفوظ تھے، لیکن قبول نہ کرنے پر وہ کاٹ ڈالے جانے کو تھے۔ تاریخ کے اوراق اِس تمثیل میں بنی اسرائیل کی پیش کردہ تصویر کا ایک ثبوت ہیں۔ یوحنا بپتسمہ دینے والے کے الفاظ پورے ہوئے: "اور اب درختوں کی جڑ پر کلہاڑا رکھا ہوا ہے۔ جو درخت اچھا پھل نہیں لاتا وہ کاٹا اور آگ میں ڈالا جاتا ہے" (انجیل بمطابق متی 3: 10)۔

"پھِر وہ سبت کے دِن کِسی عبادت خانہ میں تعلیم دیتا تھا۔ اور دیکھو ایک عورت تھی جس کو اٹھارہ برس سے کِسی بدرُوح کے باعث کمزوری تھی۔ وہ کُبڑی ہو گئی تھی اور کِسی طرح سیدھی نہ ہو سکتی تھی۔ یسوع نے اُسے دیکھ کر پاس بُلایا اور اُس سے کہا اے عورت تُو اپنی کمزوری سے چھوٹ گئی۔ اور اُس نے اُس پر ہاتھ رکھے۔ اُسی دم وہ سیدھی ہو گئی اور خدا کی تمجید کرنے لگی۔ عبادت خانہ کا سردار اِس لئے کہ یسوع نے سبت کے دِن شفا بخشی خفا ہو کر لوگوں سے کہنے لگا چھ دِن ہیں جن میں کام کرنا چاہئے پس اُنہی میں آ کر شفا پاﺅ نہ کہ سبت کے دِن۔ خداوند نے اُس کے جواب میں کہا کہ اے ریاکارو! کیا ہر ایک تم میں سے سبت کے دِن اپنے بیل یا گدھے کو تھان سے کھول کر پانی پلانے نہیں لے جاتا؟ پس کیا واجب نہ تھا کہ یہ جو ابرہام کی بیٹی ہے جس کو شیطان نے اٹھارہ برس سے باندھ رکھا تھا سبت کے دِن اِس بند سے چُھڑائی جاتی؟ جب اُس نے یہ باتیں کہیں تو اُس کے سب مخالف شرمندہ ہوئے اور ساری بھِیڑ اُن عالیشان کاموں سے جو اُس سے ہوتے تھے خوش ہوئی۔" (انجیل بمطابق لوقا 13: 10- 17)

ایک سبت کے دِن مسیح ایک گاﺅں کے عبادتخانہ میں گئے اور تعلیم دینا شروع کی۔ وہاں عبادت گزاروں میں ایک ایسی عورت موجود تھی جو پچھلے اٹھارہ برس سے کبڑی تھی اور سیدھی نہ ہو سکتی تھی۔ وہ اپنی صحت کی بحالی کی تمام اُمید کھو چکی تھی، لیکن اپنے تقویٰ کی بدولت اُس نے اپنی معذوری کے باوجود پرستش کےلئے عبادتخانہ میں آنا جاری رکھا۔ بظاہر اُس نے شفا پانے کےلئے درخواست نہ کی کیونکہ وہ تو یسوع کی تعلیم سُن رہی تھی۔

یسوع نے اُسے شفا دینے کےلئے اور سبت اور اُس کی برکات کے موضوع پر اپنی تعلیم کی توضیح پیش کرنے کےلئے اپنے پاس بلایا۔ جب وہ آ گے آئی تو یسوع نے طبیب کی طرح اُسے چھوا، اور وہ اُسی دم ٹھیک ہو گئی۔ آپ نے کہا: "تُو اپنی کمزوری سے چھوٹ گئی۔" وہ اُسی دم سیدھی ہو گئی اور خدا تعالیٰ کی تمجید کرنی شروع کر دی۔ عبادتخانہ کا سردار بہت خفا ہوا۔ اگرچہ وہ یسوع کی عزت کرتا تھا، لیکن اُس نے لوگوں سے کہا کہ "چھ دِن ہیں جن میں کام کرنا چاہئے پس اُنہیں میں آ کر شفا پاﺅ نہ کہ سبت کے دِن۔"

