سیرت المسیح، حصّہ 3، مسیح کا اختیار اور تعلیمات

"اور ایک کوڑھی نے اُس کے پاس آ کر اُس کی مِنّت کی اور اُس کے آگے گُھٹنے ٹیک کر اُس سے کہا، اگر تُو چاہے تو مجھے پاک صاف کر سکتا ہے۔ اُس نے اُس پر ترس کھا کر ہاتھ بڑھایا، اور اُسے چُھو کر اُس سے کہا، میں چاہتا ہوں۔ تُو پاک صاف ہو جا۔ اور فی الفور اُس کا کوڑھ جاتا رہا اور وہ پاک صاف ہو گیا۔ اور اُس نے اُسے تاکید کر کے فی الفور رُخصت کیا۔ اور اُس سے کہا، خبردار کسی سے کچھ نہ کہنا مگر جا کر اپنے تئیں کاہن کو دِکھا اور اپنے پاک صاف ہو جانے کی بابت اُن چیزوں کو جو موسیٰ نے مُقرر کیں نذر گُزران تا کہ اُن کےلئے گواہی ہو۔ لیکن وہ باہر جا کر بہت چرچا کرنے لگا، اور اِس بات کو ایسا مشہور کیا کہ یسوع شہر میں پھر ظاہراً داخل نہ ہو سکا بلکہ باہر ویران مقاموں میں رہا اور لوگ چاروں طرف سے اُس کے پاس آتے تھے۔" (انجیل بمطابق مرقس 1: 40-45)

یسوع نے کئی ایسے بیمار لوگوں کو شفا بخشی جو کوڑھ کے مرض میں مبتلا تھے۔ ماضی کے وقتوں میں اِس بیماری کو گناہ اور ناپاکی کا ایک نشان سمجھا جاتا تھا۔ کوڑھ کی بیماری سے شفا کےلئے استعمال کی جانے والی اصطلاح "پاک صاف کرنا" ہے، جو ظاہر کرتی ہے کہ یہ بیماری گناہگاروں کے خلاف خدا کے غضب کی ایک علامت تصور کی جاتی تھی۔

یہودیوں کی طب کی کتابوں میں سِوائے کوڑھ کی بیماری کے باقی ہر قسم کی بیماری کے علاج کا بیان ملتا ہے کیونکہ اِسے صرف خدا کے ایک معجزہ کی بدولت ہی قابل علاج تصور کیا جاتا تھا۔ ہم الیشع نبی کے ایام میں نعمان سوریانی کی شفا کی بابت یہورام بادشاہ کے الفاظ میں اِس تصور کی ایک جھلک دیکھ سکتے ہیں (2- سلاطین 5: 7)۔

ایک کوڑھی سے توقع کی جاتی تھی کہ وہ تمام لوگوں سے یہاں تک کہ اپنے گھر کے افراد سے بھی دُور رہے۔ اگر وہ کسی شہر میں داخل ہونے کی کوشش کرتا تو اُسے چالیس کوڑے مارے جاتے تھے۔

یوں ایک کوڑھی کو حقیقت میں مُردہ تصور کیا جاتا تھا اور اُس کو چھونے والا ہر فرد ناپاک ہو جاتا تھا۔ کوڑھیوں کو حکم دیا جاتا تھا کہ وہ اپنے کپڑے پھاڑ کر، اپنے سر کو ننگا کر کے، اپنے منہ کو ڈھانپ کر، اور نہائے بغیر رہتے ہوئے ماتم کا اظہار کرتے رہیں۔ ایک کوڑھی کو ہمیشہ چِلّا کہ یہ کہنا ہوتاتھا کہ "ناپاک، ناپاک" تا کہ دوسرے اُس کے قریب آنے سے بچیں۔ جب ایک کوڑھی شفا پا جاتا تو اُسے کاہن سے اپنی صحت کا تصدیق نامہ حاصل کر کے اِس کا ثبوت دینا ہوتا تھا۔

یسوع ایک دِن ایک شہر میں گئے، اور ایک کوڑھی آپ کے پاس آیا۔ کوڑھیوں کو دوسروں کے پاس آنے سے منع کیا جاتا تھا۔ ہم تصور کر سکتے ہیں کہ لوگوں کا ہجوم ناپاک ہو جانے کے خوف سے وہاں سے ہٹ گیا ہو گا۔ اُس کوڑھی کی حالت لازماً انتہائی ناگفتہ بہ ہو گی۔ اُس کا سر ننگا ہو گا، کپڑے پھٹے ہوں گے، پھیلی ہوئی بیماری کی وجہ سے آواز بھرائی ہوئی ہو گی۔

مُقدّس لوقا انجیل نویس بتاتا ہے کہ وہ شخص کوڑھ سے بھرا ہُوا تھا، اور وہ منظر یقیناً خوفزدہ کر دینے والا ہو گا، اُس کی ناک، کان، ہونٹ اور پپوٹے غالباً گل سڑ گئے ہوں گے اور وہ "ناپاک، ناپاک" چِلّاتے ہوئے چلا آتا ہو گا۔ جب اُس نے یسوع کو دیکھا تو آپ کے آگے گھٹنوں کے بل گر گیا۔

اُس کی ظاہری حالت کو تصور میں لایا جائے تو وہ یقیناً انتہائی مایوس و پریشان محسوس کرتا ہو گا۔ لیکن حقیقت میں وہ خوش قسمت تھا کہ خدا کے رُوح نے اُسے اُبھارا کہ مسیحا کے حضور جُھک جائے جسے اُس نے خداوند کہہ کر پکارا۔ اِس کوڑھی سے پہلے مسیح کے حضور جنہوں نے جھک کر سجدہ کیا تھا وہ پورب سے آنے والے مجوسی تھے۔ اِس کوڑھی کے سجدے کی تقلید کرتے ہوئے مختلف قوموں اور نسلوں کے لاکھوں کروڑوں لوگ مسیح کے حضور سجدہ ریز ہوئے۔

یہاں مسیح کے وہ پُراختیار الفاظ ہمارے ذہن میں آتے ہیں جب آپ نے ابلیس کو جھڑکتے ہوئے کہا "لکھا ہے کہ تُو خداوند اپنے خدا کو سجدہ کر، اور صرف اُسی کی عبادت کر۔" یسوع اِس پرستش کو کیسے قبول کر سکتے تھے؟ یہاں تک کہ مسیح کے رسولوں اور فرشتوں نے بھی لوگوں کو اپنی عبادت کرنے سے روکا کیونکہ یہ منع تھا۔ وہ جانتے تھے کہ وہ مکمل طور پر مسیح سے مختلف تھے، اور وہ خدا کے اِس الہٰی حق سے حسد نہیں کرتے تھے جو تمام عبادت و پرستش، عزت و تعظیم کا واحد حقدار ہے۔ لیکن یسوع مسیح چونکہ مجسم خدا ہیں اِس لئے اُنہوں نے اُس کوڑھی کی طرف سے کی جانے والے پرستش کو قبول کیا۔

اِس کوڑھی کا واقعہ ہمیں حیران کر دیتا ہے۔ اُس کے دِل میں ایمان کیونکر پیدا ہُوا؟ یسوع کی مدد کے متمنی دوسرے بیمار لوگوں نے کہا "... لیکن اگر تُو کچھ کر سکتا ہے تو ہم پر ترس کھا کر ہماری مدد کر" (انجیل بمطابق مرقس 9: 22)۔ اُنہوں نے یہ الفاظ تب کہے جب اُن کی بیماریاں اکثر و بیشتر قابل علاج تھیں۔ اور یہ کوڑھی جس کی بیماری کے بارے میں سمجھا جاتا تھا کہ ناقابل علاج ہے پکار کر کہنے لگا "اگر تُو چاہے تو مجھے پاک صاف کر سکتا ہے۔" اِن الفاظ کے ساتھ اُس کوڑھی نے اپنے ایمان کا اظہار کیا کہ صرف مسیح ہی اُسے ٹھیک کر سکتا تھا، اور یہ وہ کام تھا جو صرف خدا ہی کر سکتا تھا۔

کوڑھی فروتنی کا مظاہرہ کرتا ہے، اور یسوع سے شفا دینے کا تقاضا نہیں کرتا۔ اپنی بڑی ضرورت کے باوجود اُس نے مسیح کی مرضی کی تعظیم کی، اور اپنی بڑی حلیمی اور ایمان کی وجہ سے وہ اِس قابل ہو سکا کہ یسوع کی طرف سے شفا کو پا سکے۔

چونکہ کوڑھی کا ایمان صاف ظاہر تھا، اِس لئے مسیح نے اُسے شفا دینے میں دیر نہ کی۔ آپ نے فوراً اُس آدمی کو تسلی دی اور بتایا کہ آپ اُسے شفا دینا چاہتے ہیں۔

جب ایمان لانے والے اپنے گناہوں سے شفا کی خاطر مسیح کے حضور التجا کرتے ہیں تو آپ اُنہیں جواب دینے میں کبھی بھی تاخیر نہیں کرتے۔ آپ اپنی معافی کی بدولت فوری نجات بخش دیتے ہیں۔

یسوع نے اُس کوڑھی کی درخواست پر محض ایک میکانکی ردعمل کی وجہ سے شفا نہیں دی کیونکہ آپ ایسے نہیں ہیں۔ یسوع نے ایسا اِس لئے بھی نہیں کیا تھا کہ آپ مشہور ہونا چاہتے تھے کیونکہ بعد میں آپ نے اُس کوڑھی کو اِس شفا کے بارے میں دوسروں کو بتانے سے منع کیا۔ یسوع نے اِس زبردست معجزہ کو صرف اِس وجہ سے کیا کہ آپ کو اُس پر ترس آیا، آپ نے رحم و ترس کی بدولت ایسا کیا۔ آپ نے اپنا ہاتھ بڑھا کر اُسے چھوا۔

جب یسوع نے اُسے چھوا، تو آپ گویا اعلان کر رہے تھے کہ خدا محبت ہے۔ اپنے خاندان سے کئی سالوں کی جدائی اور اِس خوفناک بیماری کے ہاتھوں دُکھ پانے کے بعد اِس شخص کے زبردست ایمان نے اِس کےلئے یہ ممکن کیا۔ مسیح نے اُسے چھونے کے ذریعے آرام بخشا۔ جب یسوع نے اُس شخص کے سر پر ہاتھ رکھ کر یہ کہا کہ "میں چاہتا ہوں۔ تُو پاک صاف ہو جا" تو اُس کا دِل کس قدر خوشی سے معمور ہو گیا ہو گا۔ اِن الفاظ نے اُس کوڑھی کو بحال کر دیا اور وہ اندر اور باہر سے نیا ہو گیا۔

یسوع نے مذہبی رسومات کے مقابلہ میں محبت کی فضیلت پر زور دیا۔ آپ نے فرمایا: "میں قربانی نہیں بلکہ رحم پسند کرتا ہوں" (انجیل بمطابق متی 12: 7)۔ مسیح ایک حتمی کفارہ بخش قربانی ہونے کےلئے مجسم خدا کے طور پر آئے۔ کوڑھی کو چھونے کے ذریعے سے آپ نے مخلصی کے اپنے اُس کام کی ایک جھلک پیش کی جس کا ذِکر ہمیں نئے عہدنامہ میں 2-کرنتھیوں 5: 21 میں ملتا ہے: "جو گناہ سے واقف نہ تھا اُسی کو اُس نے ہمارے واسطے گناہ ٹھہرایا تا کہ ہم اُس میں ہو کر خدا کی راستبازی ہو جائیں۔"

یسوع کوڑھی کی شفا کی خبر کی مشہوری سے پیدا ہونے والی مشکلات کو جانتے تھے، لیکن شفا پانے والا وہ شخص اِس قدر شادمان تھا کہ وہ سب کو اِس بارے میں بتانا چاہتا تھا۔ یسوع نے اُسے کہا "خبردار کسی سے کچھ نہ کہنا۔"

یسوع یہ نہیں چاہتے تھے کہ ہجوم یہ سوچے کہ وہ کوڑھی کو چھونے سے ناپاک ہو گئے تھے۔ یوں آپ کی خدمت میں رکاوٹ پیدا ہو جاتی۔ یسوع یہ بھی نہیں چاہتے تھے کہ آپ کے اردگرد اَور زیادہ ہجوم جمع ہو، کیونکہ اِس سے آپ کے بشارت اور تعلیم دینے کے اہم کام میں رکاوٹ پیدا ہو جاتی۔

یوحنا خروسستم آبائے کلیسیا میں سے ایک نے کہا کہ شفا پانے والوں سے یسوع چاہتے تھے کہ وہ خاموش رہیں اور آپ سے عزت و تکریم سے پیش آئیں۔ وہ اُن سے چاہتے تھے کہ وہ اپنے لئے خدا کی رحمتوں کو یاد رکھیں تا کہ احساسِ غرور کا شکار نہ ہو جائیں۔ وہ نہیں چاہتے تھے کہ جب بہت سے لوگ ہونے والے معجزات سے متاثر ہوں تو ایسی صورتحال میں وہ مشہوری کے طالب ہوں۔

یسوع نے اُس آدمی کو ایک حکم دیا: "جا کر اپنے تئیں کاہن کو دِکھا۔" یہ ہر ایک یہودی کی بنیادی ذمہ داری تھی کہ وہ موسوی شریعت کی فرمانبرداری کرے، اور یسوع اُس شفا پانے والے کوڑھی سے چاہتے تھے کہ وہ یروشلیم میں کاہن کے پاس جائے تا کہ اُس سے اپنی شفا کی تصدیق کروائے۔ ایک کاہن کی طرف سے اپنی شفا کی تصدیق کی بدولت اُس کےلئے ممکن ہو جانا تھا کہ وہ واپس اپنے لوگوں کے پاس لوٹ سکتا۔ ایسی تصدیق حاصل کرنا آسان کام نہیں تھا، مگر یہ ضروری تھا۔

یسوع یہ نہیں چاہتے تھے کہ اُس وقت وہ شفا پانے والا کوڑھی اپنے معجزاتی طور پر ٹھیک کئے جانے کے بارے میں دوسروں کو خبر دے کیونکہ کاہن اُسے پاک صاف ہونے کا تصدیق نامہ دینے سے انکار کر سکتا تھا کہ اگر اُسے پتا چل جاتا کہ اُس نے شفا کیسے پائی تھی، اور اِس کی وجہ یہ تھی کہ کاہن یسوع سے نفرت کرتے تھے۔

شفا پانے والے کوڑھی نے یسوع کی نافرمانی کی اور دوسروں کو اپنی شفا کے بارے میں بتانا شروع کر دیا۔ جس کا نتیجہ یہ نکلا کہ بہت سے لوگ یسوع کے گرد جمع ہو گئے، اور تب مسیح دور ویران جگہ کو چلے گئے تا کہ اپنے باپ کے ساتھ اکیلے میں وقت گزاریں۔ مُقدّس لوقا انجیل نویس بتاتا ہے کہ "لیکن اُس کا چرچا زیادہ پھیلا، اور بہت سے لوگ جمع ہوئے کہ اُس کی سُنیں اور اپنی بیماریوں سے شفا پائیں۔ مگر وہ جنگلوں میں الگ جا کر دُعا کیا کرتا تھا" (انجیل بمطابق لوقا 5: 15، 16)۔

عزیز قاری، اِس شخص نے جوش میں یسوع کی نافرمانی کی اور نتیجہ مسیح کی خدمت کے مفاد میں نہ تھا۔ اُسے یسوع کے حکم کی پیروی کرنی چاہئے تھی۔ جب مسیح ہمیں ہمارے گناہ سے پُرفضل طور پر نجات بخشتے ہیں تو ضرورت اِس امر کی ہے کہ ہم شکرگزاری کے طور پر اُس کے احکام کی فرمانبرداری کریں۔

"وہ پھِر باہر جھیل کے کنارے گیا، اور ساری بھِیڑ اُس کے پاس آئی اور وہ اُن کو تعلیم دینے لگا۔ جب وہ جا رہا تھا تو اُس نے حلفئی کے بیٹے لاوی کو محصول کی چوکی پر بیٹھے دیکھا اور اُس سے کہا، میرے پیچھے ہو لے۔ پس وہ اُٹھ کر اُس کے پیچھے ہو لیا۔ اور یوں ہوا کہ وہ اُس کے گھر میں کھانا کھانے بیٹھا اور بہت سے محصول لینے والے اور گنہگار لوگ یسوع اور اُس کے شاگردوں کے ساتھ کھانے بیٹھے کیونکہ وہ بہت تھے اور اُس کے پیچھے ہو لئے تھے۔ اور فرِیسیوں کے فقیہوں نے اُسے گنہگاروں اور محصول لینے والوں کے ساتھ کھاتے دیکھ کر اُس کے شاگردوں سے کہا، یہ تو محصول لینے والوں اور گنہگاروں کے ساتھ کھاتا پیتا ہے۔ یسوع نے یہ سُن کر اُن سے کہا، تندرستوں کو طبیب کی ضرورت نہیں بلکہ بیماروں کو۔ میں راستبازوں کو نہیں بلکہ گنہگاروں کو بُلانے آیا ہوں۔" (انجیل بمطابق مرقس 2: 13-17)

یسوع محصول کی چوکی کے پاس کھڑا تھا جہاں تاجروں سے محصول وصول کیا جاتا تھا۔ آپ نے وہاں ایک محصول لینے والے شخص سے کہا "میرے پیچھے ہو لے۔" جیسے مسیح نے متی محصول لینے والے کو اپنے پیچھے چلنے کی دعوت دی ویسے ہی وہ آج آپ کو بھی اپنے پیچھے چلنے کےلئے بلاتا ہے۔

اگر ہم اِس دعوت پر گیان دھیان کریں تو ہم دیکھ سکتے ہیں کہ یہ اُتنا سادہ نہیں جتنا دِکھائی دیتا ہے۔ مثلاً، اِس شخص کے تعلق سے بہت سی ایسی باتیں تھیں کہ دوسرے اِسے دیکھ کر پسند نہیں کرتے تھے، اور اَب وہ مسیح کے ساتھ تھا۔ یہ سچ ہے کہ وہ اُن کے اپنے شہر کفرنحوم کا رہنے والا تھا۔ اُس کا نام "متی" تھا جس کا مطلب ہے "خدا کا تحفہ۔" اُس کا عبرانی نام "لاوی" تھا جس کا مطلب ہے "کاہن"، جس سے ظاہر ہوتا ہے کہ وہ ایک معزز کاہن خاندان سے تعلق رکھتا تھا۔ وہ تعلیم یافتہ اور امیر شخص تھا، لیکن ایک محصول لینے والا بھی تھا اور اِس پیشہ سے تعلق رکھنے والے افراد کو ناپسندیدگی اور نفرت سے دیکھا جاتا تھا۔ مسیح کے شاگردوں کو غالباً اِس دعوت کے دیئے جانے پر تشویش لاحق ہو گئی ہو گی کہ متی اَب اُن کے ساتھ شامل ہو جائے گا۔ چونکہ متی نے یسوع کی دعوت قبول کی اور آپ کا شاگرد بن گیا، اِس لئے مسیح کے تمام مخالف خوش ہوئے اور اُنہوں نے سوچا کہ یوں مسیح کی شہرت پر حرف آئے گا۔

جناب مسیح کی طرف سے متی کو دیا جانے والا دعوت نامہ ہمیں آپ کی عظمت کی وضاحت پیش کرتا ہے کہ آپ اپنے زمانہ کے لوگوں کی آراء سے متاثر نہ تھے۔ یہ آپ کی الہٰی فطرت کا بھی ایک ثبوت ہے کیونکہ باقی سب لوگوں کو اِس بات کی فکر ہوتی ہے کہ دوسرے لوگ اُن کے بارے میں کیا سوچتے ہیں اور معاشرے کے مطابق ڈھلنے کی کوشش کرتے ہیں۔ کیا خدا تعالیٰ نے اپنے لوگوں سے یہ نہیں کہا تھا: "... میرے خیال تمہارے خیال نہیں اور نہ تمہاری راہیں میری راہیں ہیں" (یسعیاہ 55: 8)۔ اپنے ہمعصر افراد سے برعکس عمل کی بدولت یسوع نے دکھایا کہ آپ اُن سے فرق ہیں کیونکہ آپ کے اصول اور خیالات لاثانی تھے۔ آپ اِس زمین سے نہ تھے۔ یہودی راہنما محصول لینے والوں سے نفرت کرتے تھے اور اُنہیں اُن کے شہری حقوق سے محروم رکھتے تھے۔ وہ عدالت میں اُن کی گواہی کو قبول نہیں کرتے تھے، اور اُنہیں سود خوروں، جواریوں، ڈاکوﺅں، خونیوں، حرامکاروں اور غیرقوم والوں کے برابر سمجھتے تھے۔ محصول لینے والوں سے وہ خیراتی کاموں کےلئے مدد بھی طلب نہ کرتے تھے، اور نہ ہی اُن کے ساتھ کھانا کھانے کےلئے بیٹھتے تھے۔ وہ محصول لینے والوں کو جنگلی جانوروں کے ساتھ تشبیہ دیتے تھے۔ یوں جن افراد نے محصول جمع کرنے کے پیشہ کو اپنایا ہوتا تھا، اِس برے برتاﺅ کے نتیجہ میں وہ اَور زیادہ بدعنوان ہوتے جاتے۔

