سیرت المسیح، حصّہ 2، مسیح کی آزمایش اور خدمت کی ابتدا

یسوع کے بچپن کے ایام کا مطالعہ کرتے ہوئے ہم نے ہیرودیس بادشاہ کے کاموں سے ظاہر ہونے والے ابلیس کے کاموں کی ایک جھلک دیکھی تھی۔ لیکن اب تک ابلیس کے نام کا ذِکر یا اُس کی بابت واضح بیان اِس کتاب میں نہیں آیا۔ مگر اب ہم ابلیس کو دیئے جانے والے تین ناموں کی روشنی میں اُس کا جائزہ لیں گے جو اُس کے کردار کو بیان کرتے ہیں، یعنی آزمانے والا، شیطان (الزام لگانے والا) اور ابلیس (دشمن یا مخالف)۔ انجیل جلیل بیابان میں آزمایش کے واقعہ میں اُس کے بارے میں بیان کرتی ہے کہ اُس نے یسوع کو گناہ میں گرانے کےلئے آزمایش کی (انجیل بمطابق متی 4: 1-11; انجیل بمطابق لوقا 4: 1-13)۔

کتاب مُقدّس ہمیں سکھاتی ہے کہ ابلیس نہایت شریر ہے جو بغیر جسمانی وجود کے رُوحانی مخلوق ہے۔ وہ گمراہ و شریر فرشتوں کا پیشوا ہے۔ جناب مسیح نے بتایا کہ ابلیس اور اُس کے فرشتوں کےلئے ہمیشہ کی آگ تیار کی گئی ہے (انجیل بمطابق متی 25: 41)۔ نئے عہد نامہ میں یہوداہ کے خط کی آیت چھ میں ہم یہ الفاظ پڑھتے ہیں: "اور جن فرشتوں نے اپنی حکومت کو قائم نہ رکھا بلکہ اپنے خاص مقام کو چھوڑ دیا، اُن کو اُس نے دائمی قید میں تاریکی کے اندر روزِ عظیم کی عدالت تک رکھا ہے۔" نئے عہدنامہ میں شیطان کو دُنیا کا سردار (انجیل بمطابق یوحنا 16: 11)، اِس جہان کا خدا (نیا عہدنامہ، 2-کرنتھیوں 4: 4)، اور ہوا کی عملداری کا حاکم (نیا عہدنامہ، افسیوں 2: 2) بھی کہا گیا ہے۔

شیطان عیاری سے ایک طاقتور اور پراسرار طریقے سے نسلِ انسانی پر تسلط جماتا ہے۔ ابلیس کی اثر ڈالنے والی حقیقی شخصیت ہونے کا بڑا ثبوت ہمیں شاگردوں کو سکھائی جانی والی دُعائے ربانی میں ملتا ہے، جب یسوع مسیح نے شیطان کی بابت مختصر ذِکر کے ساتھ یوں فرمایا کہ "ہمیں آزمائش میں نہ لا، بلکہ بُرائی سے بچا" (انجیل بمطابق متی 6: 13)۔ یہ بری چیزوں یا بُرائی کرنے والے لوگوں سے چھٹکارا پانے کی نہیں بلکہ شریر ابلیس سے محفوظ رہنے کی دُعا ہے۔

کتاب مُقدّس ہمیں یہ بھی بتاتی ہے کہ ابلیس کو انسانیت پر کامل غلبہ پانے کےلئے جو چیز روک رہی ہے وہ الہٰی رضا ہے۔ ابلیس اِس حقیقت کو پہچانتا ہے اور خدائی اجازت کے بغیر وہ انسان کے خلاف کسی قسم کی کارروائی نہیں کر سکتا۔ خدا کی جانب سے ابلیس کو مہیا کی جانے والی اِس اجازت میں آزمائے جانے والوں کےلئے خدا کی بے بیان محبت کار فرما نظر آتی ہے۔ آزمایش میں سے گزر کر فتح پانے والے ایماندار پاک کئے جاتے ہیں، تقویت پاتے ہیں، اور بالآخر خدا تعالیٰ کے جلال میں شامل کئے جاتے ہیں۔ بلا شک و شبہ ہم اِس بات کو جانتے ہیں کہ ایمانداروں کی آزمایش کے پسِ پردہ خدا تعالیٰ کی محبت متحرک ہوتی ہے، کیونکہ مسیح کی آزمایش کے وقت خدا کا پاک رُوح ہی مسیح کو بیابان میں لے کر گیا تھا کہ وہ ابلیس سے آزمایا جائے۔

"دوسرے دِن پھر یوحنّا اور اُس کے شاگردوں میں سے دو شخص کھڑے تھے۔ اُس نے یسوع پر جو جا رہا تھا نگاہ کر کے کہا، دیکھو یہ خدا کا برّہ ہے! وہ دونوں شاگرد اُس کو یہ کہتے سُن کر یسوع کے پیچھے ہو لئے۔ یسوع نے پھِر کر اور اُنہیں پیچھے آتے دیکھ کر اُن سے کہا، تم کیا ڈھونڈتے ہو؟ اُنہوں نے اُس سے کہا، اے ربّی (یعنی اے اُستاد) تُو کہاں رہتا ہے؟ اُس نے اُن سے کہا، چلو دیکھ لو گے۔ پس اُنہوں نے آ کر اُس کے رہنے کی جگہ دیکھی اور اُس روز اُس کے ساتھ رہے اور یہ دسویں گھنٹے کے قریب تھا۔ اُن دونوں میں سے جو یوحنا کی بات سُن کر یسوع کے پیچھے ہو لئے تھے ایک شمعون پطرس کا بھائی اندریاس تھا۔ اُس نے پہلے اپنے سگے بھائی شمعون سے مل کر اُس سے کہا کہ ہم کو خرِستُس یعنی مسیح مل گیا۔ وہ اُسے یسوع کے پاس لایا۔ یسوع نے اُس پر نگاہ کر کے کہا کہ تُو یوحنا کا بیٹا شمعون ہے۔ تُو کیفا یعنی پطرس کہلائے گا۔" (انجیل بمطابق یوحنا 1: 35-42)

یوحنا اِصطباغی (یعنی بپتسمہ دینے والا) اپنے دو شاگردوں کے ساتھ کھڑا تھا کہ اُس نے یسوع کو آتے دیکھا۔ تب اُس نے کہا "دیکھو یہ خدا کا برّہ ہے!" اُن دو شاگردوں میں سے ایک اندریاس تھا، جو شمالی گلیل میں تبریاس کی جھیل کے شمال میں واقع بیت صیدا نامی شہر کا باشندہ تھا۔ وہ یوحنا اِصطباغی کا شاگرد بننے کےلئے دُور دراز کے علاقے سے آیا تھا۔ دوسرے شاگرد کا نام یوحنا تھا جو زبدی کا بیٹا تھا۔ وہ بھی بیت صیدا کے علاقے سے آیا تھا۔

ہم نہیں جانتے کہ اِس سے پیشتر اُنہوں نے اپنے اُستاد یوحنا اِصطباغی سے مسیح کی بابت کیا سُنا تھا۔ لیکن اُنہوں نے اُسے یہ کہتے ضرور سُنا کہ یسوع خدا کا برّہ تھا۔ یوحنا اِصطباغی نے یسوع کے بارے میں یہ بھی کہا تھا کہ "دیکھو یہ خدا کا برّہ ہے جو دُنیا کا گناہ اُٹھا لے جاتا ہے" (انجیل بمطابق یوحنا 1: 29)۔ یہ لقب، یسعیاہ نبی کے الفاظ سے بالکل مطابقت رکھتا ہے "وہ ستایا گیا تَو بھی اُس نے برداشت کی اور مُنہ نہ کھولا۔ جس طرح برّہ جسے ذبح کرنے کو لے جاتے ہیں اور جس طرح بھیڑ اپنے بال کترنے والوں کے سامنے بےزبان ہے اُسی طرح وہ خاموش رہا" (پرانا عہدنامہ، یسعیاہ 53: 7)۔

یوحنا اِصطباغی ایک کاہن کا بیٹا تھا۔ کاہن کا خصوصی کام ہیکل میں برّہ کی قربانی گزراننے کے فرائض انجام دینا ہوتا تھا۔ قربانی کا بےداغ ہونا لازمی ہوتا تھا۔ جب یوحنا نے یسوع کی بابت کہا کہ وہ خدا کا برّہ ہے تو وہ یہ ظاہر کر رہا تھا کہ یسوع بالکل بےداغ اور ہر لحاظ سے کامل تھے۔ درویشانہ زندگی بسر کرنے والا یہ عظیم شخص روح القدس سے معمور لائق و فائق مبلغ تھا۔ یوحنا کو اِس بات کا بخوبی علم تھا کہ ہیکل میں جانوروں کی پیش کی جانے والی قربانیاں اُس حقیقی اور اصل قربانی یعنی خدا کے برّہ کا پیش خیمہ تھیں جو خدا کی رضا کے مطابق قربان ہوا جس کا علم بنایِ عالم سے پیشتر سے تھا (نیا عہدنامہ، 1-پطرس 1: 18-20)۔ یوحنا جانتا تھا کہ جانوروں کی قربانیاں انسانیت کے گناہ کو مٹا نہ سکتی تھیں، کیونکہ دُنیا کے گناہ اُٹھا لے جانے کا کام خدا کی جانب سے قربانی کے برّہ مسیح کا ہی کام تھا۔

مسیح کے بارے میں یوحنا اصطباغی کی گواہی کا اثر بڑا واضح ہے۔ اندریاس اور یوحنا بغیر کسی حیل و حُجّت کے، احترام کے ساتھ فوراً یسوع کے پیچھے ہو لئے۔ جب یسوع مسیح نے اُنہیں دیکھا تو مُڑ کر اُن سے پوچھا "تم کیا ڈھونڈتے ہو؟" (انجیل بمطابق یوحنا 1: 38)۔ ایسا ہی سوال مسیح ہر اُس شخص سے پوچھتے ہیں جو اُن کی پیروی کرنا چاہتا ہے۔ اِس ضمن میں مسیح کی پیروی کرنے والوں کے محرکات مختلف ہو سکتے ہیں، اور اُنہیں مناسب طور پر دیکھنے کی ضرورت ہوتی ہے۔ ایک بار یسوع نے اپنے پیچھے آنے والی بڑی بھِیڑسے یوں کہا "میں تم سے سچ کہتا ہوں کہ تم مجھے اِس لئے نہیں ڈھونڈتے کہ معجزے دیکھے بلکہ اِس لئے کہ تم روٹیاں کھا کر سیر ہوئے" (انجیل بمطابق یوحنّا 6: 26)۔ یوں یسوع نے اُنہیں اپنے شاگردوں کے طور پر قبول نہ کیا۔

اِندریاس اور یوحنّا نے یسوع کے سوال کا جواب نہایت احترام اور اعتدال سے دیا۔ یوں معلوم ہوتا ہے کہ جیسے وہ یسوع کی تعلیم کو سُننے اور سیکھنے کےلئے کسی اَور مناسب وقت پر آپ کے پاس آنا چاہتے تھے۔ اُنہوں نے جواب دیا: "اے ربّی، تُو کہاں رہتا ہے؟" (انجیل بمطابق یوحنّا 1: 38)۔ یسوع نے اُنہیں فوراً اپنے رہنے کی جگہ کے بارے میں نہ بتایا، بلکہ آپ نے اُن سے چاہا کہ وہ جان جائیں کہ آپ اُن سے اور ہر کسی سے اِس بات کی توقع کرتے ہیں کہ آپ کی فی الفور پیروی کی جائے۔ جو لوگ آپ کی پیروی کرنے کو کھٹائی میں ڈال دیتے ہیں اُنہیں آپ کی طرف سے رد کر دیا جاتا ہے۔ مسیح تمام لوگوں کو اپنی فوری پیروی کرنے پر اُبھارتے ہیں، بصورت دیگر وہ اُنہیں قبول نہیں کریں گے۔ یسوع مسیح نے اندریاس اور یوحنّا سے کہا "چلو، دیکھ لو گے۔" جب اُنہوں نے مسیح کی بات مانی، تو مسیح نے دِن بھر اُنہیں اپنے ہمراہ رہنے کی دعوت دی۔ اب بھی خدا اِسی طریقہ سے کام کرتا ہے۔ ایمان کا قبول کیا جانا محض کسی دوسرے فرد کی گواہی پر نہیں ہوتا بلکہ اِس کا تو شخصی طور پر تجربہ کیا جاتا ہے۔ ضرور ہے کہ انسان خود ایمان کو دیکھے اور پرکھے جیسا کہ داﺅد نبی نے لکھا ہے: "آزما کر دیکھو کہ خداوند کیسا مہربان ہے۔ مبارک ہے وہ آدمی جو اُس پر توکُّل کرتا ہے" (زبور 34: 8)۔

یسوع سے ملاقات کے بعد اِندریاس اور یوحنّا کی زندگیاں مکمل طور پر تبدیل ہو گئیں۔ اگرچہ اِندریاس زیادہ معروف تو نہ ہوا، مگر وہ اپنے بھائی شمعون کو مسیح کے پاس لایا۔ یوں لگتا ہے کہ شمعون بھی یوحنّا اصطباغی کا شاگرد تھا۔ اِندریاس نے شمعون کی تلاش کی جب تک کہ وہ اُسے مل نہ گیا۔ پھر اِندریاس نے شمعون کو بتایا کہ اُسے اپنے دوست یوحنّا کے ساتھ ایک بیش قیمت خزانہ ملا ہے۔ اُس نے کہا "ہم کو خرِستُس یعنی مسیح مل گیا" (انجیل بمطابق یوحنّا 1: 41)۔ یہ بیان راہِ نجات کا احاطہ کئے ہوئے ہے۔ جو بھی مسیح کو پا لیتا ہے، اُسے گویا سب کچھ مل جاتا ہے، اور اُسے کسی اَور انسان کی ضرورت نہیں رہتی۔ یہ یسوع ہی ہے جس کے حق میں داﺅد نبی نے یوں فرمایا کہ "خداوند میرا چوپان ہے۔ مجھے کمی نہ ہو گی" (زبور 23: 1)۔ وہی راہ، حق اور زندگی ہے (انجیل بمطابق یوحنّا 14: 6)۔ جس نے اِس راہ، حق اور زندگی کو پا لیا، گویا اُس نے سب کچھ پا لیا۔ اِندریاس صرف لفظی و زبانی ایمان تک محدود نہ رہا بلکہ اُس نے عملی طور پر پیروی کی، اور اپنے بھائی کو یسوع کے پاس لانے میں راہنمائی کی۔ وہ سب جو یسوع کو حقیقت میں پا لیتے ہیں، اُنہیں دوسروں کو اُس کے پاس آنے کی دعوت دینے میں سُستی نہیں کرنی چاہئے اور ضرور و مناسب ہے کہ اِس کارِ خیر کو اپنوں ہی سے شروع کریں جیسے کہ اِندریاس نے اپنے بھائی کےلئے کیا۔

جب یسوع نے شمعون کو دیکھا تو اُسے فوراً پہچان لیا۔ بلکہ یسوع تو شمعون کو دیکھنے سے پیشتر ہی اُس کے تمام اوصاف، توڑوں اور مستقبل سے واقف تھے۔ اپنی پہلی ہی ملاقات میں یسوع نے شمعون کو نیا نام دیا جو ارامی زبان میں "کَیفا" اور یونانی زبان میں "پطرس" ہے، جس کا مطلب "چٹان" ہے۔ پطرس اِس نام کےلئے اُس وقت تک لائق نہ تھا جب تک کہ وہ رُوح القدس سے معمور نہ ہوا، جس کی بدولت اُس کی زندگی میں وہ خوبیاں ظاہر ہوئیں جس کی بِنا پر اُسے یہ نام دیا گیا تھا۔

"دوسرے دِن یسوع نے گلیل میں جانا چاہا اور فِلپُّس سے مل کر کہا، میرے پیچھے ہو لے۔ فِلپُّس، اِندریاس اور پطرس کے شہر بیت صیدا کا باشندہ تھا۔ فِلپُّس نے نتن ایل سے مل کر اُس سے کہا کہ جس کا ذِکر موسیٰ نے توریت میں اور نبیوں نے کیا ہے وہ ہم کو مل گیا۔ وہ یُوسُف کا بیٹا یسوع ناصری ہے۔ نتن ایل نے اُس سے کہا، کیا ناصرة سے کوئی اچھی چیز نکل سکتی ہے؟ فِلپُّس نے کہا، چل کر دیکھ لے۔ یسوع نے نتن ایل کو اپنی طرف آتے دیکھ کر اُس کے حق میں کہا، دیکھو! یہ فی الحقیقت اسرائیلی ہے۔ اِس میں مکر نہیں۔ نتن ایل نے اُس سے کہا، تُو مجھے کہاں سے جانتا ہے؟ یسوع نے اُس کے جواب میں کہا، اِس سے پہلے کہ فِلپُّس نے تجھے بلایا جب تُو انجیر کے درخت کے نیچے تھا میں نے تجھے دیکھا۔ نتن ایل نے اُس کو جواب دیا، اے ربّی! تُو خدا کا بیٹا ہے۔ تُو اسرائیل کا بادشاہ ہے۔ یسوع نے جواب میں اُس سے کہا، میں نے جو تجھ سے کہا کہ تجھ کو انجیر کے درخت کے نیچے دیکھا، کیا تُو اِسی لئے ایمان لایا ہے؟ تُو اِن سے بھی بڑے بڑے ماجرے دیکھے گا۔ پھِر اُس سے کہا، میں تم سے سچ کہتا ہوں کہ تم آسمان کو کُھلا اور خدا کے فرشتوں کو اُوپر جاتے اور ابنِ آدم پر اُترتے دیکھو گے۔" (انجیل بمطابق یوحنّا 1: 43-51)

شمعون فوراً، اِندریاس اور یوحنّا کے ساتھ شامل ہو گیا اور وہ تینوں یسوع کے شاگرد بن گئے۔ یوں بیت صیدا میں مسیح کے آنے کا مقصد پایہ تکمیل کو پہنچا۔ اگلے دِن یسوع نے گلیل میں اپنے آبائی شہر کو واپس جانے کی تیاری کی۔ تاہم، روانہ ہونے سے پیشتر یسوع نے ایک چوتھے شاگرد کو بلایا جس کا نام فِلپُّس تھا، اور وہ بھی بیت صیدا کا رہنے والا تھا۔ یسوع نے اُسے دیکھ کر کہا "میرے پیچھے ہو لے" (انجیل بمطابق یوحنّا 1: 43)۔ مسیحی ایمان میں عمومی اصول یہ ہے کہ "مانگو تو تم کو دیا جائے گا۔ ڈھونڈو تو پاﺅ گے۔ دروازہ کھٹکھٹاﺅ تو تمہارے واسطے کھولا جائے گا" (انجیل بمطابق متی 7: 7)۔ خدا تعالیٰ نے اپنے نبی یرمیاہ کے ذریعے اِس اصول کو یوں بیان کیا تھا: "تم مجھے ڈھونڈو گے اور پاﺅ گے۔ جب پورے دِل سے میرے طالب ہو گے" (پرانا عہدنامہ، کتاب یرمیاہ 29: 13)۔ لیکن بعض لوگوں کےلئے اِس اصول میں چھوٹ بھی نظر آتی ہے، اور فِلپُّس اور متی ایسے ہی افراد تھے جن پر یسعیاہ نبی کی معرفت خدا کے یہ الفاظ صادِق آتے ہیں کہ "جو میرے طالب نہ تھے میں اُن کی طرف متوجہ ہوا۔ جنہوں نے مجھے ڈھونڈا نہ تھا مجھے پا لیا۔ میں نے ایک قوم سے جو میرے نام سے نہیں کہلاتی تھی فرمایا، دیکھ میں حاضر ہوں" (پرانا عہدنامہ، کتاب یسعیاہ 65: 1)۔

مسیح کےلئے روحیں جیتنے کا جوش و جذبہ اِندریاس اور فِلپُّس میں فوراً پیدا ہو گیا۔ فِلپُّس کی ملاقات قانائے گلیل کے رہنے والے اپنے خصوصی دوست نتن ایل سے ہوئی، جسے اُس نے بتایا کہ یسوع ہی وہ ہستی ہے جس کا ذِکر موسیٰ نے توریت میں اور نبیوں نے کیا ہے (انجیل بمطابق یوحنّا 1: 45)۔ نتن ایل نے اِس خبر کا یقین نہ کیا کیونکہ اُس کے خیال میں مسیح ناصرت کے سے معمولی اور بری ساکھ کے حامل شہر سے نہیں آ سکتا تھا۔ نتن ایل نے فِلپُّس کو اعتراضاً کہا کہ کیا ناصرة سے کوئی اچھی چیز نکل سکتی ہے؟ فِلپُّس نے اُس سے کہا، چل کر دیکھ لے (انجیل بمطابق یوحنّا 1: 46)۔ فِلپُّس جانتا تھا کہ بجائے وہ دونوں بحث و مباحثہ میں پڑ جاتے، نتن ایل کا یسوع سے ذاتی طور پر ملنا ہی سب سے بہتر تھا۔ اکثر اوقات مذہبی عقائد و معاملات پر بحث لاحاصل بلکہ کبھی کبھار نقصان دہ بھی ثابت ہوتی ہے۔ ایمانداروں کے منہ سے بہترین گواہی یہ ہے کہ آئیے اور دیکھئے (انجیل بمطابق یوحنّا 1: 39)۔ جب یسوع دو شاگردوں سے کلام کر رہا تھا تو رُوح القدس یسوع مسیح کی معرفت اُن شاگردوں سے مخاطب ہوا کہ چل کر دیکھ لو۔ پھِر فِلپُّس کے ذریعہ بھی رُوح القدس نے وہی کلام کیا۔ اِس بلاہٹ کے سبب نتن ایل کو اطمینان ہو گیا اور اِس معاملہ کی تصدیق کےلئے اُس نے مزید ثبوت نہ مانگا۔ فِلپُّس کی سمجھ اور استقامت پر پورا بھروسا کرتے ہوئے نتن ایل ذاتی طور پر یسوع سے ملاقات کو تیار ہو گیا۔