تاہم، مسیح نے اِس غریب عورت اور بہت سے دوسرے لوگوں کو اِس سخت حکم سے رہائی بخشی۔ آپ نے اُس منافقانہ سردار کو یاد دِلایا کہ سبت کے دِن جب کبھی اچانک ضرورت پڑے تو لوگوں کو اپنے جانوروں کی دیکھ بھال کی اجازت تھی۔ اِس عورت کو شفا دینے کے کام کی نسبت اُن کاموں کےلئے زیادہ جسمانی محنت درکار ہوتی تھی۔ اب اگر وہ ایک جانور کو کھول کر پانی پلانے لے جا سکتے تھے، تو مسیح اِس عورت کو جو اتنے برسوں سے شیطان کے بند میں گرفتار تھی، کیوں اُس کی جسمانی اور رُوحانی غلامی سے آزاد نہیں کر سکتا تھا؟ لوگ یسوع کے اِن الفاظ اور عالیشان کاموں سے بہت خوش ہوئے اور آپ کے سب مخالف شرمندہ ہوئے۔

"پھِر ایسا ہوا کہ وہ سبت کے دِن فریسیوں کے سرداروں میں سے کِسی کے گھر کھانا کھانے کو گیا اور وہ اُس کی تاک میں رہے۔ اور دیکھو ایک شخص اُس کے سامنے تھا جسے جلندر تھا۔ یسوع نے شرع کے عالموں اور فریسیوں سے کہا کہ سبت کے دِن شفا بخشنا روا ہے یا نہیں؟ وہ چُپ رہ گئے۔ اُس نے اُسے ہاتھ لگا کر شفا بخشی اور رُخصت کیا۔ اور اُن سے کہا تم میں ایسا کون ہے جس کا گدھا یا بیل کنوئیں میں گر پڑے اور وہ سبت کے دِن اُس کو فوراً نہ نکال لے؟ وہ اِن باتوں کا جواب نہ دے سکے۔ جب اُس نے دیکھا کہ مہمان صدرجگہ کِس طرح پسند کرتے ہیں تو اُن سے ایک تمثیل کہی کہ جب کوئی تجھے شادی میں بُلائے تو صدر جگہ پر نہ بیٹھ کہ شاید اُس نے کِسی تُجھ سے بھی زیادہ عزت دار کو بُلایا ہو ۔ اور جس نے تُجھے اور اُسے دونوں کو بُلایا ہے آ کر تُجھ سے کہے کہ اِس کو جگہ دے۔ پھِر تُجھے شرمندہ ہو کر سب سے نیچے بیٹھنا پڑے۔ بلکہ جب تُو بُلایا جائے تو سب سے نیچی جگہ جا بیٹھ تا کہ جب تیرا بُلانے والا آئے تو تُجھ سے کہے اے دوست آگے بڑھ کر بیٹھ! تب اُن سب کی نظر میں جو تیرے ساتھ کھانا کھانے بیٹھے ہیں تیری عزت ہو گی۔ کیونکہ جو کوئی اپنے آپ کو بڑا بنائے گا وہ چھوٹا کیا جائے گا اور جو اپنے آپ کو چھوٹا بنائے گا وہ بڑا کیا جائے گا۔ پھِر اُس نے اپنے بُلانے والے سے بھی یہ کہا کہ جب تُو دِن کا یا رات کا کھانا تیار کرے تو اپنے دوستوں یا بھائیوں یا رشتہ داروں یا دولتمند پڑوسیوں کو نہ بُلا تا کہ ایسا نہ ہو کہ وہ بھی تُجھے بُلائیں اور تیرا بدلہ ہو جائے۔ بلکہ جب تُو ضیافت کرے تو غریبوں لُنجوں لنگڑوں اندھوں کو بُلا۔ اور تُجھ پر برکت ہو گی کیونکہ اُن کے پاس تُجھے بدلہ دینے کو کُچھ نہیں اور تُجھے راستبازوں کی قیامت میں بدلہ ملے گا۔" (انجیل بمطابق لوقا 14: 1- 14)