اَب سوال یہ پیدا ہوتا ہے کہ کیوں یسوع نے ایک محصول لینے والے فرد کو دعوت دی کہ وہ آپ کے پیچھے ہو لے، آپ کا ایک شاگرد اور بعد میں ایک رسول بن جائے؟ اِس کا جواب یہ ہے کہ یسوع نے دوسرے یہودیوں کی طرح برتاﺅ نہ کیا جو لوگوں کے اِس گروہ سے نفرت رکھتے تھے۔ اپنی عظیم محبت میں یسوع ہر کسی تک گئے جس میں خاص طور پر معاشرے کے دھتکارے ہوئے افراد شامل تھے، اور اُن پر خدا کی شفقت و مہربانی کو ظاہر کیا۔ اِسی لئے یسوع نے ایک محصول لینے والے کو اپنی پیروی کرنے کی دعوت دی۔

یسوع کے نزدیک محصول لینے والوں کے مقابلہ میں مذہبی راہنماﺅں کے قصور کہیں زیادہ تھے اور وہ سزا کے زیادہ مستحق تھے۔ اگر فریسی یہ بات سمجھ جاتے تو وہ آنے والی سزا سے بچ جاتے۔ لیکن اُنہوں نے اِس حقیقت کو نہ سمجھا جس کی وجہ سے یسوع نے کئی مرتبہ اُن کی برملا مُذمّت کی۔ مذہبی ریاکار جو اپنے آپ کو راستباز ظاہر کرتے ہیں اُن کی نسبت وہ گنہگار جو اپنی تقصیروں کو جانتے اور اُن کا یسوع کے حضور اقرار کرتے ہیں خدا کی بادشاہی کے زیادہ نزدیک ہیں۔ اِسی وجہ سے فریسیوں سے پہلے ایک ناپسندیدہ محصول لینے والے فرد کو آسمان کی بادشاہی میں داخلے کا موقع دیا گیا۔

یسوع نے اِس سے پہلے ایک سامری عورت کی توبہ اور ایمان کی طرف راہنمائی کرنے سے معاشرے کے ایک دھتکارے ہوئے فرد کو نجات بخشی تھی۔ اور اَب آپ نے متی کو اپنی روحانی بادشاہی میں داخل ہونے کی دعوت دی۔ یسوع نے اِس بات کی وضاحت بھی کی کہ یہ محصول لینے والوں کی بداعمالی تھی کہ جس کی وجہ سے بطور طبیب اعظم آپ نے اُن پر اپنی خاص توجہ دی۔ آپ تندرستوں کو نہیں بلکہ بیماروں کو ڈھونڈنے اور شفا دینے آئے۔ فریسیوں کا نجات دہندہ، محصول لینے والوں کا بھی نجات دہندہ ہے۔

ایک مرتبہ آپ نے یہودیوں کے سردار کاہنوں اور بزرگوں کو دو بیٹوں کی تمثیل سنا کر پوچھا "اِن دونوں میں سے کون اپنے باپ کی مرضی بجا لایا؟" اُن بزرگوں نے جواب دیا "پہلا"۔ جواب میں یسوع نے اُنہیں کہا "میں تم سے سچ کہتا ہوں کہ محصول لینے والے اور کسبیاں تم سے پہلے خدا کی بادشاہی میں داخل ہوتی ہیں۔ کیونکہ یوحنا راستبازی کے طریق پر تمہارے پاس آیا اور تم نے اُس کا یقین نہ کیا مگر محصول لینے والوں اور کسبیوں نے اُس کا یقین کیا اور تم یہ دیکھ کر پیچھے بھی نہ پچھتائے کہ اُس کا یقین کر لیتے" (انجیل بمطابق متی 21: 31، 32)۔ یہاں یسوع اِس حقیقت کی طرف اشارہ کر رہے تھے کہ آپ کے ساتھ بھی لوگ ویسا ہی برتاﺅ کریں گے جیسے یوحنا بپتسمہ دینے والے کے ساتھ پیش آئے تھے جسے توبہ کرنے والے گنہگاروں نے تو قبول کیا لیکن توبہ نہ کرنے والے یہودیوں کے بزرگوں نے رد کر دیا۔

یوں لگتا ہے کہ متی یسوع مسیح کو پہلے ہی جانتا تھا۔ غالباً اُس نے یسوع کی منادی کئی بار سُنی تھی اور اُس نے اُس پر گہرا اثر چھوڑا تھا۔ ممکن ہے اُس نے مسیح کے کئی معجزات دیکھے ہوں اور بہت سے اَور لوگوں کی طرح اُس پر سادہ ایمان لے آیا ہو۔ شاید اُس نے اپنے ناپسندیدہ کام سے نفرت کرنی شروع کر دی ہو اور اُسے چھوڑنے کی تمنا کر رہا ہو۔ یسوع نے اُس کے دِلی رویہ پر نگاہ کی، اور یوں وہ جانتے تھے کہ متی آپ کی پیروی کرنے کےلئے تیار تھا، اِس لئے آپ نے اُسے دعوت دی۔ متی نے اپنا سب کچھ چھوڑا اور آپ کے پیچھے ہو لیا۔ الہٰی فضل کا کام اُس میں آشکارا تھا، کیونکہ اُس میں روپے پیسے کےلئے محبت جاتی رہی اور اُس نے اپنا سب کچھ مسیح کی خاطر قربان کر دیا۔

متی نے مسیح کی خاطر نہ صرف اپنا نفع بخش کام چھوڑا، بلکہ آپ کےلئے اپنے گھر میں ایک بڑی ضیافت کا اہتمام بھی کیا۔ اُس نے اپنے کئی ساتھیوں کی بھی وہاں ضیافت کی کیونکہ غالباً وہ چاہتا تھا کہ وہ بھی مسیح کو جان جائیں اور اُس نور کو حاصل کر لیں جو اُسے مل گیا تھا۔ مسیح کے ہر روشن ضمیر پیروکار کو ایسے ہی کرنا چاہئے۔ متی وہ واحد شاگرد تھا جس نے یسوع کےلئے ایسی ضیافت کا اہتمام کیا۔ وہ یسوع کےلئے اپنی ممنونیت کا اظہار کرنا چاہتا تھا کیونکہ مسیحا نے اُسے اپنا شاگرد ہونے کی دعوت دی تھی اور اُسے اُس کی گنہگار حالت سے چھڑایا تھا۔ دیکھئے، متی کو اپنی ملازمت اور آمد ن کھونی پڑی، مگر اُس نے نجات اور گناہوں سے معافی کو پا لیا۔ جو کچھ اُس نے پہلے حاصل کیا تھا اَب اُسے مسیح کی خاطر ایک نقصان سمجھا۔ یسوع نے اُسے ایک ایسا اجر بخشا جو زمانوں تک قائم رہے گا۔

چاروں انجیلی بیانات میں سے متی کی معرفت لکھا گیا انجیلی بیان سب سے پہلے موجود ہے جو دُنیا میں یسوع مسیح کے آنے کی خوشخبری کو پیش کرتا ہے۔ اُس نے بادشاہوں، سائنسدانوں اور اُمراء پر فضیلت کو حاصل کیا۔ اُس کے لکھے گئی انجیلی بیان کی بدولت بہت سی روحیں مسیح کے قدموں میں آئیں۔ جو کوئی بھی عظیم الہٰی معلم مسیحا کی پیروی اور خدمت کرنے کےلئے اِس دُنیا اور اِس کی تمام بری ترغیبوں کا انکار کرتا ہے، وہ کثرت سے اجر پائے گا۔

متی نے اپنی تبدیل شدہ زندگی کا ثبوت پیش کیا کیونکہ اُس نے فوراً لینے کی نسبت دینے کے بارے میں سوچنا شروع کر دیا۔ کچھ لوگ سمجھتے ہیں کہ کلیسیا میں شامل ہونے سے وہ اُس پر احسان کر رہے ہیں اور پھر وہ بدلے میں دُنیوی فوائد کی توقع کرتے ہیں۔ وہ پطرس کی مانند خطا کا مظاہرہ کرتے ہیں جب اُس نے مسیح سے کہا تھا "... دیکھ ہم تو سب کچھ چھوڑ کر تیرے پیچھے ہو لئے ہیں۔ پس ہم کو کیا ملے گا؟" (انجیل بمطابق متی 19: 27)۔ ایمان لانے کی وجہ سے کلیسیا کو اپنا سرپرست سمجھنے کی نسبت بہتر رویہ یہ ہے کہ وہ اپنی برکات کا ایک بڑا حصہ شکرگزاری کے طور پر دیں۔

اپنے انجیلی بیان میں متی نے بیان کیا ہے کہ کیسے یسوع نے اُسے اپنا شاگرد ہونے کےلئے بلایا۔ حلیمی متی کے کردار کا خاصہ ہے اور اِس وجہ سے متی نے اِس بات کا ذِکر نہیں کیا کہ اُس نے اپنا سب کچھ یسوع کےلئے چھوڑ دیا یا یہ کہ اُس نے یسوع کےلئے ایک بڑی ضیافت کا اہتمام کیا۔ صرف مُقدّس لوقا ہمیں اِس بارے میں بتاتا ہے۔

اِسی طرح ایک اَور قابل ذِکر نکتہ یہ ہے کہ مرقس اور لوقا اپنے انجیلی بیان میں شاگردوں کے ناموں کی فہرست میں متی کےلئے "محصول لینے والا" کے الفاظ استعمال نہیں کرتے، لیکن متی اپنے انجیلی بیان میں اِس قابل نفرت خطاب کو اپنے لئے استعمال کرتا ہے۔ یوں لگتا ہے کہ وہ مسیح کو جلال دینا چاہتا ہے جس نے اپنی بڑی فیاضی میں ایک محصول لینے والے کو اپنے چنے ہوئے شاگردوں میں شامل کیا۔

بہت سی زبانوں میں ایک کہاوت ہے کہ "ہم جنس باہم جنس کند پرواز، کبوتر با کبوتر باز با باز"۔ فریسی مسیح کو تضحیک سے دیکھتے تھے کیونکہ آپ نے گنہگاروں کو اپنی رفاقت میں قبول کیا اور اُن کے ساتھ کھانا کھایا۔ یہ کہاوت مسیح کے بارے میں اُس وقت درست ہوتی کہ اگر آپ نے اُن گنہگاروں کے گناہ میں شمولیت اختیار کی ہوتی۔ لیکن ایسا ہرگز نہ تھا۔ آپ کا گنہگاروں کے ساتھ ملاقات کرنے کا مقصد اُنہیں تبدیل کرنا اور الہٰی نور تک اُن کی راہنمائی کرنا تھا۔

مسیح نے متی کی دعوت قبول کی اور اُس کے گھر میں کھانا کھایا۔ ایسا کرنے سے آپ نے لوگوں کے مختلف گروہوں کے درمیان پائی جانے والی تقسیم کو مٹایا اور دِکھایا کہ خدا کسی کا طرفدار نہیں بلکہ ہر قوم میں جو اُس سے ڈرتا اور راستبازی کرتا ہے وہ اُس کو پسند آتا ہے (اعمال 10: 35)۔ یسوع کے زمانہ کے لوگ اِس حقیقت کو بھول بیٹھے تھے کہ خدا کی نظر میں امیر اور غریب، پڑھے لکھے اور عام سے شخص، بادشاہ اور غلام میں کوئی فرق نہیں۔ یسوع نے اُنہیں یہ اصول سکھایا اور اِسے دُنیا کےلئے ایک قیمتی ورثہ کے طور پر پیچھے چھوڑا۔

اگر متی کے گھر میں ہونے والے اِس غیرمعمولی اکٹھ پر غور کیا جائے تو ایک نمایاں تضاد نظر آتا ہے۔ ایک طرف جناب مسیح ہیں جنہیں آپ کی پیدایش سے پہلے مُقدّس کہا گیا ہے اور آپ کے بارے میں بدارواح نے بھی گواہی دی "... میں تجھے جانتا ہوں کہ تُو کون ہے۔ خدا کا قدوس ہے" (انجیل بمطابق مرقس 1: 24)۔ جبکہ دوسری طرف ہم محصول لینے والوں اور گنہگاروں کے گروہ کو دیکھتے ہیں۔ یہ دونوں گروہ ایک جگہ کیوں اکٹھے موجود تھے؟ اِس سوال کا جواب ہمیں یسوع کے الفاظ میں ملتا ہے کہ "میں راستبازوں کو نہیں بلکہ گنہگاروں کو بُلانے آیا ہوں۔"

جب یسوع نے متی کی دعوت کو قبول کیا تو فقیہ اور فریسیوں نے گِلہ کیا۔ اُنہیں اعتراض اِس بات پر نہیں تھا کہ محصول لینے والے اپنی ہی طرح کے شخص کے ساتھ کھانا کھا رہے تھے بلکہ اُنہوں نے اِس بات کی وجہ سے مسیح سے بیزاری کا اظہار کیا کہ آپ قابل نفرت لوگوں کے ساتھ موجود تھے اور اِس بنا پر اُنہیں موردِ الزام ٹھہرایا۔

جب اِسی شہر کے ایک اَور گھر میں یسوع نے ایک مفلوج کو شفا بخشی تو آپ نے یہودیوں کے راہنماﺅں کے دِلی اعتراضات کا جواب دیتے ہوئے اُن کو جھڑکا۔ غالباً اُنہوں نے آپ کے خلاف اپنے خیالات کا اظہار اعلانیہ اِس لئے نہ کیا تھا کہ وہ اِس بات سے خوفزدہ تھے کہ اُن کی اعلانیہ تنقید کے نتیجہ میں مسیح کا جواب اَور زیادہ سخت ہو گا۔ اِس لئے اُنہوں نے مسیح کے شاگردوں پر چڑھائی کر دی اور اُن سے پوچھنے لگے کہ کیوں اُن کا اُستاد گنہگاروں اور محصول لینے والوں کے ساتھ اُٹھتا بیٹھتا ہے۔

یسوع نے اپنے شاگردوں کو جواب دینے کا موقع نہ دیا۔ آپ نے فوراً خود اِس بات کا جواب دیا۔ شاگرد ابھی اِس دُنیا میں مسیح کی آمد کے بنیادی مقصد سے متعلق اہم سوال کا تسلی بخش جواب دینے کے قابل نہیں تھے۔ اپنے جواب میں یسوع نے اِس بات کی وضاحت پیش کی کہ آپ کے نظر آنے والے کام تو محض آپ کی رُوحانی خدمت کی علامت تھے، آپ نے انسانی بدنوں کو شفا بخشی تا کہ ظاہر ہو کہ آپ انسانی رُوحوں کے بھی شافی ہیں۔ بیماروں کو شفا دینے میں آپ کی دلچسپی کو دیکھنے کے ساتھ ساتھ اُنہیں انسانی جانوں کو گناہ سے شفا دینے میں آپ کی رضا کو بھی سمجھنے کی ضرورت تھی۔

مسیح نے یہودی راہنماﺅں پر اِس حقیقت کو واضح کیا کہ آپ رُوحوں کے بھی طبیب ہیں۔ اُنہیں اِس بات کا احساس کرنا چاہئے تھا کہ نجات دہندہ ہونے کی وجہ سے آپ نے راستبازوں میں نہیں بلکہ گنہگاروں میں اپنی خدمت سرانجام دی۔ ایک طبیب اُس بیمار شخص کا علاج نہیں کرتا جو بالکل تندرست ہونے کا دعویٰ کرتا ہے۔ اِسی طرح اگر ایک گنہگار شخص راستباز ہونے کا دعوی کرے تو وہ مسیح کی بخشی جانے والی نجات نہیں پا سکتا۔ لیکن یہودیوں کے یہ راہنما ایسا ہی کر رہے تھے۔ اُنہیں اپنے مذہبی اُستاد ہونے پر فخر تھا اِس لئے اُن کی دانست میں اُنہیں نجات دہندہ کی ضرورت نہیں تھی۔ اگر وہ واقعی راستباز ہوتے تو کھوئے ہوﺅں کو توجہ دینے اور اُن کی راہ راست کی جانب راہنمائی کرنے پر یسوع کو دیکھ کر خوش ہوئے ہوتے۔ بیماروں پر مسیح کو توجہ دیتے دیکھ کر اُنہیں خوشی کرنی چاہئے تھی۔

جب یسوع نے یہ فرمایا کہ "میں راستبازوں کو نہیں بلکہ گنہگاروں کو بُلانے آیا ہوں"، تو آپ نے اِن الفاظ سے توبہ کی اہمیت کا اظہار کیا۔ اَب وہ توبہ کیا ہے جس کی طرف آپ نے لوگوں کو بلایا؟

سب سے پہلی بات یہ ہے کہ یہ ایک فرد میں اِس بارے میں آگاہی ہے کہ وہ گنہگار ہے اور گناہ گھناﺅنا ہے۔ دوسری بات یہ ہے کہ یہ ایک فرد میں اپنے گناہوں پر غم و ندامت کرنے اور اُنہیں چھوڑنے کا حقیقی عزم مصمم ہے۔ آخری بات یہ ہے کہ ایسا فرد لازماً الہٰی معافی بخشنے والے خدا میں پناہ ڈھونڈے اور وفادار رہنے کےلئے اُس کی مدد کا طالب ہو۔

"اِن باتوں کے بعد یہودیوں کی ایک عید ہوئی اور یسوع یروشلیم کو گیا۔ یروشلیم میں بھیڑ دروازہ کے پاس ایک حوض ہے جو عبرانی میں بیت حسدا کہلاتا ہے اور اُس کے پانچ برآمدے ہیں۔ اِن میں بہت سے بیمار اور اندھے اور لنگڑے اور پژمُردہ لوگ جو پانی کے ہِلنے کے منتظر ہو کر پڑے تھے۔ ... وہاں ایک شخص تھا جو اڑتیس برس سے بیماری میں مُبتلا تھا۔ اُس کو یسوع نے پڑا دیکھا اور یہ جان کر کہ وہ بڑی مُدّت سے اِس حالت میں ہے اُس سے کہا، کیا تُو تندرست ہونا چاہتا ہے؟ اُس بیمار نے اُسے جواب دیا۔ اے خداوند، میرے پاس کوئی آدمی نہیں کہ جب پانی ہلایا جائے تو مجھے حوض میں اُتار دے بلکہ میرے پہنچتے پہنچتے دُوسرا مجھ سے پہلے اُتر پڑتا ہے۔ یسوع نے اُس سے کہا، اُٹھ اور اپنی چارپائی اُٹھا کر چل پھِر۔ وہ شخص فوراً تندرست ہو گیا۔ اور اپنی چارپائی اُٹھا کر چلنے پھِرنے لگا۔ وہ دِن سبت کا تھا۔" (انجیل بمطابق یوحنا 5: 1-9)

یوحنا انجیل نویس ہمیں بتاتا ہے کہ کیسے ایک شخص نے جو اڑتیس برس سے بیمار تھا شفا پائی۔ وہ یروشلیم کے نزدیک بیت حسدا کے حوض کے پاس پڑا رہتا تھا۔ جب بھی اُس حوض کا پانی ہلتا تو لوگوں کا ماننا تھا کہ شفا بخش خواص جاری ہوتے۔ لوگ ہجوم در ہجوم اُس حوض کے پاس پہنچ جاتے۔ اُس کے اردگرد پانچ برآمدے تعمیر کئے گئے تھے تا کہ وہاں لوگ پانی ہلنے کا انتظار کر سکتے۔

ایک سبت کے دِن یسوع اِس حوض کے ایک برآمدے میں تشریف آئے۔ وہاں آپ نے بیماروں، اندھوں، لنگڑوں اور مفلوج لوگوں پر مشتمل پریشان حال بھیڑ دیکھی جو پانی کے ہلنے کی منتظر تھی۔ اِن سب میں سے یسوع نے ایک بوڑھے شخص کو شفا دینے کا فیصلہ کیا اور اپنا ترس ظاہر کر کے معجزہ کیا۔ یسوع نے اِ س خاص شخص کو ہی کیوں چُنا؟ غالباً یہ اُس کی بڑی عمر یا شدید بیماری کی وجہ سے تھا۔ اِس میں کوئی شک نہیں کہ وہ بڑے عرصہ سے اِس حوض پر پڑا تھا۔ ہم یہ نتیجہ نکال سکتے ہیں کہ یسوع کے نزدیک یہ ایسے شخص کی مناسب مثال تھی جسے ایک ایسی بیماری سے روحانی و جسمانی شفا کی ضرورت تھی جس کے بارے میں دوسرے یہ سوچتے تھے کہ یہ اُس کے پوشیدہ گناہوں کا نتیجہ تھی۔ وہ اپنی تکلیف دہ لاعلاج صورتحال پر مایوسی کا شکار تھا۔ جب ایک فرد مایوسی کا شکار ہو جاتا ہے تو جناب مسیح مدد کےلئے اپنا ہاتھ بڑھاتے ہیں۔