یسوع، نتن ایل سے ملے بغیر یا اُس کی بابت کسی سے کچھ سُنے بغیر اُس کے پس منظر اور اُس کی خوبیوں سے واقف تھے۔ جب نتن ایل، فِلپُّس کے ساتھ یسوع کی جانب آ رہا تھا تو یسوع نے اُن سے جو پاس کھڑے تھے کہا "دیکھو! یہ فی الحقیقت اسرائیلی ہے۔ اِس میں مکر نہیں" (انجیل بمطابق یوحنّا 1: 47)۔ نتن ایل کسی اجنبی کی زبان سے اپنی بابت خوش وضع گواہی سُن کر چونک گیا اور اُس نے اجنبی سے پوچھا کہ "تُو مجھے کہاں سے جانتا ہے؟" تب یسوع نے اُسے بتایا کہ اِس سے پہلے کہ فِلپُّس نے تجھے بلایا، میں نے تجھے اپنی فوق الفطرت آنکھوں سے دیکھ لیا تھا۔ یسوع نے اُسے انجیر کے درخت کے نیچے گیان دھیان کرتے اور دُعا کی حالت میں دیکھا تھا، جبکہ اُس کے خیال میں اُسے کوئی نہیں دیکھ رہا تھا۔ نتن ایل نے جان لیا کہ یسوع غیب کی ہر بات سے کامل طور پر واقف ہے، اور وہ فوراً یسوع پر ایمان لے آیا۔ اُس نے مسیح سے کہا "اے ربّی! تُو خدا کا بیٹا ہے۔ تُو اسرائیل کا بادشاہ ہے" (انجیل بمطابق یوحنّا 1: 49)۔ ممکن ہے کہ نتن ایل نے یوحنّا اصطباغی سے خود یا دوسروں سے یسوع کی بابت گواہی سُنی ہو کہ وہ خدا کا بیٹا ہے، لہٰذا اُس نے اپنے پہلے اُستاد یوحنّا اصطباغی کی دی گئی گواہی کو دہرایا۔ تاہم یہ نتن ایل ہی تھا جس نے سب سے پہلے یسوع کو "اسرائیل کا بادشاہ" کے لقب سے نوازا۔

نتن ایل کی گواہی کے جواب میں یسوع نے اُس سے کہا "تُو اِن سے بھی بڑے بڑے ماجرے دیکھے گا۔ ... میں تم سے سچ کہتا ہوں کہ تم آسمان کو کُھلا اور خدا کے فرشتوں کو اُوپر جاتے اور ابنِ آدم پر اُترتے دیکھو گے۔" یسوع کا اِس بات کو کہنے کا مطلب یہ تھا کہ آسمان جو گناہ کے باعث بند تھا وہ بنی نوع انسان کےلئے پھر سے کھل جائے گا۔ ابنِ آدم ہوتے ہوئے آپ خدا اور انسان کے درمیان پائی جانے والی دوری کو ختم کریں گے، اور بنی نوع انسان کی خدمت کےلئے اپنے فرشتوں کو بھیجیں گے جو ایمانداروں کی نگہبانی کریں گے اور موت کے بعد اُنہیں آسمان پر لے جائیں گے (دیکھئے نیا عہدنامہ، کتاب عبرانیوں 1: 14 ;انجیل بمطابق لوقا 16: 22)۔ فرشتوں نے بوقتِ ضرورت ابنِ آدم یسوع کی خدمت بھی کرنی تھی (انجیل بمطابق یوحنّا 1: 50، 51)۔

مسیح کے ابنِ خدا ہونے کی ہمارے پاس تہری گواہی موجود ہے: (1) بپتسمہ کے وقت آسمان سے آنے والی آواز، (2) یوحنّا اصطباغی، اور (3) نتن ایل۔ لیکن یہاں پر پہلی مرتبہ مسیح اپنی بابت ابنِ آدم ہونے کی گواہی دیتے ہیں۔ دوسرے انبیا، خصوصاً حزقی ایل نے اِس لقب کو استعمال کیا ہے (پرانا عہدنامہ، کتاب حزقی ایل 2: 1)۔ یسوع نے ابنِ آدم کے لقب کو اپنے لئے ادنیٰ خیال نہ کیا بلکہ اِسے جلیل القدر بنایا۔ پھِر آپ نے نتن ایل کی تعریف کی کہ وہ آپ کو خدا کا بیٹا اور اسرائیل کا بادشاہ تسلیم کرتے ہوئے ایمان لایا۔ یسوع ایک جھوٹ، توہم پرستی، فریب نظر یا مبالغہ آمیزی پر نتن ایل کی تعریف نہیں کر سکتے تھے؟ اگر وہ ابنِ مریم ہوتے ہوئے محض ایک انسان ہوتے تو کیسے وہ نتن ایل کی جانب سے ایسے کلمات کو اپنے حق میں قبول کرسکتے تھے؟ کیسے وہ اپنے حق میں "اسرائیل کے بادشاہ" کا لقب قبول کرسکتے تھے؟

مسیح کی جانب سے نتن ایل کو دیئے جانے والے جواب میں ہم مسیح کی اُس پہلی گواہی کو پاتے ہیں جو آپ نے اپنی بابت دی۔ کسی نبی، رسول یا انسان نے اپنی بابت ایسا بیان کبھی نہیں دیا۔ جب کوئی راستباز اور فہیم شخص اپنے بارے میں کچھ کہتا ہے تو وہ بات اُس شخص کی بابت حقائق کو سمجھنے میں بہت اہم ہوتی ہے۔ اِسی لئے یسوع نے فرمایا: "اگرچہ میں اپنی گواہی آپ دیتا ہوں تو بھی میری گواہی سچی ہے کیونکہ مجھے معلوم ہے کہ میں کہاں سے آیا ہوں اور کہاں کو جاتا ہوں، لیکن تم کو معلوم نہیں کہ میں کہاں سے آتا ہوں یا کہاں کو جاتا ہوں" (انجیل بمطابق یوحنّا 8: 14)۔ اپنی حیثیت بخوبی جانتے ہوئے مسیح کےلئے ہرگز ممکن نہیں تھا کہ وہ اپنی بابت جھوٹے دعوے کرتے کیونکہ آپ میں ہر قسم کے دھوکے سے بچاﺅ کےلئے ایمانداری و راستبازی موجود تھی، اِسی طرح ہر قسم کی غلطی سے محفوظ و سلامت رکھنے کےلئے فہم و فراست بھی موجود تھی۔ اگر مسیح جھوٹی تعریف قبول کرتے تو وہ نااہل اور اخلاقی اعتبار سے ناقص ہوتے۔ کوئی بھی معزز و باوقار شخص اپنی اہلیت سے زیادہ غیرمستحق تعریف کا ہمیشہ انکار کرے گا خواہ وہ نیکی، قابلیت یا مرتبت سے متعلق ہی کیوں نہ ہو۔ تَو کس قدر زیادہ یسوع نے حقائق کے برعکس باتوں کو اپنے حق میں قبول کرنے سے انکار کر دینا تھا۔

یہودی راہنما کسی راستباز شخص کی اپنی ہی بابت دیئے گئے بیانات کی اہمیت سے بخوبی واقف تھے۔ اِسی لئے اُنہوں نے یوحنّا اِصطباغی سے یہ پوچھا کہ وہ کون تھا۔ یہودی اِس سوال کا جواب چاہتے تھے تا کہ اپنے بھیجنے والوں کو واپس جا کر اُس کی بابت بتا سکتے۔ اُنہوں نے یوحنّا اِصطباغی سے پوچھا کہ "تُو اپنی بابت کیا کہتا ہے؟" (انجیل بمطابق یوحنّا 1: 22)۔ یوحنّا اِصطباغی کا اپنی بابت بیان اُس کی مستحق شدہ اہلیت سے کم تر تھا۔ کسی نے بھی یوحنّا اِصطباغی کو مسیح سے بہتر یا زیادہ عالم تصور نہیں کرنا تھا کیونکہ مسیح ہر طرح کی حکمت، صداقت اور حلیمی میں سب سے زیادہ سبقت لے گیا اور اُس کا کلام بھی خالص سچائی ہے۔ اِس لئے ہم مسیح سے متعلق خود مسیح ہی کے بیانات کو ازحد اہمیت دیتے ہیں۔

یہ بات واضح ہے کہ اگر مسیح سے ہٹ کر کوئی اَور شخص اُن باتوں کا دعوی کرے جو مسیح نے کی ہیں تو ایسے فرد کو لوگوں کی جانب سے شرمندگی اور بےعزتی کا سامنا کرنا پڑے گا۔ ایک مُلحد نے انگریزی زبان کے ایک مشہور مصنف کارلائیل سے دوران گفتگو نہایت گستاخی سے کہا "میں اپنی بابت وہی دعویٰ کر سکتا ہوں جو یسوع نے اپنے لئے کیا تھا کہ میں اور باپ ایک ہیں۔" کارلائیل نے جواب دیا: "بےشک آپ کہہ سکتے ہیں، مگر یسوع کے دعوے کا تو دُنیا نے یقین کیا۔ آپ کا یقین کون کرے گا؟"

"پھِر تیسرے دِن قانائے گلیل میں ایک شادی ہوئی اور یسوع کی ماں وہاں تھی۔ اور یسوع اور اُس کے شاگردوں کی بھی اُس شادی میں دعوت تھی۔ اور جب مے ہو چکی تو یسوع کی ماں نے اُس سے کہا، اُن کے پاس مے نہیں رہی۔ یسوع نے اُس سے کہا، اے عورت! مجھے تجھ سے کیا کام ہے؟ ابھی میرا وقت نہیں آیا۔ اُس کی ماں نے خادموں سے کہا، جو کچھ یہ تم سے کہے، وہ کرو۔ وہاں یہودیوں کی طہارت کے دستور کے موافق پتھر کے چھ مٹکے رکھے تھے اور اُن میں دو دو، تین تین من کی گنجایش تھی۔ یسوع نے اُن سے کہا، مٹکوں میں پانی بھر دو۔ پس اُنہوں نے اُن کو لبالب بھر دیا۔ پھِر اُس نے اُن سے کہا، اَب نکال کر میرِ مجلس کے پاس لے جاﺅ۔ پس وہ لے گئے۔ جب میرِ مجلس نے وہ پانی چکھا جو مے بن گیا تھا اور جانتا نہ تھا کہ یہ کہاں سے آئی ہے (مگر خادم جنہوں نے پانی بھرا تھا جانتے تھے)، تو میرِ مجلس نے دُلہا کو بُلا کر اُس سے کہا، ہر شخص پہلے اچھی مے پیش کرتا ہے اور ناقص اُس وقت جب پی کر چھک گئے، مگر تُو نے اچھی مے اَب تک رکھ چھوڑی ہے۔ یہ پہلا معجزہ یسوع نے قانائے گلیل میں دِکھا کر اپنا جلال ظاہر کیا اور اُس کے شاگرد اُس پر ایمان لائے۔" (انجیل بمطابق یوحنّا 2: 1-11)

ہمیں کسی بھی ایسے کام کو معجزہ تصور نہیں کرنا چاہئے جس کی طبعی وضاحت مل سکے۔ آج کے دور میں لوگوں کا معجزوں پر یقین کرنے کا رجحان بڑھتا جا رہا ہے کیونکہ طبعی قوانین پر انسانی تسلط وسیع ہوتا جا رہا ہے اور اِن کے استعمال سے حیرت انگیز نتائج حاصل ہوئے ہیں۔ آج کے سائنسدان، قدیم وقتوں کے سائنسدانوں سے سبقت لے گئے ہیں، اور اُنہوں نے ایسے حیرت انگیز نتائج پیدا کئے ہیں جنہیں پہلے معجزاتی نوعیت کا تصور کیا جاتا تھا، مثلاً فضائی اُڑان یا چاند پر راکٹ کا بھیجنا، وغیرہ۔ اگر مخلوق حیرت انگیز چیزیں ایجاد کر سکتی ہے تو خالقِ کائنات اپنے مقرر کئے گئے قوانینِ فطرت سے کیا کچھ وقوع میں نہیں لا سکتا؟ غرض، وقت گزرنے کے ساتھ ساتھ مزید ہونے والی دریافتیں اور ایجادات الہٰی معجزات کے امکان کی تصدیق کرتی ہیں۔ یہ معجزات خالقِ کائنات کا جو تمام مخلوق پر حکمران ہے ایک قابلِ فہم اور یقیناً لازمی محسوس کیا جانا والا ثبوت ہیں۔ مستند ثبوت ہی فیصلہ کن ہوتے ہیں، اور انسان پر اپنے آپ کو اور اپنی الہٰی مرضی کو ظاہر کرنے کےلئے خدا کے پاس یہ معجزات ایک موثر ذریعہ ہیں۔

ہم یہ دعویٰ نہیں کرتے کہ مسیح کے معجزات سے متعلق تحریری ثبوت آپ کی عظمت کو ثابت کرنے کےلئے ضروری ہیں۔ چاروں انجیلی بیانات کے مصنفین اِس بات کا ذِکر نہیں کرتے کہ یسوع نے تیس برس کی عمر میں اپنی بشارتی خدمت کے آغاز سے پہلے کوئی معجزہ کیا ہو۔ یہ انجیلی مصنفین کی صداقت کا ایک اہم ثبوت ہے۔ اگر ہم مانتے ہیں کہ نبیوں اور رُسولوں نے خدا تعالیٰ کی جانب سے عطا کی جانے والی الہٰی قوت کی بدولت معجزات کئے، تو ہمیں کتنا زیادہ یہ ماننا چاہئے کہ قوت و قدرت کا سرچشمہ خدائے مجسم اپنی ہی قوت و قدرت سے سب پر سبقت لے جاتے ہوئے معجزات کر سکتا تھا۔

مسیح کے معجزات بغض و عداوت کے نہیں بلکہ رحمت و شفقت پر مبنی معجزات تھے۔ آپ کے صرف دو معجزات ایسے تھے جن میں بظاہر مادی نقصان ہوا، مگر اُن کا مقصد ہمیں ایک رُوحانی سبق سکھانا تھا (دیکھئے انجیل بمطابق لوقا 8: 26-33; انجیل بمطابق مرقس 11: 12-14، 20-24)۔ آپ نے کبھی بھی معجزات اِس لئے نہیں کئے کہ آپ میں خود غرضی کا کوئی پہلو تھا، یا آپ لوگوں کو حیرت زدہ کرنے اور ایمان لانے کی طرف متوجہ کرنا چاہتے تھے۔ بلکہ اِس کے برعکس، آپ نے معجزات اِس لئے کئے کہ اعتقاد رکھنے والے اپنے ایمان میں مضبوط ہوں۔ اِسی لئے یسوع نے یہودیوں کے اصرار پر معجزات کرنے سے انکار کیا کہ وہ معجزے دیکھ کر ہی مسیح کو قبول کرنا چاہتے تھے۔ اپنے پہلے معجزے میں یسوع نے اپنا جلال ظاہر کیا اور اُس کے شاگرد اُس پر ایمان لائے۔ مسیح کے تمام معجزات میں گہرا معنٰی اور ایک رُوحانی مقصد پوشیدہ تھا۔

معجزات کے ذریعے آپ نے اپنے خیالات، اصول اور عظیم الشان تعلیمات، نیز اپنی دِل پذیر اور پاکیزہ صفات کا اظہار کیا۔ مزید برآں، اگر مختلف مقامات پر معجزات انجام نہ دیئے گئے ہوتے، تو ہم مسیح کی سرگرمیوں اور آپ کے مختلف سفروں سے بے بہرہ رہتے، مثلاً ہمیں صور اور صیدا تک مسیح کے سفر کا ذِکر ملتا ہے جہاں آپ نے ایک معجزہ بھی کیا۔ اگر مسیح کی معرفت ہزاروں افراد کو خوراک مہیا کرنے اور شفا دینے کے معجزات رُونما نہ ہوتے تو ہم کیسے انسانیت کےلئے آپ کی رحمدِلی کا اندازہ کر سکتے تھے؟ کفرنحوم میں ایک مفلوج کو شفا بخش کر آپ نے گناہ معاف کرنے کے اپنے الہٰی اختیار کو ظاہر کیا۔ اگر مسیح کی معرفت کئے گئے معجزات آپ کی سوانحِ حیات سے خارج کر دیئے جائیں تو ایسا کرنا اِنجیل کی بنیادی ساخت کو چاک کر دینے کے مترادف ہو گا، نتیجتاً اِنجیلی بیانات بے ربط ہو جائیں گے اور یوں اِنجیل کی تمام سچائی پر اعتراضات اُٹھیں گے۔ علاوہ ازیں، مسیح کے معجزات نے آپ کے اِس دعوے کی بھی تصدیق کی کہ آپ آسمان سے اُترے تھے۔ اُس وقت کے پرہیزگار اور نیک لوگوں نے مسیح کو قبول کیا۔ آپ کے یہودی مخالفین نے بھی ایسا ہی محسوس کیا لیکن اُنہوں نے کبھی بھی اِس کا اقرار نہ کیا۔

"اِس کے بعد وہ اور اُس کی ماں اور بھائی اور اُس کے شاگرد کفرنحوم کو گئے اور وہاں چند روز رہے۔ یہودیوں کی عیدِ فسح نزدیک تھی اور یسوع یروشلیم کو گیا۔ اور اُس نے ہیکل میں بیل اور بھیڑ اور کبوتر بیچنے والوں کو اور صرّافوں کو بیٹھے پایا۔ اور رسّیوں کا کوڑا بنا کر سب کو یعنی بھیڑوں اور بیلوں کو ہیکل سے نکال دیا اور صرّافوں کی نقدی بکھیر دی اور اُن کے تختے اُلٹ دیئے۔ اور کبوتر فروشوں سے کہا، اِن کو یہاں سے لے جاﺅ۔ میرے باپ کے گھر کو تجارت کا گھر نہ بناﺅ۔ اُس کے شاگردوں کو یاد آیا کہ لکھا ہے، تیرے گھر کی غیرت مجھے کھا جائے گی۔ پس یہودیوں نے جواب میں اُس سے کہا، تُو جو اِن کاموں کو کرتا ہے ہمیں کون سا نشان دِکھاتا ہے؟ یسوع نے جواب میں اُن سے کہا، اِس مَقدِس کو ڈھا دو تو میں اُسے تین دِن میں کھڑا کر دُوں گا۔ یہودیوں نے کہا، چھیالیس برس میں یہ مَقدِس بنا ہے اور کیا تُو اُسے تین دِن میں کھڑا کر دے گا؟ مگر اُس نے اپنے بدن کے مَقدِس کی بابت کہا تھا۔ پس جب وہ مُردوں میں سے جی اُٹھا تو اُس کے شاگردوں کو یاد آیا کہ اُس نے یہ کہا تھا اور اُنہوں نے کتابِ مُقدّس اور اُس قول کا جو یسوع نے کہا تھا یقین کیا۔ جب وہ یروشلیم میں فسح کے وقت عید میں تھا تو بہت سے لوگ اُن معجزوں کو دیکھ کر جو وہ دِکھاتا تھا اُس کے نام پر ایمان لائے۔ لیکن یسوع اپنی نسبت اُن پر اعتبار نہ کرتا تھا اِس لئے کہ وہ سب کو جانتا تھا۔ اور اِس کی حاجت نہ رکھتا تھا کہ کوئی انسان کے حق میں گواہی دے کیونکہ وہ آپ جانتا تھا کہ انسان کے دِل میں کیا کیا ہے۔ (انجیل بمطابق یوحنا 2: 12-25)

یسوع نے اِس موقعہ پر اِس لئے غصہ دکھایا کیونکہ یہودی کاہنوں نے عبادت گاہ کو ڈاکوﺅں کی کھوہ بنا دیا تھا۔ اپنے غصہ کا اظہار کرتے ہوئے آپ نے ہیکل کو صاف کیا جو انسانوں کے دِلوں کو صاف کرنے کی تیاری کا عکس تھا کیونکہ درحقیقت انسان کا دِل ہی خدا تعالیٰ کا مَقدِس ہے۔ یسوع اپنے کام کو سرانجام دینے کےلئے پورے طور پر مستعد تھے اور اِس ذمہ داری کو پورا کرنے میں آپ نے بالکل بھی سُستی نہ کی۔ آپ نے رسیوں کا ایک کوڑا بنایا اور وہ سب جنہیں وہاں نہیں ہونا چاہئے تھا نکال باہر کیا۔