ایک فریسی نے سبت کے دِن یسوع کی کھانے پر دعوت کی جہاں آپ نے ایک ایسے شخص کو دیکھا جسے جلندر تھا۔ یسوع نے وہاں موجود افراد سے پوچھا کہ کیا سبت کے دِن شفا دینا روا ہے یا نہیں؟ اُنہوں نے محسوس کیا کہ اگر وہ کچھ کہیں گے تو اُنہیں ویسے ہی شرمندگی کا سامنا کرنا پڑے گا جیسے عبادتخانہ میں ہوا تھا۔ اِس لئے وہ خاموش رہے۔ مسیح نے اپنے مخالفوں کو اُن کی بُری سوچوں اور تنقید پر جھڑکنے کے بعد اُس بیمار شخص کو شفا بخشی اور رُخصت کیا۔ پھر مسیح نے یہ بھی دیکھا کہ اِس کھانے پر کیسے مہمان صدر جگہ پسند کر رہے تھے۔ تب آپ نے اِس موقع کو اُنہیں حلیمی کے بارے میں ایک سبق سکھانے کےلئے استعمال کیا کہ خدا تعالیٰ حلیم کو سرفرازی بخشتا ہے اور مغرور کو شرمندہ کرتا ہے۔

پھر یسوع اپنے میزبان کی طرف متوجہ ہوئے اور اُسے یاد دِلایا کہ جو اپنے دوستوں اور امیروں کو اپنی ضیافتوں میں بُلاتے ہیں وہ اِس دُنیا میں اپنا اجر پا لیتے ہیں کیونکہ وہ بھی بدلہ میں اُنہیں اپنی ضیافتوں میں بُلاتے ہیں۔ تاہم، قیامت میں بدلہ پانے کا متمنی شخص غریبوں اور رد کئے ہوﺅں کو بُلائے گا اور کھانا کھلائے گا۔ دوسروں کی حقیقی مہمان نوازی اِس جہان یا آنے والے جہان میں کسی بدلہ کے بغیرخدا تعالیٰ کی محبت کی بناء پر کی جاتی ہے۔ ایسی مہمان نوازی کےلئے خداوند نے اجر کا وعدہ بھی کیا ہے۔

"جو اُس کے ساتھ کھانا کھانے بیٹھے تھے اُن میں سے ایک نے یہ باتیں سُن کر اُس سے کہا مبارک ہے وہ جو خدا کی بادشاہی میں کھانا کھائے۔ اُس نے اُس سے کہا ایک شخص نے بڑی ضیافت کی اور بہت سے لوگوں کو بُلایا۔ اور کھانے کے وقت اپنے نوکر کو بھیجا کہ بُلائے ہوﺅں سے کہے آﺅ۔ اب کھانا تیار ہے۔ اِس پر سب نے مل کر عُذر کرنا شروع کیا۔ پہلے نے اُس سے کہا میں نے کھیت خریدا ہے مجھے ضرور ہے کہ جا کر اُسے دیکھوں۔ میں تیری مِنّت کرتا ہوں مجھے معذور رکھ۔ دوسرے نے کہا میں نے پانچ جوڑی بیل خریدے ہیں اور اُنہیں آزمانے جاتا ہوں۔ میں تیری مِنّت کرتا ہوں مجھے معذور رکھ۔ ایک اَور نے کہا میں نے بیاہ کیا ہے۔ اِس سبب سے نہیں آ سکتا۔ پس اُس نوکر نے آ کر اپنے مالک کو اِن باتوں کی خبر دی۔ اِس پر گھر کے مالک نے غصے ہو کر اپنے نوکر سے کہا جلد شہر کے بازاروں اور کوچوں میں جا کر غریبوں لُنجوں اندھوں اور لنگڑوں کو یہاں لے آ۔ نوکر نے کہا اے خداوند! جیسا تُو نے فرمایا تھا ویسا ہی ہوا اور اب بھی جگہ ہے۔ مالک نے اُس نوکر سے کہا کہ سڑکوں اور کھیت کی باڑوں کی طرف جا اور لوگوں کو مجبور کر کے لا تا کہ میرا گھر بھر جائے۔ کیونکہ میں تم سے کہتا ہوں کہ جو بُلائے گئے تھے اُن میں سے کوئی شخص میرا کھانا چکھنے نہ پائے گا۔" (انجیل بمطابق لوقا 14: 15- 24)