مسیح اُس بیمار شخص کے پاس جا کھڑے ہوئے، اُس پر نگاہ کی اور ایک سادہ سا سوال پوچھا: "کیا تُو تندرست ہونا چاہتا ہے؟" گلیل سے تعلق رکھنے والے اِس معلم انسانیت نے ایک ایسے بیمار شخص میں دلچسپی ظاہر کی جس سے پہلے وہ نہیں ملا تھا۔ یوں بھی ہو سکتا تھا کہ یہ شخص ایک اجنبی کے سوال کو اہمیت نہ دیتا لیکن یسوع کےلئے احترام کی وجہ سے اُس نے آپ کو اپنے احساسات کے بارے میں بتایا۔ بلا شک و شبہ وہ مسیح کی موجودگی اور آواز کی وجہ سے متاثر ہوا ہو گا کیونکہ اُس نے نہایت احترام سے جواب دیا: "اے خداوند، میرے پاس کوئی آدمی نہیں کہ جب پانی ہلایا جائے تو مجھے حوض میں اُتار دے بلکہ میرے پہنچتے پہنچتے دُوسرا مجھ سے پہلے اُتر پڑتا ہے۔" اِس آدمی کو شفا دینے کےلئے یسوع کا واحد تقاضا یہ تھا کہ وہ خود اپنی ضرورت کا اظہارکرتا۔ چونکہ یسوع ہر گنہگار کو شفا پاتے ہوئے دیکھنا چاہتے ہیں، اِس لئے آپ نے اُس شخص سے یہ پوچھا کہ کیا وہ واقعی تندرست ہونا چاہتا تھا۔ خدا چاہتا ہے کہ سب نجات پائیں، لیکن ہر گنہگار کو شخصی طور پر نجات کےلئے درخواست کرنی ہوتی ہے۔

اِس شخص کے جواب سے واضح ہے کہ اُس کی بیماری نے اُسے کس قدر لاغر کر دیا تھا کہ پانی ہلنے پر وہ دوسروں سے پہلے حوض میں نہیں اُتر سکتا تھا۔ ہم یہ بھی دیکھتے ہیں کہ وہ اکیلا تھا اور اُس کی مدد کرنے والا کوئی بھی وہاں نہیں تھا۔ اگر وہ صرف یہ جانتا کہ یسوع اِس لئے اُس کے پاس آئے تھے کہ اُسے کوئی مدد میسر نہ تھی، تو وہ مایوسی سے اُمید کی حالت میں داخل ہو جاتا۔ یہ نجات دہندہ اَب بھی اُن سب کوڈھونڈتا اور بچاتا ہے جو اِس بات کا احساس و اقرار کرتے ہیں کہ اُن کےلئے کوئی اَور مدد نہیں ہے۔ مُقدّس داﺅد نے لکھا: "نہ اُمرا پر بھروسا کرو، نہ آدم زاد پر۔ وہ بچا نہیں سکتا" (زبور 146: 3)۔

اِس بیمار شخص کی حوض کے پاس موجودگی سے ہم یہ نتیجہ اخذ کرتے ہیں کہ وہ شفا پانا چاہتا تھا۔ لیکن یسوع نے کیوں اُس سے یہ سوال کیا "کیا تُو تندرست ہونا چاہتا ہے؟" غالباً اِس کی وجہ یہ تھی کہ طویل بیماری اور حوض تک پہنچنے کی کوشش میں مسلسل ناکامی نے اِس بیمار شخص کے بدن کی طرح اُس کے ارادہ اور ہمت کو بھی کمزور کر دیا تھا۔ اِس لئے یہ ضروری تھا کہ اُس کے ارادہ و ہمت میں پھر سے جان پڑتی تا کہ وہ مسیح کی شفا بخش قوت کے حضور اپنا آپ پیش کر دیتا۔ یسوع اُسے اُس سُستی کی حالت میں سے جگانا چاہتے تھے جس سے وہ مانوس ہو چکا تھا، اور اَب آپ کی اُن گنہگاروں کےلئے بھی یہ رضا ہے جو اپنے گناہوں سے نجات پانے کی اُمید میں بیرونی مذہبی رسومات کو اپنا شعار بنائے ہوئے ہیں۔ جب اُس شخص نے اپنی زندگی میں گناہ کی قوت و اثر کو توڑنے کی کوشش کی تو وہ ناکامی سے خوفزدہ تھا، کیونکہ ماضی میں اُسے کئی بار ناکامی کا سامنا کرنا پڑا تھا۔ وقت گزرنے کے ساتھ ساتھ اور بہتری کی کسی اُمید کے بغیر اُس کا ارادہ و ہمت جمود کا شکار ہو گئے تھے اور اُس نے مدد مانگنی بند کر دی تھی۔ اِسی وجہ سے یسوع نے اُس سے پوچھا کہ کیا وہ تندرست ہونا چاہتا تھا۔

جناب مسیح جن کی مدد کرنا چاہتے ہیں اُن سے تاکیدی طور پر پوچھتے ہیں کہ کیا وہ واقعی اُس کی مدد کے طالب ہیں کیونکہ بہت سے لوگ آپ کی طرف سے بخشی جانے والی نجات کو حاصل کرنا نہیں چاہتے۔ مسیح یہ قیمتی بخشش صرف اُنہیں عطا کرتے ہیں جو اپنے پورے دِل سے اِس کے طالب ہوتے ہیں۔

اِس شخص نے شفا پانے کےلئے جس طریقہ پر بھروسا کرنے کا چناﺅ کیا تھا اُس کے برعکس بالکل فرق طرح سے اُسے شفا ملی۔ اُس نے شفا کی برکت کےلئے ہمیشہ حوض کی جانب ہی دیکھا تھا اور اُس وقت کا متمنی ہوتا تھا جس کے بارے میں قیاس یہ کیا جاتا تھا کہ فرشتہ پانی کو ہلاتا ہے۔ لیکن اِس کے برعکس مسیحا وہاں تشریف لائے اور سب فرشتے آپ کی فرمانبرداری کرتے ہیں۔ آپ نے اِس بیمار شخص کو اِس طرح سے مکمل شفا بخشی جس کے بارے میں اُس نے سوچا بھی نہیں تھا۔

مسیح نے اُس بیمار شخص کو کہا "اُٹھ اور اپنی چارپائی اُٹھا کر چل پھِر۔" ہمیں ہرگز اِس بات پر حیرت نہ ہوتی کہ اگر بیمار شخص نے اِن الفاظ میں جواب دیا ہوتا: "برائے مہربانی میری مدد فرمائیے اور جب پانی ہلے تو مجھے حوض میں اُتار دیں۔ تب میں اپنی چارپائی اُٹھانے اور چلنے کے قابل ہوں گا۔ اگر آپ کو واقعی میری صورتحال سے کوئی دلچسپی ہے تو میرے پاس پانی کے ہلنے کا انتظار کریں۔ اِس ضرورت کے وقت میں میرے دوست بنیں۔ وہ فرد بن جائیں جس کی مدد کا میں ہمیشہ سے منتظر تھا۔" تاہم اِس بیمار شخص نے یہ الفاظ نہ کہے، اُس میں ایمان تھا اور اُس نے اُس کے مطابق عمل کیا اور اِس وجہ سے ہم اُسے سراہ سکتے ہیں۔ اِس شخص سے ہم یہ سیکھتے ہیں کہ نجات کےلئے ضروری آگہی مسیح سے اُس کی تعلیمات پر گیان دھیان کرنے سے ملتی ہے۔ یہ ہماری اپنی پیش بینی یا دوسرے لوگوں سے حاصل نہیں ہوتی۔

چونکہ بیماری سے شفا دینا گناہ سے نجات کی علامت ہے، اِس لئے یسوع نے سبت ہونے کے باوجود بیمار شخص کو شفا دینے میں دیر نہ کی۔ اِسی طرح نجات میں بھی تاخیر نہیں کی جا سکتی۔ جب یسوع نے اُس آدمی سے کہا "اُٹھ"، تو جو وہ کر سکتا تھا آپ نے اُسے وہ کرنے کےلئے کہا۔ یسوع اَب بھی گنہگاروں سے کہتے ہیں: "یقین رکھو کہ جو تمہیں اپنے پاس آنے کےلئے کہتا ہے وہ ایسا کرنے کےلئے درکار قوت بھی عطا کرے گا۔ تم بائبل مُقدّس پڑھ سکتے ہو، دُعا میں جھک سکتے ہو، دوسرے ایمانداروں میں رفاقت و نصیحت کو پا سکتے ہو، روحانی قائدین کی مشورت کو حاصل کر سکتے ہو۔ اَب اُٹھ جاﺅ، اور رُوحانی طور پر آگے بڑھو۔"

مسیح نے اُس مایوس شخص کے دِل میں اُمید کی شمع جلائی۔ اُ س نے اپنے پٹھوں میں نئی قوت محسوس کی اور فوراً شفا پا گیا، اور پھر وہ اُٹھ کھڑا ہوا، اپنی چارپائی اُٹھائی اور چلنا شروع کر دیا۔ یسوع نے اُس شخص کو چارپائی اُٹھانے کےلئے کہا۔ یوں آپ چاہتے تھے کہ وہ اپنی مُفت اور مکمل ملنے والی فوری شفا کا اظہار کرے تا کہ اُس کے اِس عمل سے اُس کے شافی کو جلال ملتا۔ آپ اُس سے چاہتے تھے کہ وہ اپنی اُس جگہ کو جہاں وہ کئی سال سے پڑا تھا چھوڑ دے اور پھر کبھی وہاں دوبارہ نہ لوٹے۔ یہ ایسے تھا کہ جیسے یسوع نے اُسے اُٹھنے اور اپنے لئے اور دوسروں کےلئے مُفید کام سرانجام دینے کا حکم دیا۔ مسیح گنہگاروں کو کہتے ہیں: "اَب جب تم نے مُفت اور مکمل معافی کو پایا ہے تو جتنا ممکن ہے اپنے گناہوں کے اثرات کو ختم کرو۔ اِس لئے جاﺅ اور اُس کام کو سرانجام دو جو تمہارے لئے اور دوسروں کےلئے خدا کی مرضی ہے۔ بجائے وہ تمہیں سہارا دیں، تم اُنہیں سہارا دو۔ بجائے وہ تمہاری خدمت کریں، تم اُن کی خدمت کرو۔ اپنے بھلے کاموں سے اپنی نجات کا ثبوت دو۔ اپنی پرانی گناہ آلودہ زندگی کی طرف پھر نہ جانے کے اپنے مصمم ارادہ کا اعلان کرو۔"

جب مسیح نے اُس بیمار شخص کو چلنے کےلئے کہا، تو واضح ہے کہ آپ چاہتے تھے کہ وہ شفا پائے۔ آپ اُس سے یہ بھی چاہتے تھے کہ وہ بیمار لوگوں کی صحبت کو چھوڑے اور تندرست لوگوں کی رفاقت میں شامل ہو، اور اُن کی مانند بن جائے۔ اُسے باہر لوگوں کے پاس جانے کی ضرورت تھی تا کہ اُنہیں دِکھائے کہ یسوع نے اُس کےلئے کیا کیا تھا۔ ہر نجات یافتہ شخص کو اپنی پرانی بگڑی رفاقتوں کو چھوڑنا اور ایمانداروں کی رفاقت میں شامل ہونا چاہئے تا کہ وہ اپنے ایمان میں ترقی کر سکے۔ اپنے الفاظ اور اعمال سے اُسے ہر کسی پر اپنے اندر واقع ہونے والی اہم تبدیلی کو ظاہر کرنا چاہئے، اور ایسا کرنے سے وہ اپنے نجات دہندہ کو جلال دے گا۔ یسوع نے بیت حسدا کے حوضوں کو ایک ایسی جگہ میں بدل دیا جہاں اُن کی شفا دینے کی الہٰی قدرت ظاہر ہوئی۔ یسوع توبہ کرنے والی جگہ کو نجات کی جگہ بنا دیتے ہیں۔

"پس یہودی اُس سے جس نے شفا پائی تھی، کہنے لگے کہ آج سبت کا دِن ہے۔ تجھے چارپائی اُٹھانا رَوا نہیں۔ اُس نے اُنہیں جواب دیا، جس نے مجھے تندرست کیا، اُسی نے مجھے فرمایا کہ اپنی چارپائی اُٹھا کر چل پھِر۔ اُنہوں نے اُس سے پوچھا کہ وہ کون شخص ہے جس نے تجھ سے کہا، چارپائی اُٹھا کر چل پھِر؟ لیکن جو شفا پا گیا تھا وہ نہ جانتا تھا کہ کون ہے کیونکہ بھِیڑ کے سبب سے یسوع وہاں سے ٹل گیا تھا۔ اِن باتوں کے بعد وہ یسوع کو ہیکل میں مِلا۔ اُس نے اُس سے کہا، دیکھ تُو تندرست ہو گیا ہے۔ پھِر گناہ نہ کرنا۔ اَیسا نہ ہو کہ تجھ پر اِس سے بھی زیادہ آفت آئے۔ اُس آدمی نے جا کر یہودیوں کو خبر دی کہ جس نے مجھے تندرست کیا وہ یسوع ہے۔ اِس لئے یہودی یسوع کو ستانے لگے کیونکہ وہ اَیسے کام سبت کے دِن کرتا تھا۔ لیکن یسوع نے اُن سے کہا کہ میرا باپ اَب تک کام کرتا ہے اور میں بھی کام کرتا ہوں۔ اِس سبب سے یہودی اَور بھی زیادہ اُسے قتل کرنے کی کوشش کرنے لگے کہ وہ نہ فقط سبت کا حکم توڑتا بلکہ خدا کو خاص اپنا باپ کہہ کر اپنے آپ کو خدا کے برابر بناتا تھا۔" (انجیل بمطابق یوحنا 5: 10-18)

بیمار شخص نے اپنے شفا دینے والے کے حکم کی پیروی کی۔ اُس نے اپنی چارپائی اُٹھائی اور لوگوں کے درمیان چلنے لگ پڑا۔ یہ سبت کا دِن تھا۔ یہودی بزرگوں نے اُس پر تنقید کی اور جب اُس سے پوچھا کہ وہ کون شخص ہے جس نے تجھ سے کہا چارپائی اُٹھا کر چل پھِر، تو اُس نے جواب دیا کہ میں نہیں جانتا۔ بہت سے لوگ اپنے لئے یسوع کے کاموں پر خوشی کا اظہار کرتے ہیں، تاہم وہ آپ کے ساتھ ایک گہرے تعلق کو پروان چڑھانے یا ملنے والی نجات کےلئے یسوع کی شکرگزاری کا اظہار کرنے کی فکر نہیں کرتے۔

یہودی بزرگ پوری طرح سے مذہبی جنونیت کے اندھے پن کا شکار ہو گئے۔ وہ یسوع پر الزام لگانا چاہتے تھے کیونکہ آپ نے بیمار شخص کو سبت کے دِن اپنی چارپائی اُٹھانے کےلئے کہا تھا۔ اُنہوں نے بیمار شخص سے یہ پوچھنے کا تکلُّف نہ کیا کہ وہ کون تھا جس نے اُسے شفا بخشی تھی۔ بلکہ اِس کے برعکس اُنہوں نے پوچھا: "وہ کون شخص ہے جس نے تجھ سے کہا، چارپائی اُٹھا کر چل پھِر؟" اور جب اُنہیں پتا چلا کہ وہ نہیں جانتا تو وہاں سے چلے گئے۔ لیکن یسوع نے اُسے چھوڑ نہ دیا۔ آپ اُس سے ہیکل میں ملے اور اُسے کہا: "دیکھ تُو تندرست ہو گیا ہے۔ پھِر گناہ نہ کرنا۔ اَیسا نہ ہو کہ تجھ پر اِس سے بھی زیادہ آفت آئے۔" ایک فرد کے تمام دُکھ تکالیف اُس کے اندر سے برے رجحانات کو ختم نہیں کر دیتے۔ اُس شفا پانے والے شخص کی گزری مصیبت اِس بات کی ضمانت نہ تھی کہ وہ گناہ سے دُور رہے گا۔ اِسی لئے یسوع نے اُسے تنبیہ کی کہ پھر گناہ کی طرف نہ لوٹ جائے۔

جیسے ہی اُس شخص کو اپنے شفا دینے والے کے نام کا پتا چلا تو اُس نے یہودی بزرگوں کو اِس بارے میں بتا دیا۔ وہ مسیح کو قتل کرنا چاہتے تھے کیونکہ آپ نے سبت کے دِن شفا بخشی تھی اور خدا کو اپنا باپ کہتے تھے۔ اُن کی دانست میں آپ اپنے آپ کو خدا کے برابر ٹھہرا رہے تھے۔ صحائف مُقدّسہ میں ہم بنی نوع انسان کے بارے میں تسلسل سے یہ بیان پاتے ہیں کہ وہ خدا کے بیٹے ہیں۔ تاہم اِس بیان کا ہرگز یہ مطلب نہیں کہ لوگ خدا کے برابر ہیں۔ چونکہ یسوع نے خدا کے ساتھ اپنی برابری پر زور دیا اِس لئے یہودی بزرگوں نے آپ کے الفاظ کو بےحرمتی کرنے والے الفاظ تصور کیا، اور اُنہوں نے اِس بارے میں سوچنا شروع کر دیا کہ کُفر کے مرتکب ہونے پر کیسے مسیح کو قتل کیا جائے۔ حقیقت میں تو ہمیں اُن کی یسوع کے خلاف سخت مزاحمت کےلئے اُن کے ممنون ہونا چاہئے کیونکہ اِس سے مسیح کو سب کے سامنے اپنی الہٰی فطرت اور باپ کے ساتھ گہری رفاقت کا اعلان کرنے کا موقع ملا۔

"پس یسوع نے اُن سے کہا، میں تم سے سچ کہتا ہوں کہ بیٹا آپ سے کچھ نہیں کر سکتا سِوا اُس کے جو باپ کو کرتے دیکھتا ہے کیونکہ جن کاموں کو وہ کرتا ہے اُنہیں بیٹا بھی اُسی طرح کرتا ہے۔ اِس لئے کہ باپ بیٹے کو عزیز رکھتا ہے اور جتنے کام خود کرتا ہے اُسے دِکھاتا ہے بلکہ اِن سے بھی بڑے کام اُسے دِکھائے گا تا کہ تم تعجب کرو۔ کیونکہ جس طرح باپ مُردوں کو اُٹھاتا اور زندہ کرتا ہے اُسی طرح بیٹا بھی جنہیں چاہتا ہے زندہ کرتا ہے۔ کیونکہ باپ کسی کی عدالت بھی نہیں کرتا بلکہ اُس نے عدالت کا سارا کام بیٹے کے سپُرد کیا ہے۔ تا کہ سب لوگ بیٹے کی عزت کریں جس طرح باپ کی عزت کرتے ہیں۔ جو بیٹے کی عزت نہیں کرتا وہ باپ کی جس نے اُسے بھیجا عزت نہیں کرتا۔ میں تم سے سچ کہتا ہوں کہ جو میرا کلام سُنتا اور میرے بھیجنے والے کا یقین کرتا ہے ہمیشہ کی زندگی اُس کی ہے اور اُس پر سزا کا حکم نہیں ہوتا بلکہ وہ موت سے نکل کر زندگی میں داخل ہو گیا ہے۔ میں تم سے سچ کہتا ہوں کہ وہ وقت آتا ہے بلکہ ابھی ہے کہ مُردے خدا کے بیٹے کی آواز سُنیں گے اور جو سُنیں گے وہ جئیں گے۔ کیونکہ جس طرح باپ اپنے آپ میں زندگی رکھتا ہے اُسی طرح اُس نے بیٹے کو بھی یہ بخشا کہ اپنے آپ میں زندگی رکھے۔ بلکہ اُسے عدالت کرنے کا بھی اِختیار بخشا۔ اِس لئے کہ وہ آدم زاد ہے۔ اِس سے تعجب نہ کرو کیونکہ وہ وقت آتا ہے کہ جتنے قبروں میں ہیں اُس کی آواز سُن کر نکلیں گے۔ جنہوں نے نیکی کی ہے زندگی کی قیامت کے واسطے اور جنہوں نے بدی کی ہے سزا کی قیامت کے واسطے۔ میں اپنے آپ سے کچھ نہیں کر سکتا۔ جیسا سُنتا ہوں عدالت کرتا ہوں، اور میری عدالت راست ہے کیونکہ میں اپنی مرضی نہیں بلکہ اپنے بھیجنے والے کی مرضی چاہتا ہوں۔" (انجیل بمطابق یوحنا 5: 19-30)