یسوع نے تاجروں یا صرّافوں پر تشدد نہ کیا کیونکہ آپ اُن پر ظاہر کرنا چاہتے تھے کہ آپ کا غصہ اُن کی ذات و شخصیت کے خلاف نہیں بلکہ اُن کے بُرے کاموں کے خلاف تھا۔ یسوع نے جانوروں کو باہر نکال دیا اور صرّافوں کے تختے اُلٹ دیئے۔ وہاں کوئی اَور ایسا شخص موجود نہ تھا جو ایسے کر سکتا۔ آپ نے کبوتر فروشوں سے کہا کہ وہ اپنے کبوتروں کو وہاں سے لے جائیں۔ پھِر آپ نے سب کے روبرو یہ کہا "میرے باپ کے گھر کو تجارت کا گھر نہ بناﺅ۔"

خدا کے باقی تمام لوگوں سے اپنے آپ کو یگانہ و منفرد کرنے والا یہ کون شخص تھا جس نے کہا "میرے باپ کا گھر"؟ کیا کبھی کسی نبی، رسول یا آسمانی فرشتہ نے ایسا کلام کیا؟ یہ شخص کون تھا جس نے ہیکل میں لوگوں کے بڑے ہجوم کے سامنے کھڑے ہو کر اُنہیں اُن کی بگڑی راہوں کو بدلنے کا حکم دیا اور غیرقوموں کےلئے مخصوص ہیکل کے حصہ میں تجارت کے فروغ کے سلسلہ کو روکنے کو کہا؟ یہ کون شخص تھا جس نے اُنہیں ہدایت کی کہ وہ عبادت و قربانی کے سلسلہ میں ضرورت کی اشیا ہیکل کی غیراقوام والی جگہ کی بجائے باہر بازار سے خریدیں؟ یہ کون تھا جو یہودی مذہبی راہنماﺅں کی طاقت کے مرکز میں اُن کے خلاف اُٹھ کھڑا ہوا، اور تاجروں اور صرّافوں کے ساتھ اُن کے معاہدوں کو توڑ رہا تھا؟ اُسے کیا حق تھا کہ وہ لوگوں کے بیلوں اور بھیڑوں کو وہاں سے باہر نکالتا، اُن کے منظم شدہ نقدی کے تبادلہ و حساب کتاب کے طریقہ کار کو اُلٹ پُلٹ کر دیتا؟ وہ کیسے عید کے عظیم موقع پر مذہبی راہنماﺅں اور تاجروں کے مفاد کی حق تلفی کر سکتا تھا؟ کیسے اُس نے عظیم رومی حکومت کی پشت پناہی والی یہودی قوم کی قیادت کی تحقیر کرنے کی جُرأت کی؟ کیسے یسوع ہیکل میں اِس کام کو کر سکتا تھا جبکہ بہت سے کاہن اور لاوی ہر روز اپنے مذہبی فرائض کی انجام دہی کےلئے وہاں موجود ہوتے تھے؟ کیا اُن تاجروں کو جنہیں یسوع نے ہیکل سے باہر نکالا، سردار کاہن نے تجارتی سرگرمیوں کےلئے ہیکل کے استعمال کی اجازت نہیں دی تھی؟ کیا ہیکل کے نظم و نسق کو سنبھالنے کےلئے رومی سپاہیوں کو وہاں رسائی مہیا نہیں کی گئی تھی؟

جناب یسوع کیونکر اِس طرح کا برتاﺅ یا اِس کام میں کامیابی کی توقع کر سکتے تھے؟ اِس کا جواب یہ ہے کہ لوگوں کے احساس و ضمیر کے باعث یسوع کو کامیابی میں معاونت ملی کیونکہ گناہگار لوگ اپنے ضمیر اور دوسروں کے سامنے بزدل اور پست ہمت ہوتے ہیں، مگر راستباز شخص ہمیشہ دلیری کا مظاہرہ کرتا ہے۔ عظیم دانشور حضرت سلیمان نے فرمایا "اگرچہ کوئی شریر کا پیچھا نہ کرے تو بھی وہ بھاگتا ہے، لیکن صادِق شیر ببر کی مانند دلیر ہے" (پرانا عہدنامہ، امثال 28: 1)۔ ہیکل میں موجود یہودی سرداروں اور تاجروں کے احساس و ضمیر نے یسوع کی اپنے کام کو کرنے میں معاونت کی۔ جب آپ نے اُنہیں اختیار سے حکم دیا کہ آپ کے باپ کے گھر کو تجارت گاہ نہ بنائیں تو اُنہوں نے مسیح کی اطاعت کی۔

مزید برآں، اِس واقعہ سے پیشتر مذہبی راہنماﺅں نے مسیح کی بابت دریافت کرنے کےلئے یوحنا اِصطباغی کے پاس اپنا ایک وفد بھیجا تھا جن کے سامنے یوحنا اِصطباغی نے مسیح کی گواہی دی تھی، اور وہ گواہی بھی ایک طرح سے بعد ازاں تاجروں کو باہر نکالنے کے مسیح کے حق کی تصدیق کرتی ہے۔ ممکن ہے کہ اُنہوں نے قانائے گلیل میں مسیح کے پانی کو مے میں تبدیل کرنے کے معجزہ کے بارے میں بھی سُنا جس کے باعث مسیح کا روحانی اختیار مستحکم ہوا۔ علاوہ ازیں، یوحنا اِصطباغی کی خدمت کے ذریعے لوگوں کی بڑی تعداد کے دِلوں میں زبردست بیداری پیدا ہو چکی تھی جس کی وجہ سے اُن کے دِل اصلاحی عمل کےلئے تیار ہو چکے تھے۔ یوں، مذہبی راہنماﺅں نے اپنی یہودی قوم میں حقیقی خدا پرستی کے ردِعمل کو دیکھ لیا ہو گا، اگرچہ ایسے نیک لوگوں کی تعداد اُس وقت کم ہی تھی۔

اِن مختلف وجوہات نے بگاڑ کے شکار مذہبی راہنماﺅں کی مخالفت کے باوجود مسیح کی کامیابی کےلئے راہ ہموار کی۔ مسیح کی شخصیت کی امتیازی قدّوسیت اور خدا کے ساتھ اپنے تعلق میں دوسروں سے آپ کی انفرادیت دونوں کا اظہار "میرے باپ کے گھر" کے الفاظ میں ہوتا ہے۔ قدّوسیت کے سبب پیدا ہونے والی تعظیم و تکریم ناقابل بیان ہے۔

یہودی سرداروں نے یسوع کے اِس عمل کے خلاف احتجاج کرتے ہوئے آپ کو بتانے کی کوشش کی کہ وہ ہیکل کے انتظامات میں اُس وقت تک دخل اندازی کا کوئی حق نہیں رکھتا جب تک کہ وہ خدا کی طرف سے بھیجا گیا نبی یا رسول نہ ہو، اور اگر وہ سچا ہے تو اپنے الہٰی مقصد کو اُن کے سامنے کوئی خاص معجزہ کر کے ثابت کرے تا کہ وہ اُس کے مذہبی اختیار کو مان سکیں۔

مگر یسوع رضامند نہ ہوئے کہ وہ شریر لوگ آپ کے الہٰی اختیار کو پرکھنے کےلئے منصف بن جاتے۔ آپ نے اِس امر میں اُنہیں کوئی موقع فراہم نہ کیا، جس کا حقیقت میں مطلب یہ تھا کہ مسیح اپنی شخصیت میں خود ایک کافی اور عظیم ترین معجزہ تھا۔ یسوع کی بابت یہ سچے حقائق جان جانے کی صورت میں یہودیوں نے یسوع کو ہلاک کرنا تھا، مگر یسوع نے اپنی موت کے تیسرے دِن بعد مُردوں میں سے زندہ ہو جانا تھا۔ اِس لئے یسوع نے فرمایا: "اِس مَقدِس کو ڈھا دو تو میں اُسے تین دِن میں کھڑا کر دُوں گا۔"

اگر یہودیوں کے دِل سخت نہ ہوتے تو وہ یسوع کی بات کو سمجھ گئے ہوتے۔ اُنہوں نے یسعیاہ نبی کے اِن الفاظ پر توجہ نہ دی جہاں لکھا ہے کہ "خداوند یوں فرماتا ہے کہ آسمان میرا تخت ہے اور زمین میرے پاﺅں کی چوکی۔ تم میرے لئے کیسا گھر بناﺅ گے اور کون سی جگہ میری آرامگاہ ہو گی؟ کیونکہ یہ سب چیزیں تو میرے ہاتھ نے بنائیں اور یوں موجود ہوئیں، خداوند فرماتا ہے، لیکن میں اُس شخص پر نگاہ کروں گا۔ اُسی پر جو غریب اور شکستہ دِل ہے اور میرے کلام سے کانپ جاتا ہے۔" (پرانا عہدنامہ، یسعیاہ 66: 1، 2)

مسیح کے ایک سچے پیروکار، ستِفنس نے اِن الفاظ کی وضاحت یوں کی کہ "بارِی تعالیٰ ہاتھ کے بنائے ہوئے گھروں میں نہیں رہتا" (نیا عہدنامہ، اعمال 7: 48)۔ یسوع کے جواب کو یہودی سمجھ نہ سکے، اُنہوں نے مسیح کے الفاظ "اِس مَقدِس کو ڈھا دو" کو قطعی طور پر کُفر سمجھا اور نتیجتاً غصہ ہو گئے۔

کیسے یہ نیا یہودی اُستاد یہودیوں کو خدا کی مُقدّس ہیکل کو جو یہودی قوم کا عظیم ترین فخر تھی ڈھانے کی دعوت دے سکتا تھا؟ یہ کون تھا جو یہ کہہ سکتا تھا کہ اگر ہیکل کو ڈھا دیا جائے تو وہ اُسے تین دِن میں کھڑا کر دے گا جبکہ ہیرودیس بادشاہ کو اپنی تمام تر دولت، اثر و رسوخ اور توانائیوں کے ساتھ صرف اِس کی دیکھ بھال اور کچھ بہتری ہی کر سکا اور اُس کام کو پورے طور پر مکمل نہ کر سکا؟ یہ غریب گلیلی نوجوان کیسے ہیکل کو تین دِن میں دوبارہ تعمیر کر سکتا تھا؟ جو کچھ یسوع نے ہیکل کو ڈھا دینے کی بابت کہا وہ آپ کے شاگردوں پر بھی واضح نہ ہو سکا۔ وہ یسوع کے یہودیوں کے ہاتھوں مصلوب ہونے، مرنے اور دفن ہونے، اور پھر تیسرے دِن آپ کے جی اُٹھنے کے بعد ہی آپ کے اِن الفاظ کو سمجھ سکے۔ تب وہ اِس بات کو سمجھ سکے کہ ہیکل تو مسیح کے بدن کی طرف اشارہ تھا۔ اُس وقت اُن شاگردوں کا اپنے آقا مسیحا پر ایمان مستحکم ہوا، حالانکہ اُن کی اپنی قوم نے مسیح کو رد کر دیا تھا۔

شاگردوں نے یہودی قوم کے سرداروں کی مخالفت کے باوجود مسیح کی دلیری کو دیکھا اور اُسے داﺅد نبی کے اِن الفاظ کی تکمیل سمجھا جہاں درج ہے کہ "تیرے گھر کی غیرت مجھے کھا گئی" (زبور 69: 9)۔

تین سال بعد یہودی راہنماﺅں نے یسوع کے اِس جواب کو یاد رکھا اور اِسے مسیح کو قتل کرنے کےلئے ایک جواز کے طور پر لیا۔ مسیح سے انتقام لیتے ہوئے اُنہوں نے اِنہی الفاظ کے حوالے سے آپ پر طنز بھی کی۔ مسیح کے مُردوں میں سے جی اُٹھنے کو روکنے کےلئے جب اُنہوں نے حاکمِ وقت پیلاطس سے آپ کی قبر پر نگران سپاہی مقرر کرنے کےلئے درخواست کی تو اِنہی الفاظ کا حوالہ دیا۔

اِن الفاظ نے اُن لوگوں کے دِلوں میں نفرت کی آگ بھڑکا دی تھی جس سے آخرکار مسیح صلیب پر مصلوب ہوئے، اور یوں نبوت پوری ہوئی کہ "تیرے گھر کی غیرت مجھے کھا جائے گی۔" یسوع کو اِس بات کا علم تھا کہ ہیکل کی صفائی کرنے کا مقصد و نتیجہ جلد ہی غائب ہو جانا تھا اور وہاں دُنیوی طرز کی تجارت کا کام پہلے کی طرح پھر سے رائج ہو جانا تھا۔ تین سال بعد عید ہی کے موقع پر یسوع ایک بار پھر ہیکل کی صفائی کرنے کےلئے گئے، اور یہ وہی کام تھا جو آپ نے پہلے بھی کیا تھا۔ اِسی طرح جب ہماری زندگی میں نیک کاموں کے نتائج غائب ہونے لگیں تو ضرورت ہے کہ ہم اُنہیں پھر سے شروع کریں اور اُن میں ثابت قدم رہیں۔

چونکہ مسیح کے خفا ہونے کا یہ پہلا موقع ہے تو پوچھا جا سکتا ہے کہ "کیسے مسیح کا یہ غصہ آپ کی کاملیت کے ساتھ مطابقت رکھ سکتا ہے؟"

اِس کا جواب یہ ہے کہ جیسے بسا اوقات کسی پر کی گئی مہربانی بدی پر مبنی ہوتی ہے ویسے ہی غصہ بھی ایک اچھی خوبی ہو سکتا ہے۔ پاک خیالات کے ساتھ روا رکھے جانے والے غصہ کےلئے لازمی شرط یہ ہے کہ وہ تمام خود غرضانہ عناصر اور غیر معقولیت سے آزاد ہو۔ پولس رسول نے لکھا "غصہ تو کرو، مگر گناہ نہ کرو۔ سورج کے ڈوبنے تک تمہاری خفگی نہ رہے اور ابلیس کو موقع نہ دو" (نیا عہدنامہ، افسیوں 4: 26-27)۔ ہیکل کے مُقدّس مقام کی بےحرمتی دیکھ کر یسوع غصہ ہوا، اور اِس سے مادی دُنیا میں پاک خدا کے معاملات کی ترجمانی ہوتی ہے۔ خدا کا نام، اُس کا گھر اور اُس کے الفاظ پاک ہیں اور اُس کے خادم بھی پاک ہوتے ہیں۔ خدائے قدوس کی خاطر اُن کی عزت کرنی چاہئے۔ جو اِن باتوں کی پرواہ نہیں کرتا، اُس پر خدا کا غضب نازل ہو گا جیسا کہ ہیکل کو ناپاک کرنے والوں کے ساتھ ہوا۔

مسیح کے غصہ کرنے کا ایک سبب لوگوں میں مال و دولت کےلئے محبت کا ہونا بھی تھا، جو پاک انجیل کے مطابق تمام برائی کی جڑ ہے: "زر کی دوستی ہر قسم کی برائی کی جڑ ہے" (نیا عہدنامہ، 1-تیمتھیس 6: 10)۔

مسیح کے اِن الفاظ نے کہ "میرے باپ کے گھر کو تجارت کا گھر نہ بناﺅ" واضح کر دیا کہ تجارتی مفاد نے اُن کے دِلوں سے خدا کی محبت کو بےدخل کر رکھا تھا۔ "کوئی آدمی دو مالکوں کی خدمت نہیں کر سکتا، کیونکہ یا تو ایک سے عداوت رکھے گا اور دوسرے سے محبت، یا ایک سے ملا رہے گا اور دوسرے کو ناچیز جانے گا" (انجیل بمطابق متی 6: 24)۔ عزیز قاری، آپ کے اعمال ظاہر کر دیں گے کہ آیا آپ خدا کی خدمت کر رہے ہیں یا دولت کی۔ مال و دولت کی اہمیت سے انکار نہیں، لیکن جب اُس سے اِس قدر محبت کی جائے کہ متبرک اقدار گناہ آلودہ ہونے لگیں اور تجارتی نفع دینداری کو چُرا لے جائے، تو تب دولت واقعی برائی ہے۔ دینداری پر دولت کو ترجیح دینا بت پرستی کے برابر بھی ہے۔

اِس جنگ میں یسوع نے یہودی قائدین پر غلبہ حاصل کیا۔ آپ نے ابلیس کو بھی شکست دی جو تمام برائیوں کی جڑ ہے۔ اگرچہ یسوع نے یہودیوں کے مطلوبہ معجزات دِکھانے سے انکار کیا، تاہم آپ نے یروشلیم میں چند معجزات بھی کئے اور بہت سے لوگ آپ کے نام پر ایمان لائے۔

ایک شخص خیال کرسکتا ہے کہ یسوع کو اِن معجزات کے کرنے میں مُسرّت ہوئی ہو گئی لیکن کیا یوحنا رسول نے یہ نہیں لکھا کہ "یسوع اپنی نسبت اُن پر اعتبار نہ کرتا تھا، اِس لئے کہ وہ سب کو جانتا تھا" (انجیل بمطابق یوحنا 2: 24)۔

اِس سے معلوم ہوتا ہے کہ اُن لوگوں کا ایمان رُوح یا دِل سے نہیں تھا بلکہ صرف عقلی ایمان تھا۔ وہ اُن پودوں کی مانند تھے جو کم گہری زمین میں لگائے گئے ہوں۔ وہ دیر تک قائم نہ رہ سکے کیونکہ جب ایذا رسانی کا سامنا کرنا پڑا تو وہ سوکھ کر مر گئے۔ مسیح پر ایمان لانے والے بعض افراد اپنے ایمان سے پھِر گئے جس کی وجہ اپنے ہی لوگوں کی جانب سے ایذا رسانی تھی یا پھِر اُن لوگوں نے احساس کر لیا کہ مسیحی عارضی دنیوی برکتوں سے ہر وقت لطف اندوز نہیں ہوا کرتے۔ کچھ لوگ اِس حقیقت کے عیاں ہو جانے پر مسیحی دین سے پھِر گئے کہ یسوع ایک یہودی سیاسی بادشاہت قائم کرنے نہیں آئے تھے۔

انجیل مُقدّس یسوع کی بابت ایسی گواہی پیش کرتی ہے جو کسی اَور اِنسان کےلئے نہ تو دی گئی ہے اور نہ دی جا سکتی ہے کہ وہ "اِس کی حاجت نہ رکھتا تھا کہ کوئی انسان کے حق میں گواہی دے کیونکہ وہ آپ جانتا تھا کہ انسان کے دِل میں کیا کیا ہے" (انجیل بمطابق یوحنا 2: 25)۔ کسی بھی نبی یا رسول کی بابت اِس قسم کا بیان کبھی نہیں دیا گیا۔

اِس سے ہم واضح طور پر سمجھتے ہیں کہ مسیح میں الہٰی اور انسانی فطرت کے باعث لوگوں کے دِلی تصورات کو جاننے کا اِدراک بہت زیادہ تھا۔ ہم مسیح کی بابت دیکھیں گے کہ انسان کی دِلی معلومات جاننے کی آپ کی قدرت کے باعث کتنے زیادہ بھلائی کے کام ہوئے۔