یسوع کی ضیافتوں سے متعلقہ تعلیم کو سُن کر وہاں موجود ایک شخص نے یوں کہتے ہوئے اپنی رائے دی: "مبارک ہے وہ جو خدا کی بادشاہی میں کھانا کھائے۔" اُسے اِس بات کا یقین تھا کہ وہ بھی ایسوں میں شامل ہو گا۔ مسیح نے ضیافت کو دینداری کی ایک علامت کے طور پر استعمال کرتے ہوئے ایک تمثیل پیش کی کیونکہ حقیقی دینداری یا روحانیت رُوح کو آسودہ کرتی اور خوشی بخشتی ہے۔

خدا تعالیٰ ہمیں اِس ضیافت کی مُفت دعوت دیتا ہے اور ہمیں اِس دعوت کو قبول یا رد کرنے کی مکمل آزادی بھی دیتا ہے۔ وہ اُن سب کو اپنے گلے لگاتا ہے جو اُس کے الہٰی حکم کی طرف توجہ دیتے ہیں۔ اِس تمثیل میں یسوع نے ایک معزز شخص کے بارے میں بتایا جس نے اپنے گھر میں ایک بڑی ضیافت کی اور بہت سے لوگوں کو بُلایا، لیکن اُنہوں نے اپنے اپنے عُذر پیش کئے اور دعوت میں نہ آئے۔

مسیح نے مذہبی لوگوں کو دعوت دی، لیکن چونکہ اُنہوں نے آنے سے انٰکار کر دیا تو آپ نے محصول لینے والوں اور گنہگاروں کو بالکل ویسے ہی دعوت دی جیسے اِس تمثیل میں غریبوں اور لُنجوں کو دعوت دی گئی۔ تمثیل میں معزز شخص نے اپنی بڑی ضیافت کو بازاروں اور کوچوں کے لوگوں کےلئے کھولا، جو کہ غیراقوام کی طرف اشارہ ہے کہ وہ اُس پیغام کو قبول کریں گے جسے یہودیوں نے رد کر دیا تھا اور یوں توبہ اور ایمان کی راہ پر آ جائیں گے۔

مسیح نے مذہبی راہنماﺅں کو اُن لوگوں کے ساتھ تشبیہ دی جو کہتے ہیں، "میں نے کھیت خریدا ہے" یا "میں نے پانچ جوڑی بیل خریدے ہیں" یا "میں نے بیاہ کیا ہے۔ اِس سبب سے نہیں آ سکتا۔" مذہب کے معاملہ میں جھوٹی معذرتیں عام ہیں، جو ہر طرف پھیلی ہوئی اورخطرناک ہیں۔ مسیح نے اُن لوگوں پر الٰہی غضب کا اعلان کیا جو عُذر پیش کرتے ہوئے نجات کی الہٰی ضیافت کی بےقدری کرتے ہیں۔ وہ اُن لوگوں کی حماقت کی ترجمانی بھی کرتے ہیں جو آسمانی اجر کی نسبت دُنیوی فائدہ کو مقدم جانتے ہیں۔ ایسے لوگ سوچتے ہیں کہ اُن کے حماقت پر مبنی عُذر اُنہیں فائدہ دیں گے، یا پھر یہ خیال کرتے ہیں کہ اُن کےلئے ابدی زندگی کا دروازہ ہمیشہ کُھلا رہے گا۔

عزیز قاری، مسیح کی محبت کی ضیافت کادعوت نامہ آپ تک پہنچا ہے، اور اَب آپ کیا اپنی جان کی آسودگی کےلئے اُس کے پاس آنے کے متمنی ہیں؟ وہ ضیافت میں آپ کا ساتھ چاہتا ہے (نیا عہدنامہ، مکاشفہ 3: 20)۔ کیا آپ اُس کی دعوت کو قبول کریں گے؟ کیا آپ اپنے دِل کے دروازہ کو اُس کےلئے کھولیں گے؟ عُذر پیش کرنے چھوڑ دیں اور اِس عظیم ضیافت میں اپنی جان کو آسودگی پانے دیں۔