مسیح نے خدا اپنے باپ کے ساتھ برابری کے اپنے دعوے کا انکار نہ کیا۔ آپ خاموش بھی نہ رہے تا کہ کہیں آپ کی خاموشی کے بارے میں یہ تصور نہ کیا جاتا کہ آپ اُن کی رائے کو تسلیم کر رہے تھے۔ آپ نے اِس کے بالکل برعکس کیا اور اُن کے الزام پر یہ کہتے ہوئے وضاحت پیش کی کہ جن کاموں کو باپ کرتا ہے اُنہیں بیٹا بھی اُسی طرح کرتا ہے۔ اِس لئے کہ باپ بیٹے کو عزیز رکھتا ہے اور جتنے کام خود کرتا ہے اُسے دِکھاتا ہے۔ جس طرح باپ مُردوں کو اُٹھاتا اور زندہ کرتا ہے اُسی طرح بیٹا بھی جنہیں چاہتا ہے زندہ کرتا ہے۔ کیونکہ باپ کسی کی عدالت بھی نہیں کرتا بلکہ اُس نے عدالت کا سارا کام بیٹے کے سپُرد کیا ہے۔ تا کہ سب لوگ بیٹے کی عزت کریں جس طرح باپ کی عزت کرتے ہیں۔ جو بیٹے کی عزت نہیں کرتا وہ باپ کی جس نے اُسے بھیجا عزت نہیں کرتا۔ جس طرح باپ اپنے آپ میں زندگی رکھتا ہے اُسی طرح اُس نے بیٹے کو بھی یہ بخشا کہ اپنے آپ میں زندگی رکھے۔ بلکہ اُسے عدالت کرنے کا بھی اِختیار بخشا۔ اِس لئے کہ وہ آدم زاد ہے۔

مسیح نے خدا کے اپنے باپ ہونے یا اُس کی ذات میں مساوی طور پر شریک ہونے کی حقیقت کا انکار نہ کیا۔ آپ اِس بارے میں خاموش نہ رہے بلکہ اِس حقیقت کی مزید تائید اپنے اِن الفاظ سے کی: "اگر میں خود اپنی گواہی دوں تو میری گواہی سچی نہیں۔ ایک اَور ہے جو میری گواہی دیتا ہے اور میں جانتا ہوں کہ میری گواہی جو وہ دیتا ہے سچی ہے۔ تم نے یوحنا کے پاس پیام بھیجا اور اُس نے سچائی کی گواہی دی ہے۔ لیکن میں اپنی نسبت انسان کی گواہی منظور نہیں کرتا تَو بھی میں یہ باتیں اِس لئے کہتا ہوں کہ تم نجات پاﺅ۔ وہ جلتا اور چمکتا ہُوا چراغ تھا، اور تم کو کچھ عرصہ تک اُس کی روشنی میں خوش رہنا منظور ہُوا۔ لیکن میرے پاس جو گواہی ہے، وہ یوحنا کی گواہی سے بڑی ہے کیونکہ جو کام باپ نے مجھے پورے کرنے کو دیئے یعنی یہی کام جو میں کرتا ہوں وہ میرے گواہ ہیں کہ باپ نے مجھے بھیجا ہے۔ اور باپ جس نے مجھے بھیجا ہے اُسی نے میری گواہی دی ہے۔ تم نے نہ کبھی اُس کی آواز سُنی ہے اور نہ اُس کی صورت دیکھی۔ اور اُس کے کلام کو اپنے دِلوں میں قائم نہیں رکھتے کیونکہ جسے اُس نے بھیجا ہے اُس کا یقین نہیں کرتے۔ تم کتابِ مُقدّس میں ڈھونڈتے ہو کیونکہ سمجھتے ہو کہ اُس میں ہمیشہ کی زندگی تمہیں ملتی ہے، اور یہ وہ ہے جو میری گواہی دیتی ہے۔ پھِر بھی تم زندگی پانے کےلئے میرے پاس آنا نہیں چاہتے۔ میں آدمیوں سے عزت نہیں چاہتا۔ لیکن میں تم کو جانتا ہوں کہ تم میں خدا کی محبت نہیں۔ میں اپنے باپ کے نام سے آیا ہوں اور تم مجھے قبول نہیں کرتے۔ اگر کوئی اَور اپنے ہی نام سے آئے تو اُسے قبول کر لو گے۔ تم جو ایک دوسرے سے عزت چاہتے ہو، اور وہ عزت جو خدایِ واحِد کی طرف سے ہوتی ہے نہیں چاہتے، کیونکر ایمان لا سکتے ہو؟ یہ نہ سمجھو کہ میں باپ سے تمہاری شکایت کروں گا۔ تمہاری شکایت کرنے والا تو ہے یعنی موسیٰ جس پر تم نے اُمّید لگا رکھی ہے۔ کیونکہ اگر تم موسیٰ کا یقین کرتے تو میرا بھی یقین کرتے۔ اِس لئے کہ اُس نے میرے حق میں لکھا ہے، لیکن جب تم اُس کے نوِشتوں کا یقین نہیں کرتے تو میری باتوں کا کیونکر یقین کرو گے؟" (انجیل بمطابق یوحنا 5: 31-47)

یسوع نے خدا کا بیٹا ہونے کے تعلق سے پانچ گواہیوں کا ذِکر کیا ہے:

1- یوحنا بپتسمہ دینے والے کی گواہی۔ مسیح کے سامعین غالباً پہلے ہی یوحنا بپتسمہ دینے والے کے یسوع کے خدا کا بیٹا ہونے کے اعلان کو سُن چکے تھے۔ مسیح نے یوحنا بپتسمہ دینے والے کی گواہی کی طرف اِس لئے اشارہ کیا کیونکہ اُس کے سامعین اُس کی سچائی پر شک نہ کر سکتے تھے، اُس کا انکار نہ کر سکتے تھے۔ اِس لئے مسیح نے اپنے سامعین کی مدد کرنے کےلئے اُس کی گواہی کا ذِکر کیا تا کہ وہ ایمان لاتے کہ یسوع خدا کا بیٹا تھا۔

2- اپنے عظیم کاموں اور معجزات کی گواہی۔

3- اُس ذات کی گواہی جس کی عظمت و بڑائی کا کسی دوسرے سے موازنہ نہیں کیا جا سکتا یعنی باپ خود۔ یسوع کے سامعین گناہ میں اِس قدر گہرے طورپر غرق ہو چکے تھے کہ وہ باپ کی آواز کو سُن نہیں رہے تھے۔ وہ باپ پر یسوع کی طرح نگاہ کرنے کے قابل نہ تھے۔

4- کتاب مُقدّس کی گواہی۔ مسیح نے فرمایا: "تم کتابِ مُقدّس میں ڈھونڈتے ہو کیونکہ سمجھتے ہو کہ اُس میں ہمیشہ کی زندگی تمہیں ملتی ہے، اور یہ وہ ہے جو میری گواہی دیتی ہے۔"

5- شریعت کے دینے والے موسیٰ نبی کی گواہی۔ یسوع نے فرمایا: "اگر تم موسیٰ کا یقین کرتے تو میرا بھی یقین کرتے۔ اِس لئے کہ اُس نے میرے حق میں لکھا ہے، لیکن جب تم اُس کے نوِشتوں کا یقین نہیں کرتے تو میری باتوں کا کیونکر یقین کرو گے؟"

مسیح نے باپ کے تفویض کردہ اپنے دوہرے کام کا بیان کیا یعنی زندگی کو بحال کرنا اور اُس کی عدالت کرنا۔ تاہم آپ نے یہ واضح کیا کہ لوگ اپنے ہی چناﺅ کی وجہ سے سزایافتہ ٹھہرتے ہیں: "تم زندگی پانے کےلئے میرے پاس آنا نہیں چاہتے۔" آپ نے اپنے سامعین کے سامنے اپنی انسانیت پر بھی زور دیا تا کہ کہیں وہ یہ نہ سمجھنے لگ جاتے کہ آپ اپنی فطرت میں صرف الہٰی ہی تھے۔ آپ نے اُنہیں بتایا کہ باپ نے اُنہیں آدم زاد ہونے کی وجہ سے عدالت کرنے کا اختیار بخشا ہے۔ فلپیوں 2: 5-11 میں اِس بات کی وضاحت یوں کی گئی ہے: "ویسا ہی مزاج رکھو جیسا مسیح یسوع کا بھی تھا۔ اُس نے اگرچہ خدا کی صورت پر تھا، خدا کے برابر ہونے کو قبضہ میں رکھنے کی چیز نہ سمجھا۔ بلکہ اپنے آپ کو خالی کر دیا اور خادم کی صورت اختیار کی اور اِنسانوں کے مشابہ ہو گیا۔ اور اِنسانی شکل میں ظاہر ہو کر اپنے آپ کو پست کر دیا، اور یہاں تک فرمانبردار رہا کہ موت بلکہ صلیبی موت گوارا کی۔ اِسی واسطے خدا نے بھی اُسے بہت سربلند کیا اور اُسے وہ نام بخشا جو سب ناموں سے اعلیٰ ہے۔ تا کہ یسوع کے نام پر ہر ایک گُھٹنا جُھکے۔ خواہ آسمانیوں کا ہو خواہ زمینیوں کا۔ خواہ اُن کا جو زمین کے نیچے ہیں۔ اور خدا باپ کے جلال کےلئے ہر ایک زبان اقرار کرے کہ یسوع مسیح خداوند ہے۔" (نیا عہدنامہ، فلپیوں 2: 5-11)

عزیز قاری، آپ مسیح کے بارے میں کیا سوچتے ہیں؟ جو کچھ انجیل مُقدّس آپ کے بارے میں بیان کرتی ہے کیا آپ اُس پر ایمان لائیں گے؟

"اور یوحنا کے شاگرد اور فریسی روزہ سے تھے۔ اُنہوں نے آ کر اُس سے کہا، یوحنا کے شاگرد اور فریسیوں کے شاگرد تو روزہ رکھتے ہیں لیکن تیرے شاگرد کیوں روزہ نہیں رکھتے؟ یسوع نے اُن سے کہا، کیا براتی جب تک دُلہا اُن کے ساتھ ہے روزہ رکھ سکتے ہیں؟ جس وقت تک دُلہا اُن کے ساتھ ہے وہ روزہ نہیں رکھ سکتے۔ مگر وہ دِن آئیں گے کہ دُلہا اُن سے جُدا کیا جائے گا۔ اُس وقت وہ روزہ رکھیں گے۔ کورے کپڑے کا پیوند پُرانی پوشاک پر کوئی نہیں لگاتا۔ نہیں تو وہ پیوند اُس پوشاک میں سے کچھ کھینچ لے گا یعنی نیا پُرانی سے اور وہ زیادہ پھٹ جائے گی۔ اور نئی مے کو پرانی مشکوں میں کوئی نہیں بھرتا۔ نہیں تو مشکیں مے سے پھٹ جائیں گی اور مے اور مشکیں دونوں برباد ہو جائیں گی بلکہ نئی مے کو نئی مشکوں میں بھرتے ہیں۔" (انجیل بمطابق مرقس 2: 18-22)

یوں معلوم ہوتا ہے کہ یوحنا بپتسمہ دینے والے کے شاگرد یہودی دستور کے مطابق روزہ سے تھے، جبکہ یسوع اور آپ کے شاگرد روزہ سے نہ تھے۔ جب متی محصول لینے والا یسوع کی پیروی کرنے کےلئے بلایا گیا تو اُس نے یسوع اور آپ کے شاگردوں کےلئے ایک ضیافت تیار کی۔ اِس کے نتیجہ میں یہودی راہنماﺅں نے تنقید کی۔

یہودی روزہ کو بہت اہمیت دیتے تھے، اور آج بھی اِسے بہت اہم سمجھا جاتا ہے۔ شریعت کے مطابق اُن کےلئے ہر سال کفارہ کے دِن روزہ رکھنا لازمی تھا۔ اُنہوں نے سمجھا کہ اُن کا روزہ خدا کو خوش کرتا ہے، اِس لئے اُنہوں نے بابل کی اسیری سے واپس آنے کے بعد کچھ اَور سالانہ روزے مقرر کر لئے۔ مزید برآں اُنہوں نے ہر ہفتہ دو روزے اپنے اوپر عائد کر دیئے۔ مسیح کے جواب سے یہ نتیجہ نکلتا ہے کہ روزہ رکھنا ایک اختیاری بات ہے اور اِس کا انحصار حالات پر ہے۔ سوائے اُس وقت کے جب روزہ رکھنا موزوں و مناسب ہے روزہ رکھنے کی کوئی ضرورت نہیں۔ اِسے فریضہ نہیں بن جانا چاہئے کہ جسے عمومی حالات کو نظرانداز کرتے ہوئے مخصوص اوقات میں سرانجام دیا جائے۔

چونکہ یہودی درست محرکات کی وجہ سے روزہ نہیں رکھتے تھے اِس لئے اکثر خدا کو اُن کی خود انکاری ناقابل قبول لگتی تھی۔ یسعیاہ نبی نے اِس بارے میں لکھا ہے کہ خدا اُن کے روزے کو کس نگاہ سے دیکھتا ہے۔ یسعیاہ 58: 3 میں یہودیوں کو خدا کے حضور یہ شکایت کرتے بیان کیا گیا ہے:

"وہ کہتے ہیں ہم نے کس لئے روزے رکھے جبکہ تُو نظر نہیں کرتا اور ہم نے کیوں اپنی جان کو دُکھ دیا جبکہ تُو خیال میں نہیں لاتا؟"

اِس بات کا جواب خدا نے اُنہیں یہ دیا:

"... دیکھو تم اپنے روزہ کے دِن میں اپنی خوشی کے طالب رہتے ہو، اور سب طرح کی سخت محنت لوگوں سے کراتے ہو۔ دیکھو تم اِس مقصد سے روزہ رکھتے ہو کہ جھگڑا رگڑا کرو اور شرارت کے مکے مارو۔ پس اَب تم اِس طرح کا روزہ نہیں رکھتے ہو کہ تمہاری آواز عالم بالا پر سُنی جائے۔ کیا یہ وہ روزہ ہے جو مجھ کو پسند ہے؟ ایسا دِن کہ اُس میں آدمی اپنی جان کو دُکھ دے اور اپنے سر کو جھاﺅ کی طرح جُھکائے اور اپنے نیچے ٹاٹ اور راکھ بِچھائے؟ کیا تُو اِس کو روزہ اور ایسا دِن کہے گا جو خداوند کا مقبول ہو؟" (پرانا عہدنامہ، یسعیاہ 58: 3-7)

مقبول روزہ وہ ہے جو حقیقی غم کے نتیجہ میں رکھا جاتا ہے۔ غور کیجئے کہ غمزدہ شخص کھانا نہیں کھاتا۔ وہ اپنے غم کی وجہ سے کھانے سے لطف اندوز نہیں ہو سکتا، کیونکہ اُس کا جسم آسانی سے کھانا ہضم نہیں کر سکتا۔ خوشی سے بھرپور رویہ ہاضمہ کے عمل میں مدد دیتا ہے جبکہ غم و افسوس سے اِس میں رکاوٹ پیدا ہوتی ہے۔ رُوح کی شکستگی کے بغیر جسم کی انکساری کا کوئی فائدہ نہیں ہے۔ پہاڑی پر دیئے گئے اپنے وعظ میں یسوع نے ہمیں روزہ میں غرور اور ریاکاری کے خلاف تنبیہ کی ہے۔ آپ نے فرمایا کہ وہ روزہ جو خدا قبول کرتا ہے وہ ہے جسے سوائے خدا کے اور روزہ رکھنے والے کے کوئی نہیں جانتا (انجیل بمطابق متی 6: 16-18)۔

یہودی بزرگوں سے روزہ کی بابت بات کرتے ہوئے یسوع نے وضاحت کی کہ یوحنا بپتسمہ دینے والے کے شاگردوں کے پاس روزہ کی ایک وجہ تھی۔ اُن کے اُستاد کو اُن سے چھین کر بےانصافی سے قیدخانہ میں ڈال دیا گیا تھا۔ جبکہ یسوع کے شاگردوں کے پاس روزہ رکھنے کی کوئی وجہ نہ تھی کیونکہ اُن کا اُستاد اَب بھی اُن کے ساتھ تھا۔ یسوع نے کہا کہ ایک وقت آئے گا جب اُن کا دُلہا (یعنی وہ خود) اُن سے لے لیا جائے گا، تب وہ روزہ رکھیں گے۔ ایسا کہنے سے یسوع یہودیوں کی سفاکی اور سخت دِلی کی طرف اشارہ کر رہے تھے جس کا نتیجہ آپ کی مصلوبیت کی صورت میں نکلنا تھا۔ جی ہاں، یسوع نے صلیب پر اپنا آپ بہ رضا و رغبت پیش کیا، لیکن آپ کی موت آپ کے اپنے لوگوں کی عداوت کے نتیجہ میں سامنے آئی۔ یسعیاہ نبی نے اِس کا ذِکر اِن الفاظ میں کیا: "وہ ظلم کر کے اور فتویٰ لگا کر اُسے لے گئے" (یسعیاہ 53: 8)۔ پطرس رسول نے اِس کا نقشہ اِن الفاظ میں کھینچا ہے: "جب وہ خدا کے مقررہ انتظام اور علم سابق کے موافق پکڑوایا گیا تو تم نے بےشرع لوگوں کے ہاتھ سے اُسے مصلوب کروا کر مار ڈالا" (نیا عہدنامہ، اعمال الرُّسل 2: 23)۔

جب یسوع نے روزہ کے بارے میں بات کی تو یوحنا بپتسمہ دینے والے کے شاگرد سب سُن رہے تھے۔ یسوع نے اُنہیں اِس بات کی یاد دہانی کرائی کہ اُن کے اُستاد نے یسوع کو دُلہا سے اور اُس کے شاگردوں کو براتیوں سے تشبیہ دی تھی۔ جب تک دُلہا اُن کے ساتھ ہے براتی کیسے ماتم کر سکتے اور روزہ رکھ سکتے ہیں؟ اپنے اور اپنے شاگردوں کے درمیان مکمل یگانگت کی وضاحت کےلئے یہ مسیح کی پیش کی گئی انتہائی اہم ترین مثال ہے۔ یہ یگانگت ایک دُلہا اور اُس کی دُلہن میں تعلق کی مانند ہے۔ جناب یسوع ایمانداروں سے نہ صرف موت تک محبت رکھتے ہیں بلکہ تمام ابدیت تک بھی محبت کرنا جاری رکھیں گے۔ اِس محبت کا نتیجہ آپ کے اور تمام ایمانداروں کے درمیان مکمل یگانگت کی صورت میں نکلتا ہے۔ دونوں ایک ہو جاتے ہیں، وہ مسیح میں ہیں اور مسیح اُن میں ہے۔

ایماندار بدن ہیں اور مسیح اُس بدن کا سر ہے۔ مسیح خدا کے حضور اُن کے تمام قرض ادا کرتے ہیں، اُن کی تمام ضرورتیں پوری کرتے ہیں، اُن کی مشکلات میں شریک ہوتے ہیں اور اُن کے بوجھ اُٹھاتے ہیں۔ آپ اُن کی کمزوری میں اُن سے ہمدردی کرتے ہیں، اُن کی غلطیوں کو معاف کرتے ہیں اور اُنہیں تنہا نہیں چھوڑتے۔ اگر کوئی ایمانداروں سے اچھائی یا برائی سے پیش آئے تو مسیح اِسے گویا اپنے ساتھ روا رکھے جانے والا سلوک تصور کرتے ہیں۔ آپ اُنہیں وہ جلال دینے کےلئے تیار ہیں جو دُنیا کی تخلیق سے پہلے آپ باپ کے ساتھ رکھتے تھے۔ جہاں آپ ہیں، وہاں وہ بھی ہوں گے۔ یہ شاندار تعلق یسوع پر ایمان لانے اور آپ کے ساتھ ایک ہو جانے کا پُرمُسرّت نتیجہ ہے۔

جب مسیح نے اِس بات کی وضاحت کی کہ آپ کے ساتھ ایمانداروں کی یگانگت دُلہے اور دُلہن کے تعلق کو ظاہر کرتی ہے، تو پھر آپ نے موسوی روایات کے بارے میں اپنے خیالات کا اظہار کیا۔