"فریسیوں میں سے ایک شخص نِیکُدِیمُس نام یہودیوں کا ایک سردار تھا۔ اُس نے رات کو یسوع کے پاس آ کر اُس سے کہا، اے ربّی ہم جانتے ہیں کہ تُو خدا کی طرف سے اُستاد ہو کر آیا ہے کیونکہ جو معجزے تُو دِکھاتا ہے کوئی شخص نہیں دِکھا سکتا جب تک خدا اُس کے ساتھ نہ ہو۔ یسوع نے جواب میں اُس سے کہا، میں تجھ سے سچ کہتا ہوں کہ جب تک کوئی نئے سرے سے پیدا نہ ہو وہ خدا کی بادشاہی کو دیکھ نہیں سکتا۔ نِیکُدِیمُس نے اُس سے کہا، آدمی جب بوڑھا ہو گیا تو کیونکر پیدا ہو سکتا ہے؟ یسوع نے جواب دیا کہ میں تجھ سے سچ کہتا ہوں جب تک کوئی آدمی پانی اور رُوح سے پیدا نہ ہو وہ خدا کی بادشاہی میں داخل نہیں ہو سکتا۔ جو جسم سے پیدا ہوا ہے جسم ہے اور جو رُوح سے پیدا ہوا ہے رُوح ہے۔ تعجب نہ کر کہ میں نے تجھ سے کہا تمہیں نئے سرے سے پیدا ہونا ضرور ہے۔ ہوا جدھر چاہتی ہے چلتی ہے اور تُو اُس کی آواز سُنتا ہے مگر نہیں جانتا کہ وہ کہاں سے آتی اور کہاں کو جاتی ہے۔ جو کوئی رُوح سے پیدا ہوا ایسا ہی ہے۔ نِیکُدِیمُس نے جواب میں اُس سے کہا، یہ باتیں کیونکر ہو سکتی ہیں؟ یسوع نے جواب میں اُس سے کہا، بنی اسرائیل کا اُستاد ہو کر کیا تُو اِن باتوں کو نہیں جانتا؟ میں تجھ سے سچ کہتا ہوں کہ جو ہم جانتے ہیں وہ کہتے ہیں اور جسے ہم نے دیکھا ہے اُس کی گواہی دیتے ہیں اور تم ہماری گواہی قبول نہیں کرتے۔ جب میں نے تم سے زمین کی باتیں کہیں اور تم نے یقین نہیں کیا تو اگر میں تم سے آسمان کی باتیں کہوں تو کیونکر یقین کرو گے؟ اور آسمان پر کوئی نہیں چڑھا سوا اُس کے جو آسمان سے اُترا یعنی ابنِ آدم جو آسمان میں ہے۔ اور جس طرح موسیٰ نے سانپ کو بیابان میں اُونچے پر چڑھایا اُسی طرح ضرور ہے کہ ابنِ آدم بھی اونچے پر چڑھایا جائے۔ تا کہ جو کوئی ایمان لائے اُس میں ہمیشہ کی زندگی پائے۔ کیونکہ خدا نے دُنیا سے ایسی محبت رکھی کہ اُس نے اپنا اکلوتا بیٹا بخش دیا تا کہ جو کوئی اُس پر ایمان لائے ہلاک نہ ہو بلکہ ہمیشہ کی زندگی پائے۔ کیونکہ خدا نے بیٹے کو دُنیا میں اِس لئے نہیں بھیجا کہ دُنیا پر سزا کا حکم کرے بلکہ اِس لئے کہ دُنیا اُس کے وسیلہ سے نجات پائے۔ جو اُس پر ایمان لاتا ہے اُس پر سزا کا حکم نہیں ہوتا۔ جو اُس پر ایمان نہیں لاتا اُس پر سزا کا حکم ہو چکا۔ اِس لئے کہ وہ خدا کے اکلوتے بیٹے کے نام پر ایمان نہیں لایا۔ اور سزا کے حکم کا سبب یہ ہے کہ نور دُنیا میں آیا ہے اور آدمیوں نے تاریکی کو نور سے زیادہ پسند کیا۔ اِس لئے کہ اُن کے کام برے تھے۔ کیونکہ جو کوئی بدی کرتا ہے وہ نور سے دُشمنی رکھتا ہے اور نور کے پاس نہیں آتا۔ ایسا نہ ہو کہ اُس کے کاموں پر ملامت کی جائے۔ مگر جو سچائی پر عمل کرتا ہے وہ نور کے پاس آتا ہے تا کہ اُس کے کام ظاہر ہوں کہ وہ خدا میں کئے گئے ہیں۔" (انجیل بمطابق یوحنا 3: 1-21)

ایک روز رات کی خاموشی میں ایک معتبر یہودی بنام نِیکُدِیمُس، مسیح سے ملاقات کےلئے آیا۔ نِیکُدِیمُس "اسرائیل کا اُستاد" اور "یہودیوں کا سردار" والے القابات کا مالک تھا۔ وہ ستر عالموں پر مشتمل یہودی مذہبی عدالت، صدر عدالت کا رُکن تھا۔ مسیح کی زندگی میں نِیکُدِیمُس ایک اہم شخص تھا کیونکہ وہ یہودی صدر عدالت میں سے پہلا فرد تھا جو مسیح کی تعلیمات سے متاثر ہوا۔ یہی وہ شخص تھا جس کے سبب مسیح کی پہلی دینی و رُوحانی تقریر انجیل یوحنا میں درج ہوئی۔ ایک فرد اِس طرح کے خطبے سے لازماً مذہب کے بنیادی اصول پر توجہ مرکوز کئے جانے کی توقع کرے گا۔

کفرنحوم سے واپسی پر مسیح اور آپ کے شاگردوں کو شام کے وقت جس گھر میں مدعو کیا گیا تھا، اُس کی بابت ہم تصور کر سکتے ہیں کہ جب نِیکُدِیمُس اپنی زرق برق خلعت زیب تن کئے وہاں آ موجود ہوا ہو گا تو اُس وقت بہت زیادہ ہلچل پیدا ہوئی ہو گی۔ ایک فریسی ہوتے ہوئے اُس کا شمار اُن لوگوں میں ہوتا تھا جو بڑے فخر کے ساتھ اپنے سر کے جُبہّ، پوشاک کے چوڑے کناروں اور دیگر نظر آنے والے نشانات کے ذریعے اپنے اعلیٰ مقام کا اظہار کرتے تھے۔ اُس گھر میں داخل ہونے پر یقیناً اُس کا نہایت احترام سے استقبال کیا گیا ہو گا کیونکہ اُس کی شخصیت دولت، علم، مرتبہ، رہبری، سرداری اور عملی نیکی کی حامل تھی۔ اُس نے رات کے وقت غیرمتوقع موقع پر اُس سادہ سے گھر میں داخل ہو کر اُس کی زینت کو بڑھایا۔

نِیکُدِیمُس کی آمد سے گھر میں موجود تمام افراد صرف اِس لئے حیرت زدہ نہ تھے کہ وہ ایک فریسی اور صدر عدالت کا رُکن تھا بلکہ اِس کی خاص وجہ یہ تھی کہ وہ یسوع سے اُس وقت ملنے آیا جب اُس سے کچھ دیر پہلے یسوع نے ہیکل کی صفائی کی تھی اور اِس واقعہ نے سردار کاہنوں کو سخت ناراض کر دیا تھا۔

یہودیوں کے اِس سردار کی آمد پر ہم تصور کر سکتے ہیں کہ لوگ احترام کے ساتھ کھڑے ہوئے ہوں گے۔ مسیح اور آپ کے حواری اِس خصوصی مہمان کی گفتگو کے شروع ہونے کے برابر منتظر ہوئے ہوں گے تا کہ وہ اُس کی آمد کی مقصد کو جان سکتے۔ جب نِیکُدِیمُس نے گفتگو شروع کی تو اُس نے یسوع کے ساتھ احترام سے پیش آتے ہوئے آپ کو "ربّی" یعنی "اُستاد" کہہ کر مخاطب کیا۔ یہ یہودی قوم کے درمیان اعلیٰ ترین مذہبی لقب تھا۔ یہ لقب صرف اُن افراد کو دیا جاتا تھا جو یہودی دینی درسگاہوں سے اعلیٰ تعلیم یافتہ ہوتے تھے۔ کسی کو توقع نہ تھی کہ نِیکُدِیمُس یہ اعلیٰ مرتبہ والا لقب ایک ایسے نوجوان کو دے گا جو نہ تو یہودی مدرسوں کا اعلیٰ تعلیم یافتہ تھا اور نہ ہی کبھی ایسے مدرسوں میں داخل ہوا تھا۔

پھِر نِیکُدِیمُس سے مسیح کی عظمت کا اقرار کرنے والے یہ الفاظ کہے "اے ربی ّ ہم جانتے ہیں کہ تُو خدا کی طرف سے اُستاد ہو کر آیا ہے۔" یہ بات تسلیم کر کے نِیکُدِیمُس نے یسوع کو اپنی قوم کے دیگر ربیوں سے نہایت مُقدّم مرتبت پر رکھا کیونکہ وہ سب ربی خدا کی طرف سے نہیں بھیجے گئے تھے بلکہ اُنہوں نے یہودی قوم کے سرداروں اور مدرسوں سے اِس لقب کو حاصل کیا تھا۔ نِیکُدِیمُس نے اپنی رائے کو ثبوت کے ساتھ تقویت بخشی کیونکہ ایک عالم ہوتے ہوئے وہ کسی بات کو پکی دلیل کے بغیر قبول نہیں کرتا تھا۔ اُس نے کہا کہ جو معجزے مسیح کر رہا تھا وہ کوئی اَور اُس وقت تک نہیں کر سکتا تھا جب تک کہ خدا اُس کے ساتھ نہ ہو۔

نِیکُدِیمُس، شمعون کی مانند راستباز اور خدا ترس بزرگ شخص تھا جو بنی اسرائیل پر مسیح کے ظہور کا منتظر تھا، اور یہی سبب تھا کہ وہ آیا تا کہ معلوم کرے کہ آیا یہ نیا اُستاد مسیح تھا یا نہیں۔ یسوع کے جواب سے ہمیں پتا چلتا ہے کہ نِیکُدِیمُس اپنے آپ پر فخر کرتا تھا اور نجات کےلئے اپنی ذاتی راستبازی اور شجرہ نسب پر بھروسا کرتا تھا۔ اُس نے موسیٰ کی شریعت پر بہت ہی احتیاط سے عمل کیا تھا، اور نہ صرف مال و زر میں بلکہ نیک کاموں میں بھی دولتمند بن گیا تھا۔ چونکہ نِیکُدِیمُس خدا کی شریعت اور مذہبی معاملات میں ماہر تھا اِس لئے لوگ سوچتے تھے کہ آسمان کی بادشاہی میں داخل ہونے والوں میں وہ اوّل ہو گا۔ لوگوں کو نِیکُدِیمُس کے پُرعظمت کردار اور امتیازی مرتبہ کی بدولت یوں لگا کہ جیسے مُقدّسین کے ساتھ فردوس میں ایک اعلیٰ مقام اُس کا انتظار کر رہا تھا۔ نِیکُدِیمُس کی مانند آج بھی کتنے لوگ ایسے ہیں جو نجات کےلئے دین کے اپنے علم، کلیسیائی فرقہ کے اپنے ایمانی ضابطہ عمل اور ظاہری خیرات پر تکیہ کرتے ہیں۔

ہمارے خیال میں نِیکُدِیمُس نے سوچا ہو گا کہ اُس نے اپنے الفاظ سے یسوع کا بہت احترام کیا تھا۔ اِس لئے وہ مسیح کی جانب سے شکرگزاری اور قدرشناسی سے نوازے جانے کا منتظر تھا۔ اِس میں شک نہیں کہ یسوع کے حواری نِیکُدِیمُس کی گواہی سے متاثر ہوئے اور اُس کی بابت خوش اُمیدی رکھتے تھے۔ لیکن یسوع نے ایک دیانتدار رُوحانی طبیب کی حیثیت سے اپنے ملاقاتی نِیکُدِیمُس کے دِل میں رُوحانی بیماری کو پہچان لیا تھا۔ نِیکُدِیمُس کے وسوسہ و وہم کو دُور کرنے کےلئے یسوع کو اُس کے احساسات کو زخمی ہونے کی حد تک چھونا پڑا تا کہ اُس کا مناسب طور پر دُرست علاج کیا جا سکتا۔

غلط روِش پر گامزن گمراہ رُوحوں کو بچانے کےلئے ابتدائی قدم کے طور پر ضرور ہے کہ اُن کے ایسے تمام لاحاصل و باطل سہاروں و اُمیدوں کو مسمار کیا جائے جن پر وہ اپنی نجات کےلئے تکیہ کئے ہوتے ہیں۔ یسوع کے کلام نے نِیکُدِیمُس کے نجات کی خیالی اُمید کے تمام لبادہ کو چاک کر دیا، اور اُسے معززانہ یا بااحترام الفاظ سے نوازنے کے بجائے یوں کہا "میں تجھ سے سچ کہتا ہوں کہ جب تک کوئی نئے سرے سے پیدا نہ ہو وہ خدا کی بادشاہی کو دیکھ نہیں سکتا۔" دوسرے الفاظ میں یسوع، نِیکُدِیمُس سے یہ کہہ رہے تھے کہ "چونکہ تُو اُوپر سے پیدا نہیں ہوا، اِس لئے تُو خدا کی بادشاہی کو دیکھ نہیں سکتا۔" نِیکُدِیمُس نئی پیدایش کے موضوع سے ناواقف نہیں تھا کیونکہ اِس مضمون کا تذکرہ عہدنامہ عتیق میں پایا جاتا ہے۔ لیکن یہودی اِس کی تفسیر کرتے ہوئے اِسے صرف غیراقوام کےلئے سمجھتے تھے جو اُن کے نزدیک اُس وقت تک نجات نہیں پا سکتے تھے جب تک کہ وہ یہودیت کو قبول کر کے ختنہ نہ کرواتے اور موسوی شریعت کی پابندی نہ کرتے۔ ہر یہودی یہ سوچتا تھا کہ چونکہ وہ پہلے ہی اِن باتوں پر قائم ہے اِس لئے اُسے نئی پیدایش کی ضرورت نہیں۔ اِسی سبب سے یسوع کے بیان پر نِیکُدِیمُس حیران ہو گیا۔ جن الفاظ میں نِیکُدِیمُس نے یسوع کو جواب دیا اُن سے علم ہوتا ہے کہ نِیکُدِیمُس یسوع کے الفاظ پر زبردست شک کر رہا تھا۔ علاوہ ازیں اُس کا جواب ظاہر کرتا ہے کہ اُس نے پیدایش کی بابت مسیح کے الفاظ کو جسمانی معنوں میں سمجھا تھا۔

یسعیاہ نبی نے یسوع کی بابت نبوت کی تھی کہ "وہ مسلے ہوئے سرکنڈے کو نہ توڑے گا اور ٹمٹماتی بتی کو نہ بُجھائے گا ۔..." (پرانا عہدنامہ، یسعیاہ 42: 3)۔ یہ نبوت مسیح میں اُس وقت پوری ہوئی جب آپ نے نِیکُدِیمُس کو نئے ایمان کی جانب لے جانے کی کوشش کی۔

یسوع نے نِیکُدِیمُس کو اُس کی سخت دِلی اور رُوحانی باتوں کی لفظی تفسیر کرنے پر سرزنش نہ کی، اور نِیکُدِیمُس کے پہلے الفاظ کو دُہراتے ہوئے اُنہیں قائم رکھا اور اُس کے بیان پر مزید وضاحت پیش کی۔

یسوع نے نِیکُدِیمُس پر اِس بات کو آشکارا کیا کہ آسمانی پیدایش سے مُراد پانی اور رُوح سے پیدا ہونا ہے۔ پانی سے پیدایش کا ذِکر کرتے ہوئے وہ توبہ کی طرف اشارہ کر رہے تھے جس کےلئے پانی کا بپتسمہ ایک علامت و تصدیقی مُہر تھی۔ اور رُوح سے یسوع کی مُراد رُوح القدس تھا جس کی بدولت باطنی پاکیزگی کے ساتھ نئی پیدایش واقع ہوتی ہے۔ یہ گناہ کے اعتبار سے مر جانے اور پھِر راستبازی کے اعتبار سے نئی زندگی پانے کا دوسرا نام ہے (نیا عہدنامہ، رومیوں باب 6)۔ خدا تعالیٰ کے فرزندوں کے سوا کوئی بھی آسمان کی بادشاہی کا وارث نہیں ہوتا، اور خدا کے فرزند ہونے کےلئے خدا سے پیدا ہونے کے علاوہ کوئی اَور راہ نہیں جو کہ صرف رُوحانی ہی ہو سکتی ہے کیونکہ ایک فرد جسمانی طور پر تو اپنے والدین سے پیدا ہوتا ہے لیکن رُوحانی اعتبار سے رُوح القدس سے پیدا ہوتا ہے۔

مسیح کو علم تھا کہ عقلیت پسندی پر مبنی فلسفہ میں نئی پیدایش کی حقیقت کو نہ سمجھنے کے باعث اُسے قبول کرنا آسان نہ تھا۔ یسوع نے نئی پیدایش کی رُوحانی اور پُراسرار حقیقت کو نہ سمجھنے کی وجہ سے نِیکُدِیمُس کو الزام نہ دیا۔ باوجود کہ نِیکُدِیمُس اِن رُوحانی حقائق کو سمجھ نہ سکا، یسوع نے اُسے اِن حقائق کو قبول و تسلیم کرنے کےلئے کہا۔ اِس بات کو واضح کرنے کےلئے یسوع نے اُس سے کہا "ہوا جدھر چاہتی ہے چلتی ہے اور تُو اُس کی آواز سُنتا ہے مگر نہیں جانتا کہ وہ کہاں سے آتی ہے اور کہاں کو جاتی ہے۔ جو کوئی روح سے پیدا ہوا ایسا ہی ہے" (انجیل بمطابق یوحنا 3: 8)۔ جب اِن باتوں سے نِیکُدِیمُس کے ذہن سے تمام شکوک رفع نہ ہوئے تو اُس نے مسیح سے دریافت کیا کہ ایسا کیسے ممکن ہو سکتا ہے۔ ایک عالم ہونے کی حیثیت سے نِیکُدِیمُس نے مزید وضاحت کی درخواست کی۔

مسیح نے نِیکُدِیمُس کے سوال کے سلسلہ کو ساری دُنیا کےلئے ابدی برکت کے ایک عظیم پیغام میں بدل دیا۔ آپ نے نرم تادیب کے ساتھ نِیکُدِیمُس کو اُس کی کمزوری کا احساس دلاتے ہوئے کہا "بنی اسرائیل کا اُستاد ہو کر کیا تُو اِن باتوں کو نہیں جانتا؟" اِس موقع پر یسوع مسیح نے انتہائی بیش بہا خطبہ دیا جس میں وہ سنہری آیت شامل ہے جسے انتہائی زمین کے اکثریتی لوگوں نے پاک انجیل کی سب سے اہم اور خوبصورت ترین آیت کے طور پر قبول کیا ہے جو یوں ہے: "خدا نے دُنیا سے ایسی محبت رکھی کہ اُس نے اپنا اکلوتا بیٹا بخش دیا تا کہ جو کوئی اُس پر ایمان لائے ہلاک نہ ہو بلکہ ہمیشہ کی زندگی پائے" (انجیل بمطابق یوحنا 3: 16)۔

نِیکُدِیمُس سے اپنی گفتگو کی ابتدا ہی پر یسوع نے آسمانی معاملات کے بارے میں اختیار کے ساتھ بات کرنے کے اپنے حق کا دعویٰ کیا۔ جو کچھ مسیح جانتے تھے اُس بارے میں آپ نے بات کی اور جو کچھ آپ نے دیکھا تھا اُس کی خبر دی: "آسمان پر کوئی نہیں چڑھا سوائے اُس کے جو آسمان سے اُترا یعنی ابنِ آدم جو آسمان میں ہے۔" مسیح کا آسمانی کلام چاہے کتنا ہی مخفی و پُراسرار معلوم ہو، خدا سے پیدا ہونے کی ضرورت کے بارے میں آپ کے الفاظ کو قبول کرنے کی ضرورت ہے۔

اِن الفاظ کی بنیاد اِس حقیقت پر قائم ہے کہ گناہگار کا فطری دِل گناہ و بدی کی حالت میں مردہ ہے۔ یہ حقیقت میں رُوحانی موت ہے۔ مگر جو آسمان پر موجود ہیں وہ رُوحانی اعتبار سے زندہ ہیں، اِس لئے زندوں میں مُردوں کےلئے کوئی جگہ نہیں ہے، اور انسان کی گناہ میں گری ہوئی حالت اور آسمانی پاکیزگی میں کوئی موافقت و ہم آہنگی نہیں پائی جاتی۔ اگر ہم فرض کر بھی لیں کہ ایک فرد اپنی گناہ میں گری ہوئی حالت کے ساتھ بہشت میں چلا جائے گا تو اُسے وہاں اپنی گناہگار طبیعت کے موافق جسم و نفس کو خوش کرنے والا ماحول نہیں ملے گا کیونکہ ایسے فرد کی تمام لذتیں اور خوشیاں محض جسمانی ہوتی ہیں۔ ایسا فرد خود بھی پاک آسمان میں رہنا نہیں چاہے گا۔ اِسی طرح آسمان کے رہنے والے بھی ایسے بدکار انسان کو قبول نہیں کریں گے کیونکہ جس طرح زندہ لوگ گلنے سڑنے والی کسی لاش سے نفرت کرتے ہیں اُس سے کہیں زیادہ آسمانی لوگ گناہ آلودہ بگڑی فطرت سے نفرت کریں گے۔

مسیح کی تعلیمات کے مطابق حقیقی مذہب کا تعلق ظاہر سے نہیں بلکہ باطن کے ساتھ ہے۔ یہ بنیادی طور پر انسان کےلئے خدا کی طرف سے زندگی کی بخشش ہے جس میں اِس بخشش کی بدولت انسانی زندگی میں رُوحانی پھل ظاہر ہوتے ہیں۔ خدا کے اُس فضل سے جس کے ہم ہرگز مستحق نہیں، ہماری نفسانی و جسمانی حالت رُوحانی نئی پیدایش کی حالت میں بدل جاتی ہے، اور یہی وہ کنجی ہے جو اُس دروازے کو کھولتی ہے جس کے ذریعہ ہم فضل کی حالت سے گذرتے ہوئے خدائے پاک کے ابدی جلال میں داخل ہو سکتے ہیں۔ خدا کی اِس بخشش کو پانے کےلئے ضرور ہے کہ ہمارے ذہن الہٰی نور سے منور ہوں، ہمارے جذبات و ہیجانات کی تقدیس ہو، ہماری مرضی الہٰی مرضی سے تبدیل ہو جائے اور ہمارا چال چلن راستبازی کے مطابق بدل جائے۔ اگر اِن باتوں میں ہماری اصلاح نہیں ہوتی تو ہم کبھی بھی آسمانی شہر کو نہیں دیکھ سکیں گے۔