آپ نے دو تمثیلیں سُنائیں جو خاص طور پر یوحنا بپتسمہ دینے والے کے شاگردوں کےلئے تھیں، کیونکہ وہ سمجھتے تھے کہ یسوع کی لائی ہوئی خوشخبری موسیٰ کی لائی ہوئی قدیم تعلیم کے ساتھ اضافہ کے طور پر ہے۔ اُنہوں نے سمجھا کہ قدیم قائم رہے گا اور اُسے نئے سے تبدیل کرنے کی ضرورت نہیں۔ اِس کا یہ مطلب تھا کہ مسیح اور اُس کے شاگردوں کو تمام یہودی رسوم پر عمل کرنا ضروری تھا۔ لیکن یسوع نے کہا کہ اگر نیا قاعدہ قانون پرانے سے جُڑا رہے گا تو اُسے نقصان پہنچائے گا۔ آپ نے کہا: "کورے کپڑے کا پیوند پرانی پوشاک پر کوئی نہیں لگاتا۔ نہیں تو وہ پیوند اُس پوشاک میں سے کچھ کھینچ لے گا یعنی نیا پرانی سے اور وہ زیادہ پھٹ جائے گی" (انجیل بمطابق مرقس 2: 21)۔

کوئی دانا شخص ایسا نہیں کرے گا، نہ ہی وہ نئی مے پرانی مشکوں میں ڈالے گا، کیونکہ اِس سے مشک اور مے دونوں کا نقصان ہو گا۔ کپڑے لوگوں کو لباس مہیا کرتے ہیں، جبکہ مشکیزوں میں مے رکھی جاتی ہے۔ مسیح نے سکھایا کہ جب کپڑا اپنا کام کر چکے اور پرانا ہو جائے تو اُسے استعمال نہیں کرتے بلکہ اُس کی جگہ نیا کپڑا استعمال کیا جاتا ہے۔ اُس کا پیوند نہیں لگایا جاتا۔ اِس کامطلب یہ نہیں ہے کہ پرانا بُرا ہے، بلکہ مطلب یہ ہے کہ پرانے کا مقصد پورا ہو چکا ہے۔ جب ایک شخص کو شادی میں جانا ہو تو وہ پرانے کپڑے کو جس میں سوراخ ہوں لے کر پیوند نہیں لگاتا۔ وہ اُس موقع کےلئے نئے کپڑے خریدتا ہے۔ یہ بات ہماری مذہبی زندگی کے بارے میں بھی سچ ہے۔ اگر یوحنا بپتسمہ دینے والے کا یا فریسیوں کا کوئی شاگرد آسمانی دُلہے مسیح کی پیروی کرنا چاہتا تھا تو اُسے نئے کپڑے پہننے کی ضرورت تھی یعنی اُنہیں نئے ضابطہ عمل کو اپنانا تھا، مثلاً ختنہ کی جگہ بپتسمہ، فسح کی جگہ عشائے ربانی، لاویوں کی کہانت کی جگہ تمام ایمانداروں کی کہانت، ساتویں دِن کی جگہ ہفتے کے پہلے دِن عبادت، اور ہیکل کی جگہ ایمانداروں کی تمام جماعت کلیسیا۔

اِس مثال کے ساتھ یسوع نے اِس حقیقت کی وضاحت کی کہ روایتی موسوی ضابطہ عمل اپنا مقصد پورا کر چکا تھا اور یوں پرانا ہو گیا تھا۔ اُس میں ترمیم نہیں کی جا سکتی تھی بلکہ اُس کی جگہ کسی برتر ضابطہ کی ضرورت تھی۔ موسیٰ کی شریعت مذہب کی بیرونی تہہ کی مانند تھی۔

دوسری مثال میں یسوع نے بتایا کہ جو کوئی آپ کی نئی تعلیم کو قبول کرتا ہے، اُسے ایک نئے دِل سے اِسے قبول کرنے کی ضرورت ہے جو رُوح القدس کے کام کے باعث ہو سکتا ہے۔ جب مسیح نے اپنی گفتگو کو اِن الفاظ سے ختم کیا کہ "اور کوئی آدمی پرانی مے پی کر نئی کی خواہش نہیں کرتا کیونکہ کہتا ہے کہ پرانی ہی اچھی ہے" (انجیل بمطابق لوقا 5: 39)، تو آپ کا مطلب تھا کہ نیا دِل ایک نئی مشک کی مانند ہے جو نئی مے یعنی طاقتور مسیحی پیغام کے دباﺅ کو برداشت کر سکتا ہے۔

مُقدّس بیسِلیئس نے بھی اِس کی ایسے ہی تشریح کی ہے۔

مُقدّس اگستین نے کہا کہ اِس کی تکمیل عید پینتیکوست کے دِن ہوئی جب نئے مے نئی مشکوں میں بڑی قوت سے اُنڈیلی گئی، جب آسمانی پیدایش پانے والے نئے شاگردوں کو رُوح القدس نے بھر دیا۔

کچھ مُفسّروں نے پرانی مشکوں کو فریسیوں کے طور پر اور نئی مشکوں کو رسولوں کے طور پر بیان کیا ہے۔

یوحنا بپتسمہ دینے والے کے شاگرد پرانی مشکوں سے وابستہ رہے۔ زیادہ تر لوگ یہی کرتے ہیں۔ اُنہیں احساس کرنے کی ضرورت ہوتی ہے کہ نئی پرانی سے کہیں بہتر ہے۔ یہ فہم ہوشمندی کے ساتھ کئے گئے گیان دھیان اور غور و فکر سے حاصل کیا جا سکتا ہے۔ دوسروں کے ساتھ اِ س نئے نور کو بانٹنے کی کوشش کرتے ہوئے یہ آگہی رکھنا بہت اہم ہے۔ ہمیں کرخت یا گھمنڈی نہیں ہونا، بلکہ اِس بات کا تعین کرنا چاہئے کہ کون سی رکاوٹیں اُن کی راہ میں کھڑی ہیں جو اُنہیں نئی مے کی برتری کو دیکھنے نہیں دے رہیں۔

"پھِر سبت کے دِن یوں ہُوا کہ وہ کھیتوں میں ہو کر جا رہا تھا اور اُس کے شاگرد بالیں توڑ توڑ کر اور ہاتھوں سے مَل مَل کر کھاتے جاتے تھے۔ اور فریسیوں میں سے بعض کہنے لگے، تم وہ کام کیوں کرتے ہو جو سبت کے دِن کرنا روا نہیں؟ یسوع نے جواب میں اُن سے کہا، کیا تم نے یہ بھی نہیں پڑھا کہ جب داﺅد اور اُس کے ساتھی بھوکے تھے تو اُس نے کیا کیا، وہ کیونکر خدا کے گھر میں گیا اور نذر کی روٹیاں لے کر کھائیں جن کو کھانا کاہنوں کے سِوا اَور کسی کو روا نہیں اور اپنے ساتھیوں کو بھی دیں؟ پھِر اُس نے اُن سے کہا کہ ابنِ آدم سبت کا مالک ہے۔" (انجیل بمطابق لوقا 6: 1-5)

یسوع اور اُ س کے شاگرد کھیتوں میں لگی فصل میں سے گزر کر جا رہے تھے۔ شاگردوں نے کچھ بالیں توڑیں اور اُنہیں کھانے لگ گئے۔ موسیٰ کی شریعت میں اِس بات کی اجازت تھی۔ لکھا ہے: "جب تُو اپنے ہمسایہ کے کھڑے کھیت میں جائے تو اپنے ہاتھ سے بالیں توڑ سکتا ہے، پر اپنے ہمسایہ کے کھڑے کھیت کو ہنسوا نہ لگانا" (توریت شریف، اِستثنا 23: 25)۔ تاہم جب یسوع کے شاگردوں نے ایسا کیا تو یہ سبت کا دِن تھا، اور یہودی بزرگوں نے ٹھہرا دیا تھا کہ بالیں توڑنا فصل کاٹنے کے برابر ہے، اور سبت کو فصل کاٹنے کی اجازت نہ تھی۔ اُنہوں نے اناج کی چند بالوں کے ملنے کو غلہ سے بھوسی کو علیحدہ کرنے کا کام گردانا، جس کی سبت کے دِن اجازت نہیں تھی۔ اِس لئے یہودی بزرگوں نے شاگردوں کے عمل کو دس احکام میں سے ایک کو توڑنے کا مرتکب سمجھا۔ دس احکام خدا تعالیٰ نے موسیٰ نبی کو کوہِ سینا پر دیئے تھے۔ اِن احکام کے دیئے جانے کے وقت گرج اور چمک نے اِن کی اہمیت و شدت کو واضح کیا۔ رسوم و رواج کی بجاآوری کرنے والے یہودی بزرگوں نے سبت کو ماننے کے حکم کو بڑی سختی سے تھام رکھا تھا کیونکہ اِس کا تعلق ظاہری تعمیل سے تھا۔ وہ ہر قسم کی سرگرمی پر ممانعت کی غرض سے بڑی انتہا تک نکل گئے، جس سے شریعت کے حقیقی مقصد سے بھی پہلوتہی ہوئی۔

جو کچھ مسیح کے شاگردوں نے کیا تھا، فریسیوں نے اُس پر تنقید کی۔ اُنہوں نے کہا: "تم وہ کام کیوں کرتے ہو جو سبت کے دِن کرنا روا نہیں؟" یسوع نے توریت کا اقتباس کرنے سے اُنہیں جواب دیا، جسے اُن لوگوں نے یاد بھی کیا ہوا تھا۔ آپ نے اُن کی سرزنش کی کیونکہ جو کچھ اُن کے عظیم بادشاہ، راہنما اور نبی داﺅد نے کیا تھا اُسے بُھلا بیٹھے تھے۔ جب داﺅد نبی اور اُن کے ساتھی بھوکے تھے تو اُنہوں نے اُن نذر کی روٹیوں میں سے کھایا جو صرف کاہنوں کو کھانے کی اجازت تھی۔ اگر خدا نے اِس کےلئے داﺅد نبی کو نہ جھِڑکا تو پھر ابنِ داﺅد جو کہیں بڑا تھا یقیناً اپنے شاگردوں کو سبت کے دِن اناج کی بالیں توڑنے اور کھانے کی اجازت دے سکتا تھا۔

مسیح کی تعلیمات کے مطابق اپنے پورے وجود سے خدا سے محبت کرنے کا پہلا حکم، اپنے پڑوسی سے محبت کرنے کے دوسرے حکم سے مختلف نہیں ہے۔ ہم خدا کو اُس وقت خوش نہیں کر سکتے کہ جب ایک طرف سبت کو تو منائیں لیکن دوسری طرف دیگر لوگوں سے بےرحمی سے پیش آئیں۔ اِس لئے، مسیح نے اپنے سامعین کو نبوتانہ الفاظ کی یاد دہانی کرائی جو یہ ہیں کہ "کیونکہ میں قربانی نہیں بلکہ رحم پسند کرتا ہوں اور خدا شناسی کو سوختنی قربانیوں سے زیادہ چاہتا ہوں" (پرانا عہدنامہ، ہوسیع 6: 6)۔ اگر یسوع کے سامعین اِس حوالہ کے معنٰی سے واقف ہوتے تو وہ آپ کے بےگناہ شاگردوں کے بارے میں ایسی بات نہ کرتے۔

پھر یسوع نے ایک اَور مثال پیش کی جو سبت کے تعلق سے تھی اور جس سے یہود ی راہنما بخوبی واقف تھے۔ یہ الہٰی احکام کی فرمانبرداری تھی اور انسانی روایت نہ تھی۔ آپ نے کہا "تم نے توریت میں نہیں پڑھا کہ کاہن سبت کے دِن ہیکل میں سبت کی بےحرمتی کرتے ہیں اور بےقصور رہتے ہیں؟" (انجیل بمطابق متی 12: 5)۔ وہ قربانیوں کےلئے آگ جلانے سے اور مذہبی خدمت کی خاطر دُگنی محنت کے کام کو سرانجام دینے سے سبت کی بےحرمتی کرتے تھے۔

اِس موقع پر مسیح نے اپنے مذہبی اختیار کا پُرزور دعویٰ کیا۔ آپ نے ہیکل سے بھی بڑے ہونے کا دعویٰ کیا کیونکہ آپ تو اُس کے مالک ہیں۔ اگر عظیم الشان ہیکل کی خدمت کےلئے سبت کے قوانین کو توڑنے کی اجازت تھی، تو اِنسان کی قائم کی ہوئی ممانعتوں کو جو اُس دِن کے تعلق سے یہودیوں نے ٹھہرائی تھیں، ہیکل کے خداوند کو توڑنے کا کس قدر زیادہ حق حاصل تھا کیونکہ آپ ہیکل اور سبت دونوں کے مالک ہیں۔ درحقیقت، آپ تو خود ہی ہیکل ہیں کیونکہ الوہیت کی ساری معموری آپ ہی میں مجسم ہو کر سکونت کرتی ہے (نیا عہدنامہ، کُلُسِّیوں 2: 9)۔ آپ میں خدا کےلئے حقیقی پرستش پیش کی جاتی ہے کیونکہ آپ خدا اور انسان کے مابین درمیانی ہیں (نیا عہدنامہ، 1-تیمتھیس 2: 5)۔ اگر ہیکل سبت سے عظیم ہے، تو ہیکل کا مالک کس قدر عظیم تر ہے!!

مسیح نے سبت کے تعلق سے ایک اضافی بیان بھی دیا۔ آپ نے کہا کہ یہ دِن انسان کےلئے بنا ہے، نہ کہ انسان اِس دِ ن کےلئے بنا ہے (انجیل بمطابق مرقس 2: 27)۔ سبت اور ہیکل دونوں انسان کی خدمت کےلئے ہیں۔ یسوع سبت کا مالک ہے، اور آپ نے اِسے عزت بخشی۔ لیکن اِس کے ساتھ ساتھ آپ نے اِس کی افادیت کو وسعت عطا کی اور اِسے فریسیوں کی بندشوں سے آزادی بخشی۔ اگر مسیحا محض ایک انسان ہوتے، تو آپ کو اپنے آپ کو سبت کا مالک کہنے کا کوئی حق نہیں تھا۔

نئے عہدنامہ کی کئی آیات سے، خاص طور پر وہ جو مسیح کے جی اُٹھنے کے تعلق سے ہیں، ہم نتیجہ اخذ کرتے ہیں کہ مسیح نے عبادت کے بنیادی دِن کو ہفتہ کے آخری دِن سے اُس کے پہلے دِن اتوار کو منتقل کرنے کےلئے اپنے سبت کے مالک ہونے کے اختیار کو استعمال کیا۔ اتوار کو "خداوند کا دِن" کہا جانے لگا۔ یہاں اصول یہ ہے کہ ہر ہفتہ نیک کاموں (رحمدِلی کے کام)، عبادت اور آرام کےلئے ایک دِن مخصوص کیا جائے۔ جب ہم ہفتہ کے ایک دِن کو مکمل طور پر خداوند کی پرستش اور خدمت کےلئے وقف کرتے ہیں تو اِس الہٰی حکم کے مقصد کو پورا کرتے ہیں۔ مسیح کے رسولوں نے رُوح القدس کی راہنمائی اور تحریک میں اِس دِن کو ہفتہ کے ساتویں دِن سے پہلے دِن کی طرف منتقل کیا۔ لیکن اِس سے حکم کی رُوح یا اِس کا مقصد تبدیل نہیں ہوا۔ خدا نے پرانے عہدنامہ میں ساتویں دِن کو ایک خاص جگہ دی، لیکن نئے عہد کے زمانہ کےلئے ایک شاندار تر دِن، ہفتہ کا پہلا دِن رکھا ہے۔ جیسے یہودی سبت تخلیق کائنات میں الہٰی کام کی یادگاری کرنے کےلئے تھا، اُسی طرح عبادت و پرستش کا مسیحی دِن اِس سے بھی بڑے کام (مخلصی کے کام) کو خراجِ تحسین پیش کرنے کےلئے ہے جب ہمارا نجات دہندہ ہفتہ کے پہلے دِن مُردوں میں سے جی اُٹھا۔ اِس لئے ہم اِس دِن کو "خداوند کا دِن" کہتے ہیں۔ ہفتہ کے پہلے دِن عبادت و پرستش کرنا ہمیں پینتِکوست کے دِن کو یاد رکھنے میں بھی مدد فراہم کرتا ہے جب رُوح القدس کے نزول کی وجہ سے مسیحی کلیسیا کا آغاز ہُوا۔ مسیح کے وقتوں سے تہذیب و تمدن کی تاریخ میں عبادت و پرستش کے مسیحی دِن کے عزت و تعظیم کے فوائد کو نظرانداز نہیں کیا جا سکتا۔

"اور وہ وہاں سے چل کر اُن کے عبادتخانہ میں گیا۔ اور دیکھو وہاں ایک آدمی تھا جس کا ہاتھ سوکھا ہُوا تھا۔ اُنہوں نے اُس پر الزام لگانے کے ارادہ سے یہ پوچھا کہ کیا سبت کے دِن شفا دینا روا ہے؟ اُس نے اُن سے کہا، تم میں ایسا کون ہے جس کی ایک ہی بھیڑ ہو، اور وہ سبت کے دِن گڑھے میں گر جائے تو وہ اُسے پکڑ کر نہ نکالے؟ پس آدمی کی قدر تو بھیڑ سے بہت ہی زیادہ ہے۔ اِس لئے سبت کے دِن نیکی کرنا روا ہے۔ تب اُس نے اُس آدمی سے کہا کہ اپنا ہاتھ بڑھا۔ اُس نے بڑھایا اور وہ دوسرے ہاتھ کی مانند درست ہو گیا۔ اِس پر فریسیوں نے باہر جا کر اُس کے برخلاف مشورہ کیا کہ اُسے کس طرح ہلاک کریں۔" (انجیل بمطابق متی 12: 9-14)

ایک اَور سبت کے دِن یسوع نے سبت کے موضوع پر ایک تیسرا سبق سکھایا۔ آپ نے پہلا سبق ہیکل میں دیا، جبکہ دوسرا کھیتوں میں دیا، اور یہ تیسرا سبق ایک عبادتخانہ میں دیا۔ اُس سبت کے دِن جب یسوع عبادتخانہ میں تعلیم دے رہے تھے، تو وہاں موجود فقیہ فریسیوں نے ایک ایسے شخص کو دیکھا جس کا دہنا ہاتھ سوکھا ہُوا تھا۔ مسیح اُن سب کو شفا دینے کےلئے جانے جاتے تھے جنہیں آپ بیمار دیکھتے، یا جو آپ کے پاس آ کر شفا کی درخواست کرتے تھے۔ فقیہ اور فریسی اُمید کر رہے تھے کہ یہ شفا پا جائے گا، لیکن اِس کی وجہ یہ نہیں تھی کہ اُنہیں اِس پر ترس آیا تھا بلکہ اِس لئے کہ وہ یسوع میں کسی عیب کی تلاش کر رہے تھے جس کی خبر وہ یہودی مذہبی راہنماﺅں کو دے سکتے۔ اِس لئے اُنہوں نے یسوع سے پوچھا: "کیا سبت کے دِن شفا دینا روا ہے؟"

یسوع جانتے تھے کہ وہ سوال پوچھنے میں مخلص نہ تھے۔ آپ نے بیمار شخض کو اُن کے بیچ میں کھڑا ہونے کےلئے کہا تا کہ آپ کے مخالف خاموش ہو جائیں اور اُن پر ظاہر ہو جائے کہ آپ اُن سے خوفزدہ نہیں تھے۔ تب آپ نے اُن سے کہا: "میں تم سے یہ پوچھتا ہوں کہ آیا سبت کے دِن نیکی کرنا روا ہے یا بدی کرنا؟ جان بچانا یا ہلاک کرنا؟" (انجیل بمطابق لوقا 6: 9)۔ اِس شخص کو سبت کے دِن شفا دینا ایک نیکی کا کام ہونا تھا، جبکہ سبت کے دِن مسیح کو قتل کرنے کی اُن کی خواہش بدی تھی۔ اَب حکم خداوندی پر کون عمل پیرا تھا اور کون اُسے توڑ رہا تھا؟ آپ نے اُنہیں یاد دہانی کرائی کہ اگر اُن میں سے کسی کے پاس بھیڑ ہو، اور وہ سبت کے دِن ایک گڑھے میں گر جائے تو یقیناً وہ اُسے بچائے گا۔ اور اگر کوئی شخص نیکی کر سکتا ہو لیکن اُس سے پہلوتہی کرے تو یہ بھی بدی گنا جائے گا۔ اِسی طرح اگر کوئی فرد کسی شخص کی نجات کی طرف راہنمائی کر سکتا ہو، اور اِس سے بےاعتنائی برتے تو وہ اُس کی تباہی میں حصہ دار ہوتا ہے۔ مسیح نے اپنے سوال سے فقیہوں اور فریسیوں کو موردِ الزام ٹھہرایا، اور وہ کچھ کہنے کے قابل نہ تھے۔