ِیہ باطنی تبدیلی ایک ایمان لانے والے کو پولس رسول کے ساتھ یہ کہنے کا فخر عنایت کرتی ہے کہ "جو مجھے طاقت بخشتا ہے اُس میں ہو کر میں سب کچھ کر سکتا ہوں" (نیا عہدنامہ، فلپیوں 4: 13)۔ ایسی تبدیلی کی بدولت انسان نیکی کے وہ سب کام کر سکتا ہے جنہیں پہلے انجام دینے کے قابل نہیں تھا جن میں اپنے دشمنوں سے محبت کرنا، دوسروں کی خدمت کےلئے خود کو وقف کر دینا، غیروں کےلئے اپنی جان دے دینا اور شخصی دُعا اور رُوحانی مطالعہ میں خوشی تلاش کرنا شامل ہیں۔ مزید برآں، یسوع نے اعلان کیا کہ جو نور آپ دُنیا میں لائے ہیں اُسے عموماً قبول نہیں کیا جاتا۔ اِس عجیب حقیقت کا سبب یہ ہے کہ لوگوں کے کام تاریکی میں کئے گئے کام ہیں اور نور کی تاب نہیں لا سکتے۔ لیکن اِس کے برعکس راست لوگ نور سے محبت کرتے ہیں اور اپنے اعمال کے ظاہر ہونے سے خوفزدہ نہیں ہوتے تا کہ لوگ خدا کے ہاتھ کو کام کرتے ہوئے دیکھ سکیں۔

انجیل یوحنا میں مسیح کی سب سے پہلی تحریری گفتگو میں جو نِیکُدِیمُس کے ساتھ ہوئی، ہم مسیحی ایمان کے ایک اہم پہلو کو دیکھ سکتے ہیں۔ اِس بیان میں ہم مسیح کو ابنِ آدم کے طور پر دیکھتے ہیں اور ساتھ ہی ابنِ خدا کے طور پر بھی دیکھتے ہیں۔ یہاں ہمیں تثلیث فی التوحید کے تین اقانیم کا بیان بھی ملتا ہے جو خدا کی واحدانیت میں تثلیث کی سچائی کی تصدیق کرتا ہے۔ آخر میں ہم ایک نبی، کاہن اور بادشاہ کے طور پر مسیح کے کام کا بیان بھی پاتے ہیں۔

انسانیت کو نبیوں کی ضرورت اِس لئے ہے کہ اُن کی نبوت سے آنے والے واقعات کی بابت وضاحت مل سکے۔ اُنہیں کاہن کی ضرورت بھی ہے کہ وہ خدا کے روبرو اُن کی نمائندگی کر کے گناہوں کا کفارہ پیش کرے۔ اور پھر اُنہیں بادشاہ کی ضرورت ہے کہ وہ ملک کے تمام معاملات کو سنبھالے اور حکومت کرے۔

یہ تینوں منصب تمام سماجی اور مذہبی ضروریات کےلئے کافی ہیں، اور اِن سب کو یسوع نے اپنی شخصیت میں یکجا کر دیا۔ اسرائیل کی تمام تاریخ میں کبھی بھی یہ سب عہدے کسی ایک شخص میں نہیں پائے گئے۔ سب نبی، کاہن اور بادشاہ علامت تھے جو یسوع کی طرف اشارہ کرتے تھے۔ اُنہیں پاک مسح سے مخصوص کیا جاتا تھا اور بعض اوقات اُنہیں مسیحا بھی کہا گیا۔ یسوع سے پہلے اِن تین منصبوں کےلئے جن فرائض کی ادائیگی مطلوب تھی وہ یسوع نے اپنی آمد سے ہمیشہ کےلئے پایہ تکمیل کو پہنچا دیئے۔

یسوع وہ نبی ہیں جنہوں نے عالم بالا کی چیزوں کے بارے میں بات کی۔ آپ نے خدا کی مرضی اور صفات اور اِس کے ساتھ ساتھ انسانی دِل کی پوشیدہ باتوں کو عیاں کیا۔ یسوع آج بھی وہ راست اُستاد ہیں جن کی رُوح انسانیت کو وہ سب کچھ سکھاتی ہے جو اِس کی بہتری کےلئے ضروری ہے۔

انسان کےلئے مسیح کا مقام اُس کاہن کی مانند ہے جس نے تمام انسانیت کے گناہوں کے فدیہ و کفارہ کے طور پر اپنے آپ کو ابدی قربانی کےلئے نذر کر دیا۔ خدا کے برہ کی حیثیت سے آپ سب کے گناہ کی مخلصی ہیں تا کہ جو کوئی آپ پر ایمان لائے ابدی ہلاکت کا شکار نہ ہو۔ جیسے موسیٰ نبی نے بیابان میں سانپ اونچے پر چڑھایا تھا ویسے ہی مسیح نے صلیب پر لٹکائے جانے اور اپنی جان دینے سے یہ سب ممکن کیا: "چنانچہ موسیٰ نے پیتل کا ایک سانپ بنوا کر اُسے بلّی پر لٹکا دیا اور ایسا ہوا کہ جس جس سانپ کے ڈسے ہوئے آدمی نے اُس پیتل کے سانپ پر نگاہ کی وہ جیتا بچ گیا۔" (توریت شریف، گنتی 21: 9)؛ "اور جس طرح موسیٰ نے سانپ کو بیابان میں اُونچے پر چڑھایا اُسی طرح ضرور ہے کہ ابنِ آدم بھی اُونچے پر چڑھایا جائے۔ تا کہ جو کوئی اُس پر ایمان لائے اُس میں ہمیشہ کی زندگی پائے۔" (انجیل بمطابق یوحنا 3: 14، 15)

یسوع ہر توبہ کرنے والے شخص کےلئے مکمل، فوری اور مُفت معافی کا اعلان کرتے ہیں۔ درمیانی کے طور پر شفاعت کرتے ہوئے آپ ایمان لانے والوں کی درخواستوں کو آسمانی باپ کے حضور پیش کرتے ہیں اور اُن کےلئے وکالت کرتے ہیں۔

ایک بادشاہ کے طور پر آپ اپنے لوگوں کے دِلوں پر حکمرانی کرتے ہیں۔ آپ اُن کی ضروریات پوری کرتے ہیں اور اُن کے دشمنوں کو شکست دیتے ہیں اور اُنہیں اپنی ابدی رُوحانی بادشاہی میں لے کر آتے ہیں۔

اگر آپ بادشاہ نہ ہوتے تو انسانوں کو ابدی نجات کےلئے اپنے اوپر ایمان لانے کےلئے نہ کہتے، بلکہ صرف یہ کہتے کہ خدا پر ایمان رکھو، جیسا کہ دوسرے نبیوں نے کرنے کو کہا تھا۔ نبی، کاہن اور بادشاہ ہوتے ہوئے جناب مسیح آج وہ رُوحانی معجزات ظہور میں لاتے ہیں جو اُن معجزوں سے کہیں عظیم ترین ہیں جو آپ نے زمین پر رہتے ہوئے سرانجام دیئے تھے۔

"وہ یہودیہ کو چھوڑ کر پھر گلیل کو چلا گیا۔ اور اُس کو سامریہ سے ہو کر جانا ضرور تھا۔ پس وہ سامریہ کے ایک شہر تک آیا جو سُوخار کہلاتا ہے۔ وہ اُس قطعہ کے نزدیک ہے جو یعقوب نے اپنے بیٹے یوسف کو دیا تھا۔ اور یعقوب کا کنواں وہیں تھا۔ چنانچہ یسوع سفر سے تھکا ماندہ ہو کر اُس کنوئیں پر یونہی بیٹھ گیا۔ یہ چھٹے گھنٹے کے قریب تھا۔ سامریہ کی ایک عورت پانی بھرنے آئی۔ یسوع نے اُس سے کہا، مجھے پانی پلا۔ کیونکہ اُس کے شاگرد شہر میں کھانا مول لینے کو گئے تھے۔ اُس سامری عورت نے اُس سے کہا کہ تُو یہودی ہو کر مجھ سامری عورت سے پانی کیوں مانگتا ہے؟ (کیونکہ یہودی سامریوں سے کسی طرح کا برتاﺅ نہیں رکھتے)۔ یسوع نے جواب میں اُس سے کہا، اگر تُو خدا کی بخشش کو جانتی اور یہ بھی جانتی کہ وہ کون ہے جو تجھ سے کہتا ہے مجھے پانی پلا تو تُو اُس سے مانگتی اور تجھے زندگی کا پانی دیتا۔ عورت نے اُس سے کہا، اے خداوند تیرے پاس پانی بھرنے کو تو کچھ ہے نہیں اور کنواں گہرا ہے۔ پھر وہ زندگی کا پانی تیرے پاس کہاں سے آیا؟ کیا تُو ہمارے باپ یعقوب سے بڑا ہے جس نے ہم کو یہ کنواں دیا اور خود اُس نے اور اُس کے بیٹوں نے اور اُس کے مویشی نے اُس میں سے پیا؟ یسوع نے جواب میں اُس سے کہا، جو کوئی اِس پانی میں سے پیتا ہے وہ پھر پیاسا ہو گا۔ مگر جو کوئی اُس پانی میں سے پئے گا جو میں اُسے دوں گا وہ ابد تک پیاسا نہ ہو گا بلکہ جو پانی میں اُسے دوں گا وہ اُس میں ایک چشمہ بن جائے گا جو ہمیشہ کی زندگی کےلئے جاری رہے گا۔ عورت نے اُس سے کہا، اے خداوند وہ پانی مجھ کو دے تا کہ میں نہ پیاسی ہوں نہ پانی بھرنے یہاں تک آﺅں۔ یسوع نے اُس سے کہا، جا اپنے شوہر کو یہاں بُلا لا۔ عورت نے جواب میں اُس سے کہا کہ میں بےشوہر ہوں۔ یسوع نے اُس سے کہا تُو نے خوب کہا کہ میں بےشوہر ہوں۔ کیونکہ تُو پانچ شوہر کر چکی ہے اور جس کے پاس تُو اَب ہے وہ تیرا شوہر نہیں۔ یہ تُو نے سچ کہا۔ عورت نے اُس سے کہا، اے خداوند مجھے معلوم ہوتا ہے کہ تُو نبی ہے۔ ہمارے باپ دادا نے اِس پہاڑ پر پرستش کی اور تم کہتے ہو کہ وہ جگہ جہاں پرستش کرنا چاہئے یروشلیم میں ہے۔ یسوع نے اُس سے کہا، اے عورت! میری بات کا یقین کر کہ وہ وقت آتا ہے کہ تم نہ تو اِس پہاڑ پر باپ کی پرستش کرو گے اور نہ یروشلیم میں۔ تم جسے نہیں جانتے اُس کی پرستش کرتے ہو۔ ہم جسے جانتے ہیں اُس کی پرستش کرتے ہیں کیونکہ نجات یہودیوں میں سے ہے۔ مگر وہ وقت آتا ہے بلکہ اُب ہی ہے کہ سچے پرستار باپ کی پرستش رُوح اور سچائی سے کریں گے کیونکہ باپ اپنے لئے ایسے ہی پرستار ڈھونڈتا ہے۔ خدا رُوح ہے اور ضرور ہے کہ اُس کے پرستار رُوح اور سچائی سے پرستش کریں۔ عورت نے اُس سے کہا، میں جانتی ہوں کہ مسیح جو خرِستُس کہلاتا ہے آنے والا ہے۔ جب وہ آئے گا تو ہمیں سب باتیں بتا دے گا۔ یسوع نے اُس سے کہا، میں جو تجھ سے بول رہا ہوں وہی ہوں۔" (انجیل بمطابق یوحنا 4: 3-26)

یسوع، یہودیہ سے گلیل کی جانب سفر کر رہے تھے۔ آپ کےلئے سفر کا آسان اور مختصر ترین راستہ سامریہ سے تھا جو یہودیہ (جہاں یروشلیم واقع تھا) اور آپ کے علاقے گلیل کے درمیان واقع تھا۔ مسیح نے اِس راستہ پر سفر اِس لئے اختیار کیا کیونکہ آپ کو سامریہ میں سے ہو کر گزرنا ضرور تھا۔ یہودیوں اور سامریوں کے درمیان فطری اور قومی رشتوں کے باعث باہمی نفرت مسلسل بڑھتی ہی رہی تھی۔ رشتہ داروں کے درمیان پائی جانے والی نفرت اکثر انتہائی تلخ ترین نوعیت کی ہوتی ہے۔ یہودی لوگ، سامریوں کو غیرقوم خیال کرتے ہوئے ناپاک تصور کرتے تھے۔ یہودی سوائے کسی سخت مجبوری کے نہ سامریوں کے ساتھ بیٹھتے، نہ گفتگو کرتے اور نہ ہی اُن کے علاقوں سے گزرتے تھے۔ اِن دونوں کے مابین متعدد بار تصادم و شرارت کے باعث توڑ پھوڑ کی نوبت بھی آ چکی تھی اور بالآخر لفظ "سامری" یہودیوں کی نظر میں توہین آمیز بن کر رہ گیا۔ مگر چونکہ یسوع تنگ نظری کے خلاف تھے اِس لئے آپ نے سامریہ سے ہو کر گزرنے کا فیصلہ کیا اور وہ تعصب اور تشدد سے پُر مذہبی جنون کو اپنے شاگردوں کے دِل سے اُکھاڑ پھینکنا چاہتے تھے۔ اِس راہ سے گُزر کر یسوع نے سامریوں کے دِلوں میں رُوحانی بیج بونا چاہا جو اسرائیلیوں کےلئے اجنبی ہو چکے تھے، اور اپنے شاگردوں کو یہ یقین دہانی کرانا چاہتے تھے کہ خدا کی بادشاہی صرف ابراہام کی نسل ہی کےلئے مخصوص نہ تھی۔

کوہِ عیبال اور کوہِ گرزیم کے درمیان، سِکم (نابلس) سے ہو کر گزرنے والی بڑی شاہراہ پر ایک کنواں تھا جو "یعقوب کا کنواں" کہلاتا تھا۔ اِس کنویں پر یسوع کی سامری عورت سے ملاقات ہوئی جس کی وجہ سے یہ بہت مشہور ہوا۔ یسوع سفر سے تھک اِس کنویں پر بیٹھ گئے اور اپنے شاگردوں کو سُوخار شہر میں بھیجا کہ وہ اپنے لئے کھانا خریدتے۔ اِس سے ہم یہ نتیجہ اخذ کرتے ہیں کہ اپنی اور اپنے شاگردوں کی زمینی غریبی کے باوجود بھی جناب مسیح دوسروں کی جانب سے مہمان نوازی کے محتاج نہ تھے، اور زندگی کی بسر اوقات کےلئے کبھی بھی حاجت مند نہ ہوئے تھے۔ لوگوں کی طرف سے ملنے والے نذرانوں کو مسیح اُن کے ذریعے سے خرچ کرتے جو آپ سے محبت کرتے تھے اور آپ کی عزت کرتے تھے، اور ایسی رقم اپنے شاگردوں میں سے ایک کے پاس جمع کرا دیتے تھے۔

اُس موقع پر یسوع تھکاوٹ، بھوک اور پیاس میں سے گزرے، تا کہ آپ انسانی طبیعت کی کمزوریوں کو سمجھتے ہوئے انسانیت کی مصیبتوں میں ہمدردی کا اظہار کر سکتے۔ کوئی یہ سوال کر سکتا ہے کہ "کیوں یسوع نے اپنی اور اپنے شاگردوں کی بھوک مٹانے کےلئے کوئی معجزہ نہ کیا؟" اِس کا جواب یہ ہے کہ قدرتی ذرائع موجود ہونے کی صورت میں معجزہ کی ضرورت نہیں۔ یسوع نے کبھی بھی کوئی معجزہ اپنے ذاتی مفاد کےلئے نہ کیا۔ جب آپ کو بیابان میں بھوک لگی جہاں ابلیس نے آپ کو آزمایا تو وہاں بھوک مٹانے کےلئے فطری ذرائع دستیاب نہ تھے، لیکن پھر بھی یسوع نے اپنی سہولت کی خاطر کوئی معجزہ نہ کیا۔ بلکہ انجیلی کلام کے مطالعہ سے پتا چلتا ہے کہ بعد ازاں فرشتے آ کر آپ کی خدمت کرنے لگے۔

جب یسوع یعقوب کے کنویں پر اپنے شاگردوں کی واپسی کے منتظر تھے تو نزدیکی علاقے سے ایک سامری عورت وہاں پانی بھرنے آئی۔ ممکن ہے وہ عورت اِس کنویں سے پانی اِس لئے بھرنے آئی کہ وہ اِسے متبرک پانی خیال کرتی تھی۔ شاید اُس سے اُس کے آبائی شہر کے لوگ حقارت و نفرت کرتے تھے اور اُس نے اپنے آپ کو اپنے لوگوں سے دُور ہی رکھنا چاہا۔ سامری عورت اُس وقت بہت خفا ہوئی ہو گی جب اُس نے ایک یہودی کو کنویں پر بیٹھے دیکھا ہو گا، خاص کر جب وہ اپنے لباس اور ظاہری وضع سے یہودی مذہب کا اُستاد معلوم ہوتا تھا۔ عام طور پر اِس مرتبہ کے یہودی لوگ پُرجوش طریقہ کے ساتھ سامری لوگوں سے نفرت کرتے تھے۔

مسیح اور سامری عورت کے درمیان بہت سی رکاوٹیں موجود تھیں جو قابلِ توجہ ہیں:

1- پہلی رکاوٹ یہ تھی کہہ یہ عورت سامری تھی اور جناب یسوع ایک یہودی مذہبی اُستاد تھے۔ اِس عورت کی قوم یہودی اور غیراقوام کی مخلوط نسل کے لوگوں پر مشتمل تھی جو مذہبی اعتبار سے یہودیوں کے مخالف تھے، جبکہ یہودی نسلی پاکیزگی کے دعویدار تھے۔ بلاشک و شبہ آج بھی لوگوں میں جو تلخ ترین تنازعے ہیں وہ مذہبی نوعیت ہی کے ہیں۔

مُلکِ بابل کی اسیری سے واپس آنے کے بعد یہودیوں نے ہیکل کی تعمیرنو اور بحالی کے کام میں سامریوں کو شریک ہونے کی اجازت دینے سے انکار کر دیا تھا، اور اُن سے بُری طرح سے پیش آئے تھے۔ انتقاماً سامریوں نے مُردہ آدمیوں کی ہڈیاں ہیکل میں پھینک کر اُس کی بےحرمتی کی جس سے یہودیوں اور سامریوں کے درمیان نفرت کی خلیج مزید وسیع ہو گئی۔ یہودیوں نے یروشلیم کی ہیکل میں سامریوں کا داخلہ ممنوع قرار دے دیا، جس نے سامریوں کو کوہِ گرازیم پر پرستش کےلئے جگہ کا چناﺅ کرنے پر مجبور کیا جس کے بارے میں اُن کا دعویٰ یہ تھا کہ اپنی قدیم تاریخ کی وجہ سے کوہِ گرازیم، یروشلیم سے زیادہ مُقدّس جگہ تھی۔ اُن کا یہ بھی دعویٰ تھا کہ ابرہام نبی اپنے بیٹے اضحاق کو خدا کے حضور قربان کرنے کےلئے کوہِ گرازیم ہی کے مقام پر لے کر آئے تھے۔

2- اِس سامری عورت کے سامنے دوسری مشکل یہ تھی کہ ایک عورت ہوتے ہوئے وہ اِس بات سے بخوبی واقف تھی کہ یہودی مرد خصوصاً مذہبی اُستاد عوام الناس کے سامنے عورتوں سے گفتگو کرنے یا اُن کے ہمراہ ہونے سے کتنا زیادہ پرہیز کرتے تھے، خواہ وہ خاتون اُن کی زوجہ یا بہن ہی کیوں نہ ہو۔ یہاں تک کہ اُن کی دعاﺅں میں ایک دُعا ایسی بھی تھی جس میں یہودی مرد خدا کا شکر ادا کرتا تھا کہ اُسے مرد پیدا کیا گیا ہے نہ کہ عورت۔ اِس روشنی میں یہودیوں کی کسی سامری عورت کےلئے حقارت کتنی زیادہ ہو سکتی تھی!

3- تیسری رکاوٹ یہ تھی کہ وہ گناہ میں گِری ہوئی عورت تھی۔ بھلا کیسے کوئی چیز یا شخص، ایک واجب التعظیم یہودی اُستاد اور غلط کاری میں گِری ہوئی بدحال عورت کو جس نے اپنی تمام زندگی گناہ میں بسر کی تھی اور اُس وقت بھی گناہ کی غلام تھی، دونوں کو ایک یکساں مقام پر لا سکتا تھا؟

اِن تین رکاوٹوں کے سبب ہم یہ کہنے میں حق بجانب ہیں کہ اِس سامری عورت کو اُس وقت بڑی تشویش کا سامنا ہوا ہو گا جب وہ لمبا فاصلہ طے کر کے آئی اور اُس نے یسوع کو کنویں پر بیٹھے ہوئے دیکھا۔ اِس عورت کو یقیناً توقع نہ تھی کہ یسوع اُس سے گفتگو کرے گا، اور نہ ہی وہ آپ سے بات چیت کرنا چاہتی تھی۔ لیکن یسوع نے جیسے یہودیوں کی فکر کی اور اُن سے محبت رکھی ویسے ہی آپ نے اِس سامری عورت کی بھی فکر کی، کیونکہ آپ سب کے خالق، نجات دہندہ اور منصف ہیں۔ یسوع سب کو ایک ہی نظر سے دیکھتے ہیں کیونکہ آپ سب کو نجات دے کر ابدی ہلاکت سے بچانا چاہتے ہیں۔ آپ نے عورتوں کو کمتر جاننے اور اُن کی اہانت کرنے کے نکتہ نظر کی طرفداری نہ کی بلکہ خواتین کو نہایت عزت و قدر بخشی۔ مذہب کی رُوح کو دِلی ایمان، ذہن میں قانون کی حکمرانی اور چال چلن میں اعلیٰ مرتبت و عظمت کی ضرورت ہے۔

یسوع تمام انسانیت، بشمول مرد و زن سب کےلئے نجات کے خواہاں ہیں۔ یہی وجہ تھی کہ آپ اِس سامری عورت کو نظرانداز نہیں کر سکتے تھے۔ اپنے وقت کے بہت سے تارک الدنیا لوگوں کے برعکس مسیح نے خواتین کو اجازت دی کہ وہ آپ کی پیروی کریں، آپ کی تعظیم کریں، اور اپنے وسائل سے مسیح کی خدمت میں اپنا حصہ ڈالیں۔ سامری عورت کے ساتھ اپنی ملاقات میں یسوع نے اِس بات کا عظیم ثبوت مہیا کیا کہ آپ خواتین کی رُوحانی تبدیلی بھی چاہتے تھے۔ گرچہ شیطان نے انسانی تاریخ کے آغاز پر ہی حوا کو گناہ میں گرایا، مگر یسوع نے حوا کی بیٹیوں کو اپنی زمینی خدمت کی ابتدا ہی میں فضیلت عطا کرتے ہوئے اُن کی اصلاح کی۔ مسیحیت کے ممتائز پہلوﺅں میں سے ایک یہ ہے کہ یہ خواتین کو معاشرتی، اخلاقی اور رُوحانی طور پر بلند مرتبہ بخشتی ہے۔ کنواری مریم کے بطن سے پیدا ہو کر یسوع نے باغِ عدن میں حوا کے گناہ میں گرنے کے باعث نسوانی جنس سے منسلک شدہ ندامت کو مٹا ڈالا۔ آپ نے اپنی خدمت کے برسوں کے دوران، اور اپنی مصلوبیت اور جی اُٹھنے کے موقع پر مذہبی جوش اور نجات دہندہ کے ساتھ اپنی وفاداری میں بیشتر آدمیوں پر سبقت لے جانے والی عورتوں کو عزت و وقار بخشا۔

سامری عورت ایک گنہگار عورت تھی۔ مگر یسوع کیونکر ایسی عورت کو توجہ دیتے ہوئے اُس کے ساتھ بیٹھنے اور بات چیت کرنے پر آمادہ ہوئے؟ پولس رسول نے بھی پوچھا ہے: "... کیونکہ راستبازی اور بےدینی میں کیا میل جول؟ یا روشنی اور تاریکی میں کیا شراکت؟" (نیا عہدنامہ، 2- کرنتھیوں 6: 14)۔ مگر ہم یسوع کے اصول کو سمجھتے ہیں جنہوں نے فرمایا کہ "ابنِ آدم کھوئے ہوﺅں کو ڈھونڈنے اور اُنہیں نجات دینے آیا ہے" (انجیل بمطابق لوقا 19: 10)۔ آپ نے متی محصول لینے والے کے گھر میں یوں فرمایا "میں راستبازوں کو نہیں بلکہ گنہگاروں کو توبہ کےلئے بلانے آیا ہوں" (انجیل بمطابق لوقا 5: 32)۔ ایک شخص طبیب کے پاس صحتمند ہونے کی وجہ سے نہیں بلکہ اپنی بیماری کی ہاتھوں تکلیف اُٹھا کر جاتا ہے۔ طبیب کی توجہ صحتمندوں پر نہیں بلکہ بیماروں پر ہوتی ہے، اور انتہائی سخت بیمار افراد پر تو طبیب اَور زیادہ توجہ دیتا ہے۔

یسوع نے اپنی خدمت کے آغاز میں بنیادی طور پر جوان افراد، غُربا اور سادہ مزاج لوگوں کو توجہ دی، یسوع کے بلائے ہوئے شاگردوں میں سے زیادہ تر اِنہی لوگوں پر مشتمل تھے۔ اِس کے بعد یسوع نے اپنی توجہ ایک بوڑھے، دولتمند اور دیندار مذہبی عالم نِیکُدِیمُس کی نجات کی جانب فرمائی۔ یہ سب لوگ یہودی نسل سے تھے۔ اِس کے بعد یسوع اَب خواتین، دُھتکارے ہوئے افراد اور غیر یہودی لوگوں کی طرف اپنی بڑی فکر کے ساتھ متوجہ ہونا چاہتے تھے۔ سامری عورت سے گفتگو کرتے ہوئے یسوع نے گناہ کی گہرائی میں غرق ہو جانے کے باوجود غیرفانی انسانی رُوح کےلئے قدر و منزلت کا اظہار کیا۔ آپ نے اِس بات کا عملی مظاہرہ کیا کہ آپ بدحال اور بدترین گناہگاروں کو بھی نجات دینے پر قادر ہیں۔

یسوع معاشرتی پابندیوں کو نظرانداز کرتے ہوئے سامری عورت سے مخاطب ہوئے، اور اُس سے پینے کےلئے پانی مانگا۔ یسوع کا بنیادی مقصد محض اپنی پیاس بجھانا تو نہ تھا بلکہ آپ کا دِلی اشتیاق یہ تھا کہ اُس عورت کی گمراہی کی شکار تباہ حال رُوح کو بچایا جا سکے۔ یہ اِس عظیم یہودی ربّی (مسیحا) کی انتہائی حلیمی کی معراج تھی کہ اُس نے اِس سامری عورت کو یہ اجازت دے کر اُسے عزت بخشی کہ وہ اپنے پاس دستیاب شدہ پانی سے مسیح کی ضرورت کو پورا کر سکتی۔ ایسا کر کے مسیح نے رُوحیں جیتنے کےلئے ہمیں ایک نمونہ عطا کیا ہے۔ ایک عورت کے جواب میں جس شائستگی کی توقع کی جا سکتی ہے، وہ سامری عورت کے جواب میں مفقود تھی۔ اُس نے جواب میں مسیح سے کہا "تُو یہودی ہو کر مجھ سامری عورت سے پانی کیوں مانگتا ہے؟" تب یسوع نے اپنا لہجہ تبدیل کیا تا کہ وہ عورت پہچان سکتی کہ جو اُس سے گفتگو کر رہا تھا وہ حقیقت میں کون تھا۔ یسوع کسی بات میں اِس عورت کے محتاج نہ تھے، مگر اِس عورت کو یسوع کی ضرورت تھی کیونکہ اگر وہ مسیح سے مانگتی تو آپ اُسے خدا کی بخشش عطا فرما سکتے تھے۔ یہ بخشش زندگی کے پانی کی مانند تھی۔ جب سامری عورت نے اِس بارے میں اپنی حیرانی و ناسمجھی ظاہر کی تو یسوع نے فرمایا کہ جو پانی وہ دیتا ہے اُس پانی سے مختلف ہے جسے بھرنے کےلئے وہ یعقوب کے کنوئیں پر آئی تھی۔ زندگی کا پانی پیاسے کی ابدی پیاس بجھاتا ہے اور پینے والے کے اندر ایک چشمہ بن جاتا ہے جو ہمیشہ کی زندگی کےلئے جاری رہتا ہے۔ اِس تمام گفتگو کے نتیجے میں سامری عورت نے یسوع سے، جنہوں نے پہلے اُس سے پانی مانگا تھا، یہ درخواست کی کہ "اے خداوند! وہ پانی مجھ کو دے تا کہ میں نہ پیاسی ہوں اور نہ پانی بھرنے کو یہاں تک آﺅں۔"

گناہوں سے نجات پانے کےلئے شرطِ اوّل ضمیر کا بیدار ہونا ہے، تا کہ گناہگار کو نجات دہندہ کی ضرورت محسوس ہو، اور وہ حقیقی توبہ کی طرف آ سکے۔ اِسی لئے طبیب اعظم مسیح اِس عورت کو شفا دینے سے پہلے چرکا لگاتے ہیں، اور اِس سے اِس جرّاح کی ہنرمندی عیاں ہوتی ہے۔ جس بیماری کا شکار ہو کر وہ عذاب میں تھی یسوع نے اُسے اُس بیماری سے پاک صاف کر دیا۔ یسوع نے اُس عورت سے کہا کہ جا اپنے شوہر کو بُلا لا۔ جب اُس نے اقرار کرتے ہوئے جواب دیا کہ میں تو بےشوہر ہوں، تو تب یسوع نے اُس پر انکشاف کیا کہ آپ کو اُس کے شرمناک ماضی کا علم تھا اور اُس کی موجودہ بدنصیب و خستہ حالت کا بھی جس میں وہ رہ رہی تھی۔ یسوع نے اُس پر شفقت و مہربانی اِس لئے نہیں کی تھی کہ آپ اُس کی بدچلن حالت سے واقف نہ تھے۔ اِس میں ہمیں رُوحوں کو یسوع کی جانب مائل کرنے کی اچھی مثال ملتی ہے۔ ہم لوگوں کی خامیوں پر تُند و تیز حملے کر کے رُوحوں کو ہر وقت مسیح کےلئے نہیں جیت سکتے۔ لیکن انسانوں کی جانوں کا دُشمن شیطان ہمیشہ چوکنا رہتا ہے۔ جب شیطان نے سامری عورت کو مسیحا کی جانب متوجہ ہوتے ہوئے دیکھا تو اُس نے اپنا ایک پسندیدہ حربہ اختیار کرتے ہوئے اُس عورت کی توجہ یہودیوں اور سامریوں کے درمیان عبادت و پرستش کی دُرست جگہ والی فرقہ وارانہ تکرار کی طرف لگانا چاہی۔ شیطان اُسے ایک ایسی بحث کی طرف لے گیا جو آج بھی لاکھوں کروڑوں مذہبی لوگوں کو گمراہ کر نے والا یہ اعتقاد ہے کہ مذہب ایک ایسی چیز ہے جو ایک فرد اپنے والدین سے میراث میں پاتا ہے۔ یوں بہت سے لوگ اپنے آباﺅ اجداد کے نقشِ قدم کی پیروی کرنے میں مطمئن ہیں۔ تاہم، اِس سامری عورت کے ضمیر کی بیداری کے سبب اُس میں سچا ایمان پیدا ہو چکا تھا۔ اُسے اِس یہودی اجنبی شخص میں ایک نبی نظر آیا کیونکہ یسوع سے مخاطب ہو کر اُس نے کہا "اے خداوند! مجھے معلوم ہوتا ہے کہ تُو نبی ہے۔" یوں اُس سامری عورت نے مذہب کی بابت سچائی کے مکاشفہ کو جاننے کےلئے مسیح کے سامنے اپنے نئے ایمانی دروازہ کو کھول دیا۔

کنوئیں کے پاس اِس خطبہ گاہ سے مسیح نے ایک گنہگار سامری عورت پر مشتمل اپنی واحد سامع کے سامنے ایک انتہائی اہم وعظ پیش کیا۔ ماہر اُستاد کی طرف سے دیا جانے والا یہ ایک انتہائی جامع پیغام تھا۔ اِس میں یسوع نے اعلان کیا کہ قدوسیت ہاتھ کے بنائے ہوئے مقدِسوں یا تقدیس شدہ ظروف میں قیام پذیر نہیں ہوتی بلکہ دِلوں میں سکونت کرتی ہے۔ یسوع کی آمد نے اُس دور کا خاتمہ کر دیا جس میں خدا کی پرستش صرف مخصوص مقامات میں کی جاتی تھی جہاں لوگ اپنی قربانیاں پیش کرنے جاتے تھے۔ غیراقوام کے جھوٹے خدا دیوتا اور بت کی شکل میں خصوصی عبادت گاہوں میں نصب کئے جاتے ہیں مگر واحد برحق خدا رُوح ہے، اور وہ اُن سب کو قبول کرتا ہے جو رُوح اور سچائی سے اُس کی پرستش کرتے ہیں، خواہ پرستش کا یہ مقام کہیں بھی کیوں نہ ہو۔ وہ رُوح اور سچائی سے پرستش کرنے والے سچے پرستاروں کے علاوہ کسی اَور کو قبول نہیں کرتا خواہ لوگ کتنے ہی مُقدّس مقامات پر سرنگوں ہوتے ہوں۔ ملاکی نبی نے جس زمانہ کی بابت پیشینگوئی کی تھی وہ آ پہنچا تھا: "آفتاب کے طلوع سے غروب تک قوموں میں میرے نام کی تمجید ہو گی۔ اور ہر جگہ میرے نام پر بخور جلائیں گے اور پاک ہدئے گزارنیں گے۔ کیونکہ قوموں میں میرے نام کی تمجید ہو گی، ربُّ الافواج فرماتا ہے" (پرانا عہدنامہ، ملاکی 1: 11)۔

تاہم، یہ سچائی عبادت و پرستش کےلئے مخصوص مقامات کی تقدیس اور اُن کی جملہ تعظیم و احترام کو قطعاً خارج از عمل نہیں کرتی۔ عبادت گاہوں کو متبرک جاننا ایک مقبول مذہبی رسم ہو سکتی ہے، لیکن ایسے مقامات سے قدوسیت کو منسلک کرنے میں ہمیں انتہاپسند نہیں ہونا چاہئے۔ ہمیں یہ نہیں سوچنا چاہئے کہ مُقدّسین کے تبرکات یا کلیسیائی سیکرامنٹوں کے اجزا سے یا کسی خاص شخص یا عبادت گاہ کو چھو لینے سے ہم برکت پاتے ہیں۔

جب یسوع نے یروشلیم کو ایک مُقدّس مقام کی جگہ نہ دی تو مسیح کا کہنے کا مطلب یہ تھا کہ چونکہ خدا رُوح ہے لہٰذا اُس کی پرستش کسی بھی جگہ پر ہو سکتی ہے اور عبادت و پرستش رُوح کے ساتھ کی جانی چاہئے جو ظاہری رسوم پر مبنی نہ ہو۔ ہمیں خدا تعالیٰ کی پرستش اپنے دِل کی گہرائیوں سے کرنی چاہئے۔ یسوع نے سامری عورت پر واضح کیا کہ خدا کی جانب سے قبولیت کا دروازہ یروشلیم کی ہیکل سے خارج شدہ غیراقوام اور اُن سب کےلئے کُھلا ہے جو رُوح اور سچائی سے خدا کی پرستش کرتے ہیں۔ خدا اُن لوگوں کو بھی قبول کرتا ہے جن کی ماضی کی زندگی گناہ کے باعث شرم سے جُھکی ہے۔ سامری عورت کے دِل کی تبدیلی نے اُسے اپنے پورے دِل اور جان سے آمدِ مسیحا کا خیرمقدم کرنے کے قابل بنایا، جو انسانیت کو رُوحانی و دینی معاملات میں خدا کی تمام توقعات کے بارے میں خبر دیتے ہیں۔ جب اُس عورت نے نور ِحق کےلئے اپنے دِل کو کھولا تو خدا نے اُسی وقت اُسے نور سے مزید مُنوّر کیا۔ جو باتیں یسوع نے ابھی یہودی سرداروں، وفادار نِیکُدِیمُس اور اپنے دوستوں یعنی شاگردوں پر بھی ظاہر نہیں کی تھیں، اُنہیں اُس سامری عورت پر ظاہر کر کے آپ نے اُس کی عزت و حوصلہ افزائی کی۔ مسیح نے اُس عورت سے کہا "میں جو تجھ سے بول رہا ہوں، وہی ہوں۔" اُس وقت تک یسوع نے کسی کو بھی نہیں بتایا تھا کہ وہی مسیح تھا، لیکن آپ نے یہ سچائی سامری عورت پر ظاہر کی کیونکہ اُس نے یسوع کے نبی ہونے کا اقرار کیا تھا۔

"اتنے میں اُس کے شاگرد آ گئے اورتعجب کرنے لگے کہ وہ عورت سے باتیں کر رہا ہے تو بھی کسی نے نہ کہا کہ تُو کیا چاہتا ہے؟ یا اُس سے کس لئے باتیں کرتا ہے؟ پس عورت اپنا گھڑا چھوڑ کر شہر میں چلی گئی اور لوگوں سے کہنے لگی، آﺅ! ایک آدمی کو دیکھو، جس نے میرے سب کام مجھے بتا دیئے۔ کیا ممکن ہے کہ مسیح یہی ہے؟ وہ شہر سے نکل کر اُس کے پاس آنے لگے۔ اتنے میں اُس کے شاگرد اُس سے یہ درخواست کرنے لگے کہ اے ربّی! کچھ کھا لے۔ لیکن اُس نے اُن سے کہا، میرے پاس کھانے کےلئے ایسا کھانا ہے جسے تم نہیں جانتے۔ پس شاگردوں نے آپس میں کہا، کیا کوئی اُس کےلئے کھانے کو کچھ لایا ہے؟ یسوع نے اُن سے کہا، میرا کھانا یہ ہے کہ اپنے بھیجنے والے کی مرضی کے موافق عمل کروں اور اُس کا کام پورا کروں۔ کیا تم کہتے نہیں کہ فصل کے آنے میں ابھی چار مہینے باقی ہیں؟ دیکھو! میں تم سے کہتا ہوں، اپنی آنکھیں اُٹھا کر کھیتوں پر نظر کرو کہ فصل پک گئی ہے اور کاٹنے والا مزدوری پاتا اور ہمیشہ کی زندگی کےلئے پھل جمع کرتا ہے تا کہ بونے والا اور کاٹنے والا دونوں مل کر خوشی کریں۔ کیونکہ اِس پر یہ مثل ٹھیک آتی ہے کہ بونے والا اَور ہے اور کاٹنے والا اَور۔ میں نے تمہیں وہ کھیت کاٹنے کےلئے بھیجا، جس پر تم نے محنت نہیں کی۔ اَوروں نے محنت کی اور تم اُن کی محنت کے پھل میں شریک ہوئے۔ اور اُس شہر کے بہت سے سامری اُس عورت کے کہنے سے جس نے گواہی دی کہ اُس نے میرے سب کام مجھے بتا دیئے، اُس پر ایمان لائے۔ پس جب وہ سامری اُس کے پاس آئے تو اُس سے درخواست کرنے لگے کہ ہمارے پاس رہ چنانچہ وہ دو روز وہاں رہا۔ اور اُس کے کلام کے سبب سے اَور بھی بہتیرے ایمان لائے۔ اور اُس عورت سے کہا، اَب ہم تیرے کہنے ہی سے ایمان نہیں لاتے کیونکہ ہم نے خود سُن لیا اور جانتے ہیں کہ یہ فی الحقیقت دُنیا کا منجی ہے۔" (انجیل بمطابق یوحنا 4: 27-42)

مسیح اور سامری عورت کے درمیان گفتگو کے وقت کوئی بھی شاگرد موجود نہیں تھا۔ بلاشبہ مسیح کے عزیز شاگرد یوحنا نے اِس بارے میں مسیح سے یا اُس عورت سے تمام باتوں کو سُنا ہو گا۔ اُس کے بیان کے مطابق جب وہ اور اُس کے ساتھی شاگرد سوخار سے کھانا مول لے کر واپس آئے تو وہ نہایت متعجب ہوئے۔ اُن کی حیرانی کی وجہ یہ تھی کہ اُنہوں نے اپنے اُستاد کو ایک اجنبی سامری عورت سے محو ِگفتگو دیکھا۔ اُنہوں نے سامری عورت کے جوش اور جذبے کو بھی بغور دیکھا کہ جب وہ اپنا پانی کا گھڑا چھوڑ کر اپنے قصبہ کو نہایت تیزی سے گئی۔ شاگردوں کا متعجب ہونا حیرانی کی بات نہیں، اور حالات کا اندازہ کرتے ہوئے اپنے موزوں اور پُراَدب رویہ کے سبب وہ تعریف کے مستحق ہیں۔ شاگردوں میں سے کسی نے بھی مسیح سے یہ پوچھنے کی جرأت نہ کی کہ سامری عورت کیا چاہتی تھی یا وہ کیوں سامری عورت سے بات چیت کر رہا تھا۔ جب شاگردوں نے کھانے کا انتظام کر دیا تو اُن کی توقع کے برعکس مسیح نے کھانا نہ کھایا۔ تب اُنہوں نے کہا "اے ربّی! کچھ کھا لے۔" پہلے وہ سامری عورت کے ساتھ مسیح کی گفتگو پر حیران تھے اور اَب وہ مسیح کے کھانا نہ کھانے پر تعجب کر رہے تھے۔ اور اُن کی حیرت میں اُس وقت اَور بھی اضافہ ہوا، جب مسیح نے جواب دیا "میرے پاس کھانے کےلئے ایسا کھانا ہے جسے تم نہیں جانتے۔"