یسوع نے اُن کے جواب کا انتظار کیا لیکن وہ خاموش رہے۔ اپنی خاموشی سے اُنہوں نے یسوع کے اخلاقی اختیار کو تسلیم کیا۔ بدقسمتی سے اپنی خطا کو دیکھ کر بھی اُن کے ضمیر پر کوئی اثر نہ ہُوا، نہ اُنہوں نے اپنے گناہ کا اقرار کیا اور نہ اُس شخص سے معافی طلب کی جس کا ہاتھ سوکھا ہُوا تھا۔ یسوع اُن کے دِل کی سختی سے غصے اور افسردہ ہوئے۔ خداوند کی خاطر خفگی و احتجاج کا اظہار کرنا مستحسن امر ہے، اور اُس کی بادشاہی کی حالت پر غم غصہ کی تقدیس کرتا ہے اور اُسے ایک خوبی میں بدل دیتا ہے۔ ہم بائبل مُقدّس میں کئی بار خدا کے غصہ کے بارے میں پڑھتے ہیں، تاہم خدا پاک اور کامل ہے۔ ہم مسیح کے غصہ کو اِسی تناظر میں دیکھتے ہیں۔ مناسب غصہ لائقِ تحسین ہے۔ مسیح کو اُن مغرور لوگوں پر غصہ آیا، مگر آپ اُس سوکھے ہاتھ والے شخص کےلئے ترس سے بھرے تھے۔ آپ نے چند الفاظ کہنے کی بدولت اُسے شفا بخشی، اور اِس معجزاتی شفا کی بدولت آپ نے ثابت کیا کہ بےشک آپ سبت کے مالک تھے۔ آپ نے اُس شخص سے کہا "اپنا ہاتھ بڑھا۔" اِس قسم کے بیان پر ایک فطری ردعمل یہ ہو سکتا تھا "خداوند، میں نہیں کر سکتا۔ اگر میں اُسے بڑھا سکتا تو مجھے تیری مدد کی ضرورت نہ ہوتی۔" لیکن اِس شخص نے ناممکن کام کا یقین کیا، اور یسوع نے اُسے جزوی طور پر نہیں بلکہ مکمل طور پر شفا بخشی۔ اُس کا ہاتھ بحال ہو گیا۔ اِسی طرح یسوع نامکمل معافی عطا نہیں کرتے بلکہ وہ اپنے پاس آنے والے سب لوگوں کو مکمل معافی بخشتے ہیں۔ اِس سوکھے ہاتھ والے آدمی کی مثال میں ہم نجات کی حقیقی تصویر دیکھتے ہیں۔ اِس شخص نے اپنے عمل کی بدولت نہیں بلکہ مسیح کے کام کی بدولت شفا پائی۔ تاہم مسیح ایک فرد کو اُس وقت تک شفا نہیں دیتے جب تک کہ وہ آپ اور آپکے کام پر ایما ن نہ لائے۔ ایک گنہگار کسی انسانی کام کی بدولت نہیں بلکہ مسیح کے کام کی بدولت نجات پاتا ہے۔ مسیح کی گنہگاروں کو بخشی جانے والی نجات کا انحصار اُن کے اُس ایمان پر ہوتا ہے جو وہ نجات دہندہ مسیح کی شخصیت اور کام پر رکھتے ہیں۔

اِن تین مواقعوں پر جب یسوع نے سبت سے متعلق بات کی تو آپ نے ایک بڑے اصول کی وضاحت یہ کہتے ہوئے کی کہ "زندہ کرنے والی تو رُوح ہے۔ جسم سے کچھ فائدہ نہیں۔ جو باتیں میں نے تم سے کہی ہیں وہ رُوح ہیں اور زندگی بھی ہیں" (انجیل بمطابق یوحنا 6: 63)۔ پولس رسول نے بھی ایسی ہی بات کہی ہے جب کہا کہ خدا نے "ہم کو نئے عہد کے خادم ہونے کے لائق بھی کیا۔ لفظوں کے خادم نہیں بلکہ رُوح کے کیونکہ لفظ مار ڈالتے ہیں مگر رُوح زندہ کرتی ہے" (نیا عہدنامہ، 2-کرنتھیوں 3: 6)۔

یسوع کے الفاظ نے فقیہوں اور فریسیوں کو غصہ دِلا دیا۔ مُقدّس لوقا انجیل نویس بیان کرتا ہے کہ وہ آپے سے باہر ہو کر ایک دوسرے سے کہنے لگے کہ ہم یسوع کے ساتھ کیا کریں؟ (انجیل بمطابق لوقا 6: 11)۔ سبت کے تعلق سے حکم کو قائم رکھنے کی غرض سے وہ چھٹے حکم کو توڑنے کےلئے تیار تھے جو کہتا ہے کہ "تُو خون نہ کرنا۔" مسیح سے متعلق اُن کے خیالات اور برتاﺅ بالکل اُس رویہ کے مماثل ہے جو دُنیوی لوگوں نے ہر زمانہ میں خدا کے لوگوں سے روا رکھا ہے۔ نبیوں، رسولوں، مُصلحین اور شہدا نے مسیح ہی کی طرح راستبازی کی خاطر دُکھ سہے۔ جب عداوت رکھنے والے افراد راستبازوں کو تنقیدی نظر سے دیکھتے ہیں تو اِس کا فائدہ یوں سامنے آتا ہے کہ وہ اپنی عوامی اور ذاتی زندگی میں بہت محتاط ہو جاتے ہیں اور اُن کی گواہی کی چمک دمک خوب روشن ہو جاتی ہے۔

"اور اُن دِنوں میں ایسا ہُوا کہ وہ پہاڑ پر دُعا کرنے کو نکلا اور خدا سے دُعا کرنے میں ساری رات گزاری۔ جب دِن ہُوا تو اُس نے اپنے شاگردوں کو پاس بُلا کر اُن میں سے بارہ چُن لئے اور اُن کو رسول کا لقب دیا۔ یعنی شمعون جس کا نام اُس نے پطرس بھی رکھا اور اُس کا بھائی اندریاس، اور یعقوب اور یوحنا، اور فلپس اور برتلمائی۔ اور متی اور توما، اور حلفئی کا بیٹا یعقوب، اور شمعون جو زیلوتیس کہلاتا تھا۔ اور یعقوب کا بیٹا یہوداہ، اور یہوداہ اِسکریوتی جو اُس کا پکڑوانے والا ہُوا۔ اور وہ اُن کے ساتھ اُتر کر ہموار جگہ پر کھڑا ہُوا، اور اُس کے شاگردوں کی بڑی جماعت اور لوگوں کی بڑی بھِیڑ وہاں تھی جو سارے یہودیہ اور یروشلیم اور صور اور صیدا کے بحری کنارے سے اُس کی سُننے اور اپنی بیماریوں سے شفا پانے کےلئے اُس کے پاس آئی تھی۔ اور جو ناپاک رُوحوں سے دُکھ پاتے تھے وہ اچھے کئے گئے۔ اور سب لوگ اُسے چھونے کی کوشش کرتے تھے کیونکہ قوت اُس سے نکلتی اور سب کو شفا بخشتی تھی۔" (انجیل بمطابق لوقا 6: 12-19)

یہودی راہنما اگرچہ مختلف فرقوں سے تعلق رکھتے تھے، مگر یسوع کی مخالفت میں سب ایک ہو گئے۔ فریسی سبت کو توڑنے کی وجہ سے آپ سے نفرت رکھتے تھے۔ وہ آپ کو بگاڑ کا سبب بننے والا، کفر کا مرتکب، ایک سامری، دھوکہ باز، اور بدرُوح گرفتہ تصور کرتے تھے۔ آپ چونکہ گنہگاروں کے ساتھ اُٹھتے بیٹھتے تھے اِس لئے اُن کی نگاہ میں آپ نے اُن کی شریعت اور ہیکل کی بےعزتی کی تھی۔ دوسری طرف ہیرودی تھے جو اِس بات سے خوفزدہ تھے کہ آپ ہیرودیس بادشاہ سے تخت چھین لیں گے۔

جب مسیح نے دیکھا کہ یہودیوں کے بزرگ آپ کے خلاف متحد ہو گئے ہیں تو آپ گلیل کی جھیل کے کنارے چلے گئے تا کہ ضرورت مندوں کی مدد کر سکیں اور اپنے پیروکاروں میں سے اُن افراد کا چناﺅ کر سکیں جنہیں آپ نے خدمت کےلئے تیار کرنا تھا۔ آپ کا اِن رسولوں کو چُننے کا مقصد یہ تھا کہ وہ آپ کے یہودی راہنماﺅں کے ہاتھوں مرنے، جی اُٹھنے اور آسمان پر صعود کر جانے کے بعد خوشخبری کی منادی کریں۔ تب بہت سے لوگ آپ کے پاس گلیل، یہودیہ، ادومیہ، صور اور صیدا کے بحری علاقوں، اور بیریہ سے آئے اور آپ نے اُن سب کو شفا بخشی۔

اِس ہجوم میں کچھ یسوع کی تعلیم کو سُننے کےلئے آئے اور بہت سے شفا پانا چاہتے تھے۔ مسیح نے بدرُوح گرفتوں میں سے بدرُوحیں باہر نکالیں۔ بدرُوحوں نے آپ کو پہچان کر کہا "تُو خدا کا بیٹا ہے۔" بداروح نے مسیح کے الہٰی اختیار کو دیکھا اور اُس کی گواہی دی۔ لوگوں کا ہجوم یسوع کے گرد جمع ہو گیا تا کہ آپ کو چھوئے، کیونکہ قوت آپ سے نکلتی اور سب کو شفا بخشتی تھی۔

آئیے ہم یسوع کے شاگردوں کے چناﺅ پر غور کریں جن کا کام بیماروں کو شفا دینا، یسوع کے نام میں بدارواح کو نکالنا، آپ کی تعلیمات کو پھیلانا، ایمانداروں کے گروہوں کی تشکیل دینا اور مستقبل کی نسلوں کےلئے ایمان کی سچائیوں کو تحریر کرنا تھا۔ یسوع نے دُنیا کے عظیم لوگوں کو نہیں چُنا تا کہ کہیں وہ اپنے آپ پر فخر کرنے نہ لگ جاتے، اگر ایسے ہوتا تو خدا کو وہ جلال نہ ملتا جو یسوع دیکھنا چاہتے تھے۔ سارا جلال صرف خدا ہی کا ہے۔ اِس کی حمایت میں پولس رسول نے یہ کہا ہے "لیکن ہمارے پاس یہ خزانہ مٹی کے برتنوں میں رکھا ہے تا کہ یہ حدّ سے زیادہ قدرت ہماری طرف سے نہیں بلکہ خدا کی طرف سے معلوم ہو" (نیا عہدنامہ، 2-کرنتھیوں 4: 7)۔ یسوع نے کمزوروں اور بےوجودوں کو چُنا، اور اُنہیں اپنی خدمت کرنے کے قابل بنایا جس کا نتیجہ یہ نکلا کہ وہ اپنے وقتوں کے کسی بھی دُنیوی قائد سے زیادہ سبقت لے گئے۔ یسوع نے اُنہیں اپنی خدمت کے ابتدائی سالوں میں چُنا تا کہ آسمان پر اپنے صعود سے پہلے اُن کی تربیت کر سکیں۔

رسولوں نے یسوع کو گہرے طور پر جاننے کےلئے آپ کے ساتھ کافی عرصہ گزارا، اور اُنہوں نے یسوع پر اپنے ایمان میں ترقی کی۔ اُنہوں نے آپ کی محبت کا تجربہ کیا اور آپ کی خاطر مشکلات اور ایذارسانی برداشت کی۔ جتنی اسرائیل کے قبیلوں کی تعداد تھی مسیح نے بھی اُتنے ہی رسولوں کا چناﺅ کیا۔ یوں آپ پرانے اور نئے عہدنامہ کو باہم منسلک کرنا چاہتے تھے۔ رسولوں کا چناﺅ بہت اہم تھا، اِس لئے یسوع نے اُن کے چناﺅ سے پہلے ساری رات دُعا میں گزاری۔ دُعا کی اُس رات نے اُن کی زندگیوں میں رُوحانی بیج بو دیا۔ بعدازاں اُن کے کاموں اور تحریروں سے ایسی بڑی فصل سامنے آئی جس نے انسانیت کی آنے والی تمام نسلوں پر گہرا اثر ڈالا۔ خدا اور اُس کے مسیح کے جلال کےلئے اِس فصل کی کٹائی آج بھی جاری و ساری ہے۔

"پھِر وہ پہاڑ پر چڑھ گیا اور جن کو وہ آپ چاہتا تھا اُن کو پاس بُلایا اور وہ اُس کے پاس چلے آئے۔ اور اُس نے بارہ کو مقرر کیا تا کہ اُس کے ساتھ رہیں اور وہ اُن کو بھیجے کہ منادی کریں۔ اور بدرُوحوں کو نکالنے کا اختیار رکھیں۔" (انجیل بمطابق مرقس 3: 13-15)

مسیح نے بارہ شاگردوں کو "رسولوں" کا لقب دیا جس کا مطلب "بھیجے ہوئے" ہے، کیونکہ آپ نے اُنہیں بھیجنا تھا تا کہ اپنے نام میں نہیں بلکہ آپ کے نام میں خدمت کے کام کو سرانجام دیں۔ بعدازاں آپ نے فرمایا: "... جس طرح باپ نے مجھے بھیجا ہے اُسی طرح میں بھی تمہیں بھیجتا ہوں" (انجیل بمطابق یوحنا 20: 21)۔ آپ نے اُنہیں اپنے صعود سے کافی عرصہ پہلے چنا تا کہ اُن کے پاس کافی وقت ہو، اور وہ اُن فریب خوردہ خیالات اور ثقافتی رسومات کو چھوڑ سکتے جن کی تعلیم اُنہوں نے بچپن میں پائی تھی یا جو اُنہوں نے نوجوانی میں اپنے قائدین سے سیکھی تھیں۔ آپ اُنہیں اپنی نئی رُوحانی خوراک حقیقی الہٰی تربیت سے آسودہ کرنا چاہتے تھے تا کہ اُن کی مدد ہو، اور وہ پرانی اور نئی تعلیم کی نوعیت میں تمیز کر سکیں۔

ہم یسوع کے اپنے اردگرد جمع ہونے والے لوگوں پر محبت سے نگاہ کرنے کو تصور میں لا سکتے ہیں۔ ہم اُنہیں اپنے چنیدہ رسولوں پر اپنے نئے کام کی اہمیت کو پُرفضل طریقے سے واضح کرتے ہوئے سُن سکتے ہیں۔ آپ نے اُنہیں اپنے محبت بھرے مقاصد اور اُن بڑی ذمہ داریوں کے بارے میں بتایا جن کے مطابق اُنہیں کام کرنا تھا۔ کسی بھی رسول کے چُنے جانے سے پہلے آپ کے سامعین کیا سوچتے ہوں گے؟ غالباً اُن میں سے سب چُنے ہوﺅں میں ہونے کی اُمید کر رہے تھے۔ اُنہوں نے اپنے عزیز اُستاد یسوع پر پوری طرح بھروسا کیا، اور یہ اُن کےلئے ایک سنہری موقع تھا کہ آپ کے ساتھ رہیں اور آپ کی حکمت سے فیض یاب ہوں۔ اور پھر ایک شاندار خدمت کا موقع سامنے آیا۔ اِس میں کوئی شک نہیں کہ جب آپ نے ایک ایک کر کے اپنے رسولوں کو چُننا شروع کیا تو اُن کے دِل خوشی سے بھر گئے ہوں گے۔ غالباً کچھ چُنے گئے رسولوں کو مبارکباد دینا چاہتے ہوں گے جبکہ دوسرے منفی جذبات سے نبرد آزما ہوتے ہوں گے۔

غالباً یسوع نے شعمون کو اُس کی سرگرمی اور جوش و جذبہ کی وجہ سے چُنا۔ اُس کا نام سب سے پہلے آتا ہے جس سے پتا چلتا ہے کہ یسوع نے اُسے سب سے پہلے رسول ہونے کےلئے بلایا۔ ہم یہ نتیجہ اخذ کر سکتے ہیں کہ مسیح نے اُسے نیا نام پطرس اِس لئے دیا، تا کہ ایک اَور چُنے گئے شاگرد شمعون اور اُس میں فرق واضح ہو۔ اِس کے بعد ہمیں اندریاس کا نام ملتا ہے۔ اندریاس نے سب سے پہلے یسوع کی پیروی شروع کی تھی اور و ہ تاریخ میں پہلا مسیحی مبشر بھی تھا جس نے اپنے بھائی پطرس کو یسوع کی پیروی کرنے کی دعوت دی۔ اُس کے بارے میں کلام مُقدّس میں اِس کے بعد زیادہ تذکرہ نہیں ملتا۔ اِس کے بعد یسوع نے دو اَور بھائیوں، زبدی کے بیٹوں یعقوب اور یوحنا کو چُنا۔ اُن کا تعلق بھی اُسی قصبہ سے تھا اور وہ پطرس اور اندریاس کے ہم پیشہ تھے۔ اُن میں سے بڑا بھائی یعقوب، مسیح کے صعود کے بعد کلیسیا کا ایک سرکردہ راہنما بنا، جسے پندرہ برس بعد ہیرودیس اگرپّا نے یہودیوں کو خوش کرنے کےلئے قتل کر ڈالا۔ جبکہ چھوٹے بھائی یوحنا نے طویل عمر پائی، اور اپنے باقی سب ساتھیوں کے دُنیا سے رخصت ہو جانے کے بعد بھی کئی کلیسیاﺅں میں خدمت سرانجام دی۔

اِن چاروں رسولوں کا پہلے ذِکر کرنے کی وجہ یہ ہے کہ یہ یسوع کی پیروی کرنے والے اوّلین افراد میں شامل تھے جب آپ کے بارے میں لوگ ابھی زیادہ نہیں جانتے تھے۔ پھر یسوع نے دو اَور رسولوں فلِپُّس اور برتلمائی کو چُنا۔ اِس کے بعد سوائے ایک جگہ کے، جو یوحنا کی معرفت لکھے گئے انجیلی بیان میں ہے، کہیں اَور فلِپُّس کا ذِکر نہیں آیا۔ یہ چھ رسولوں کی نصف تعداد تھی۔ یہ سب یوحنا بپتسمہ دینے والے کے شاگرد تھے اور اُس کے ساتھ رہے تھے کیونکہ اُنہوں نے یوحنا بپتسمہ دینے والے کی منادی میں حقیقی رُوحانیت کے جوہر کو پہچان لیا تھا۔ بلا شک و شبہ سب رسولوں نے یسوع کی جانب سے چُنے جانے پر فخر محسوس کیا۔

متی محصول لینے والے کا رسول ہونے کےلئے چناﺅ قابل غور ہے۔ کیا اُس جیسا شخص رسول ہونے کے قابل ہو سکتا تھا؟ رُوحانی اور ذہنی طور پر وہ اِس کام کےلئے مناسب تھا۔ اُس کا چناﺅ کرنے سے یسوع نے ظاہر کیا کہ بہت سے ایسے لوگ جن سے دوسرے نفرت کرتے ہیں خدا کی نظر میں اہم ہیں۔ متی کا چناﺅ خدا کے فضل کی قدرت کی ایک اچھی مثال ہے جس نے ایک گنہگار کو لیا اور ایک عظیم رسول بنایا۔ متی کے بعد توما کا نام لکھا ہے۔ ہم اُس کے ماضی کے بارے میں نہیں جانتے۔ اِس لحاظ سے وہ پہلے چُنے گئے سات رسولوں سے فرق ہے۔ اِس کے بعد جو نام درج ہے، وہ ہے: حلفئی کا بیٹا یعقوب۔ کچھ خیال کرتے ہیں کہ وہ متی کا بھائی تھا کیونکہ دونوں کے باپ کا نام حلفئی تھا۔ لیکن یہ غالباً درست نہیں ہے کیونکہ جیسے پطرس اور اندریاس، اور یعقوب اور یوحنا کے نام اکھٹے آئے ہیں ویسے متی اور یعقوب کا نام اکھٹے نہیں دیا گیا۔

اِس کے بعد جس شخص کو مسیح نے چُنا اُس پر ہمیں حیرانی ہوتی ہے۔ اُس شخص کا نام شمعون تھا جو زیلوتیس کہلاتا تھا۔ وہ رومیوں کا مخالف تھا۔ وہ معاشرے کا ایسا فرد تھا جس نے رومیوں کے خلاف بغاوت کی ہوئی تھی، اِس لئے اُس کے لوگ اُس کی عزت کرتے تھے۔ یسوع نے شاگردوں کے اپنے گروہ میں اُس جیسا فرد اِس لئے شامل کیا تا کہ وہ گروہ مختلف مزاج اور پس منظر کے لوگوں پر مشتمل ہو۔ گیارہویں رسول کے مختلف نام تھے: یہوداہ، یعقوب کا بھائی یا تدّی۔

آخری رسول یہوداہ اسکریوتی یہودیہ سے تعلق رکھتا تھا۔ باقی سب گلیل کے رہنے والے تھے۔ وہ دوسروں سے اِس لحاظ سے مختلف تھا کہ وہ مختلف علاقہ سے آیا تھا اور اُس نے اپنے اُستاد کو دھوکے سے پکڑوایا تھا۔ اُس کے نام کے ساتھ ہمیشہ "دھوکے باز" کا لفظ آتا ہے۔ اگرچہ یہوداہ میں ایک رسول ہونے کےلئے کسی لازمی خوبی کا پتا نہیں چلتا، تاہم یسوع نے غالباً اُسے اِس لئے چُنا کہ نبوت پوری ہو اور خدا کی مرضی پوری ہو (دیکھئے زبور 41: 9; 109: 7، 8)۔ یہوداہ کا چناﺅ کرنے سے یسوع غالباً اپنے پیروکاروں کےلئے ایک مثال بھی قائم کرنا چاہتے تھے کہ کیسے کھوئے ہوﺅں تک جایا جائے۔ کچھ لوگ فوراً تبدیل نہیں ہوتے، اور ایک شخص کو توبہ کی طرف لے کر جانے والے طریقے شاید دوسروں کےلئے کام نہ کریں۔ کوئی ایسی بات نہ تھی جس کی وجہ سے یہوداہ یسوع کو دھوکا دیتا، لیکن اِس کے باوجود اُس نے ایسا کیا۔ اُسے تبدیل ہونے کے کئی مواقع ملے، لیکن اُس نے اُنہیں نظرانداز کیا۔

یہوداہ نے جب پہلی بار یسوع کی پیروی کرنی شروع کی تو غالباً وہ بُرا شخص نہیں تھا۔ لیکن جب وہ ایک رسول بنا تو اُس کے بعد وہ اُن لوگوں کی طرح راہ سے بھٹک گیا جو آغاز تو اچھا کرتے ہیں مگر پھرالہٰی فضل کے بارے میں اپنی ناقص سمجھ کی وجہ سے اختتام بُرا کرتے ہیں۔ یہوداہ اُس گروہ کا خزانچی تھا، اور غالباً اُس کے ساتھیوں نے اُس میں کاروباری رجحان کو دیکھتے ہوئے اُسے اِس عہدے پر مقرر کیا۔

یسوع مکمل طور پر جانتے تھے کہ آپ کے شاگردوں کے ساتھ مستقبل میں کیا ہو گا، اور اِس کے ساتھ ہی آپ نے اپنے رسولوں کا چناﺅ ختم کیا۔ آپ نے نبوتانہ رُوح میں نہ صرف اُن کی کمزوریوں اور خامیوں کو دیکھا بلکہ اُن کا جوش و جذبہ، مشکلات پر اُن کی فتح، اور اُن کی ایذارسانیوں کو بھی دیکھا۔ مزیدبرآں، آپ نے اُن کی زندگی میں اُن کی منادی کے اثر کو بھی دیکھا۔ آپ نے اُن کی تحریروں اور اُن کے قائم کئے ہوئے اداروں اور اُن کی موت کے بعد آگے جاری و ساری رہنے والے کام کو بھی دیکھا۔ آپ نے اُنہیں الہٰی تخت کے دہنے ہاتھ بڑے جلال میں شہیدوں کے درمیان تاج پہنے بیٹھے اسرائیل کے بارہ قبیلوں کا انصاف کرتے دیکھا (انجیل بمطابق متی 19: 28)۔

رسولوں کے چُناﺅ کے بعد مسیح نے ایک دو ٹوک وعظ پیش کیا جسے "پہاڑ پر دیا گیا وعظ" کہا جاتا ہے۔ اِس پر گہرے طور سے غور و فکر کرنے کی ضرورت ہے کیونکہ مذہب کے معاملے میں جو کچھ خدا لوگوں سے توقع کرتاہے اُس کا ایک مکمل خلاصہ اور راہنما اصول اِس میں موجود ہیں۔ مسیح نے اِسے کفرنحوم کے نزدیک ایک پہاڑی پر پیش کیا۔ زیادہ تر مُفسّروں کے نزدیک جس جگہ پر اِسے مسیح نے پیش کیا وہ تبریاس کے شمال میں قرون حطین کا مقام تھا۔ یہ مسیح کا مشہور ترین اور طویل وعظ ہے، جس کی فضیلت کو سب لوگ تسلیم کرتے ہیں اور اِس میں مسیحیت کے مخالفین بھی شامل ہیں۔

یہ وعظ مسیح کی نئی قائم کردہ رُوحانی بادشاہی کا دستور ہے۔ اِس کی بنیاد جناب موسیٰ اور دیگر انبیا کو دیئے گئے مکاشفوں پر ہے جنہیں مسیح پورا کرنے کےلئے تشریف لائے۔ خدا تعالیٰ نے داﺅد نبی کی معرفت مسیح کو اِس رُوحانی بادشاہی کے بادشاہ طور پر یوں بیان کیا: "میں تو اپنے بادشاہ کو اپنے کوہِ مُقدّس صِیُّون پر بٹھا چکا ہوں" (زبور 2: 6)۔ بادشاہ کے طور پر یہ آپ کےلئے لازمی امر تھا کہ اپنے رسولوں کو جو آپ کی نمائندگی کرتے تھے ایک خاص فرمان دیں جس میں آپ کی بادشاہی کے نئے عناصر کا اعلان اور قدیم ضابطہ کے نئے معنٰی شامل ہوں۔ بادشاہ نے نہ صرف اپنے رسولوں کو مقرر کیا بلکہ اُنہیں خاص قوت بھی بخشی تا کہ وہ اُس زبردست اور کثیرجہتی کام کو سرانجام دے سکیں جو اُنہیں کرنے کےلئے سونپا گیا تھا۔

آئیے اِس سے پہلے کہ ہم مسیح کے الفاظ پر غور کریں، اُس تناظر پر ایک نگاہ کریں جس میں یہ وعظ دیا گیا۔ اِس کا دیا جانا بنجر کوہِ سینا پر عہد عتیق کی شریعت کے دیئے جانے کی طرح نہ تھا جس میں نادیدنی خدا کی آواز نے شریعت دی جس کے ساتھ گرج چمک، زلزلہ اور آگ تھی۔ سوائے موسیٰ کے کسی اَور کو پہاڑ پر آنے کی اجازت نہ تھی، اور اگر کوئی ایسا کرتا تو سنگسار کیا جاتا۔ لیکن اِس کے برعکس، مسیح کا یہ مشہور وعظ قرون حطین کے مقام پر دیا گیا جہاں ہر طرف ہریالی تھی، پرندوں کے چہچہانے کی آواز سُنی جا سکتی تھی، اور خوبصورت پھولوں کی خوشگوار مہک نے اُس ساری جگہ کو معطر کر رکھا تھا، اور خدائے مجسم مسیح نے جو حلیم و فروتن تھے اُس جگہ اپنی زبان مبارکہ سے اِن الفاظ کو بیان کیا۔ آپ کے اردگرد آپ کے شاگرد موجود تھے اور فلستین کے مختلف علاقوں سے آئی ہوئی ایک بڑی بھیڑ بھی آپ کی باتوں پر کان لگائے ہوئے تھی۔

بیان کیا جاتا ہے کہ ایک یہودی روایت میں مسیح کے آنے کے منظر کا نقشہ کچھ یوں کھینچا گیا ہے کہ وہ یافا کے ساحل پر کھڑا ہو گا، اور سمندر کو حکم دے گا کہ اپنے خزانے اُگل دے۔ سمندر فوراً مسیح کے قدموں میں اپنی گہرائی میں دبے تمام جواہرات و خزانے نکال کر رکھ دے گا۔ مسیح اپنے شاگردوں کو زرق برق لباس پہنائے گا، قیمتی پتھروں سے اُنہیں مُزّین کرے گا، اُنہیں آسمانی من کھلائے گا جو اُس من سے کہیں زیادہ میٹھا اور مزیدار ہو گا جو بنی اسرائیل نے بیابان میں کھایا تھا۔ تاہم یہ روایت مسیح کی آمد کی غیرحقیقی اور فریب پر مبنی تصویر پیش کرتی ہے۔

کیا اصل منظر جس پر ہم سوچ بچار کر رہے ہیں زیادہ خوبصورت نہیں؟ کیا سمندر کی تہہ میں موجود جواہرات کا ہمارے سامنے موجود بنیادی رُوحانی تعلیمات کے ساتھ کوئی موازنہ کیا جا سکتا ہے؟ کیا کوئی لباس اِس وعظ اور مسیح کے کردار میں موجود قابل تحسین خوبیوں سے زیادہ شاندار ہے؟ کیا سمندر کو اپنے خزانے اُگل دینے کا حکم اُسی پُرجلال اختیار کو ظاہر کرتا ہے جو بدارواح کو جھڑکنے، مُردوں کو زندہ کرنے یا اپنے پیروکاروں کو دوسرے کے گناہ معاف کرنے کے تقاضے میں نظر آتا ہے؟

یسوع نے اِس پہاڑ پر جو تعلیمات دیں وہ سب نئی نہ تھیں۔ یہودی پرانے عہدنامہ سے اپنی آگاہی کی وجہ سے آپ کی تعلیمات کی بنیادی سچائیوں سے واقف تھے، جبکہ غیراقوام کے پاس بھی ایسے کئی قوانین تھے جن میں خدا کی شریعت کی جھلک موجود تھی (دیکھئے رومیوں 2: 14، 15)۔ مسیح کی تعلیمات نے عہد عتیق کی شریعت میں بالکل ویسے زندگی کا دم پھونکا جیسے خدا تعالیٰ نے زمین کی مٹی سے آدم کو بنانے کے بعد اُس کے خوبصورت بدن میں زندگی کا دم پھونکا تھا۔

"وہ اِس بھِیڑ کو دیکھ کر پہاڑ پر چڑھ گیا اور جب بیٹھ گیا تو اُس کے شاگرد اُس کے پاس آئے۔ اور وہ اپنی زبان کھول کر اُن کو یوں تعلیم دینے لگا۔ مبارک ہیں وہ جو دِل کے غریب ہیں کیونکہ آسمان کی بادشاہی اُن ہی کی ہے۔ مبارک ہیں وہ جو غمگین ہیں کیونکہ وہ تسلی پائیں گے۔ مبارک ہیں وہ جو حلیم ہیں کیونکہ وہ زمین کے وارِث ہوں گے۔ مبارک ہیں وہ جو راستبازی کے بھوکے اور پیاسے ہیں کیونکہ وہ آسودہ ہوں گے۔ مبارک ہیں وہ جو رحمدل ہیں کیونکہ اُن پر رحم کیا جائے گا۔ مبارک ہیں وہ جو پاک دِل ہیں کیونکہ وہ خدا کو دیکھیں گے۔ مبارک ہیں وہ جو صلح کراتے ہیں کیونکہ وہ خدا کے بیٹے کہلائیں گے۔ مبارک ہیں وہ جو راستبازی کے سبب سے ستائے گئے ہیں کیونکہ آسمان کی بادشاہی اُن ہی کی ہے۔ جب میرے سبب سے لوگ تم کو لعن طعن کریں گے اور ستائیں گے اور ہر طرح کی بُری باتیں تمہاری نسبت ناحق کہیں گے تو تم مبارک ہو گے۔ خوشی کرنا اور نہایت شادمان ہونا کیونکہ آسمان پر تمہارا اجر بڑا ہے، اِس لئے کہ لوگوں نے اُن نبیوں کو بھی جو تم سے پہلے تھے اِسی طرح ستایا تھا۔" (انجیل بمطابق متی 5: 1-12)

"جب وہ لوگوں کو اپنی سب باتیں سُنا چکا تو کفرنحوم میں آیا۔ اور کسی صوبیدار کا نوکر جو اُس کو عزیز تھا بیماری سے مرنے کو تھا۔ اُس نے یسوع کی خبر سُن کر یہودیوں کے کئی بزرگوں کو اُ س کے پاس بھیجا اور اُس سے درخواست کی کہ آ کر میرے نوکر کو اچھا کر۔ وہ یسوع کے پاس آئے اور اُس کی بڑی مِنّت کر کے کہنے لگے کہ وہ اِس لائق ہے کہ تُو اُس کی خاطر یہ کرے۔ کیونکہ وہ ہماری قوم سے محبت رکھتا ہے اور ہمارے عبادتخانہ کو اُسی نے بنوایا۔ یسوع اُن کے ساتھ چلا، مگر جب وہ گھر کے قریب پہنچا تو صوبیدار نے بعض دوستوں کی معرفت اُسے یہ کہلا بھیجا کہ اے خداوند تکلیف نہ کر کیونکہ میں اِس لائق نہیں کہ تُو میری چھت کے نیچے آئے۔ اِسی سبب سے میں نے اپنے آپ کو بھی تیرے پاس آنے کے لائق نہ سمجھا بلکہ زبان سے کہہ دے تو میرا خادم شفا پائے گا۔ کیونکہ میں بھی دوسرے کے اختیار میں ہوں اور سپاہی میرے ماتحت ہیں اور جب ایک سے کہتا ہوں جا تو وہ جاتا ہے اور دوسرے سے آ تو وہ آتا ہے اور اپنے نوکر سے کہ یہ کر تو وہ کرتا ہے۔ یسوع نے یہ سُن کر اُس پر تعجب کیا اور پھِر کر اُس بھِیڑ سے جو اُس کے پیچھے آتی تھی کہا، میں تم سے کہتا ہوں کہ میں نے ایسا ایمان اسرائیل میں بھی نہیں پایا۔ اور بھیجے ہوئے لوگوں نے گھر میں واپس آ کر اُس نوکر کو تندرست پایا۔" (انجیل بمطابق لوقا 7: 1-10)

مسیح نے فرمایا کہ آپ لوگوں سے خدمت لینے نہیں بلکہ اُن کی خدمت کرنے کےلئے آئے تھے۔ آپ نے ہمیشہ اپنے دعوﺅں کو مکمل طور پر پورا کر کے دِکھایا۔ آپ کے سامعین آپ کے بارے میں کہتے تھے کہ آپ فقیہوں کی طرح نہیں بلکہ اختیار کے ساتھ کلام کرتے تھے۔ آپ کے پُراختیار کلام کے ساتھ پُراختیار کام بھی تھے۔ تعلیم دینے کے بعد آپ نے پھر معجزات کرنے شروع کئے۔ آپ کفرنحوم میں داخل ہوئے تو ایک بڑی بھِیڑ آپ کے ساتھ تھی۔ اور یہودی بزرگوں کا ایک وفد آپ سے ملا اور بڑے اشتیاق سے آپ سے درخواست کرنے لگا کہ ایک رومی صوبیدار کے مفلوج نوکر کو جو مرنے کے قریب تھا شفا بخشیں۔ ہم یہ نتیجہ اخذ کر سکتے ہیں کہ یہ نوکر رومی صوبیدار کو بہت عزیز تھا، کیونکہ الفاظ "میرے نوکر" کا ترجمہ "میرا لڑکا" بھی کیا جا سکتا ہے۔ یونانی میں یہ لفظ بیٹوں کےلئے استعمال ہوتا تھا۔ رومی صوبیدار ایک شریف النفس انسان تھا، کیونکہ اُس کے الفاظ اور اُس کی فکر سے ظاہر ہوتا ہے کہ وہ اپنے نوکر سے محبت کرتا تھا جبکہ اُس کے زیادہ تر ہمعصر اپنے نوکروں کو حقیر جانتے اور اُن سے بری طرح سے پیش آتے تھے۔

رومی صوبیدار نے سوچا کہ یسوع یہودی بزرگوں کی درخواست کو سُنے گا، اِس لئے اُس نے اُن کی مدد کا سہارا لیا۔ اِس سے ہم یہ بھی نتیجہ اخذ کر سکتے ہیں کہ مسیح اور کفرنحوم کے یہودی بزرگوں کے درمیان تعلقات اَب بھی ٹھیک تھے، جبکہ یہودیہ میں ایسی صورتحال نہ تھی۔ یہودی بزرگوں نے رومی صوبیدار کی درخواست یسوع کے سامنے اِس لئے رکھی کیونکہ وہ ابھی تک یسوع کے مخالف نہ ہوئے تھے۔ وہ رومی صوبیدار کو اُس کے نوکر کے پاس چھوڑ کر یسوع سے ملنے گئے۔ اور جب وہاں پہنچ گئے تو یسوع سے کہنے لگے کہ رومی صوبیدار اُن کی قوم سے محبت رکھتا ہے اور اُس نے اُن کےلئے ایک عبادتخانہ بھی تعمیر کرایا ہے، اِس لئے وہ اِس لائق ہے کہ اُس کا نوکر شفا پائے۔ رومی صوبیدار نے سوچا کہ یسوع سے شفا پانے کےلئے درمیانیوں کی ضرورت ہے۔ تاہم وہ اِس بات سے واقف نہ تھا کہ یسوع اِن درمیانیوں سے کہیں بڑھ کر اُسے جانتے تھے، اور کسی بھی دوسرے شخص سے بڑھ کر اُس سے محبت کرتے تھے۔ اِس لئے اُن کا بیچ میں پڑنا غیر اہم تھا۔ حتیٰ کہ آج بھی ہمارے لئے سوائے یسوع مسیح کے کوئی اَور درمیانی نہیں ہے۔ نہ ہی کوئی فرشتہ اور نہ ہی کوئی مُقدّس ہمارے لئے کچھ کر سکتا ہے، کیونکہ خدا اور انسان کے مابین واحد درمیانی مسیح ہے۔ اور یہ صلیب پر آپ کے مخلصی کے لاثانی کام کی بدولت ممکن ہو سکا۔ ہم 1-تیمتھیس 2: 5 میں یہ الفاظ پڑھتے ہیں: "کیونکہ خدا ایک ہے اور خدا اور اِنسان کے بیچ میں درمیانی بھی ایک یعنی مسیح یسوع جو اِنسان ہے۔"

وہ جو فرشتوں اور مُقدسین کی شفاعت کے متلاشی ہیں، درحقیقت اُن لوگوں کی مانند ہیں جو دِن کے عین درمیانی وقت میں چراغ مانگ رہے ہیں۔ وہ اِس بات کا ادراک نہیں کرتے کہ اُن میں پائی جانے والی شفقت و مہربانی کا مسیح کے اعلیٰ ترین کردار کے ساتھ کوئی موازنہ نہیں ہے۔ کسی بھی مُقدّس نے کبھی مسیح سے بڑھ کر محبت نہیں دکھائی۔ صرف آپ ہی آسمان سے تشریف لائے، مجسم ہوئے، تعلیم دی، خدمت کی، دُکھ اُٹھایا، مر گئے، مُردوں میں سے جی اُٹھے، آسمان پر صعود فرمایا اور اَب ہمارے درمیانی اور شفیع کے طور پر خدا کے دہنے ہاتھ بیٹھے ہوئے ہیں۔ آپ نے اپنی کامل محبت کی وجہ سے ایسا کیا۔ وہ جو مسیح سے ہٹ کر کسی اَور سے مدد کے طالب ہوتے ہیں، درحقیقت اُس بچے کی مانند ہیں جس کو مشکلات درپیش ہوں اور وہ اپنی والدہ کی جگہ جس نے اُس کی محبت میں اپنا آپ وقف کر دیا ہو، کسی نوکر کی طرف متوجہ ہو جائے۔ یسوع کی زمینی ماں مُقدسہ مریم کی شفاعت بھی لاحاصل ہے۔ اِس کی تائید میں ہم قانائے گلیل میں یسوع کی مثال کا حوالہ دے سکتے ہیں جب آپ نے اپنی والدہ کو مداخلت کرنے سے روک دیا۔

بیمار لوگ عموماً یسوع کے پاس لائے جاتے تھے۔ تاہم اِس معاملے میں یسوع رومی صوبیدار کے بیمار نوکر کے پاس جانے کو روانہ ہوئے، اور اِس کی غالباً وجہ یہ تھی کہ وہ دوسری قوم کا تھا۔ جب رومی صوبیدار کو یسوع کے اپنے گھر کی طرف آنے کے بارے میں پتا چلا تو اُس نے اپنے چند دوستوں کو راہ میں یسوع سے ملنے کو بھیجا تا کہ مسیح کی قدرت کےلئے اُس کی بڑی تعظیم اور ایمان کا اظہار کریں۔ وہ یسوع کو بتانے کا خواہشمند تھا کہ وہ اِس قابل نہیں کہ یسوع اُس کی چھت کے نیچے آئے۔ وہ یسوع سے چاہتا تھا کہ وہ صرف زبان سے کہہ دے، اور وہ جانتا تھا کہ اُس کا خادم شفا پا جائے گا۔ یہ کتنی بڑی عاجزی و فروتنی ہے! یہ بہترین ثبوت تھا کہ وہ مسیح کی مدد کے لائق بن گیا تھا۔ وہ سب جو مسیح کی مدد اور نجات کے متمنی ہیں اُن کےلئے لازم ہے کہ وہ خدا کے حضور اپنی نالائقی کا احساس کریں۔