نِیکُدِیمُس سے یسوع نے ہمیشہ کی زندگی پانے کےلئے نئے سرے سے پیدا ہونے کے بارے میں گفتگو کی، لیکن وہ یسوع کی بات کا مطلب سمجھ نہ سکا۔ سامری عورت سے یسوع نے زندگی کے پانی کے بارے میں بات کی، مگر وہ بھی اُسے سمجھنے سے قاصر رہی۔ مسیح نے شاگردوں سے اپنی خوراک کے بارے میں بات کی جس کی بابت اُنہیں کوئی علم نہ تھا۔ اور وہ بھی مسیح کے کلام کو نہ سمجھے اور ایک دوسرے سے دریافت کرنے لگے کہ "کیا کوئی اِس کےلئے کھانے کو کچھ لایا ہے؟" مگر یسوع نے جلد ہی اُن کے شکوک دُور کرتے ہوئے واضح کیا کہ آپ کا کھانا آسمانی باپ کی مرضی کے مطابق اُس کام کو پورا کرنا تھا جس کےلئے آپ کو بھیجا گیا تھا۔

سامری عورت مسیحا سے ملاقات کر کے، آپ کا پیغام سُن کر اور آپ پر ایمان لا کر اِس قدر خوش ہوئی کہ اُس نے کنوئیں کے پاس اپنے گھڑے کو چھوڑا، اور اپنے شہر سوخار کو گئی اور وہاں کے باشندوں کو مسیح کی بابت خوشخبری دی۔ مگر ایک بُری عورت کی طرف سے دیئے گئے پیغام کو کس نے سُننا چاہا ہو گا؟ ممکن ہے، سُوخار کے رہنے والوں نے آپس میں اِس طرح کا سوال کیا ہو کہ "کیا آنے والا مسیحا اِس جیسی عورت پر اپنے آپ کو پہلے ظاہر کرے گا؟" انجیلی بیان کی روشنی میں یہ بات واضح ہے کہ اِس عورت کا پیغام متاثرکُن تھا۔ یوں لگتا ہے کہ مسیح سے ملاقات کے بعد جب اِس عورت کا دِل بدل گیا تو اِس کا اثر اُس کے چہرے کی صورت، اُس کی حرکات و سکنات اور آواز کے لہجہ سے صاف عیاں تھا۔ جب اُس نے سُوخار شہر کے لوگوں سے کہا کہ "آﺅ، ایک آدمی کو دیکھو! جس نے میرے سب کام مجھے بتا دیئے۔ کیا ممکن ہے کہ مسیح یہی ہو؟" تو اُنہوں نے اُس کے پیغام کا یقین کیا۔ وہ چاہتی تھی کہ اُس کے شہر کے لوگ خود آ کر دیکھتے اور یسوع کی باتیں سُنتے تا کہ وہ مسیح کی بابت خود کوئی فیصلہ کر سکتے۔

سامری عورت نے گواہی دی اور اُس کے نتیجہ کو سُننے والوں کے ضمیر و دِل پر چھوڑ دیا۔ اپنے اِس عمل میں اُس نے ہمارے لئے دوسروں کو خوشخبری دینے کا ایک بہترین نمونہ چھوڑا ہے۔ موثر بشارت کی قوت اِطلاع دینے میں نہیں بلکہ اچھی گواہی میں پائی جاتی ہے۔ روحوں کو جیتنے والا ایک ہوشیار گواہ وہی کہتا ہے جو زبور نویس نے کہا کہ "آزما کہ دیکھو کہ خداوند کیسا مہربان ہے" (زبور 34: 8)۔

مُردوں میں سے زندہ ہو کر آسمان پر اُٹھائے جانے سے پیشتر یسوع نے اپنے الوداعیہ خطاب میں شاگردوں کو حکم کے طور پر زمین کی انتہا تک گواہی دینے کا بنیادی فریضہ سونپا (نیا عہدنامہ، اعمال 1: 8)۔ اور اِس کے بعد جو حیران کن نتائج سامنے آئے، وہ شاگردوں کی جانب سے مسیح کے تمام احکام کی کامل فرمانبرداری کرنے اور لوگوں کی شاگردوں کے کلام کی طرف توجہ دینے کی وجہ سے تھے۔ ایک ذہین سامع پیش کی جانے والی گواہی میں سے اہم نصیحت آموز باتوں کے جوہر کو پا سکتا ہے۔ مگر ایسی نصیحت جس کو گواہی یا تجربہ کی تائید حاصل نہ ہو کمزور ہوتی ہے۔ یسوع کی جانب سے آب ِحیات پا کر سامری عورت یعقوب کے کنوئیں کے ظاہری تقدّس کو بھول گئی، اور یہ ابدی زندگی کا پانی دوسروں کو ہمیشہ کی زندگی دینے کےلئے اُس میں ایک چشمہ کی صورت اختیار کر گیا۔

مسیح کی بابت سامری عورت کی باتوں نے سُوخار کے لوگوں کے دِلوں میں شہر چھوڑ کر یسوع کے پاس آنے کی تحریک پیدا کی۔ جب یسوع نے دُور سے لوگوں کو آتے دیکھا تو اپنے شاگردوں سے تمثیل میں کہا "کیا تم کہتے نہیں کہ فصل کے آنے میں ابھی چار مہینے باقی ہیں؟ دیکھو میں تم سے کہتا ہوں اپنی آنکھیں اُٹھا کر کھیتوں پر نظر کرو کہ فصل پک گئی ہے۔" نجات کی خوشخبری کو قبول کرنے کےلئے مسیح کے پاس آنے والے سامری لوگ پکی ہوئی فصل کی مانند تھے۔ اُن سامری لوگوں کو دیکھ کر مسیح کو نہایت خوشی ہوئی کیونکہ آپ اُن لوگوں کو پہلے پھل کی طرح دیکھ رہے تھے جو غیرقوموں میں سے بڑی فصل کی مانند تھے۔ یہ سامری لوگ مسیح کے پاس اِس لئے نہیں آئے تھے کہ اُنہوں نے مسیح کے کسی شفا بخش معجزے کو دیکھا تھا، اور نہ یہ کسی قسم کے دُنیاوی مفاد کی خاطر اُس کے پاس آئے تھے۔ اُن کے آنے کا اوّلین مقصد یسوع سے ملاقات کرنا اور آپ کی تعلیم کو سُننا تھا۔ یہ سامری لوگ مسیح کی اُس محنت کی فصل تھے جس کے باعث آپ ایک گناہگار عورت کو توبہ اور سچے ایمان کے ذریعہ ابدی نجات کی راہ پر لائے۔

اِس عورت کی گواہی کے سبب اُس شہر کے بہتیرے سامری لوگ یسوع پر ایمان لائے۔ پھر بہت سے اَور لوگ مسیح سے ملاقات کرنے اور اُن کا کلام سُننے کے بعد اُن پر ایمان لائے۔ اُنہوں نے یسوع سے عرض کی کہ وہ کچھ دِن اُن کے ساتھ قیام کرے۔ یہ یسعیاہ نبی کی اُس نبوت کی تکمیل تھی جہاں لکھا ہے کہ "جو میرے طالب نہ تھے میں اُن کی طرف متوجہ ہوا۔ جنہوں نے مجھے ڈھونڈا نہ تھا مجھے پا لیا۔ میں نے ایک قوم سے جو میرے نام سے نہیں کہلاتی تھی فرمایا دیکھ میں حاضر ہوں" (یسعیاہ 65: 1)۔ یسوع نے اپنی قوم کی روایت کے برعکس کیا۔ آپ چاہتے تھے کہ آپ کے شاگرد بھی آپ کے نقشِ قدم پر چلتے۔ آپ نے سامریوں کے اُس شہر میں دو دِن قیام کیا۔ یہ فصل اُس بڑی فصل کی ابتدا تھی جو مستقبل میں یسوع کے آسمان پر صعود کر جانے کے بعد آپ کے شاگردوں کے زمانے میں حاصل ہونے والی تھی۔

یسوع کی بابت اِن سامریوں کی گواہی کتنی عظیم تھی! اُنہوں نے اِس حقیقت کا اعتراف کیا کہ وہ فی الحقیقت دُنیا کا نجات دہندہ تھا۔ اُنہوں نے یسوع میں بنی نوع انسان کےلئے نجات کی واحد اُمید دیکھی۔ یعقوب کے اِس کنویں پر اُس انسانی بدن کو آرام ملا جس میں پاک تثلیث کا دوسرا اقنوم ابدی بیٹا جو "باپ کی گود میں ہے" سکونت پذیر تھا (دیکھئے انجیل بمطابق یوحنا 1: 18)۔ ہلاکت کے موڑ پر کھڑی اِس سامری عورت کےلئے یہ کتنا شیریں موقع تھا کہ موت کی بجائے اُسے آب ِحیات نصیب ہو گیا۔ یہ عورت اپنی جسمانی پیاس بجھانا چاہتی تھی، مگر مسیحا نے جس سے اُس کی ملاقات کنویں کے پاس ہوئی، اُسے ہمیشہ کی زندگی بخشی اور آب ِحیات کا چشمہ اُس میں جاری کر دیا۔

یسوع نے گلیل میں اپنی خدمت کی ابتدا معجزات وقوع میں لاتے ہوئے نہ کی، بلکہ آپ نے یہودی عبادتخانہ میں خدا کی بادشاہی کی خوشخبری کی منادی سے ایسا کیا۔ یسوع کی منادی لوگوں کو ملامت کرنے یا خوفزدہ کرنے کی نہیں تھی، بلکہ یہ پُرمحبت نجات دہندہ کا کلام تھی جو آسمان سے گنہگاروں کےلئے خدا کی محبت کا اعلان کرنے کےلئے زمین پر ظاہر ہوا۔ یسوع اِس دُنیا میں راستبازی، سلامتی اور خوشی کی بادشاہی قائم کرنے کو آئے۔ یہ جانتے ہوئے بھی کہ یسوع حلیم و غریب تھا، جس کسی نے بھی مسیح کے کلام کو سُنا آپ کی تعریف و ستایش کی۔ یسوع نے اعلانیہ کہا کہ "وقت پورا ہو گیا ہے اور خدا کی بادشاہی نزدیک آ گئی ہے۔ توبہ کرو اور خوشخبری پر ایمان لاﺅ" (انجیل بمطابق مرقس 1: 15)۔ ایسا کہہ کر مسیح توریت، زبور اور صحائف انبیا کی نبوتوں کی طرف اشارہ کر رہے تھے۔ اِس وقت پورا ہونے کے بارے میں پولس رسول نے کہا "جب وقت پورا ہو گیا تو خدا نے اپنے بیٹے کو بھیجا، جو عورت سے پیدا ہوا اور شریعت کے ماتحت پیدا ہوا" (دیکھئے نیا عہدنامہ، گلتیوں 4: 4)۔ یسوع کی منادی، یوحنا اصطباغی کی بشارتی مہم سے کامل طور پر ہم آہنگ تھی جس نے کہا تھا "توبہ کرو کیونکہ آسمان کی بادشاہی نزدیک آ گئی ہے" (انجیل بمطابق متی 3: 2)۔

"اور گلیل کی جھیل کے کنارے کنارے جاتے ہوئے اُس نے شمعون اور شمعون کے بھائی اندریاس کو جھیل میں جال ڈالتے دیکھا کیونکہ وہ ماہی گیر تھے۔ اور یسوع نے اُن سے کہا، میرے پیچھے چلے آﺅ تو میں تم کو آدم گیر بناﺅں گا۔ وہ فی الفور جال چھوڑ کر اُس کے پیچھے ہو لئے۔ اور تھوڑی دُور بڑھ کر اُس نے زبدی کے بیٹے یعقوب اور اُس کے بھائی یوحنا کو کشتی پر جالوں کی مرمت کرتے دیکھا۔ اُس نے فی الفور اُن کو بلایا اور وہ اپنے باپ زبدی کو کشتی پر مزدوروں کے ساتھ چھوڑ کر اُس کے پیچھے ہو لئے۔" (انجیل بمطابق مرقس 1: 16-20)

یسوع نے اپنے پہلے چار شاگردوں کو گلیل کی جھیل کے پاس جو تبریاس کی جھیل بھی کہلاتی تھی اپنی پیروی کرنے کےلئے بُلایا۔ وہ چار شاگرد اندریاس اور اُ س کا بھائی شمعون پطرس، یعقوب اور اُس کا بھائی یوحنا تھے۔

یہ چاروں ماہی گیر تھے اور جھیل کے کناروں سے یا کشتیوں کے ذریعے سے مچھلیوں کا شکار کیا کرتے تھے۔ یعقوب اور یوحنا کو مسیح نے اُس وقت بلایا جب وہ اپنے باپ زبدی کے ساتھ جالوں کی مرمت کر رہے تھے۔ یسوع نے سب سے پہلے پطرس اور اندریاس کو ایک اَور اہم کام، آدم گیر ہونے کےلئے بلایا۔

اِن شاگردوں کو انجیل کا رُوحانی جال ڈالنا تھا تا کہ ہلاکت کے سمندر میں برباد ہونے والی جانیں بچانے کےلئے اُنہیں سلامتی کے ساحل پر لایا جا سکتا۔ بعد ازاں، مسیح نے اِسی طرح دو اَور لوگوں کو بلایا۔ مسیح کی دعوت کو قبول کرتے ہوئے یہ چاروں افراد فوراً آپ کے پیچھے ہو لئے۔

مسیح کے پیچھے چلنے کےلئے اِن افراد نے اپنے والدین، نوکروں، کشتیوں، جالوں اور اپنے کام غرض سب کچھ چھوڑ دیا۔ اِس سے پہلے وہ رُوح اور ایمان میں مسیح کی پیروی کرتے ہوئے متعدد بار سفر میں آپ کے ہمراہ رہے تھے، مگر اَب سے اُنہیں متواتر مسیح کے ساتھ رہنا تھا۔ مسیح نے شاگردوں کو یہودیہ اور سامریہ میں آدم گیری کےلئے مثال دی، لیکن اَب آپ نے اُن سے چاہا کہ وہ اپنا روزمرہ کا کام چھوڑ کر اپنی نئی خدمت کےلئے مزید تربیت اور راہنمائی حاصل کریں۔

زبدی کے بیٹوں نے اپنے والد کو کشتی ہی میں چھوڑا، اور مسیح کے پیچھے ہو لئے۔ اپنے آقا یسوع کی پیروی کرنے والوں میں یہ سب سے پہلے افراد تھے جنہوں نے ضروری ہونے پر اپنے عزیز و اقارب کو چھوڑا۔

کسی بھی شخص کو مذہبی یا اخلاقی طور پر یہ حق نہیں پہنچتا کہ وہ لوگوں کو کہے کہ وہ اُسے اپنے عزیز و اقارب پر فوقیت دیں، مگر چونکہ یسوع محض ایک انسان نہیں بلکہ اِس سے بڑھ کر تھے اِس لئے آپ کو یہ حق حاصل تھا کہ اپنے شاگردوں سے مطالبہ کرتے کہ آپ کے پیروکار آپ کو اپنی زندگیوں میں اوّل ترین مقام دیتے۔

اگر یسوع فقط عام انسان ہوتے تو وہ والدین کی عزت سے متعلق پانچویں حکم کو ایک طرف نہ کر سکتے تھے، اور کبھی بھی زبدی کے بیٹوں کو نہ کہتے کہ وہ اپنے بزرگ باپ کو آپ کی خاطر چھوڑ دیں۔

اُنہوں نے مسیح کے حکم کی تعمیل کی کیونکہ اُنہیں احساس ہو گیا کہ یسوع نے اُنہیں الہٰی حکم دیا تھا جو انتہائی اہم انسانی ذمہ داریوں پر سبقت رکھتا تھا۔ چونکہ آپ نے انسان کو شریعت بخشی تھی، اِس لئے آپ کو اپنی مرضی کے مطابق اُسے استعمال کرنے کا حق حاصل تھا۔

خدا کے دوست ابرہام نے کسدیوں کے اُور میں اپنے آبائی گھر کو الہٰی بلاہٹ کے جواب میں چھوڑا۔ ابرہام نبی خدا پر ایمان لانے کی بدولت بنی اسرائیل کا جد امجد ٹھہرا، اِسی لئے اُسے ایمانداروں کا باپ کہا گیا ہے (نیا عہدنامہ، رومیوں 4: 11)۔ خدا نے اُس سے کہا "زمین کے سب قبیلے تیرے وسیلے سے برکت پائیں گے" (توریت شریف، پیدایش 12: 3)۔

جناب موسیٰ نے بھی الہٰی بلاہٹ کا فرمانبردار ہوتے ہوئے فرعون کے محل، بادشاہ کے لےپالک ہونے، شاہی عیش و آرام، حکمت و دولت اور مصر کی شان و شوکت کو چھوڑ دیا۔ خدا نے موسیٰ نبی کو بلایا کہ وہ بنی اسرائیل کی رہبری کرے، اُنہیں منظم کرے، اور شریعت کو حاصل کرے جو مسیح سے قبل کے نوشتوں اور ہمارے ایمان کی بنیاد ہے۔

اِسی طرح اِن چاروں شاگردوں نے بھی اپنے کام، گھر، عزیز و اقارب کو چھوڑا، اور غریب و فروتن اُستاد یعنی مسیحا کے پیروکار ہو گئے۔ اِن چند شاگردوں اور اِن کے سادہ کمزور ساتھیوں کے ذریعہ ایک نہایت قوی مسیحی کلیسیا وجود میں آئی یعنی ایسا روحانی شاہی نظام جس نے تمام دُنیا کو بدل کر رکھ دیا۔

کتاب مُقدّس میں ہم پڑھتے ہیں کہ خدا نے اپنے خادم داﺅد کو چُنا اور اُسے بھیڑوں کی گلہ بانی کرنے کی بجائے اپنے لوگوں کا چرواہا بنایا۔ اب ہم دیکھتے ہیں کہ مسیح نے اندریاس، پطرس، یعقوب اور یوحنا کو ماہی گیروں میں سے چُنا، اور اُنہیں رسول ہونے کے عظیم مرتبہ تک سرفراز کیا۔

آپ اِن شاگردوں کی زندگیوں میں معجزات کے ظہور کے باعث اُنہیں خادم بنانے کو تھے تا کہ وہ انجیل کی زندہ و پُرنور مثال بنیں۔ جب بھی مسیح نے لوگوں کی بھیڑ میں منادی کی اور اُنہیں تعلیم دی تو آپ کی پہلی ترجیح اپنے اِن چاروں شاگردوں کی تربیت کرنا ہوتی تھی جو مختلف شہروں میں آپ کے پیچھے ہو لئے تھے۔

جن لوگوں نے یسوع کو کفرنحوم کے عبادت خانہ میں کلام کرتے سُنا، وہ حیران ہو گئے کیونکہ اِس سے پیشتر اُنہوں نے جن بڑے بڑے واعظین کو سُنا تھا وہ ماضی کے لوگوں کی باتوں ہی کو دہرایا کرتے تھے۔

اُن واعظین میں حفظ کرنے کی بڑی صلاحیت تھی اور وہ ماضی کے بزرگوں کی باتوں کو یاد رکھنے کےلئے بڑی محنت کرتے تھے اور پھر اُن الفاظ کو لوگوں کے اجتماع کے سامنے پیش کیا کرتے تھے۔ اُن کی شہرت اور ساکھ کا انحصار اِسی بات پر ہوتا تھا۔

لیکن اب لوگوں کے سامنے ایک نئی قسم کا واعظ تھا جو روائتی انسانی تعلیم، فلسفہ یا قدیم خوش بیان مقررین کے اقوال کو خاطر میں نہیں لاتا تھا۔ کسی مشہور ربّی کا اقتباس کرنے کے بجائے یسوع نے کہا "میں تم سے سچ سچ کہتا ہوں ..."۔ جب بھی مسیح نے قدیم تعلیمات کا تذکرہ کیا تو آپ نے اُس پر روشنی ڈالی اور نئی معنٰی کے ساتھ پیش کیا۔ عہدنامہ عتیق کو سمجھانے میں مسیح نے محض شریعت کے الفاظ پر نہیں بلکہ اُس تعلیم کی حقیقی روح پر زور دیا۔

"پھر وہ گلیل کے شہر کفرنحوم کو گیا اور سبت کے دِن اُنہیں تعلیم دے رہا تھا۔ اور لوگ اُس کی تعلیم سے حیران تھے کیونکہ اُس کا کلام اختیار کے ساتھ تھا۔ اور عبادتخانہ میں ایک آدمی تھا جس میں ناپاک دیو کی رُوح تھی ۔ وہ بڑی آواز سے چِلّا اُٹھا کہ اے یسوع ناصری! ہمیں تجھ سے کیا کام؟ کیا تُو ہمیں ہلاک کرنے آیا ہے؟ میں تجھے جانتا ہوں کہ تُو کون ہے۔ خدا کا قدوس ہے۔ یسوع نے اُسے جھڑک کر کہا، چپ رہ اور اُس میں سے نکل جا۔ اِس پر بدرُوح اُسے بیچ میں پٹک کر بغیر ضرر پہنچائے اُس میں سے نکل گئی۔ اور سب حیران ہو کر آپس میں کہنے لگے کہ یہ کیسا کلام ہے؟ کیونکہ وہ اختیار اور قدرت سے ناپاک رُوحوں کو حکم دیتا ہے اور وہ نکل جاتی ہیں۔ اور گرد و نواح میں ہر جگہ اُس کی دھوم مچ گئی۔" (انجیل بمطابق لوقا 4: 31-37)

کفرنحوم میں یسوع سبت کے دِن عبادت خانہ میں گئے۔ وہاں اُس سبت عبادت کےلئے آنے والوں میں ایک بدرُوح گرفتہ شخص بھی تھا۔ جیسے ہی اُس نے یسوع کو دیکھا تو وہ چِلّا اُٹھا: "اے یسوع ناصری! ہمیں تجھ سے کیا کام؟" یہ الفاظ شیطانی نفرت سے پُر ہیں، اور اِس شخص کا صیغہ جمع میں بولنا ظاہر کرتا ہے کہ اُس میں ایک سے زائد بدرُوحیں بول رہی تھیں۔ اِسی طرح یہ سوال کہ "کیا تُو ہمیں ہلاک کرنے آیا ہے؟" اِس بات کا اقرار تھا کہ یسوع بدارواح پر مکمل اختیار رکھتا تھا۔ آخر میں یہ الفاظ کہ "میں تجھے جانتا ہوں کہ تُو کون ہے" ظاہر کرتے ہیں کہ بدارواح روحانی معاملات کے بارے میں انسانوں سے زیادہ جانتی ہیں۔

اِس سے پہلے بھی ابلیس اُس وقت یسوع کی مخالفت کرتے ہوئے آپ کے سامنے آیا تھا جب آپ بیابان میں تنہا تھے۔ بعدازاں اُس نے یسوع پر تب حملہ کیا جب درپردہ رہ کر ناصرة کے لوگوں کو یسوع کے قتل پر اُبھارا۔ اور اب وہ اِس قدوس معلم کی مخالفت میں کُھلے عام سامنے آ گیا۔ جب یسوع راہِ نجات کی وضاحت کرتے ہوئے لوگوں کو خدا کی بادشاہی کی نزدیکی کے بارے میں بتا رہے تھے اور اُس میں داخل ہونے کی شرائط کی وضاحت کر رہے تھے تو ابلیس سے خاموش نہ رہا جا سکا۔ ابلیس جانتا تھا کہ یسوع اُس کے خلاف نبرد آزما تھا اور اُس کے کاموں اور ناراست بادشاہی کو تباہ و برباد کرنے آیا تھا۔ اب جبکہ مسیح ابلیس کے سر کو کچلنے کو تھا (دیکھئے توریت شریف، کتاب پیدایش 3: 15) تو ایسی صورتحال میں بھلا ابلیس کیسے خاموش رہ سکتا تھا؟

شاید ہمیں ابلیس کے اعلانیہ یہ کہنے پر حیرت ہو کہ یسوع "خدا کا قدوس ہے"۔ جب جناب مسیح اُس شخص سے بُری رُوح کو نکالنے کو تھے تو یہ ضرور ہی مسیح کے اختیار کا پہلا پُرقدرت نتیجہ تھا۔ دشمن ابلیس کی یسوع کے حق میں اِس طرح کی گواہی دُگنی اہمیت کی حامل تھی اور یسوع چاہتے تھے کہ لوگ دیکھ لیں کہ ابلیس بھی آپ کی جلالی حیثیت کی گواہی دے رہا تھا۔ مسیح کی بابت ابلیس کی جانب سے یہ پہلی اعلانیہ تصدیق تھی مگر یہ آخری نہ تھی۔ جیسے ہی اِس بدرُوح گرفتہ شخص نے کُھلے عام واضح گواہی دی تو یسوع نے اُسے جھڑکتے ہوئے کہا "چپ رہ اور اُس میں سے نکل جا۔" ساری بھیڑ منتظر تھی کہ مسیح کے اِس حکم کے نتیجہ میں کیا رونما ہو گا۔ تب بدرُوح اُس شخص کو بیچ میں پٹک کر بغیر ضرر پہنچائے اُس میں سے نکل گئی۔ سب دیکھنے والوں نے تعجب کیا اور ایک دوسرے سے پوچھنے لگے کہ ہمارے بیچ ایسا اعلیٰ کام کرنے والا قابل شخص کون ہے؟ اِن معجزات کے ہمراہ یہ نئی تعلیم کیسی ہے؟ اِس بڑھئی کے بیٹے کو یہ قدرت و اختیار کہاں سے ملا کہ بدرُوحیں بھی اِس کا حکم مانتی ہیں؟

قانائے گلیل میں اپنے پہلے معجزہ میں جب یسوع نے پانی کو مے میں تبدیل کیا تو آپ نے فطرت کے قوانین پر اپنے اختیار کو ظاہر کیا۔ بعدازاں قانائے گلیل میں جب یسوع نے بادشاہ کے دربار میں اعلیٰ مرتبہ رکھنے والا شخص کے بیٹے کو شفا دے کر دوسرا معجزہ کیا تو بیماری پر اپنی قوت و قدرت کو ظاہر کیا۔ اور پھر اِس تیسرے معجزہ میں یسوع نے شیطانی قوتوں کے خلاف اپنی برتر قوت و قدرت کا مظاہرہ کیا۔ مسیح کی خدمت کے آغاز ہی میں اِن تین معجزوں نے ثابت کیا کہ وہ اپنی ذات میں ہر طرح سے انسانیت کےلئے نجات دہندہ ہونے کے قابل تھا۔

اِس عظیم معجزہ کی خبر اُس تمام علاقہ اور اِردگرد کی تمام جگہوں میں پھیل گئی۔ داﺅد کے گھرانے کے شہزادہ اور اِس دُنیا کے سردار یعنی ابلیس کے درمیان زبردست جنگ ہوئی تھی جس میں ابلیس کو شکست و ندامت کا منہ دیکھنا پڑا۔ مسیح کی بابت سب گرد و نواح کے لوگوں کو پتا چل گیا۔ بیابان میں یسوع نے ابلیس کو جھوٹا ثابت کیا، جبکہ کفرنحوم میں آپ نے دوسروں کی زندگیوں میں اُسے مغلوب کیا۔ اپنے قدرت بھرے کاموں کی بدولت مسیح نے اپنے نئے شاگردوں، گلیل کے باشندوں، مستقبل کی آنے والی نسلوں کے لوگوں اور یہاں تک کہ ابلیس کو بھی یہ دکھایا کہ وہ بطور ابنِ آدم اپنی زندگی میں اور ساتھ ہی ساتھ دوسروں کی زندگیوں میں بھی ابلیس پر فتح پانے کے قابل ہے۔

ہم بدرُوح گرفتگی کی حالت کی وضاحت کئے بغیر اِس معجزہ پر بات چیت کو ختم نہیں کر سکتے، کیونکہ ایسی حالت کا ذِکر ہمیں مسیح کے خدمت کے دوران اور اُس کے بعد کئی بار مختلف لوگوں کے تعلق سے ملتا ہے۔ یوں لگتا ہے کہ یسوع کی خدمت کے دوران ابلیس نے ہماری دُنیا میں اپنے کاموں کو کئی گنا زیادہ بڑھا دیا تھا، گویا کہ ایسا کرنا اُس کے نزدیک انتہائی اہم ترین تھا۔ وہ تمام انسانیت پر پہلے کی نسبت کہیں زیادہ تسلط قائم کرنا چاہتا تھا۔ خدا نے ایسا ہونے دیا تا کہ مسیح کی فتح کی عظمت اور اُس کے نتائج قدرت کے ساتھ بکثرت ظاہر ہوتے۔ ابلیس انسان میں اُس کے ذہن کی قوت سے بخوبی واقف تھا۔ اِس لئے مجنونیت (پاگل پن) اُس کے اختیار کا حصہ بن گئی جو وہ انسانیت پر رکھتا تھا۔ بسااوقات ایک بیمار شخص کو مخبوط الحواس سمجھا جاتا تھا۔ کیا انجیل مُقدّس میں جس حالت کو "بدرُوح گرفتگی" کہا گیا ہے وہی کیفیت ہے جسے آج کل پاگل پن کہا جاتا ہے؟ ایسی وضاحت تبھی ممکن ہو سکتی تھی کہ اگر مسیح مذہبی فریب یا وہم پرستی کی جانب مائل ہوتے۔ تاہم، جب مسیح اُس بیمار شخص کے بجائے اُس پر قبضہ کرنے والی بدرُوح سے یہ کہتے ہوئے مخاطب ہوئے کہ "چپ رہ، اور اُس میں سے نکل جا" تو ہم جانتے ہیں کہ یہ ویسا پاگل پن کا معاملہ نہیں تھا جس سے آج ہم واقف ہیں۔ علاوہ ازیں، اگر بدرُوح گرفتہ شخص صرف پاگل ہی ہوتا تو وہ یسوع کی بابت ایسی حیران کن بات نہ کرتا جسے کوئی بھی اُس وقت نہ سمجھتا تھا۔ مزید برآں، اگر مسیح نے صرف دماغی امراض سے شفا دی ہوتی تو پھر ایسی شفا میں کسی بھی قسم کا تشنج یا تکلیف دہ دورہ موجود نہ ہوتا جو عموماً بدرُوح گرفتہ شخص میں سے بدرُوح نکالتے وقت ہوتا تھا۔ مسیح اور اُس کے شاگردوں نے بیماریوں سے شفا دینے کے علاوہ بدارواح کو نکالنے کے خصوصی کام کو بھی سرانجام دیا۔ مندرجہ بالا بیانات کی بنیاد پر ہم کہہ سکتے ہیں کہ وہ تکلیف جسے انجیل مُقدّس میں بدرُوح گرفتگی کہا گیا ہے اُسے ایک عام ذہنی بیماری تصور نہیں کیا جا سکتا۔

"پھر وہ عبادتخانہ سے اُٹھ کر شمعون کے گھر میں داخل ہوا، اور شمعون کی ساس کو بڑی تپ چڑھی ہوئی تھی اور اُنہوں نے اُس کےلئے اُس سے عرض کی۔ وہ کھڑا ہو کر اُس کی طرف جُھکا اور تپ کو جِھڑکا تو اُتر گئی اور وہ اُسی دم اُٹھ کر اُن کی خدمت کرنے لگی۔ اور سورج کے ڈوبتے وقت وہ سب لوگ جن کے ہاں طرح طرح کی بیماریوں کے مریض تھے اُنہیں اُس کے پاس لائے اور اُس نے اُن میں سے ہر ایک پر ہاتھ رکھ کر اُنہیں اچھا کیا۔ اور بدرُوحیں بھی چِلّا کر اور یہ کہہ کر کہ تُو خدا کا بیٹا ہے بہتوں میں سے نکل گئیں اور وہ اُنہیں جِھڑکتا اور بولنے نہ دیتا تھا کیونکہ وہ جانتی تھیں کہ یہ مسیح ہے۔" (انجیل بمطابق لوقا 4: 38-41)

مسیح اور اُس کے ساتھی پطرس کے گھر گئے، غالباً یا تو مسیح کا وہاں قیام تھا یا پھر پطرس نے شاگرد اور آدم گیر بننے کی شکرگزاری کرتے ہوئے ضیافت میں آپ کو وہاں مدعو کیا تھا۔ ممکن ہے کہ پطرس نے بھی اپنے اُستاد سے اِس بات کی توقع کی ہو کہ وہ اُس کے گھر میں ویسا ہی شفا بخشنے والا معجزہ کرے گا جیسے اُس نے بادشاہ کے افسر کے گھر میں کیا تھا۔ پطرس کی ساس تیز بخار میں مبتلا تھی۔ یوں لگتا ہے کہ پطرس نے اپنی ساس کی شفا کےلئے یسوع کو کہنا مناسب نہ جانا۔ مگر دوسروں نے پطرس کے دِل کی بات مسیح کو بتائی تو آپ نے بخار کو جھڑکا اور وہ شفایاب ہو گئی۔ ہمیں اُن الفاظ کا علم نہیں جو مسیح نے بخار کو جھڑکتے وقت استعمال کئے، لیکن ہم یہ ضرور پڑھتے ہیں کہ مسیح نے اُس کا ہاتھ پکڑ کر اُسے اُٹھایا اور بخار جاتا رہا۔ اِس کے بعد وہ اُٹھی اور اُن کی خدمت کرنے لگی۔ یہ ایک دوہرا معجزہ تھا۔ بخار کے سبب عموماً جو کمزوری پیدا ہو جاتی ہے وہ بخار کے ساتھ فوراً ہی جاتی رہی، اور وہ اِس قابل ہوئی کہ یکدم خدمت کرنا شروع کر دی۔ مسیح کے خدمت کے آغاز کے بعد یہ پہلی خاتون ہے جس کے بارے میں تحریری طور پر لکھا ہوا ہے کہ اُس نے مسیح کی خدمت کےلئے اپنے آپ کو رضاکارانہ طور پر پیش کیا۔

اِس شفایابی کی خبر سارے علاقے میں پھیل گئی۔ یہ معجزہ بدرُوح گرفتہ شخص کی شفا کے بعد وقوع پذیر ہوا۔ اُس علاقے کے تمام بیمار لوگ سبت (ہفتہ کے دِن) کی شام کو پطرس کے گھر پر جمع ہوئے۔ سبت کو پاک ماننے کے حکم کا لحاظ رکھتے ہوئے اُنہوں نے شام تک انتظار کیا۔ ایسا معلوم ہوتا ہے کہ اُس وقت کفرنحوم میں کوئی بھی بیمار نہ رہا۔ سب نے ہر قسم کی بیماری سے شفا پائی۔

مُقدّس لوقا بدرُوح گرفتہ افراد کی بابت زیادہ توجہ دیتا ہے۔ وہ لکھتا ہے کہ بہتوں میں سے بدرُوحیں یہ چِلّاتے ہوئے نکل گئیں کہ "تُو خدا کا بیٹا ہے"۔ یسوع نے بیماروں پر تو اپنے ہاتھ رکھے مگر بدرُوح گرفتہ افراد کے ساتھ ایسا نہ کیا۔ بدرُوحوں کو مسیح نے اپنے کلام کی قدرت سے باہر نکالا۔ عبادت خانہ میں مسیح نے بدرُوح سے کہا "چپ رہ"، مگر اِس سے پہلے یہ بدرُوح اقرار کر چکی تھی کہ مسیح خدا کا قدوس ہے۔ شام کے وقت مسیح کی بابت بدارواح کی گواہی اَور بھی زیادہ واضح اور قوی تھی۔ وہ چِلّا رہی تھیں کہ "تُو خدا کا بیٹا ہے۔" ایک بار پھر یسوع نے بدرُوحوں کو جھڑکا اور بولنے نہ دیا کیونکہ وہ جانتی تھیں کہ وہ مسیح تھا۔ ایسا نہیں تھا کہ بدرُوحیں ایک عام شخص کی تعریف کر رہی تھیں جو اُنہیں باہر نکال رہا تھا، بلکہ یسوع کے پاس تو الہٰی اختیار تھا۔ ایک فرد یقیناً شہر کے لوگوں کی بابت افسوس کا اظہار کرے گا جنہوں نے یسوع کو مسیح، خدا کا بیٹا اور قدوس نہ کہا۔ جو شفایاب ہوئے تھے اُنہیں نجات دہندہ کی بابت واضح گواہی دینے میں پہل کرنی چاہئے تھی۔

شفا دینے والے مسیحا کی یہ کتنی حیرت انگیز تصویر ہے! وہ شام کے شروع میں پطرس کے گھر کے دروازے پر کھڑا تھا اور ہر اُس بیمار شخص کو چھونے کےلئے اپنے ہاتھ کو بڑھائے ہوئے تھا جو اُس کے پاس آیا، اور یوں اُس نے اُن غریب لوگوں کے رنج میں اُن کے ساتھ اپنی ہمدردی کا ثبوت دیا۔ آپ نے شفا دینے کی اپنی قوت کا اظہار کیا اور آپ کے ہاتھوں نے اُن کی ضرورت کے مطابق اُنہیں بحالی عطا کی۔ ایسا کر کے مسیح نے سمجھنے والوں پر یہ عیاں کر دیا کہ رُوحانی امراض سے بھی شفا مل سکتی ہے۔ آپ نے ثابت کر دکھایا کہ آپ کو جسمانی و رُوحانی دونوں طرح کی بیماریوں سے شفا دینے کی قدرت حاصل تھی، اور اُنہیں صرف اُس کے حضور شفا کی درخواست ہی کرنی تھی۔ یسعیاہ نبی نے مسیح کے حق میں برحق پیشین گوئی کی تھی کہ "اُس نے ہماری مشقتیں اُٹھا لیں اور ہمارے غموں کو برداشت کیا" (یسعیاہ 53: 4)۔

یہ یسوع کی طویل شفا دینے والی خدمت کا آغاز تھا۔ اپنے تمام کئے گئے شفا کے معجزات میں سب سے پہلے یسوع نے بیماری اور گناہ کے درمیان تعلق پر نگاہ کی، کیونکہ اکثر یہ ایک دوسرے سے منسلک ہوتے ہیں۔ بیماری جسم میں خرابی اور خدا کے اصل بھلے مقصد کا بگاڑ ہے، جبکہ گناہ رُوح میں انسانی خرابی کا نام ہے۔ مسیح کا مقصد انسانی رُوحوں کو مرضِ گناہ سے بچانے کےلئے اپنی رضا و قابلیت کو ظاہر کرنا تھا، کیونکہ آپ "اپنے لوگوں کو اُن کے گناہوں سے نجات دینے کےلئے" آئے تھے (انجیل بمطابق متی 1: 21)۔ آپ آسمان سے خدا کے برہ کی صورت میں اِس دُنیا کا گناہ اُٹھانے کی غرض سے زمین پر ظاہر ہوئے تا کہ آپ اُن سب کو جو آپ پر ایمان لائیں اُنہیں اُن کے گناہوں سے معافی بخشیں۔ چونکہ تمام بیماری گناہ کا نتیجہ ہے، اِس لئے گناہ سے جنگ کرنے والے مسیحا کےلئے ضروری ہوا کہ وہ گناہ کے نتائج سے بھی لڑتا، اور جب وہ مسئلہ کی جڑ تک پہنچا تو اُس نے اُس کے مختلف پہلوﺅں کو نظرانداز نہ کیا۔ مسیح کو علم تھا کہ لوگوں کو کسی ایسی چیز کی ضرورت تھی جس سے اُن میں رُوحانی شفا کی ضرورت کی آرزو بیدار ہو جاتی۔ گناہ انسان کو رُوحانی اعتبار سے مُردہ کر دیتا ہے، اِس لئے یسوع نے لوگوں کو جسمانی شفا کے ذریعے بیدار کرنا چاہا۔

وہ سب راستباز جن میں مسیح کا رُوح ہے اُنہیں انسانیت کو اُس کے مصائب سے چھٹکارا دلانے کی تشویش لاحق رہتی ہے جن میں سے بیماری سب سے بڑی مصیبت ہے۔ یہ خدا کا رُوح القدس ہے جو مسیحی ڈاکٹروں کو اپنی رقم، وقت اور زندگی بیماروں کی خدمت میں صرف کرنے کی طرف لے کر آتا ہے۔ اُن کے نزدیک جسمانی بیماری کے خلاف جنگ بھی اُتنی ہی ضروری ہوتی ہے جتنی گناہ کے خلاف محاذ آرائی، اور انسان کی رُوحانی فلاح میں دلچسپی کے ساتھ ساتھ اُن کے نزدیک جسمانی بدنوں کی دیکھ بھال کرنا بھی اُتنا ہی اہم ہوتا ہے۔ مسیح کے پاک رُوح نے مسیحیوں کو مختلف قسم کے ہسپتال اور یتیم خانے چلانے کی تحریک بخشی، جس کے نتیجے میں ایسے ادارے قائم ہوئے جو یسوع کے زمین پر آنے سے پیشتر اِس دُنیا میں موجود نہیں تھے۔ جہاں جہاں بھی مسیحیت پھیلی ہے، وہاں انسانی ہمدردی کے ایسے خیراتی ادارے دیکھنے کو ضرور ملتے ہیں۔

اگر آپ نے اِس کتاب "سیرت المسیح، حصّہ 2، مسیح کی آزمایش اور خدمت کی ابتدا" کا گہرائی سے مطالعہ کر لیا ہے، تو ہم اُمید کرتے ہیں کہ اَب آپ آسانی سے مندرجہ ذیل سوالات کے درست جوابات دینے کے قابل ہوں گے۔ آپ اپنے جوابات ہمیں روانہ کریں، اور اُن کے ساتھ اپنا مکمل نام اور پتہ واضح طور پر لکھیں۔