ممکن ہے اِس شخص نے سوچا ہو کہ جیسے یسوع تقریباً ڈیڑھ برس پہلے ایک اَور صوبیدار سے پیش آئے تھے اور دُور ہی سے اپنے کہنے سے شفا بخشی تھی ویسے ہی وہ اَب کریں گے۔ اُس کا ایمان تھا کہ جیسے وہ رومی صوبیدار کے طور پر اپنے سپاہیوں اور خادموں پر اختیار رکھتا تھا اُسی طرح یسوع بھی فطرت کے عناصر اور بیماری پر اختیار رکھتا تھا۔

یسوع غیرقوم کے اِس فرد کے بڑے ایمان، حکمت اور حلیمی سے حیران ہوئے۔ آپ نے اردگرد دیکھ کر کہا "میں تم سے کہتا ہوں کہ میں نے ایسا ایمان اسرائیل میں بھی نہیں پایا۔" مسیح نے یہودی سامعین کے ردعمل کی پروا نہ کی، اور آپ نے واضح کر دیا کہ خدا لوگوں کو بلاامتیاز رنگ و نسل قبول کرتا ہے۔ آپ نے فرمایا کہ "بہتیرے پُورب اور پچھّم سے آ کر ابرہام اور اضحاق اور یعقوب کے ساتھ آسمان کی بادشاہی کی ضیافت میں شریک ہوں گے، مگر بادشاہی کے بیٹے باہراندھیرے میں ڈالے جائیں گے۔ وہاں رونا اور دانت پیسنا ہو گا" (انجیل بمطابق متی 8: 11، 12)۔ یسوع نے واضح ثبوت بھی دیا کہ آپ ایک روایتی مذہبی اُستاد نہ تھے، اور یہ کہ آپ محض انسان نہ تھے۔ آپ کے خیالات اپنے ہمعصر لوگوں سے مکمل طور پر جُدا اور پوری طرح سے مختلف تھے۔ یہاں آپ نے اُن کی اِس سوچ کو رد کیا کہ یہودی نسل سے تعلق ہونا خدا کی طرف سے قبول کئے جانے کی ایک شرط ہے۔

مسیح نے اُس صوبیدار کے گھر کی طرف جائے بغیر یہ کہتے ہوئے اُسے اپنا جواب بھجوایا "جا جیسا تُو نے اعتقاد کیا تیرے لئے ویسا ہی ہو، اور اُسی گھڑی خادم نے شفا پائی" (انجیل بمطابق متی 8: 13)۔ تب بھیجے ہوئے لوگوں نے واپس آ کر اُس نوکر کو تندرست پایا۔ اُس رومی صوبیدار میں یسوع کو مستقبل میں ایمان لانے والے غیراقوام کے پہلے پھل کو دیکھ کر بڑی خوشی ہوئی۔ لیکن دوسری طرف آپ کے اپنے لوگوں نے آپ کو رد کر دیا۔ اور ایسا صرف اُس وقت فلستین میں آپ کی زمینی زندگی کے دوران نہیں ہُوا، بلکہ آج ہمارے دور میں بھی وہ ایسا ہی رویہ روا رکھے ہوئے ہیں۔

عزیز قاری، کیا آپ محسوس کرتے ہیں کہ آپ خدا کی معافی حاصل کرنے کے لائق نہیں ہیں؟ یاد رکھئے اگر ایسا ہے تو آپ مبارک ہیں۔ یہ معافی پانے کی راہ کی شروعات ہیں۔ جو کچھ یسوع نے صلیب پر آپ کی خاطر کیا ہے، اُس کی بنیاد پر خدا سے درخواست کریں کہ وہ آپ کو معاف کر دے۔ اُس سے التجا کیجئے کہ وہ آپ کو مسیح کے نام میں ایک ایماندار میں بدل دے۔

"تھوڑے عرصہ کے بعد ایسا ہُوا کہ وہ نائِین نام ایک شہر کو گیا اور اُس کے شاگرد اور بہت سے لوگ اُس کے ہمراہ تھے۔ جب وہ شہر کے پھاٹک کے نزدیک پہنچا تو دیکھو ایک مُردہ کو باہر لئے جاتے تھے۔ وہ اپنی ماں کا اکلوتا بیٹا تھا اور وہ بیوہ تھی اور شہر کے بُہتیرے لوگ اُس کے ساتھ تھے۔ اُسے دیکھ کر خداوند کو ترس آیا اور اُس سے کہا، مت رو۔ پھِر اُس نے پاس آ کر جنازہ کو چھوا، اور اُٹھانے والے کھڑے ہو گئے اور اُس نے کہا اے جوان میں تجھ سے کہتا ہوں اُٹھ۔ وہ مُردہ اُٹھ بیٹھا اور بولنے لگا اور اُس نے اُسے اُس کی ماں کو سونپ دیا۔ اور سب پر دہشت چھا گئی اور وہ خدا کی تمجید کر کے کہنے لگے کہ ایک بڑا نبی ہم میں برپا ہُوا ہے اور خدا نے اپنی اُمّت پر توجہ کی ہے۔ اور اُس کی نسبت یہ خبر سارے یہودیہ اور تمام گرد و نواح میں پھیل گئی۔" (انجیل بمطابق لوقا 7: 11-17)

یسوع نے ناصرت سے نائین نام شہر کی طرف سفر کیا۔ یہ شہر وہاں سے پیدل ایک دِن کی مسافت پر واقع تھا۔ زندگی کے مالک کے پیچھے ایک بڑی بھِیڑ آ رہی تھی اور اُن کا سامنا ایک اَور بھِیڑ سے ہُوا جو ایک مُردہ کو باہر لئے جاتے تھے۔ وہ مُردہ لڑکا اپنی ماں کا اکلوتا بیٹا تھا اور اُس کی ماں ایک بیوہ تھی۔ اُس ماں کا غم بہت بڑا تھا، اور اُس کے غم میں شریک شہر کے لوگ اُس کے بیٹے کو دفنانے کےلئے اُس کے ساتھ ساتھ جا رہے تھے۔ لیکن اچانک اُن کی ملاقات مسیح سے ہوئی جو قیامت اور زندگی ہے، اور آپ کے سامنے نہ صرف موت بلکہ ابلیس کا بھی کچھ زور نہیں چل سکتا۔

ہم شیطان کو مُردہ شخص کے تابوت پر بیٹھے تصور میں لا سکتے ہیں، گو وہ نظر نہیں آ رہا لیکن اِس نوجوان پر اپنی فتح کےلئے فخر کر رہا ہے۔ اُسے اپنے مخالف یسوع کو دیکھ کر کتنا غصہ آیا ہو گا جس نے اَب تک ہر جنگ میں اُسے شکست دی تھی۔ جب بھی یسوع نے بدرُوح گرفتہ افراد میں سے بدرُوحوں کو نکالا تو کیا ابلیس نے ماضی میں غصے میں ہر بار اپنے دانت نہ پیسے تھے؟ شاید شیطان اپنے آپ کو اِس سوچ سے تسلی دیتا ہو کہ مسیح نے اَب تک اُس کے ہاتھ سے موت کے کسی شکار کو نہ چُھڑایا تھا۔ وہ اَب تک اِس حصہ میں اُس فاتح کی مانند تھا جسے چیلنج نہ کیا گیا ہو۔

یہودی جنازہ میں ماتم کرنے والوں کی دلجوئی کرنے کو انتہائی اہم اور مُقدّس فریضہ سمجھتے تھے، اور مانتے تھے کہ اِس کا اجر خدا کی طرف سے ملے گا۔ اُس وقت کے رواج کے مطابق یسوع اور اُن کے ساتھ آنے والوں کو ایک طرف ہو کر جنازہ میں شامل لوگوں کو گزر جانے دینا اور پھر اُس میں شامل ہو جانا چاہئے تھا۔ گلیل میں عورتیں عموماً جنازے کے آگے آگے چلتی تھیں اور یہ اِس اعتقاد کا اظہار ہوتا تھا کہ گناہ اور موت عورت کی بدولت ہی نسلِ انسانی میں داخل ہوئے۔ لیکن یسوع اُس ہجوم کے سامنے آئے اور اُسے روک دیا۔

جب دوسرے ایسے جنازے کے گروہ میں آ شامل ہوں تو عموماً اُس وقت رونے اور ماتم کرنے میں اضافہ ہو جاتا ہے۔ اِس لئے جب یہ دو ہجوم ایک دوسرے سے ملے تو یقیناً غم اور ماتم میں اضافہ ہو گیا ہو گا۔ اُس غریب بیوہ کو دیکھ کر یسوع کو اُس پر ترس آیا، اور آپ نے اُس سے کہا "مت رو۔"

آپ نے ایسا اِس لئے نہیں کہا تھا کہ رونا غلط ہے، کیونکہ آنسو تو خدا کی طرف سے ایک تحفہ ہیں۔ رونا ایک برکت بھی ہو سکتا ہے، کیونکہ اِس سے غم کا درد جاتا رہتا ہے۔ وہ آنسو کتنے قیمتی ہیں جو دوسروں کی محبت میں بہائے جائیں، جو اپنی خطاﺅں اور گناہوں کےلئے خدا کے حضور افسوس و ندامت کو ظاہر کرنے کےلئے بہائے جائیں۔ یسوع نے اُس بیوہ کو رونے سے منع کیا اور پھر اُس کے سامنے اپنے الفاظ کی اہمیت کو ثابت بھی کیا۔ آپ آگے بڑھے اور جنازہ کو چھوا، اور جنازے کو اُٹھانے والے وہاں کھڑے ہو گئے اور اِس بات کے منتظر تھے کہ اَب کیا ہوتا ہے۔

نائین نامی شہر میں اِس نوجوان کی موت کا اعلان یقیناً نرسنگا پھونک کر کیا گیا ہو گا۔ تاہم، اَب وہاں راستہ میں موجود سب افراد وہ آواز سُننے کو تھے جس نے یروشلیم میں یہودی راہنماﺅں کے سامنے ایک گہری حقیقت کا اعلان یہ کہہ کر کیا تھا کہ "میں تم سے سچ کہتا ہوں کہ وہ وقت آتا ہے بلکہ ابھی ہے کہ مُردے خدا کے بیٹے کی آواز سُنیں گے اور جو سُنیں گے وہ جئیں گے" (انجیل بمطابق یوحنا 5: 25)۔ یسوع اپنے الفاظ کو ایک معجزہ سے ثابت کرنے کو تھے۔ آپ نے مُردہ شخص سے کہا "اے جوان میں تجھ سے کہتا ہوں اُٹھ۔"

اِردگرد موجود افراد کےلئے یہ الفاظ ایک دھماکہ خیز خبر تھے۔ یہ سچ ہے کہ بھِیڑ کے بہت سے لوگوں نے پہلے سُن رکھا تھا کہ کیسے اِس عظیم اُستاد نے بدرُوحیں نکالی تھیں، بیماریوں سے شفا بخشی تھی، اور طوفان کو جھِڑکا تھا، لیکن اُنہوں نے یہ کبھی نہ سوچا تھا کہ مسیح انسان کے مرنے کے بعد اُس کی رُوح کو واپس لوٹ آنے کا حکم دے سکتے تھے۔

انسانی بدن میں جان لوٹانے کا مطلب یہ تھا کہ بدن کو چھوڑ جانے والی زندگی واپس لوٹ آتی۔ جی ہاں، اُنہوں نے کتاب مُقدّس میں اُن نبیوں کے بارے میں پڑھا تھا جنہوں نے خدا سے کافی دُعا کرنے کی جدوجہد کے بعد مُردوں کو زندہ کیا تھا۔ اُن لوگوں نے مشکل طریقے استعمال کئے تھے، جس سے ظاہر ہوتا ہے کہ ایسا معجزہ معمولی نہیں تھا۔ اُنہوں نے ایسا پوشیدگی میں کیا کہ جیسے وہ ناکامی سے خوفزدہ تھے۔ مزیدبرآں، ایلیاہ نبی کے ایام میں ایسے ہونے والے واقعہ کو نو سو سال گزر چکے تھے (1- سلاطین 17: 17-24)۔ اُس ہجوم نے سوچا بھی نہ تھا کہ ایسا اُن کی آنکھوں کے سامنے ہونے کو تھا۔ لیکن مسیح وہ شخصیت تھی جنہوں نے اختیار کے ساتھ موت کا سامنا کیا، اور آپ نے نبیوں کی طرح عاجزی سے درخواست نہیں کی۔ مسیح کی قوت و قدرت کس قدر عظیم ہے!

ہم مسیح کے معجزہ کی تاثیر کو اُس کے نتیجہ سے دیکھ سکتے ہیں۔ وہ نوجوان اُٹھ بیٹھا اور باتیں کرنے لگا۔ جب اُس نے اپنی آنکھیں کھولی ہوں گی تو یہ دیکھ کر کس قدر حیران ہُوا ہو گا کہ اُسے دفنانے کےلئے لے جایا جا رہا تھا اور اِردگرد ماتم کرنے والے موجود تھے۔

اُس نے اپنی ماں کی بڑی غمگینی کو دیکھا اور ہجوم کے آہ و نالہ کو سُنا۔ اِس سے بڑھ کر اُسے اُس وقت حیرت ہوئی ہو گی جب اُس نے ایک اجنبی کو اپنے پاس کھڑے دیکھا جو اُس کے جنازہ کو چھو رہا تھا جس کے چہرے پر اُسے بڑی حکمت، آسمانی پاکیزگی اور مہربانی کے سوتے پھوٹتے نظر آئے۔

جب نائین شہر کی بیوہ کے بیٹے نے یسوع پر نگاہ کی تو اُسے یسوع کا چہرہ نظر آیا۔ اَب یسوع کا چہرہ مبارک کیسا تھا؟ قدیم مصنفین نے ہمیں یسوع کی صورت کے بارے میں کچھ بتانے کی کوشش کی ہے، لیکن ہم اُن بیانات میں سے کسی پر پوری طرح سے یقین نہیں کر سکتے۔ کیا آپ میں جسمانی خوبصورتی تھی؟ آپ سے متعلق نبوتوں میں ہمیں کچھ ایسی آیات بھی ملتی ہیں جو اِس بات کو ظاہر کرتی ہیں کہ مسیح کے چہرے میں کوئی خوبصورتی نہ تھی، مثلاً "... نہ اُس کی کوئی شکل و صورت ہے نہ خوبصورتی اور جب ہم اُس پر نگاہ کریں تو کچھ حُسن و جمال نہیں کہ ہم اُس کے مشتاق ہوں" (یسعیاہ 53: 2)۔

جبکہ دوسری طرف ایسی آیات بھی ہیں جو آپ کی خوبصورتی کی بات کرتی ہیں۔ زبور نویس لکھتا ہے: "تُو بنی آدم میں سب سے حسین ہے۔ تیرے ہونٹوں میں لطافت بھری ہے اِس لئے خدا نے تجھے ہمیشہ کےلئے مبارک کیا" (زبور 45: 2)۔

اِسی طرح سلیمان نبی نے لکھا: "میرا محبوب سُرخ و سفید ہے۔ وہ دس ہزار میں ممتاز ہے۔ ... وہ سراپا عشق انگیز ہے" (پرانا عہدنامہ، غزل الغزلات 5: 10، 16)۔

ہمارے نزدیک یہ خیال زیادہ معتبر ہے کہ مسیح غیرمعمولی طور پر جاذب نظر تھے۔ خدا تعالی خوبصورت ہے اور خوبصورتی کو پسند کرتا ہے۔ یہ خیال زبور نویس کے الفاظ سے مطابقت رکھتا ہے: "میں نے خداوند سے ایک درخواست کی ہے۔ میں اُسی کا طالب رہوں گا کہ میں عمر بھر خداوند کے گھر میں رہوں تا کہ خداوند کے جمال کو دیکھوں اور اُس کی ہیکل میں اِستِفسار کیا کروں" (زبور 27: 4)۔

اِس میں کوئی شک نہیں ہے کہ جو کچھ خدا نے خلق کیا ہے اُس میں سے ہر چیز خوبصورت ہے۔ جو کچھ دِلکش نہیں وہ گناہ یا اُ س کے اثرات کا نتیجہ ہے۔ اپنی شکل و صورت کا خیال رکھنا اہم بات ہے، اور وہ سب جو اپنی زندگی کے کام کی بدولت خوبصورتی کو برقرار رکھنے اور اُس کی حوصلہ افزائی کرنے کی کوشش کرتے ہیں، وہ درحقیقت نسلِ انسانی کےلئے ایک بھلائی کی خدمت سرانجام دے رہے ہیں جسے یاد رکھنا اور سراہا جانا چاہئے۔

کچھ قدیم لوگ خاص کر یونانی بیرونی خوبصورتی کو سراہتے ہوئے اِس انتہا تک چلے گئے کہ اُنہوں نے اِسے اپنی عبادت و پرستش کا موضوع بنا دیا۔ دیگر جھوٹے مذاہب کی طرح یہ بھی بگاڑ کی طرف لے کر گیا۔ لیکن خوبصورتی میں اُن کی دلچسپی نے اُن کی تہذیب کے مرتبہ کو بلند کرنے میں مدد فراہم کی، اور اِس نے قوموں میں اُن کی شہرت کو دوام بخشا۔

غالباً یسوع ایک جاذب نظر شکل و صورت کے حامل تھے کیونکہ آپ ہی وہ واحد شخصیت ہیں جو کنواری سے رُوح القدس کی بدولت پیدا ہوئی۔ خدا نے اسرائیل کی ہزاروں کنواریوں میں سے ایک کنواری مُقدّسہ مریم کو چُنا تا کہ وہ اُس بدن کو جنم دے جس میں ذاتِ الہٰی سکونت پذیر ہو۔ مسیح کے جاذِب نظر ہونے کے ہمارے خیال کی تائید اِس آگہی سے بھی ہوتی ہے کہ باطنی خوبصورتی کا اظہار بیرونی طور پر ظاہر ہوتا ہے۔ بےشک گناہ سے مبرّا اِنسانِ کامل یسوع بےحد شخصی خوبصورتی اور کرشماتی شخصیت کے حامل تھے جس نے بےشمار لوگوں یہاں تک کہ آپ کے دُشمنوں پر بھی مثبت اثر ڈالا۔

مسیح نے دُنیا سے جسمانی موت کو دُور نہ کیا۔ یہ الہٰی سزا، اگرچہ وقتاً فوقتاً معطل کی گئی، مگر اِس کا خاتمہ نہیں ہوا۔ جب یسوع نے مُردہ نوجوان کو زندہ کیا تو آپ اپنی بڑی قدرت سے لوگوں کو خیرہ نہیں کرنا چاہتے تھے، بلکہ اِس کا محرک اُس بیوہ کےلئے آپ کا ترس تھا۔ ابلیس انسانیت کو موت کا مغلوب کرنے اور لوگوں کے دِلوں سے مہربانی و ترس کو دور کرنے میں خوشی محسوس کرتا ہے۔ بیوہ کی جانب مسیح کی ہمدردی ابلیس کے کام پر غالب آنے کا ایک اظہار تھا۔ جیسے ہی وہ نوجوان شخص جی اُٹھا تو یسوع نے اُسے اُس کی ماں کو لوٹایا، گویا کہ اُسے کہہ رہے ہوں "اَب تم سمجھ سکتی ہو کہ کیوں میں نے تمہیں رونے سے منع کیا تھا۔" مسیح کے ہر پیروکار کے دِل میں شفقت و مہربانی یکجا موجود ہوتی ہیں۔ یہ اِس حکم کی عین فرمانبرداری ہے کہ "خوشی کرنے والوں کے ساتھ خوشی کرو۔ رونے والوں کے ساتھ روﺅ" (رومیوں 12: 15)۔

بےشک، نائین شہر کی بیوہ اور اُس کا بیٹا، مسیح نجات دہندہ پر ایمان لائے۔ ہمیں اُنہیں یسوع کے دو باوفا پیروکاروں کے طور پر لے سکتے ہیں۔ نائین شہر میں ایمان کا بیج بویا گیا۔ اِس عام سے شہر کو یسوع نے شہرت بخشی۔ اِس بڑے معجزے کی بدولت یسوع کی شہرت تیزی سے اِردگرد کے علاقے میں پھیلی۔ نتیجہ یہ نکلا کہ سب پر دہشت چھا گئی اور وہ خدا کی تمجید کرنے لگے کہ ایک بڑا نبی ہم میں برپا ہُوا ہے۔

اگر آپ نے اِس کتاب "سیرت المسیح، حصّہ 3، مسیح کا اختیار اور تعلیمات" کا گہرائی سے مطالعہ کر لیا ہے، تو ہم اُمید کرتے ہیں کہ اَب آپ آسانی سے مندرجہ ذیل سوالات کے درست جوابات دینے کے قابل ہوں گے۔ آپ اپنے جوابات ہمیں روانہ کریں، اور اُن کے ساتھ اپنا مکمل نام اور پتہ واضح طور پر لکھیں۔